Baaghi TV

Category: جرائم و حادثات

  • گوجرہ خون میں نہا گیا! پرانی دشمنی پر فائرنگ سے 2 افراد قتل، غیرت کے نام پر باپ نے بیٹی کو بھی مار ڈالا

    گوجرہ خون میں نہا گیا! پرانی دشمنی پر فائرنگ سے 2 افراد قتل، غیرت کے نام پر باپ نے بیٹی کو بھی مار ڈالا

    گوجرہ(باغی ٹی وی،نامہ نگارعبدالرحمن جٹ کی رپورٹ)گوجرہ میں دو الگ الگ واقعات میں 3 افراد کو قتل کر دیا گیا ہے۔ پہلے واقعہ میں دشمنی کی بنا پر دو افراد کو فائرنگ کرکے قتل کیا گیا جبکہ دوسرے واقعہ میں ایک باپ نے غیرت کے نام پر اپنی بیٹی کو گولی مار کر ہلاک کر دیا ہے۔

    چک نمبر 303 ج ب کٹھور کا رہائشی توصیف امجد اپنے رشتہ دار حسن کے ہمراہ ایک مقدمے میں تاریخ پیشی پر مقامی عدالت آ رہا تھا کہ جھنگ روڈ پر اس کے مخالفین رفیع اور دیگر نے موٹر سائیکلوں پر سوار ہو کر اندھا دھند فائرنگ کر دی۔

    فائرنگ کے نتیجے میں توصیف امجد (عمر 50 سال)، حسن (عمر 30 سال) اور ایک راہ گیر گلزار احمد سکنہ چک نمبر 300 ج ب شدید زخمی ہو گئے۔
    توصیف امجد موقع پر ہی دم توڑ گیاجبکہ حسن تحصیل ہیڈ کوارٹر ہسپتال میں زخموں کی تاب نہ لاتے ہوئے چل بساجبکہ زخمی راہ گیر گلزار احمد کو ابتدائی طبی امداد کے بعد مخدوش حالت کے پیش نظر الائیڈ ہسپتال فیصل آباد ریفر کر دیا گیا ہے۔

    واضح رہے کہ یہ قتل چند ماہ قبل مقتول توصیف امجد کے بھتیجے عبدالرحمن کے ہاتھوں رفیع کے بیٹے سعد کے قتل کا شاخسانہ ہے۔تھانہ سٹی پولیس نے نعشیں تحویل میں لے کر ہسپتال منتقل کر دیں اور ملزمان کی تلاش شروع کر دی ہے۔

    دوسرا واقعہ تھانہ صدر گوجرہ کے نواحی گاؤں چک نمبر 418 ج ب میں ایک اور اندوہناک واقعہ پیش آیا جہاں غیرت کے نام پر ایک باپ نے اپنی بیٹی کو قتل کر دیا۔

    گاؤں ک چک نمبر 418 ج بے رہائشی محمد ماجد اقبال نے اپنی 23 سالہ بیٹی مسمات ام البنین کو فائرنگ کر کے قتل کر دیا اور موقع سے فرار ہونے میں کامیاب ہو گیا۔

    قتل کی وجہ یہ بتائی جاتی ہے کہ مقتولہ چند دن قبل گاؤں کے ایک لڑکے کے ساتھ بھاگ گئی تھی۔ مقامی پولیس نے لڑکی کو برآمد کر کے عدالت میں پیش کیا تھا جہاں دوشیزہ کے بیان پر اسے ورثاء کے حوالے کر دیا گیا تھا۔ باپ نے اسی رنج کی بنا پر بیٹی کو قتل کر دیا۔

    مقامی پولیس نے تفتیش شروع کر دی ہے اور ملزم کی گرفتاری کے لیے چھاپے مارے جا رہے ہیں۔

  • گھوٹکی پولیس کی شاندار کارروائی، چوری شدہ موٹر سائیکل اور بھینس برآمد کرکے مالکان کے حوالے

    گھوٹکی پولیس کی شاندار کارروائی، چوری شدہ موٹر سائیکل اور بھینس برآمد کرکے مالکان کے حوالے

    میرپورماتھیلو(باغی ٹی وی ،نامہ نگارمشتاق علی لغاری) ایس ایس پی گھوٹکی محمد انور کھیتران کی خصوصی ہدایت پر گھوٹکی پولیس نے جرائم پیشہ عناصر کے خلاف کارروائیاں تیز کر دی ہیں۔ ان کارروائیوں کے نتیجے میں تھانہ جروار پولیس نے چوری شدہ موٹر سائیکل اور ایک بھینس برآمد کرنے میں کامیابی حاصل کی ہے۔

    تفصیلات کے مطابق ایس ایچ او جروار صفدر عباس پھلپوٹو کی زیرِ نگرانی پولیس نے دو اہم کارروائیاں کرتے ہوئے وہ مسروقہ موٹر سائیکل برآمد کر لی جو کچھ دن قبل عاشق حسین گبول سے نامعلوم چور چوری کر کے لے گئے تھے۔

    دوسری کارروائی میں پولیس نے گزشتہ رات چوری ہونے والی عبدالغفور گبول کی ایک بھینس بھی برآمد کر لی۔ مالکان نے ان وارداتوں کی بروقت اطلاع تھانہ جروار کو دی تھی۔

    پولیس نے قانونی کارروائی مکمل کرنے کے بعد چوری شدہ موٹر سائیکل اور بھینس اصل مالکان کے حوالے کر دی ہیں۔ مسروقہ مال واپس ملنے پر مالکان نے ایس ایچ او جروار صفدر عباس پھلپوٹو کا تہہ دل سے شکریہ ادا کیا۔

    ایس ایس پی گھوٹکی محمد انور کھیتران نے پولیس پارٹی کی اس بہترین کارکردگی پر انہیں شاباشی کا پیغام بھیجا ہے۔

  • ننکانہ صاحب: ڈی ایچ کیو ہسپتال،لیبر روم میں جعلی رپورٹس کا بڑا سکینڈل بے نقاب، ملازمہ کوصرف شوکاز نوٹس

    ننکانہ صاحب: ڈی ایچ کیو ہسپتال،لیبر روم میں جعلی رپورٹس کا بڑا سکینڈل بے نقاب، ملازمہ کوصرف شوکاز نوٹس

    ننکانہ صاحب(باغی ٹی وی ،نامہ نگار احسان اللہ ایاز ) ڈسٹرکٹ ہیڈ کوارٹر (ڈی ایچ کیو) ہسپتال ننکانہ صاحب کے لیبر روم میں ذاتی لالچ کی خاطر مبینہ طور پر جعلی طبی رپورٹس تیار کرنے کا سنگین سکینڈل سامنے آیا ہے، جس سے مریضوں کی جانوں کو خطرہ لاحق ہو گیا تھا۔

    اس سنگین انکشاف کے بعد میڈیکل سپرنٹنڈنٹ (ایم ایس) ڈاکٹر اطہر فرید نے فوری کارروائی کرتے ہوئے لیبر روم میں تعینات درجہ دوم کی ملازمہ فروا عباس کو باضابطہ شوکاز نوٹس (لیٹر نمبر 13535) جاری کر دیا ہے۔

    مراسلے کے مطابق ملازمہ پر یہ سنگین الزام عائد کیا گیا ہے کہ اس نے لیبر روم سے متعلق اہم طبی رپورٹس میں رد و بدل کیا اور جعلی رپورٹس تیار کیں۔ ایم ایس نے واضح کیا ہے کہ یہ بے ضابطہ اقدام نہ صرف مریضوں کی صحت کے لیے انتہائی خطرناک ہے بلکہ ہسپتال کے تشخیصی اور علاج کے عمل کے اعتماد کو بھی شدید نقصان پہنچا سکتا ہے اور یہ پیشہ ورانہ غفلت اور بدعنوانی (Misconduct) کے زمرے میں آتا ہے۔

    نوٹس میں پنجاب ایمپلائز ایفیشنسی، ڈسپلن اینڈ اکاؤنٹیبلٹی ایکٹ 2006 کا حوالہ دیتے ہوئے کہا گیا ہے کہ معاملے کی سنگینی کے پیش نظر باقاعدہ انکوائری کی ضرورت نہیں اور براہ راست کارروائی کی جا سکتی ہے۔ فروا عباس کو حکم دیا گیا ہے کہ وہ سات روز کے اندر اپنا تحریری جواب جمع کرائیں، بصورت دیگر محکمانہ کارروائی اور ممکنہ سزاؤں کا سامنا کرنا پڑے گا۔

    ذرائع کے مطابق اس انکشاف نے ہسپتال انتظامیہ میں تشویش کی لہر دوڑا دی ہے اور مطالبہ کیا گیا ہے کہ اس کی بڑے پیمانے پر انکوائری کی جائے تاکہ تمام حقائق سامنے آ سکیں۔

  • اوچ شریف: آئل ٹینکر اور خالی ٹرک میں ٹکر، ڈرائیور شدید زخمی

    اوچ شریف: آئل ٹینکر اور خالی ٹرک میں ٹکر، ڈرائیور شدید زخمی

    اوچ شریف(باغی ٹی وی،نامہ نگارحبیب خان) آئل ٹینکر اور خالی ٹرک میں ٹکر، ڈرائیور شدید زخمی،ریسکیو 1122 کی بروقت کارروائی

    تفصیلات کے مطابق ریسکیو 1122 کنٹرول روم بہاولپور کے مطابق آج صبح 02:15 بجے ہیڈ پنج نند پٹرولنگ چیک پوسٹ کے قریب خوفناک ٹریفک حادثہ پیش آیا، جس میں آئل ٹینکر اور خالی ٹرک میں ٹکر کے نتیجے میں ایک شخص زخمی ہو گیا۔

    مظفرگڑھ سے اوچ کی جانب جانے والا آئل ٹینکر، جس میں 15 ہزار لیٹر پٹرول موجود تھا، سڑک پر کھڑے ایک خالی ٹرک کے پچھلے حصے سے ٹکرا گیا۔ حادثے کے باعث ٹینکر کا ڈرائیور زخمی ہو گیا۔
    ریسکیو 1122 کی دو ایمبولینسز،ای سی 385783 (علی پور)ای سی 782664 (اوچ شریف)حادثہ کی کال موصول ہوتے ہی روانہ ہوئیں جبکہ ریسپانس ٹائم 16 منٹ رہا۔

    ریسکیو اہلکاروں نے موقع پر پہنچ کر زخمی ڈرائیور عبدالرحمن ولد محمد رفیق، عمر 42 سال ساکن جھگی والا، تحصیل علی پور، ضلع مظفرگڑھ کو ابتدائی طبی امداد فراہم کی۔ زخمی کے دائیں پاؤں کی ٹِبیا میں کلوز فریکچر جبکہ بائیں پاؤں میں اوپن فریکچر کی تصدیق ہوئی۔ مریض کو حالت کے پیشِ نظر آر ایچ سی اوچ شریف منتقل کر دیا گیا۔

    آئل ٹینکر میں بڑی مقدار میں پٹرول موجود ہونے کے باعث ریسکیو ٹیم نے علاقہ کارڈن آف کر دیا جبکہ کسی بھی ممکنہ خطرے کے پیش نظر احمد پور سے بی ایف-06 فائر وہیکل کو موقع پر الرٹ رکھا گیا۔ پٹرولنگ پولیس بھی جائے حادثہ پر موجود رہی۔

    ریسکیو حکام نے شہریوں سے اپیل کی ہے کہ حادثات کی صورت میں ہجوم سے گریز کریں اور ریسکیو عملے کے ساتھ تعاون کو یقینی بنائیں۔

  • اوکاڑہ: ناپ تول کی خلاف ورزیاں، کنڈے ضبط،3 پیٹرول پمپس سیل

    اوکاڑہ: ناپ تول کی خلاف ورزیاں، کنڈے ضبط،3 پیٹرول پمپس سیل

    اوکاڑہ (نامہ نگار ملک ظفر) ڈائریکٹر جنرل انڈسٹریز پنجاب ذیشان شبیر رانا کی خصوصی ہدایت پر ضلع اوکاڑہ میں ناپ تول کے پیمانوں کی چیکنگ کا سلسلہ تیزی سے جاری ہے۔ اس سلسلے میں ڈسٹرکٹ آفیسر انڈسٹریز خالد جاوید بھٹی نے اپنی ٹیم کے ہمراہ مختلف پیٹرول پمپس، شوگر ملز، کریانہ اسٹورز اور دیگر کاروباری مراکز کا تفصیلی معائنہ کیا۔

    کارروائی کے دوران متعدد دکانداروں کے کم پیمانہ ثابت ہونے پر کنڈے ضبط کر لیے گئے جبکہ ان کے خلاف چالان تیار کرکے عدالت بھجوا دیے گئے۔ اسی طرح ناپ تول میں خرابی اور پیمانہ پورا نہ ہونے پر تین پیٹرول پمپس کے نوزلز موقع پر سیل کر دیے گئے اور ان کے چالان بھی معزز عدالت میں جمع کرا دیے گئے۔

    ڈی او انڈسٹریز خالد جاوید بھٹی نے کہا کہ عوام کو درست اور معیاری ناپ تول فراہم کرنا حکومت پنجاب کی اولین ترجیح ہے۔ انہوں نے تمام کاروباری حضرات کو سخت تنبیہ کی کہ وہ صرف منظور شدہ، درست اور قانونی اوزان و پیمائش کے آلات استعمال کریں، ورنہ ان کے خلاف سخت قانونی کارروائی عمل میں لائی جائے گی۔

  • سیالکوٹ: 13 سالہ بچی اغوا،افغانستان منتقل، 50 لاکھ تاوان طلب

    سیالکوٹ: 13 سالہ بچی اغوا،افغانستان منتقل، 50 لاکھ تاوان طلب

    سیالکوٹ (باغی ٹی وی ،ڈسٹرکٹ رپورٹرمدثررتو کی رپورٹ)13 سالہ بچی اغوا کرکے افغانستان منتقل، 50 لاکھ تاوان طلب،نامزد ملزمان کی رہائی پر سوالات، والد کا وزیراعلیٰ پنجاب سے نوٹس لینے کا مطالبہ

    تفصیلات کے مطابق سیالکوٹ میں 13 سالہ کم سن بچی کو اغوا کرکے افغانستان منتقل کر دیا گیا، جہاں سے اغوا کاروں نے 50 لاکھ روپے تاوان کا مطالبہ کر دیا۔ والد کی مدعیت میں درج مقدمے نے نیا رخ اختیار کر لیا ہے جبکہ 22 روز گزرنے کے باوجود مغویہ بازیاب نہیں ہو سکی۔

    تفصیلات کے مطابق عبدالحق نامی شخص نے اپنی 13 سالہ بیٹی ثمینہ کے اغوا کا مقدمہ تھانہ کوتوالی میں درج کروایا تھا۔ مقدمہ درج ہونے کے بعد سامنے آنے والی معلومات کے مطابق بچی کو سرحد پار افغانستان منتقل کر دیا گیا ہے، جہاں سے اغوا کاروں نے رابطہ کرکے 50 لاکھ روپے تاوان کا مطالبہ کیا ہے۔

    متاثرہ والد کا کہنا ہے کہ پولیس تعاون نہیں کر رہی اور نامزد ملزمان کو پکڑ کر دوبارہ چھوڑ دیا گیا ہے۔ ان کے مطابق پولیس کی اس مبینہ غفلت نے بچی کی بازیابی کو مزید مشکل بنا دیا ہے۔ عبدالحق نے وزیراعلیٰ پنجاب سے فوری نوٹس لینے اور بچی کو واپس لانے کے لیے خصوصی اقدامات کرنے کی اپیل کی ہے۔

    ایس ایچ او کوتوالی الطاف گھمن کا کہنا ہے کہ مغویہ کی بازیابی کے لیے ’’ییلو وارنٹ‘‘ جاری کروائے جا رہے ہیں اور افغانستان انٹرپول سے بھی رابطہ کیا جائے گا۔ دوسری جانب ترجمان پولیس سیالکوٹ کا کہنا ہے کہ واقعے کی تحقیقات جاری ہیں، بچی کی بازیابی کے لیے ہر ممکن کوشش کی جا رہی ہے اور جلد اہم پیش رفت متوقع ہے۔ ترجمان کے مطابق ڈی پی او فیصل شہزاد نے بھی واقعے کی رپورٹ طلب کر لی ہے۔

  • ملتان: ثانیہ زہرا قتل کیس کا فیصلہ، شوہر کو سزائے موت

    ملتان: ثانیہ زہرا قتل کیس کا فیصلہ، شوہر کو سزائے موت

    ملتان کی ایڈیشنل ڈسٹرکٹ اینڈ سیشن عدالت نے ثانیہ زہرا قتل کیس کا فیصلہ سناتے ہوئے مقتولہ کے شوہر علی رضا کو سزائے موت سنادی۔

    کیس میں شوہر علی رضا، ساس عذرا پروین، دیور علی حیدر سمیت 6 افراد کو نامزد کیا گیا تھا۔ عدالت نے جرم ثابت ہونے پر علی رضا کو دفعہ 302 کے تحت سزائے موت، جبکہ ساس عذرا پروین اور دیور علی حیدر کو عمر قید اور 5 لاکھ روپے جرمانہ عائد کردیا۔ کیس میں نامزد 3 ملزمان کو بری کردیا گیا۔فیصلے کے بعد مقتولہ کے والد اسد عباس شاہ نے میڈیا سے گفتگو کرتے ہوئے کہا کہ وہ اپنی بیٹی کے لیے اکیلے جدوجہد کرتے رہے، آج انصاف کی جیت ہوئی ہے۔

    ان کا کہنا تھا کہ اس فیصلے کے بعد کوئی بھی آئندہ کسی بیٹی کی جان لینے کی جرأت نہیں کرے گا۔واضح رہے کہ ثانیہ زہرا کو گزشتہ سال اس کے شوہر نے قتل کردیا تھا

    علیمہ خان پولیس تحویل میں، پی ٹی آئی کارکنان سے جھڑپ

    عالمی انٹرنیٹ خرابی، پی ٹی اے کا وضاحتی بیان جاری

  • صادق آباد: چوروں کی تلاش کرنے والی نجی ٹیم خود اغوا

    صادق آباد: چوروں کی تلاش کرنے والی نجی ٹیم خود اغوا

    صادق آباد میں چوروں کا سراغ لگانے کے لیے کام کرنے والی ایک نجی کھوجی ٹیم خود ڈاکوؤں کے ہاتھوں اغوا ہوگئی۔

    میڈیا رپورٹس کے مطابق کھوجی کتوں کے ساتھ چوروں کی تلاش میں جانے والے افراد کو ڈاکو اٹھا کر کشمور کے کچے میں لے گئے۔پولیس کے مطابق یہ ٹیم پانچ روز قبل اوباڑو (سندھ) سے اپنے کتوں سمیت اغوا ہوئی تھی اور اب تک لاپتا ہے۔رحیم یار خان، کشمور اور گھوٹکی پولیس مشترکہ طور پر چاروں مغویوں کی تلاش میں مصروف ہے، جبکہ مقدمہ صادق آباد تھانے میں درج کر لیا گیا ہے

    پنجاب حکومت کی کارروائی: ٹی ایل پی کے اربوں کے اثاثے منجمد

    کراچی:خواتین کے ساتھ زیادتی اور موبائل ہیکنگ کرنے والا ملزم گرفتار

    سعودی ولی عہد کا امریکا کا دورہ ،ٹرمپ کا استقبال

  • کراچی:خواتین کے ساتھ زیادتی اور موبائل ہیکنگ کرنے والا ملزم گرفتار

    کراچی:خواتین کے ساتھ زیادتی اور موبائل ہیکنگ کرنے والا ملزم گرفتار

    کراچی پولیس نے اولڈ سٹی کے علاقے عید گاہ میں کارروائی کرتے ہوئے ایک ایسے ملزم کو گرفتار کیا ہے جو خواتین کے موبائل فون ہیک کرکے ان کے ساتھ زیادتی کرتا تھا اور ویڈیوز بنا کر بلیک میل کرتا تھا۔

    پولیس کے مطابق ملزم خواتین کو جعلی لنکس بھیجتا تھا، جن کی مدد سے وہ موبائل فون اور سوشل میڈیا اکاؤنٹس ہیک کر لیتا تھا۔ہیک کیے گئے فونز سے خواتین کے نمبر نکال کر واٹس ایپ پر پیغام اور کالز کی جاتی تھیں۔ملزم ان خواتین کو بلاتا اور ان کے ساتھ ویڈیوز بناتا تھا، پھر انہیں دھمکیاں دے کر بلیک میل کرتا تھا، پیسے اور کردار دونوں کی ادائیگی کا مطالبہ کرتا تھا۔

    گرفتار ملزم کے قبضے سے دو موبائل فون برآمد ہوئے ہیں، جن میں ان غیر اخلاقی ویڈیوز بھی موجود تھیں۔

    سعودی ولی عہد کا امریکا کا دورہ ،ٹرمپ کا استقبال

    ٹیکساس میں پاکستانی نژاد کراچی کی خاتون کو 8 سال قید

    کراچی: سی ٹی ڈی کی کارروائی، ٹارگٹ کلر سمیت 4 گرفتار

  • یارولُنڈ میں چوری کی کوشش ناکام، شہریوں نے چور کو رنگے ہاتھوں پکڑ کر پولیس کے حوالے کیا

    یارولُنڈ میں چوری کی کوشش ناکام، شہریوں نے چور کو رنگے ہاتھوں پکڑ کر پولیس کے حوالے کیا

    میرپور ماتھیلو(باغی ٹی وی،نامہ نگارمشتاق علی لغاری) یارولُنڈ کے علاقے میں شمن عیسائی کی ریڑھی سے قیمتی گھڑی چوری کرنے کی کوشش ناکام بنا دی گئی۔ موقع پر موجود ریڑھی والے اور علاقے کے مکینوں نے فوری کارروائی کرتے ہوئے چور کو رنگے ہاتھوں پکڑ لیا اور پولیس کے حوالے کر دیا۔

    عینی شاہدین کے مطابق چور نے ریڑھی پر رکھی شمن عیسائی کی قیمتی گھڑی اٹھائی اور فرار ہونے کی کوشش کی، مگر ریڑھی والے اور دیگر مکین فوراً حرکت میں آئے اور اسے قابو کر لیا۔ لوگوں کی بروقت کارروائی سے چور کا فرار ہونے کا منصوبہ ناکام ہو گیا۔

    اطلاع ملتے ہی پولیس فوری طور پر موقع پر پہنچی اور چور کو اپنی تحویل میں لے لیا۔ پولیس نے ابتدائی تفتیش کے بعد واقعے کی مکمل تحقیقات کا آغاز کر دیا ہے تاکہ معاملے کی مکمل حقیقت سامنے آ سکے۔

    علاقہ مکینوں نے پولیس انتظامیہ سے چوری کے بڑھتے ہوئے واقعات کو روکنے کے لیے موثر اقدامات کرنے کا مطالبہ کیا ہے۔ ان کا کہنا ہے کہ ایسے واقعات نہ صرف شہریوں میں عدم تحفظ پیدا کرتے ہیں بلکہ علاقے کی ساکھ پر بھی منفی اثر ڈالتے ہیں۔