Category: جرائم و حادثات

شیخوپورہ،باغی ٹی وی (ویب نیوز) کوٹ عبدالمالک کے قریب نامعلوم افراد نے پراپرٹی آفس پر فائرنگ کردی، جس کے نتیجے میں 4 افراد جاں بحق اور 2 زخمی ہوگئے۔

پولیس حکام کے مطابق فائرنگ کی اطلاع ملتے ہی پولیس اور ریسکیو کی ٹیمیں جائے وقوعہ پر پہنچ گئیں، 3 افراد موقع پر ہی دم توڑ گئے تھے، جب کہ واقعے میں 3 زخمی ہوئے، ریسکیو کی مدد سے لاشوں اور زخمیوں کو اسپتال منتقل کیا جہاں ایک نوجوان دم توڑ گیا۔

ریسکیو حکام نے بتایا کہ مرنے والوں میں سرفراز، مہر علی اور لطیف جب کہ زخمی ہونے والوں میں فیصل وقاص، سعید اور مقصود احمد شامل ہیں۔
پولیس حکام کا کہنا ہے کہ فوری طور پر فائرنگ کی وجہ معلوم نہیں ہوسکی، تاہم ڈی پی او شیخوپورہ نے علاقہ کی ناکہ بندی کی ہدایت کردی ہے، اور ملزمان کی گرفتاری کے ٹیمیں بھی تشکیل دیدی گئی ہیں۔

سیالکوٹ،باغی ٹی وی (سٹی رپورٹرشاہد ریاض) ڈسٹرکٹ اینڈ سیشن جج سیالکوٹ جزیلہ اسلم نے کہا ہے کہ 20 سال گزرنے کے باوجود سانحہ ڈسٹرکٹ جیل کے شہداء کے زخم کل بھی تازہ ہیں، سانحہ ڈسٹرکٹ جیل واقعہ انسانیت سوز اور دلخراش ہے جس کو کبھی بھی فراموش نہیں کیا جاسکتا۔زندہ قوموں کی یہ روایت ہے کہ وہ اپنے شہداء کی یاد کو تازہ رکھتے ہیں۔

25 جولائی 2003ء کو ہونے والے سانحہ ڈسٹرکٹ جیل سیالکوٹ کو 20 سال گزرنے کے باوجود ڈسٹرکٹ بار ایسوسی ایشن ان کی یاد میں دعائیہ تقریب منعقد کرواتی ہے اصل میں وہ ان کا حق ادا کرتے ہیں ڈسٹرکٹ بار کی اس روایت پر ڈسٹرکٹ جوڈیشری بار کی مقروض ہے۔ ان خیالات کا اظہار ڈسٹرکٹ اینڈ سیشن جج جزیلہ اسلم نے 25جولائی 2003 کو ڈسٹرکٹ جیل سیالکوٹ میں شہید ہونے والے ججز آصف ممتاز چیمہ، شاہد منیر رانجھا،صغیر انور،شہر یار بخاری کی یاد میں تعزیتی ریفرنس سے خطاب کرتے ہوئے کیا۔

تعزیتی ریفرنس سے ڈسٹرکٹ اینڈ سیشن جج کنزیومر کورٹ گلزار احمد، صدر ڈسٹرکٹ بار مقصود احمد بھٹی، سیکرٹری چوہدری احسن اسماعیل گجر،آصف علی بھلی، سید مجاہد ہاشمی، سید غوث شاہ، شاہد محمود میر، آصف علی باجوہ، اصغر علی بیگ، انجم پرویز نت،جاوید اقبال، میاں ناصر محمود، ناصر محمودنے شہید ہونے والے ججز کے یاد میں اپنے اپنے خیالات کا اظہار کیا۔

ڈسٹرکٹ اینڈ سیشن جج کنزیومر کورٹ گلزار احمد نے کہا کہ 20 سال گزرنے کے باوجود سانحہ ڈسٹرکٹ جیل کے شہداء کے زخم آج بھی تازہ ہیں دعائیہ تقریب کے آغاز پر ڈسٹرکٹ اینڈ سیشن جج جزیلہ اسلم،ڈسٹرکٹ اینڈ سیشن جج کنزیومر کورٹ گلزار احمد، سینئر سول جج عبدالستار بوسال،صدر ڈسٹرکٹ بار مقصود احمد بھٹی، سیکرٹری چوہدری احسن اسماعیل گجرکے علاوہ ایڈیشنل سیشن اور سول ججز نے شہداء کی یادگار پر پھولوں کے گلدستہ چڑھائے او رخصوصی دعا کی۔

جنرل سیکرٹری چوہدری احسن اسماعیل گجر نے شہید ہونے والے چار سول ججز صغیر انور، شاہد منیر رانجھا، شہریار بخاری اور عاصف ممتاز چیمہ کو زبردست خراج تحسین پیش کرتے ہوئے سانحہ سیالکوٹ جیل کو ملکی تاریخ کا المناک واقعہ قرار دیتے ہوئے کہا کہ سانحہ ڈسٹرکٹ جیل سیالکو ٹ المناک اور افسوسناک واقعہ ہے جوقابل مذمت ہے۔

میرپورخاص،باغی ٹی وی( نامہ نگار سید شاہزیب شاہ کی رپورٹ) پولیس کی بڑی کارروائی،چوری شدہ 10 سے موٹر سائیکلیں برآمد ،2 چور گرفتار تفصیل کے مطابق سی آئی اے پولیس میرپورخاص کے انچارج عنایت علی زرداری کی سربراہی میں ایس ایچ او ٹاؤن پولیس اسٹیشن افتخار باجوہ انچارج ڈی آئی بی دانش بھٹی سب انسپکٹر ہدایت اللہ ناریجو، اور ایس ایچ او مہران پولیس اسٹیشن عبدالحق جونیجو، اے ایس آئی عباس علی عباسی کے ہمراہ ایک اور بڑی کارروائی مہران ، سٹی اور دیگر پولیس اسٹیشنوں کی حدود سے چوری ہونے والی 10 سے موٹر سائیکلیں برآمد، مزید برآمدگیوں کا سلسلہ بھی جاری ہے ،

دو موٹر سائیکل چور کوری پھاٹک کے رہائشی اللہ بچایو ماچھی ولد اللہ داد ماچھی ظفر ماچھی عرف بابری ماچھی کو گرفتار کرلیا گیا، گرفتارشدگان کے تین ساتھی نعمان ماچھی، راجہ خاصخیلی ماجد ببر فرار ہوگئے،جنکی گرفتاری کے لئے چھاپے مارے جارہے ہیں ،پولیس کے مطابق ملزمان میرپورخاص میں موٹر سائیکلیں چوری کرتے تھے انکے پاس سے موٹر سائیکل لاک توڑنے کے آلات بھی برآمد ہوئے ہیں

کندھ کوٹ،باغی ٹی وی (نامہ نگار مختیاراعوان ) پولیس اور رینجرز کے فلیگ مارچ پر ڈاکوؤں کی فائرنگ
کندھ کوٹ میں پولیس اور رینجرز کے فلیگ مارچ پر مسلح ڈاکوؤں نے فائرنگ کردی، تاہم کوئی جانی نقصان نہیں ہوا۔
کندھ کوٹ میں پولیس اور رینجرز کے فلیگ مارچ پر مسلح افراد نے فائرنگ کردی، جب کہ پولیس اور رینجرز کی جوابی فائرنگ سے ایک ڈاکو زخمی ہوگیا۔

ایس ایس پی کندھ کوٹ کے مطابق فائرنگ کرنے والے تین ڈاکوؤں کو گرفتار کرلیا گیا ہے، جن میں سے ایک کو زخمی حالت میں اسپتال منتقل کیا گیا ہے۔ گرفتار تینوں ڈاکوؤں سے اسلحہ بھی برآمد کر لیا گیا ہے۔

ڈیرہ غازیخان (باغی ٹی وی )پنجاب کے شہروں سرگودھا، ڈیرہ غازی خان، بہاولپور، بھکر، لیہ ،مظفر گڑھ، راجن پور اور رحیم یار خان کے اضلاع میں فلڈ الرٹ جاری کیا گیا ہے۔ڈیرہ غازیخان کوہ سلیمان پر بارش کے باعث راکھی گاج کے قریب لینڈ سلائیڈنگ کے باعث کئی گھنٹے بین الصوبائی کوئٹہ روڈ بند رہی ،جس سے گاڑیوں لمبی لائینیں لگ گیں

ترجمان پی ڈی ایم اے کے مطابق پنجاب کے دریاؤں میں پانی کی سطح میں مزید اضافہ ہو رہا ہے، تربیلہ اور کالاباغ کے مقام پر نچلے، چشمہ اور تونسہ کے مقام پر درمیانے درجے کا سیلاب ہے۔ادھرگڈو اور نوشہرہ بیراج پر بھی نچلے درجے کا سیلاب ہے جہاں تونسہ کے مقام پر پانی کی آمد اور اخراج 3 لاکھ95 ہزار 152 کیوسک ریکارڈ کیا گیا، ہیڈ بلوکی میں پانی کی آمد 66 ہزار 325 اور اخراج 41 ہزار 425 کیوسک ریکارڈ کیا گیا۔

سکھر بیراج پر پانی کی سطح مسلسل بلند ہو رہی ہے جہاں 24 گھنٹوں میں 25 ہزار کیوسک کا اضافہ کیا گیا ہے، سکھر بیراج پر پانی کی آمد ایک لاکھ 85 ہزار 270 کیوسک ریکارڈ کی گئی، سکھر بیراج سے کوٹری بیراج کے لیے ایک لاکھ 81 ہزار 70 کیوسک پانی چھوڑا جارہا ہے۔

بارشوں اور ممکنہ شگاف کے خطرات پرسکھر بیراج سے نکلنے والی 6 کینالز بند کردی گئی ہیں جن میں دادو ، رائس، کیر تھر، روہڑی، خیرپور ایسٹ اور خیرپور ویسٹ کینالز شامل ہیں۔

مون سون کی بارشوں کی وجہ سے ایک بار پھر دریائے ستلج کی سطح بلند ہونے لگی ہے اور ہیڈ سلیمانکی کے مقام پر پانی کی آمد 71604 اور اخراج 62639 کیوسک ریکارڈ کیا گیا ہے جس کے باعث ہیڈ سلیمانکی اور ضلع بہاولنگرکی حدود میں نچلے درجےکے سیلاب کا خدشہ پیدا ہوگیا ہے۔

ریسکیو ذرائع کے مطابق بہاولنگر میں سیلابی پانی سے دریائی پٹی سے ملحقہ درجنوں بستیاں متاثر ہوئی ہیں جب کہ پانی سے پاکپتن میں دریائی پٹی سے ملحقہ علاقے بھی زیر آب آگئے ہیں، زیرآب آنے والے علاقوں میں ریسکیو کا آپریشن جاری ہے، اب تک 6 ہزار 13لوگوں کو محفوظ مقام پر منتقل کیا جاچکا ہے، حفاظتی بند ٹوٹنے سے سیکڑوں ایکڑپرکاشت فصلیں تباہ ہوگئیں۔

اُدھر بلوچستان کے نصیرآباد ڈویژن میں موسلادھار بارشیں ہوئیں جب کہ بولان میں عارضی پُل بہہ جانے کے سبب راستہ تاحال بند ہے، سندھ بلوچستان اورپنجاب جانے والی گاڑیوں کی لمبی قطاریں لگ گئی ہیں۔

گلگت بلتستان میں تیز بارشوں کے باعث مختلف مقامات پرلینڈ سلائیڈنگ ہوئی جس سے سیلابی پانی رہائشی علاقوں میں داخل ہوگیا جب کہ چلاس میں شاہراہِ قراقرم بند ہونے سے گاڑیوں میں پھنسے مسافر اور سیاح پریشان ہیں۔