Category: جرائم و حادثات

چونیاں،باغی ٹی وی(نامہ نگارعدیل اشرف) بقایاجات اور بجلی چوروں کیلئے شکنجہ کسنے کیلئے تحصیل کے افسران کی اہم بیٹھک، ایکسیئن چونیاں ڈویژن نوید احمد بھٹی اور دیگر یونین عہدیداران کی اسسٹنٹ کمشنر اور ڈی ایس پی چونیاں سے اہم ملاقات

تفصیلات کے مطابق ایکسیئن چونیاں ڈویژن نوید احمد بھٹی، ڈویژنل چیئرمین چوہدری ہمائیوں فیض رسول، ذیشان حیدر بھٹی اور یونین عہدیداران کی اسسٹنٹ کمشنر چونیاں اور ڈی ایس پی چونیاں سے ملاقات ہوئی جس میں بجلی چوروں کے خلاف اور محکمے کے واجبات کلیئر نہ کرنے والوں کے خلاف گرینڈ آپریشن کا منصوبہ تیار ہوا یہ آپریشن سٹی چونیاں شہر سے شروع ہو گا جس میں اسسٹنٹ کمشنر چونیاں عامر بٹ سرپرستی کریں گے اور ڈی ایس پی چونیاں سرور اعوان اپنی نفری کے ہمراہ فل پروف سکیورٹی مہیا کریں گے،

حالیہ ملک گیر بجلی کی بڑھتی ہوئی قیمتوں پر شدید احتجاج جاری ہے وفاقی حکومت کی حکمت عملی کو مدنظر رکھتے ہوئے ایکسیئن چونیاں نے تحصیل افسران سے میٹنگ کی، بقایاجات اور بجلی چوروں کے خلاف آپریشن تیار کیا۔ایکسیئن چونیاں نوید احمد بھٹی نے صحافیوں کو بتایا کہ جو محکمے کے ڈیفالٹر ہیں کسی بھی رعایت کے مستحق نہیں، بڑے بجلی چور بھی اس شکنجے سے نہیں بچ پائیں گے بجلی میٹر، ٹرانسفارمر اور تاریں بھی اتار لیں گے۔ ملکی فلاح کی خاطر اپنا قبلہ درست کر لیں۔

سیالکوٹ باغی ٹی وی (سٹی رپورٹر شاہد ریاض)تھانہ کوٹلی لوہاراں میں تعینات سب انسپکٹر ارشد علی کے خلاف سینیئر سول جج عثمان سرور نے ایف آئی آر کے آرڈر جاری کر دیے
تفصیلات کے مطابق تھانہ کوٹلی لوہاراں کے سب انسپکٹر ارشد علی نے سینیئر سول جج عثمان سرور کے آرڈر ہوا میں اڑا دیئے ،جس کیس میں جج عثمان سرور نے ملزم کو ضمانت دی ، ذرائع کے مطابق اسی کیس میں ارشد علی نے مدعی سے مبینہ بھاری رشوت وصول کر کے ضمانت لینے والے ملزم کو دوبارہ گرفتار کر کے جج عثمان سرور کے سامنے جب پیش کیا

جب جسمانی ریمانڈ لینا چاہا تو ملزم کے وکیل نے معزز جج کو آگاہ کیا کہ جناب ملزم 2 روز قبل اس کیس میں ضمانت پر ہے جو کے اگلی تاریخ آنے تک یا فیصلہ ہونے تک کیسے پولیس گرفتار کر سکتی ہے ،حقیقت معلوم ہونے پر معززجج نے فی الفور ملزم کو بری کیا اور سخت الفاظ میں تھانہ کوٹلی لوہاراں کے ایس ایچ او کو حکم صادر کرتے ہوۓ کہا کے فی الفور سب انسپکٹر ارشد علی کے خلاف ایف آئی آر درج کی جائے اور ارشد علی کو گرفتار کر کے پابند سلاسل کیا جائے اور ایف آئی آر کی ایک کاپی عدالت میں پیش کی جائے ورنہ آپ کے خلاف بھی قانونی کارروائی عمل میں لائی جائے گی۔

سیالکوٹ باغی ٹی وی (سٹی رپورٹر شاہد ریاض سے)سمبڑیال وزیر آباد روڈ پر موجود نجی فیکٹری شیخان انڈسٹری میں آگ لگ گئی،ریسکیو ٹیمیں فوری جا ۓ وقوعہ پر پہنچ کر آگ بجھانے میں مصروف ،ریجنل ایمرجنسی آفیسر گوجرانوالہ سید کمال عابد اور ڈسٹرکٹ ایمرجنسی آفیسر انجینئر نوید اقبال بھی موقع پر موجود

آگ لگنے کی وجہ فی الحال معلوم نہ ہو سکی۔ ریسکیو کی 11 فائربرگیڈگاڑیاں اور 3 ریسکیو وہیکلز، 2 ائیرپورٹ فائر ٹینڈر اور ایمبولینس کے علاوہ 100 سے زائد ریسکیورز و ریسکیو محافظین نے آپریشن میں حصہ لیا۔

ریسکیو کی بروقت کارروائی سے آگ کو محدود کر کے ساتھ ملحقہ فیکٹری میں جانے سے روک دیا گیا۔ ریسکیورز نے 5گھنٹے کی انتھک کاوشوں کے بعد آگ پر قابو پا لیا۔ مزید کولنگ کا عمل جاری ہے۔ فیکٹری میں لیدر ویٹ لفٹنگ بیلٹس اور ربر گرپس بنانے کا کام ہوتا ہے۔ آگ لگنے سے ہال کا کچھ حصہ گر گیا۔

میرپور ماتھیلو،باغی ٹی وی (نامہ نگار مشتاق علی لغاری)ڈہرکی میں17روز سے نجی پائپ لائن بچھانے والی کمپنی کے خلاف مقامی لوگ سراپا احتجاج
ڈہرکی ایک طرف مہنگائی تو دوسری جانب کاشتکاروں کی کاشت کا مبینہ لاکھوں کا نقصان کیا جانے لگا،ڈہرکی کے نواحی علاقے کھیروہی کے مکین گزشتہ 17روز سے نجی کمپنی کے خلاف سراپا احتجاج بن گئے،مکینوں کاکہنا ہے کہ کمپنی بلا معاوضہ ہماری زمینوں سے پائپ لائن کراس کرنا چاہتی ہے، ہماری زرعی اراضی متاثر ہوئی ہے اور لاکھوں کا نقصان اٹھانا پڑ رہا ہے،

مقامی لوگوں کاکہنا ہے کہ کمپنی ان علاقوں سے گیس اور تیل نکال رہی ہے،ان کی مشینری نے ہماری راستوں کو تباہ کردیا ہے،بڑی بڑی پائپ لائن جبری طور پرہماری زرعی زمین سے کراس کی جارہی ہیں جوکہ آنے والے دنوں میں زمینوں کو بنجربنا دے گی –

احتجاج کرنے والے مقامی لوگوں نے کہا کہ اگر قدرت نے ان علاقوں میں تیل دیا ہے ،گیس فراہم کی ہو تو کمپنی کو چاہئے کہ مکینوں کو بنیادی سہولیات فراہم کریں،اسپتال،اسکول،صاف پانی اور روزگار ہمارا بنیادی حق ہے کمپنی فراہم کرنے سے انکار کر رہی ہے۔اگر ہمارے جائز مطالبات نہیں مانے گئے تو کمپنی کے خلاف دما دم مست قلندر ہوگا-

ڈیرہ غازی خان باغی ٹی وی( نیوز رپورٹر شاہد خان )ڈیرہ غازیخان پولیس اقلیتوں کے حقوقاور تحفظ کیلئے دن رات کوشاں ہے- ڈی پی او حسن افضل
تفصیل کے مطابق امروز کرسچن کمیونٹی کے وفد کی ڈی پی او آفس میں نئے قائم شدہ میثاق سنٹر آمد، پولیس کی جانب سے مسیحی برادری کو مکمل تحفظ اور انکے مسائل ترجیحی بنیادوں پر حل کرنے کی یقین دہانی کرائی گئی،

مسیحی برادری نے آئی جی پبجاب کے اس اقدام کو سراہا اور اعتماد کا اظہار کرتے ہوئے شکریہ ادا کیا،ڈی پی او ڈیرہ غازیخان حسن افضل نے کہا کہ اقلیتوں کے حقوق، انکی عبادت گاہوں کا تحفظ اور انکے جان ومال کی حفاظت ڈیرہ غازیخان پولیس کی اولین ترجیح ہے۔

اوچ شریف باغی ٹی وی ( نامہ نگار حبیب خان)اوچ شریف میں پھیری لگانے والوں نے لاؤڈ سپیکر کا استعمال کرکے شہریوں کا سکون چھین لیا
شہر اور گردونواح میں پھیری لگانے والوں نے لاؤڈ سپیکر کا استعمال کرکے شہریوں کا سکون چھین لیا، ریڑھی بان ، علی الصبح گدھا گاڑیوں، چنگ چی رکشوں ، موٹر سائیکلوں ، سائیکلوں پر نصب لاؤڈ سپیکر پر اونچی آوازوں میں سبزی، کپڑا، منیاری کا سامان فروخت کرنے کی صدائیں لگاتے ہیں جس سے علاقہ مکینوں کاسکھ چین غارت ہو کر رہ گیا ہے۔

حکومت پنجاب کی طرف سے لاؤڈ سپیکر کے بے جا استعمال پرعائد پابندی کے باوجود انتظامیہ کی نااہلی اور عدم توجہی کے باعث اندرون شہر اور ملحقہ آبادیوں کے بیشتر علاقوں میں چھلی ، سبزی فروٹ ، آئس کریم ، کباڑیا ، بھکاری مافیا، پھیری لگانے والوں نے گدھا گاڑیوں، موٹر سائیکلوں ، چنگ چی رکشوں ، ریڑھیوں پر لاؤڈ سپیکر لگا رکھے ہیں جس پر دھڑلے سے اونچی آواز میں سامان فروخت کرنے کی صدائیں بلند کی جاتی ہیں۔گدھا گاڑیوں پر مشکوک قسم کی عورتیں اپنے ساتھ دو تین چھوٹے چھوٹے مفلوک الحال بچوں کو بٹھا کر علی الصبح اونچی آواز میں بھیک مانگنے کی صدائیں دیتے ہوئے خدا اور رسول کے واسطے دیتی ہیں، حالانکہ حکومت کی جانب سے لاؤڈ سپیکر کے بے جا استعمال پر سخت پابندی عائد ہے ، مسجدوں کے امام اور خطیبوں کولوڈ سپیکر استعمال کرنے پر پابندی عائد ہے ، مگر قانون نافذ کرنے والے اداروں کے ذمہ داران ان ریڑھی بانوں کے خلاف کارروائی کرنے سے گریزاں ہیں۔
شہر کی سماجی ، رفاعی ، فلاحی تنظیموں کے عمائدین نے ڈپٹی کمشنر ، ڈسٹرکٹ پولیس آفیسر بہاولپورسے نوٹس لینے کا مطالبہ کیاہے