Category: جرائم و حادثات

اوکاڑہ ک،باغی ٹی وی (نامہ نگار ملک ظفرکی رپورٹ ) نواحی علاقہ گیارہ جیڈی میں با اثر افراد کا یتیم بچوں کے گھر میں گھس کر تشدد ،ملکیتی گھر پر قبضہ کرنے کی کوشش ڈنڈوں،سوٹوں،کلہاڑی اور اینٹوں کا آزادانہ استعمال خواتین سمیت پانچ افراد شدید زخمی ہسپتال منتقل

تفصیل کے مطابق تھانہ راوی کی حدود نواحی علاقہ گیارہ جیڈی میں با اثر افراد نے درجنوں ساتھیوں کے ہمراہ یتیم بچوں احمد نواز اور اسکی معصوم بہنوں کے تعمیر شدہ ملکیتی مکان پر قبضہ کرنے کے لیے دھاوا بول دیا ،حملہ آوروں نے ڈنڈوں،سوٹوں، کلہاڑی کا آزادانہ استعمال کیا ،جس سے خواتین سمیت پانچ افراد شدید زخمی ہوگئے ،علاقہ میں شدید خوف وہراس پھیل گیا

تھانہ راوی پولیس موقع پر پہنچ گئی زخمیوں کو ہسپتال منتقل کر دیا گیا ہے، با اثر ملزمان پولیس کی موجودگی میں تشدد کرتے رہے

اس سے قبل ملزمان کے خلاف یتیم بچوں کی جانب سے تھانہ راوی میں گھر کا مین گیٹ اکھاڑ کر راستہ بند کرنے احاطہ پر قبضہ کرنے اور جان سے مارنے کی دھمکیوں کی درخواست بھی جمع کروائی گئی تھی متاثرہ یتیم بچوں نے ڈی پی او اوکاڑہ آئی جی پنجاب اور نگران وزیر اعلی پنجاب محسن نقوی سے نوٹس لے کر تحفظ فراہم کرنے اور ملزمان کی گرفتاری کا مطالبہ کر دیا

میہڑ،باغی ٹی وی (نامہ نگارمنظورعلی جوئیہ کی رپورٹ)بھائی نے بھائی کو گولی مارکر شدید زخمی کردیا
تفصیل کے مطابق میہڑتھانہ بی سیکشن کہ حدود میں جائیداد کہ تنازعہ پر بروہی قوم کے دو بھائیوں میں جھگڑا ہوا،ملزم صالح بروہی نے فائرنگ کر اپنے سگے بھائی خالد بروہی کوشدید زخمی کرکے فرار ہوگیا.

تھانہ بی سیکشن پولیس نے موقع پر پہنچ کر زخمی کو تشویش ناک حالت میں لاڑکانہ ہسپتال منتقل کردیاہے ۔

اوچ شریف،باغی ٹی وی (نامہ نگارحبیب خان )ٹریلرکی موٹرسائیکل کو ٹکر،خاتون موقع پرجاں بحق،مرد زخمی،ہسپتال منتقل
تفصیل کے مطابق ایک موٹر سائیکل جس پر دو لوگ سوار تھے اوچ شریف سے چنی گوٹھ جاتے ہوئے سامنے سے آتے ہوئے ایک ٹریلر سے جاٹکرائے۔

جس ایک معمر خاتون لال مائی زوجہ منظور احمدچک 51 چنی گوٹھ کی رہائشی موٹر سائیکل پر سوار تھی ٹریلر کے نیچے آگئی اور زخموں کی تاب نہ لاتے ہوئے موقع پر ہی جاں بحق ہو گئی۔ ڈیڈ باڈی کو RHC اوچ شریف منتقل کر دیا گیا ہے لواحقین موقع پر موجود ہیں۔

موٹر سائیکل کا ڈرائیور معمولی زخمی تھا جسے مقامی لوگوں نے اپنی مددآپ کے تحت آر ایچ سی اوچ شریف شفٹ کر دیا تھا

قصور،باغی ٹی وی (نامہ نگارطارق نویدسندھو)مبینہ سلنڈرپھٹنے سے مسافروین میں آگ بھڑک اٹھی۔
تفصیل کے مطابق قصورمیں کشمیر چوک نزد شہباز خان روڑ پرٹیوٹا ہائی ایس میں اچانک آگ بھڑک اٹھی،بتایا گیا ہے کہ آگ سلنڈر پھٹنے سے لگی ،مگر سیکرٹری آر، ٹی، اے محمد جعفر چوہدری کا کہنا ہے کہ آگ سلنڈر پھٹنے سے نہیں لگی،گاڑی میں لگا سلنڈر اپنی اصلی حالت میں موجود ہے، آگ لگنے کی وجہ شارٹ سرکٹ ہے۔

جبکہ معجزاتی طور پر ڈرائیور اور کنڈیکٹر بچ گئے اورخوش قسمتی سے اس وقت وین میں کوئی سواری موجود نہ تھی ۔ سیکرٹری آر، ٹی، اے کا کہنا ہے کہ ذمہ داران کے خلاف سخت قانونی کارروائی عمل میں لائی جا رہی ہے۔

دوسری طرف وین کے ڈرائیور کے خلاف مقدمہ درج کر دیا گیا ہے اور پنجاب حکومت کی ہدایات پر ضلع بھر میں سلنڈر والی گاڑیوں کے خلاف کریک ڈائون جاری ہے۔

ڈیرہ غازی خان ،باغی ٹی وی( نیوز رپورٹر شاہد خان ) ریجنل پولیس آفیسر ڈیرہ غازی خان کیپٹن (ر) سجاد حسن خان کا اپنے دفتر میں روزانہ کی بنیاد پر کھلی کچہری کا انعقاد۔ ریجن بھر سے آنے والے سائلین کی درخواستوں کی سماعت کرکے فوری کاروائی کے احکامات جاری۔ مارک کی گئی تمام درخواستوں کا مکمل فالو اپ لینے کا حکم۔ میرٹ پر انصاف کی فراہمی اور عوام کی دادرسی کو ہرصورت یقینی بنایا جائے گا۔

تفصیلات کے مطابق ریجنل پولیس آفیسر ڈیرہ غازی خان کیپٹن (ر) سجاد حسن خان نے عوامی مسائل کے فوری حل اور شہریوں کے براے راست مسائل کی سماعت کے لیے روزانہ کی بنیاد پر ریجنل پولیس آفس میں کھلی کچہری کے انعقاد کا سلسلہ سے جاری رکھتے ہوئے ریجن کے تمام اضلاع ڈیرہ غازی خان، مظفرگڑھ، راجن پور اور لیہ سے آنے والے سائلین کی درخواستوں کو سماعت کی اور مسائل کے فوری حل کے لیے متعلقہ افسران کو احکامات جاری کیے ۔

اس موقع پر آر پی او کیپٹن (ر) سجاد حسن خان کا کہنا تھا کہ دفتر میں آنے والے سائلین کی درخواستوں کو مقررہ کردہ ٹائم فریم میں مکمل کرکے فالو اپ لیا جائے۔ کسی بھی شہری کے ساتھ زیادتی ہر گز برداشت نہیں ہے. میرٹ پر انصاف کی فراہمی اور سائلین کی دادرسی کو ہرصورت یقینی بنایا جائے گا۔

ٹھٹھہ،باغی ٹی وی(بلاول سموں)حیدرآباد روڈ پر ڈاکوؤں نے شہری سے موٹرسائیکل ،موبائل فون اور نقدی چھین لی
تفصیل کے مطابق ٹھٹھہ شہر سے 10 کلومیٹر دور ٹھٹھہ،حیدرآباد روڈ پر نامعلوم مسلح ڈاکوؤں نے ایک شخص سراج بروہی کو یرغمال بنا کر ایک عدد موٹرسائیکل،دو عدد موبائل فون اور نقد رقم لوٹ کر فرار ہوگئے

جب کہ اس واقعہ کی اطلاع پولیس کودی گئی لیکن اطلاع باوجود پولیس موقع پر نہ پنہچ سکی، واضح رہے کہ گذشتہ کچھ روز سے ضلع ٹھٹھہ میں جرائم کی شرح کافی بڑھ گئی ہے ،بڑھتے ہوئے جرائم کوپولیس کنٹرول کرنے میں عملاََ ناکام دکھائی دے رہی ہے،

شہریوں نے پولیس کے اعلیٰ حکام سے بڑھتے ہوئے جرائم کو کنٹرول کرنے کیلئے نوٹس لینے کامطالبہ کیا ہے

سرگودھا،باغی ٹی وی (نامہ نگار شاہنوازجالپ)محکمہ مال میں کرپشن کابڑاسکینڈل بے نقاب،ایف بی آر کی تاریخ کے پہلے اورسب سے بڑےالیکٹرانک اورفیزیکل آڈٹ میں ہوشرباء انکشافات،صرف ایک سال میں جائیداد کی خرید و فروخت کے دوران قومی خزانے کو اربوں روپے سے محروم کیاگیا

ایف بی آر ذرائع کے مطابق الیکٹرانک اورفیزیکل آڈٹ کے دوران سب رجسٹراروں کے دفاتر سے بڑی تعدادمیں جعلی چالان برآمدہوئے۔ایف بی آر نے محکمہ مال میں ڈیڑھ ارب روپے سے زائد کے گھپلے پکڑے ہیں۔پانچ اضلاع کے17 سب رجسٹراروں نے افسران،رجسڑی محرروں اور عملہ سے مل کر اربوں روپے خرد برد کئے،سرگودھا،میانوالی،خوشاب،بھکر اور منڈی بہاؤالدین پانچ اضلاع میں دیدہ دلیری سے کرپشن کاکھیل کھیلاگیا۔

ایف بی آر آڈٹ ٹیم نے سب رجسٹراروں کے اربوں روپے کے گھپلوں کے ثبوت اکٹھے کرکے مزیدقانونی کارروائی شروع کردی ہے۔دوران آڈٹ یہ انکشاف بھی ہواکہ بڑے افسران کی آشیر باد سے رجسٹریوں کی مد میں قومی خزانے کومسلسل ٹیکہ لگایا جاتا رہاہے۔بوقت رجسٹری فروخت اور خرید کنندہ کے ٹیکس کی رقم قومی خزانے میں جمع نہ کرائی گئی ۔

سب رجسٹرار دفاتر میں ٹیکس کے جعلی چالان تیار کرنے کے بھی ہوشربا انکشافات سامنے آئے ہیں۔ایف بی آر نے 17 سب رجسٹراروں کو ریکوری کے لیے نوٹس جاری کر دئیے۔متعلقہ ٹیکس نادہندگان کو بھی زیر دفعہ 162 نوٹس جاری کئے گئے۔

کرپشن سکینڈل میں ملوث سب رجسٹراروں،رجسٹری محرروں،وثیقہ نویسوں، وکلا،رجسٹری محرروں اور دیگر ریونیو عملہ کی ملی بھگت کے ثبوت ایف بی آرنے اکٹھے کر کے رپورٹ مرتب کر لی ہے جس کے مطابق صرف ایک سال میں ہونے والی اربوں روپے کی ٹیکس چوری منظر عام پر لائی گئی ہے۔

ٹیکس فراڈ میں ملوث تمام افراد کے خلاف قانونی کاروائی کاآغازہوچکا ہے اورجلد گرفتاریاں شروع ہونے کابھی امکان ہے۔کمشنر ود ہولڈنگ بابر نواز راجہ کا کہنا ہے ملوث کالی بھیڑوں کو جرمانہ کے ساتھ 10 سال تک سزا ہو سکتی ہے۔

ایف بی آر کی تاریخ میں پہلی بار آڈٹ ٹیم کی زیر نگرانی ریکارڈ کی الیکٹرانک اور فزیکل سکروٹنی کی گئی۔