Category: جرائم و حادثات

چترال،باغی ٹی وی (نامہ نگارگل حماد فاروقی) امن و مان دوبارہ بحال کرنے کیلئے جماعت اسلامی کے زیر اہتمام گرینڈ امن جرگہ کا انعقاد
چترال حالیہ دنوں میں جو ناخوشگوار واقعہ پیش آیا جس میں سیکورٹی فورسز کے چار اہلکار شہید اور سات زحمی ہوئے اس کے بعد چترال کی فضاء نہایت سوگوار تھی۔ عوام نہایت غم اور خوف کی زندگی گزار رہے ہیں۔ چترال ایک مثالی امن کا ضلع تھا جہاں ہر سال ہزاروں کی تعداد میں ملکی اور غیر ملکی سیاح آتے ہیں اور زیادہ تر سیاح وادی کیلاش کارخ کرتے ہیں۔ مگر ٹی ٹی پی کی جانب سے بمبوریت وادی کیلاش کے پاس چترال سکاوٹس کی ایک پوسٹ اور جنجیریت کوہ میں بھِی چترال سکاوٹس کے پوسٹ پر حملہ کرکے چار اہلکاروں کو شہید کیا تھا۔ اس کے بعد پورے چترال کی فضاء نہایت سوگوار ہے اور لوگ پریشان ہیں

جماعت اسلامی کے زیر اہتمام چترال کے مثالی امن کو دوبارہ بحال کرنے کیلئے ایک گرینڈ امن جرگہ بلایا گیا۔ گرینڈ امن جرگہ میں تمام سیاسی اور مذہبی جماعتوں کے رہنماوں اور سنی، اسماعیلی دونوں کمیونٹی کے لوگوں نے کثیر تعداد میں شرکت کی۔گرینڈ امن جرگہ سے خطاب کرتے ہوئے علاقے کے عمائدین نے کہا کہ چترال کے لوگ ہمیشہ پاکستان اور فوج کے وفادار رہے ہیں مگر حالیہ دنوں میں جو نا خوشگوار واقعہ پیش آیا اس سے ہر چترالی نہایت پریشان ہے۔ انہوں نے کہا کہ چترال میں اتنی زیادہ ایجنسیاں کام کرتی ہیں اور ان کو پہلے اطلاع بھِی پہنچی تھی مگر اس کے باوجود بھی اس کی روک تھام کیلئے صحیح معنوں میں اقدامات نہیں کئے گئے جو قابل افسوس بات ہے۔

مقررین نے کہا کہ بارڈر پولیس یعنی چترال لیویز کا کام ان سرحدوں کا حفاظت کرنا ہے مگر ڈپٹی کمشنر اوراسسٹنٹ کمشنر کے دفتر میں ان لیویز کا پورا جلوس موجود ہوتا ہے اور زیادہ تر لیویز ڈی سی ، اے سی اور دیگر افسران کے بنگلوں میں ان کے ذاتی کاموں پر مامور ہیں جوسراسر غلط ہے۔ ان کو اس کام کیلئے سرکاری خزانے سے تنخواہیں نہیں دی جاتی کہ وہ ڈی سی کے بال بچوں یا اس کے گھر کے افراد کی ذاتی طور پر خدمت کرتے رہیں بلکہ ان کا کام ہے کہ سرحدوں کی حفاظت کریں۔ انہوں نے کہا چترال میں افسران کے وی وی آئی پی پروٹوکول کو بھی ختم ہونا چاہئے ۔ کئی یورپی ممالک کے صدور اور وزیر اعظم اپنے دفاتر کو سائیکل پر آتے ہیں یا بغیر کسی پروٹوکول کے مگر یہاں تو ایک معمولی سرکاری ملازم کے آگے بھی پروٹوکول کی پوری فوج جاتی ہے جس سے عوام میں مایوسی اور نفرت پیدا ہوتی ہے۔

مقررین نے کہا کہ چترال میں دنیا کی واحد اورمخصوص ثقافت کے حامل لوگ کیلاش لوگ رہتے ہیں ان کی مخصوص ثقافت کو دیکھنے کیلئے دنیا بھر سے سیاح یہاں آتے ہیں مگر وادی کیلاش سے متصل ایک پوست پر طالبان کے حملے نے نہ صرف سیاحوں بلکہ مقامی لوگوں میں بھِی خوف و ہراس کی فضا پیدا کی ہے۔ اگر صورت حال یہ رہی تو وہاں کوئی ملکی یا غیر ملکی سیاح نہیں آئے گا اور ان لوگوں کی گزربسر سیاحت سے ملنے والی آمدنی پر ہے اگر وہ ختم ہوئی تو کیلاش کے لوگ فاقہ کشی پر مجبور ہوں گے۔

اس موقع پر ایک متفقہ قرارداد بھی منظور ہوئی جس کے تحت حکومت سےمطالبہ کیا گیا کہ حالیہ دہشت گرد حملے میں جو ہمارے چار جوان شہید ہوئے ہیں ،چیف آف آرمی سٹاف جنرل عاصم منیر کو چاہئے کہ وہ فوری طور پر چترال کا دورہ کریں اور یہاں کے عمائدین سے مل کر اس مسئلے کے مستقل حل کیلئے لوگوں سے مل بیٹھ کر کوئی لائحہ عمل طے کریں ۔قرارداد کے ذریعے مطالبہ کیا گیا کہ چترال کے سرحدی علاقے کے لوگوں کو ان کے بنیادی حقوق اور سہولیات فراہم کرکے ان کی احساس محرومی کو ختم کیا جائے تاکہ وہ وطن عزیز کے ہمیشہ کی طرح وفادار رہیں۔ قرارداد کے ذریعے اس بات پر نہایت تشویش کا اظہار کیا گیا کہ قانون نافذ کرنے والے اداروں، سیکورٹی فورسز اور ایجنسیوں کی موجودگی میں اس قسم کے واقعات کا ہونا لمحہ فکریہ ہے۔قرارداد کے ذریعے پر زور مطالبہ کیا گیا کہ چترال کے اندر سیکورٹی اداروں کے اہلکار اپنی فرض منصبی کے علاوہ دیگر امور میں دخل اندازی سے اجتناب کریں۔ قرارداد کے ذریعے مطالبہ کیا گیا کہ چترال بارڈر پولیس کو افسر شاہی کی پروٹوکول کی بجائے ان کو سرحدات پر بھیج کر ا ن کی حفاظت پر مامور کیا جایے۔

یہ بھِی مطالبہ کیا گیا کہ چترال کے اندر افسران کی نقل و حرکت کے وقت بے جاء پروٹوکول سے اجتناب کریں اس سے لوگوں میں نفرت اور مایوسی پھیل جاتی ہے۔اس بات پر نہایت افسوس اور غم و غصے کا اظہار کیا گیا کہ چترال میں ہونے والے ناخوشگوار واقعات کے دوران انتظامیہ کا عوام کے ساتھ رابطہ نہ رکھنا اور ان کو اندھیرے میں رکھنا قابل مذمت ہے۔اس سے عوام اور سرکار میں ایک دراڑ پیدا ہوتی ہے۔اس بات کا فیصلہ ہوا کہ چترال میں امن و امان کی فضا ء کو دوبارہ پیدا کرنے کیلئے دروش، گرم چشمہ، اپر چترال اور دیگر علاقوں میں بھی گرینڈ امن جرگے کا اہتمام کیا جائے گا۔ اس امن جرگے میں تمام طبقہ فکر سے تعلق رکھنے والے کثیر تعداد میں لوگوں نے شر کت کی جو بعد میں مولانا شیر عزیز سابق امیر جماعت اسلامی کی دعاییہ کلمات کے ساتھ اختتام پذیر ہوا۔

تنگوانی باغی ٹی وی (نامہ نگار منصور بلوچ) تنگوانی میں بدامنی اور کندھ کوٹ کے دھرنے میں پولیس کے لاٹھی چارج کے خلاف شہری اتحاد ، مذہبی ، سماجی اور سیاسی جماعتوں کی جانب سے شہر میں شٹر بند ہڑتال کرکے احتجاجی دھرنا دیاگیا

تنگوانی میں بدامنی اور کندھ کوٹ کے دھرنے میں پولیس کے لاٹھی چارج کے خلاف شہری اتحاد سماجی سیاسی اور مذہبی جماعتوں نے شہر میں شٹر ڈاؤن ہڑتال کرنے کے بعد ایک بڑی احتجاجی ریلی نکالی ، احتجاجی ریلی غلہ منڈی سے ہوتی ہوئی ویگن اسٹینڈ تک پہنچنے پر بڑے احتجاجی مظاہرے تبدیل ہوگئی

احتجاجی مظاہرہ میں شہری اتحاد کے رہنما حافظ کفایت کھوسہ، جی یو آئی کے رہنما مولانا محمد صلاح ملک ، عوامی تحریک کے رہنما ربنواز ملک اور دیگر رہنماؤں نے شرکت کی .احتجاجی مظاہرہ کے بعد دھرنا دے دیا گیا اس دوران شرکاء نے پولیس کے خلاف سخت نعرے بازی کی

دھرنے میں رہنماؤں نےخطاب کرتے ہوئے کہا کہ کندھ کوٹ کے دھرنے میں پولیس کے لاٹھی چارج کرنے والے اہلکاروں کے خلاف سخت کارروائی کی جائے اور بدامنی ختم کر کے امن وامان کو برقرار رکھا جائے-

اوچ شریف، باغی ٹی وی (نامہ نگار حبیب خان)اوچ شریف شہر کے مختلف علاقوں میں مین ہول اور گٹروں کے ڈھکن غائب ہوگئے، کھلے ہوئے مین ہول شہریوں کیلئے ڈیتھ ہول بن گئے۔

آج بھی میونسپل کمیٹی کی مجرمانہ غفلت کے باعث ایک لوڈر رکشہ کھلے مین ہول میں جاگرا، انتظامیہ کی روایتی بے حسی، شہریوں کا کہنا ہے کہ ہماراازلی دشمن اور ہمسایہ ملک بھارت چاند کے اس حصے پر جاپہنچا جہاں دنیا کاکوئی دوسراترقی یافتہ ملک ابھی تک نہیں پہنچ پایا ،شہریوں کاکہنا تھا کہ افسوس کے ساتھ کہنا پڑتا ہے ہم سے تو ہمارے مین ہولز کے ڈھکن نہ سنبھالے جا سکے ،یہ کرپشن اور بے حسی کی انتہا ہے کہ کئی بار نشاندہی کے باوجود د گٹروں پر ڈھکن لگانے کا بندوبست نہیں کیاجاسکا ۔

اسسٹنٹ کمشنر احمد پور اور میونسپل کمیٹی اوچ شریف کی مجرمانہ غفلت و لاپرواہی کانتیجہ ہے کہ ایک لوڈررکشہ کھلے مین ہول میں گرگیا اس سے قبل بھی کئی موٹرسائیکل سوار ان کھلے مین ہولز کی وجہ سے حادثات کا شکار ہوچکے ہیں ،شہریوں نے تنبیہ کرتے ہوئے کہا کہ اب اگر ان کھلے مین ہولز کی وجہ سے کوئی حادثہ یا جانی نقصان ہواتو ہم میونسپل کمیٹی اور اسسٹنٹ کمشنر احمدپورشرقیہ و دیگرافسران کے خلاف عدالت سے رجوع کریں گے اوران مقدمات درج کرائے جائیں گے اوراب شہری مزید خاموش رہ کر ظلم برداشت نہیں کریں گے

مرکزی سڑکوں کے علاوہ اندرونی گلیوں شمیم آباد، اختر کالونی، ناصر ٹائون، محلہ امیر آباد سمیت دیگر کئی علاقوں میںگٹروں کے مین ہول کھلے پڑے ہیں،جن ڈھکن غائب ہیں، جس سے کسی بھی وقت کوئی اورناخوشگوار واقعہ پیش آسکتا ہے اور اسکول کے بچے ان مین ہولز میں گرسکتے ہیں،اوچ شریف کے مکینوں نے میونسپل کمیٹی اوچ شریف اور اسسٹنٹ کمشنر احمد پور شرقیہ سے مطالبہ کیا ہے کھلے ہوئے گٹروں پر فی الفور ڈھکن لگائے جائیں تاکہ کسی بڑے حادثہ سے شہری محفوظ رہ سکیں۔

ڈیرہ غازیخان،باغی ٹی وی (نامہ نگارشہزادخان)حکومت پنجاب نے بجلی چوروں کیخلاف کریک ڈاؤن کا فیصلہ کیا ہے . کمشنر ڈی جی خان ڈویژن ڈاکٹر ناصر محمود بشیر نے اعلی سطحی اجلاس کی صدارت کرتے ہوئے احکامات دے دئیے. اجلاس میں آر پی او کیپٹن ریٹائرڈ سجاد حسن خان ایڈیشنل کمشنر کوآرڈینیشن کریم بخش ، چاروں ڈپٹی کمشنرزمہر شاہد زمان لک،محمد سلمان لودھی،خالد محمود،ڈاکٹر منصور بلوچ ، ڈی پی او حسن افضل سمیت چاروں ڈی پی اوز ، دیگر افسران اورمیپکو حکام شریک تھے .

کمشنر ڈاکٹر ناصر محمود بشیر نے اجلاس سے خطاب کرتے ہوئے کہاکہ ڈویژن کے ڈپٹی کمشنرز ڈی پی اوز اور میپکو حکام کے ساتھ میٹنگ کر کے آپریشن کو حتمی شکل دیں . بجلی کے مگر مچھوں پر ہاتھ ڈالا جائے. انہوں نے کہاکہ کمرشل اور گھریلو بجلی چوروں کے خلاف موثر آپریشن کیا جائیگا،ڈی جی خان اور راجنپور اضلاع میں بجلی چوری کے 662 علاقے اور 200 نو گو ایریاز کا انکشاف ہوا ہے ،

ڈی جی خان پولیس نے 560 مقدمات درج کرکے 429 بجلی چور گرفتار کئے، ڈی جی خان ڈویژن میں 422 بجلی چوروں کے چالان کئے گئے. کمشنر نے کہا کہ بجلی چوری کی روک تھام قومی مقصد ہے ، بجلی چوری کا بوجھ عام صارف کو اٹھانا پڑتا ہے،شہری بجلی چوروں کی اطلاع دیکر قومی مہم میں حکومت کا ساتھ دیں،بجلی چوری کی اطلاع دینے والوں کا نام صیغہ راز میں رکھا جائیگا،

اجلاس میں بجلی چوری کی سرپرستی کرنے والے سرکاری ملازمین و افسران کے خلاف بھی سخت کارروائی کا فیصلہ کیاگیا . کمشنر نے کہاکہ بجلی چوروں کیخلاف ایف آئی آر کے بروقت اندراج اور پراسیکیوشن کا طریقہ کار بہتر بنایا جائیگا،بجلی چوروں کیخلاف آپریشن میں انتظامیہ اور پولیس مکمل معاونت فراہم کریگی،

انڈسٹریل یونٹس،زرعی ٹیوب ویل اور دیگر بجلی چوری پر کارروائی کیلئے ٹیمیں تشکیل دے دی گئیں، کمشنر نے کہاکہ بجلی صارفین کو بھی میپکو حکام ریلیف فراہم کریں، صارفین کو بجلی میٹرز کی بروقت فراہمی کیلئے بھی اقدامات کئے جائیں، آر پی او سجاد حسن خان نے کہا کہ میپکو ٹیم کو سپورٹ کے ساتھ قانونی معاونت فراہم کریں گے، مقدمات کے اندراج کیلئے مکمل کوائف اور ثبوت دئیے جائیں .

شاہصدردین ،باغی ٹی وی (نامہ نگار شاہدعمران کی رپورٹ )تھانہ شاہ صدر دین کی حدود پیرعادل پل بصیرہ،ڈکیٹوں کی پولیس پر فائرنگ ایک کانسٹبل شہید جبکہ ایک زخمی
ابتدائی اطلاعات کے مطابق SHO شاہ صدر دین عرفان مصطفیٰ ملازمان کے ہمراہ پل بصیرہ کے قریب گشت کناں تھے کہ ایک موٹر سائیکل جس پر تین اشخاص سوار تھے نے پولیس پارٹی کو دیکھ کر اندھا دھند فائرنگ کردی اور فرار ھو گئے۔

ملزمان کی فائرنگ سے کانسٹبل غلام حسن اور منیر احمد شدید زخمی ہوگئے جنہیں فوری طور پر ٹراما سنٹر ڈیرہ غازیخان منتقل کیا گیا۔اطلاع موصول ہوتے ہی ڈی پی او ڈیرہ غازیخان حسن افضل فورا ٹراما سنٹر پہنچ گئے۔

بعد ازاں کانسٹیبل غلام حسن زخموں کی تاب نہ لاتے ہوئے شہید ہو گئے۔ ایس ڈی پی او صدر سرکل پولیس کی بھاری نفری کے ہمراہ موقع پر پہنچ گئے ہیں۔ علاقے کو گھیرے میں لیکر سرچ آپریشن جاری ہے۔

ڈی پی او حسن افضل نے کہا ہے کہ قانون کے مطابق کاروائی عمل میں لائی جا رہی ہے۔ ملزمان کو جلد از جلد گرفتار کر لیا جائے گا۔

دوسری طرف اطلاع ملتے ہی آر پی او کیپٹن (ر) سجاد حسن خان فوری ٹیچنگ ہسپتال ڈی جی خان پہنچ گئے۔ فرض کی راہ میں شہید ہونے والے اہلکار کو خراج تحسین پیش کیا،ڈی پی او ڈیرہ غازی خان کو واقعہ کی مکمل انکوائری کے احکامات،واقعہ میں ملوث مجرمان کی فوری گرفتاری کا حکم ،ڈی پی او ڈی جی خان کو مجرمان کی گرفتاری کے آپریشن کی خود نگرانی کرنے کا حکم ۔

شہید کانسٹیبل غلام حسن کی نماز جنازہ پولیس لائنز ڈی جی خان میں سرکاری اعزاز کے ساتھ ادا کر دی گئی،قومی پرچم میں لپٹے شہید کے جسد خاکی کو پولیس کے چاک و چوبند دستے نے سلامی پیش کی

آر پی او کیپٹن (ر) سجاد حسن خان اور ڈی پی او حسن افضل جملہ سرکل افسران بھی شہید کے نماز جنازہ میں شریک ۔پولیس افسران و اہلکاران، شہید کے ورثاء سمیت شہریوں کی کثیر تعداد میں شرکت ۔آر پی نے شہید کے جسد خاکی پر پھول چڑھائے اور بلندی درجات کے لیے دعا کی ۔

آر پی او نے شہید کے ورثاء اور بچوں سے ملاقات کی اور اظہار تعزیت کیا،دکھ کی اس گھڑی میں پنجاب پولیس آپکے ساتھ ہے اور آپکی کفالت کی ذمہ دار ہے

نماز جنازہ کے بعد شہید کے جسد خاکی کو آبائی گاؤں روانہ کیا گیا جہاں انہیں مکمل سرکاری اعزاز کے ساتھ سپرد خاک کیا جائے گا ۔شہید کانسٹیبل غلام حسن نے سوگواران میں والدہ، بیوی، دو بیٹیاں اور تین بیٹے چھوڑے ہیں ۔

یاد رہے اسی پل بصیرہ پر کچھ عرصہ پہلے بھی ڈکیٹوں نے سکندر کھوہاوڑ کو شہید کردیا تھا اور 5 افراد اسی سانحہ میں زخمی بھی ہوگئے تھے

کندھ کوٹ،باغی ٹی وی (نامہ نگار) پولیس کا ڈاکوؤں سے مبینہ مقابلہ 2 مغوی بازیاب کرا لئے
کندھ کوٹ پولیس نے کچے کے علاقہ گیہل پور میں ڈاکوؤں کے خلاف آپریشن کر کے دو مغویوں کو بازیاب کرالیا ہے ، دونوں مغویوں کی بازیابی کے بعد مظاہرین نے انڈس ہائی وے پر جاری دھرنا ختم کردیا۔

ایس ایس پی امجد شیخ کے مطابق کچے کےعلاقہ گیہل پورمیں پولیس اور ڈاکوؤں کے درمیان مقابلہ ہوا، مقابلے کے دوران ڈاکو دو مغویوں کو چھوڑ کر فرار ہوگئے۔

پولیس کے مطابق دونوں مغویوں کو انڈس ہائی وے پردھرنا دینے والے مظاہرین کے حوالے کیا گیا اور دیگر مغویوں کو جلد بازیاب کرانے کی یقین دہانی کے بعد مظاہرین کی جانب سے دھرنا ختم کردیا گیا۔

واضح رہے کہ کندھ کوٹ کے شہریوں نے اپنے پیاروں کی آزادی کے لیے گولا موڑ انڈس ہائی وے پر دھرنا دے دیا، پولیس سے مذاکرات ناکام ہوئے تو مظاہرین کو منتشر کرنے کے لیے پولیس نے لاٹھی چارج کردیا، جس کے نتیجے میں دس سے زائد مظاہرین زخمی بھی ہوگئے تھے۔