لیبیا کے ساحل کے قریب تارکینِ وطن کو لے جانے والی ایک کشتی ڈوبنے سے 2 بچوں سمیت 55 افراد ہلاک یا لاپتہ ہو گئے ہیں۔
انٹرنیشنل آرگنائزیشن آف مائیگریشن کے مطابق یہ حادثہ 6 فروری کو لیبیا کے ساحلی شہر زوارہ کے شمال میں پیش آیا۔ لیبیائی حکام کا کہنا ہے کہ تلاش اور بچاؤ کی کارروائی کے دوران صرف نائجیریا سے تعلق رکھنے والی دو خواتین کو زندہ بچایا جا سکا۔
میڈیا رپورٹس کے مطابق بچ جانے والی خواتین میں سے ایک نے بتایا کہ اس حادثے میں اس کے شوہر کی جان چلی گئی، جبکہ دوسری خاتون نے اپنے دو بچوں کی ہلاکت کی تصدیق کی ہے۔
زندہ بچ جانے والی خواتین کے مطابق افریقی ممالک سے تعلق رکھنے والے تارکینِ وطن اور پناہ گزینوں کو لے جانے والی یہ کشتی 5 فروری کی رات تقریباً 11 بجے لیبیا کے شہر الزاویہ سے روانہ ہوئی تھی۔ تقریباً چھ گھنٹے بعد کشتی میں پانی بھرنا شروع ہو گیا، جس کے بعد کشتی الٹ گئی۔
Category: جرائم و حادثات
لیبیا کے ساحل کے قریب تارکینِ وطن کی کشتی کو حادثہ ، 55 افراد ہلاک
لاہور میں انسدادِ پولیو ٹیموں پر تشدد کے واقعات، 8 ملزمان کے خلاف مقدمات درج
لاہور: شہر کے مختلف علاقوں میں انسدادِ پولیو مہم کے دوران پولیو ٹیموں پر تشدد کے دو الگ الگ واقعات پیش آئے، جن میں مجموعی طور پر 8 افراد کے خلاف مقدمات درج کر لیے گئے ہیں۔
پولیس کے مطابق یہ واقعات ہربنس پورہ اور شاہدرہ کے علاقوں میں پیش آئے، جہاں پولیو ٹیموں کو اپنے فرائض کی انجام دہی کے دوران شدید مزاحمت اور تشدد کا سامنا کرنا پڑا۔پولیس حکام کا کہنا ہے کہ ہربنس پورہ میں انسدادِ پولیو ٹیم جب بچوں کو پولیو کے قطرے پلانے میں مصروف تھی تو ملزمان نے نہ صرف ٹیم کے ارکان کو دھمکایا بلکہ ان پر تشدد بھی کیا۔ واقعے کی اطلاع ملنے پر پولیس موقع پر پہنچی تو ملزمان نے پولیس اہلکاروں کو بھی تشدد کا نشانہ بنایا، جس سے صورتحال مزید کشیدہ ہو گئی۔
اسی طرح شاہدرہ کے علاقے چمن کالونی میں بھی انسدادِ پولیو ٹیم پر حملہ کیا گیا۔ ایف آئی آر کے متن کے مطابق وہاں ٹیم کے انچارج سمیت دیگر عملے کو تشدد کا نشانہ بنایا گیا اور سرکاری فرائض کی انجام دہی میں رکاوٹ ڈالی گئی۔ پولیس نے بروقت کارروائی کرتے ہوئے ملزمان کے خلاف مقدمہ درج کر لیا۔پولیس کے مطابق دونوں واقعات میں 8 افراد ملوث پائے گئے ہیں، جن کے خلاف کارِ سرکار میں مداخلت، سرکاری اہلکاروں پر تشدد اور دیگر سنگین دفعات کے تحت مقدمات درج کیے گئے ہیں۔ ملزمان کی گرفتاری کے لیے چھاپے مارے جا رہے ہیں جبکہ قانونی کارروائی کا آغاز کر دیا گیا ہے۔
پولیس اور محکمہ صحت کے حکام نے اس بات پر افسوس کا اظہار کیا ہے کہ پولیو جیسے موذی مرض کے خاتمے کے لیے کام کرنے والی ٹیموں کو تشدد کا سامنا کرنا پڑ رہا ہے۔ حکام کا کہنا ہے کہ انسدادِ پولیو مہم قومی فریضہ ہے اور اس میں رکاوٹ ڈالنے والوں کے ساتھ آہنی ہاتھوں سے نمٹا جائے گا۔دوسری جانب شہریوں سے اپیل کی گئی ہے کہ وہ پولیو ٹیموں کے ساتھ تعاون کریں تاکہ بچوں کو عمر بھر کی معذوری سے بچایا جا سکے اور پاکستان کو پولیو فری بنانے کے ہدف کو حاصل کیا جا سکے۔
پولیس اور ڈاکوؤں کا آمنا سامنا، کراس فائرنگ، دو ڈاکو زخمی حالت میں گرفتار
موت کا رقص اور پولیس کی جرات، سی پی او سید خالد ہمدانی کا دو ٹوک اعلان پولیس پر گولی چلانے والوں کا انجام ہسپتال یا قبرستان ہوگا
یہ محض ایک گرفتاری نہیں بلکہ علاقے میں چھپے گینگز کے لیے واضح پیغام ہے شہریوں کے مال و جان سے کھیلنے والے کسی رعایت کے مستحق نہیں سید دانیالگوجرخان (قمرشہزاد) تھانہ مندرہ کا علاقہ گزشتہ رات میدانِ جنگ بن گیا جہاں فرض شناس پولیس پارٹی اور سنگین وارداتوں میں مطلوب چار سفاک ڈاکوؤں کے درمیان آمنا سامنا ہونے اور پولیس کی جانب سے مشکوک موٹرسائیکل کو رکنے کا اشارہ کرنے پر ملزمان نے خوف و ہراس پھیلانے کی نیت سے اندھا دھند فائرنگ شروع کر دی۔ اس ہولناک مقابلے کے دوران کانسٹیبل علی کو براہِ راست گولی لگی، مگر سینے پر لگی بلٹ پروف جیکٹ سیسہ پلائی دیوار ثابت ہوئی اور کانسٹیبل کی جان بچ گئی۔ پولیس کی بھرپور جوابی کارروائی اور پیشہ ورانہ حکمت عملی کے نتیجے میں دو خطرناک ڈاکو گولیوں کی زد میں آکر زخمی ہوئے، جنہیں پولیس نے گرفتار کر لیا۔ ملزمان کے قبضے سے وہ موٹر سائیکل بھی برآمد کر لیا گیا جو ڈیڑھ ماہ قبل ایک شہری سے اسلحہ کے زور پر چھینا گیا تھا۔گرفتار ملزمان ڈکیتی اور وہیکل لفٹنگ کی درجنوں سنگین وارداتوں میں پولیس کو مطلوب تھے۔ اے ایس پی سید دانیال حسن نے دو ٹوک الفاظ میں کہا پولیس پر فائرنگ کرنا دراصل ریاست کی رِٹ کو چیلنج کرنے کے مترادف ہے۔ ہمارے جوانوں نے جس بہادری سے موت کی آنکھوں میں آنکھیں ڈال کر ان خطرناک مجرموں کو دبوچا ہے، وہ محکمہ پولیس کے لیے باعثِ فخر ہے۔ ہم واضح کر دینا چاہتے ہیں کہ گوجرخان کی حدود میں شہریوں کے مال و جان سے کھیلنے والے درندوں کے لیے کوئی جگہ نہیں، قانون کا آہنی ہاتھ ان کا تعاقب جاری رکھے گا۔ جبکہ ایس ایچ او مندرہ ملک تنویر اشرف نے کہا کہ یہ محض ایک گرفتاری نہیں بلکہ علاقے میں چھپے گینگز کے لیے ایک واضح پیغام ہے۔ ملزمان انتہائی شاطر اور مسلح تھے، لیکن ہماری ٹیم کی بروقت جوابی فائرنگ نے انہیں سر اٹھانے کا موقع نہیں دیا۔ مفرور ساتھیوں کے گرد گھیرا تنگ کر دیا گیا ہے اور بہت جلد وہ بھی اپنے عبرتناک انجام کو پہنچیں گے۔ سی پی او راولپنڈی سید خالد محمود ہمدانی نے کامیاب کارروائی پر پوری ٹیم کی کارکردگی کو سراہتے ہوئے شاباش دی اور تعریفی اسناد کا اعلان کیا ہے۔
یوٹیلیٹی بل زیادہ آنے پر 22 سالہ نوجوان نے خودکشی کرلی
راولپنڈی میں 22 سالہ نواجوان نے یوٹیلیٹی بل زیادہ آنے پر مبینہ طور پر خودکشی کر لی۔
تفصیلات کے مطابق تھانہ پیرودھائی کے علاقے گلی لوہاراں میں فاروق خان نے شہ رگ پر چھری پھیر کر زندگی کا خاتمہ کر لیا پولیس موقع پر پہنچ گئی اور سی سی ٹی کیمروں کی فوٹیج حاصل کرکے تحقیقات شروع کر دی ہیں،علاقے میں مبینہ اطلاع پھیل گئی کہ متوفی نے یوٹیلیٹی بل زیادہ آنے پر زندگی کا خاتمہ کرلیا تاہم واقعے کی مزید تحقیقات جاری ہیں۔ایس ایچ او پیر ودھائی کا کہنا ہے کہ خودکشی ہوئی ہے لیکن وجہ کا تعین نہیں ہو سکا اس لیے تحقیقات میں صورتحال واضح ہوگی۔
ہالینڈ کے زلزلہ پیما ماہر کی زلزلے کے حوالے سے بڑی پیشگوئی
ہالینڈ کے زلزلہ پیما ماہر فرینک ہوگربیٹس نے زلزلے کے حوالے سے بڑی پیشگوئی کی ہے-
فرینک ہوگربیٹس نے انتباہ جاری کرتے ہوئے کہا کہ آنے والے چند دنوں میں زمین پر ممکنہ زلزلہ خیز سرگرمیاں دیکھنے کو مل سکتی ہیں اور اس بار انہوں نے کسی ”سرپرائز“ سے بھی خبردار رہنے کی تاکیدکی ہےاجرامِ فلکی کی ترتیب جسے وہ سیاروں کی جیومیٹری کہتے ہیں، اس وقت خاص طور پر اہم ہے-
انہوں نے کہا کہ 13 سے 15 فروری کے درمیان زمین، چاند اور سیارہ مشتری ایک لائن میں آ رہے ہیں، جس کی وجہ سے زلزلوں کی سرگرمیاں بڑھ سکتی ہیں ،میں آپ کو 13 سے 15 فروری تک انتہائی محتاط رہنے کا مشورہ دیتا ہوں کیونکہ اس دوران ایک بڑا زلزلہ آ سکتا ہے اور کوئی حیران کن واقعہ پیش آ سکتا ہے۔
اس کے برعکس سائنسی ماہرین نے فرینک کے نظریات کو سختی سے مسترد کرتے ہوئے کہا کہ یہ دعوے غیر سائنسی ہیں اور سیاروں کی گردش کا زمین پر زلزلوں سے کوئی تعلق موجودہ سائنسی بنیادوں پر نہیں پایا جاتااگرچہ کچھ علاقے زلزلے کیلئے زیادہ خطرناک ہیں لیکن مختصر مدت میں درست پیش گوئی ممکن نہیں۔
گوجرہ:سی سی ڈی کا بڑا کریک ڈاؤن، اغوا برائے تاوان اور کمسن بچے کے قتل کا مرکزی ملزم مبینہ مقابلے میں ہلاک
گوجرہ (باغی ٹی وی،نامہ نگار عبد الرحمن جٹ):سی سی ڈی ٹوبہ ٹیک سنگھ نے بڑی کارروائی کرتے ہوئے اغوا برائے تاوان اور کمسن بچے کے قتل کے مقدمے میں مطلوب مرکزی ملزم کو مبینہ پولیس مقابلے میں ہلاک کر دیا۔
پولیس ذرائع کے مطابق مقدمہ نمبر 31/26 بجرم 365-A/302/201 ت پ تھانہ نواں لاہور میں مطلوب مرکزی ملزم ذوالقرنین ولد ضیاء اللہ قوم کمبوہ، سکنہ 339 ج ب گوجرہ سی سی ڈی ٹوبہ کی ٹیم کے ساتھ مبینہ مقابلے میں مارا گیا۔
تفصیلات کے مطابق سی سی ڈی پولیس ملزمان اور ناجائز اسلحہ فروشوں کی تلاش میں چک نمبر 364 ج ب کے قریب گشت کر رہی تھی کہ اس دوران موٹر سائیکل پر سوار تین مشتبہ افراد نے پولیس ٹیم کو دیکھتے ہی فائرنگ شروع کر دی۔ جوابی کارروائی کے دوران ایک ملزم اپنے ہی ساتھیوں کی فائرنگ سے موقع پر ہلاک ہو گیا جبکہ دو ملزمان فائرنگ کرتے ہوئے فرار ہونے میں کامیاب ہو گئے۔
پولیس کے مطابق ہلاک ہونے والا ملزم تھانہ نواں لاہور کی حدود میں اغوا برائے تاوان کے بعد کمسن بچے کے بہیمانہ قتل کا مرکزی کردار تھا۔ ملزم کے قبضے سے ناجائز پسٹل 30 بور بھی برآمد کر لیا گیا ہے۔
پولیس کا کہنا ہے کہ فرار ہونے والے ملزمان کی گرفتاری کے لیے چھاپے مارے جا رہے ہیں اور واقعے کی مزید تفتیش جاری ہے۔
جرنلسٹس ایسوسی ایشن آف پاکستان/یوکے کی اسلام آباد خودکش حملے کی شدید مذمت
اوکاڑہ (نامہ نگار ملک ظفر):جرنلسٹس ایسوسی ایشن آف پاکستان/یوکے (رجسٹرڈ) نے اسلام آباد کے علاقے ترلائی میں امام بارگاہ میں ہونے والے خوفناک خودکش دھماکے کی شدید الفاظ میں مذمت کی ہے، جس کے نتیجے میں قیمتی انسانی جانیں ضائع ہوئیں اور متعدد افراد زخمی ہوئے۔
اپنے مذمتی بیان میں ایسوسی ایشن نے کہا کہ بے گناہ شہریوں کو نشانہ بنانا بدترین دہشت گردی ہے جس کی کسی صورت اجازت نہیں دی جا سکتی۔ تنظیم نے شہداء کے لواحقین سے دلی تعزیت اور ہمدردی کا اظہار کرتے ہوئے زخمیوں کی جلد صحت یابی کے لیے دعا بھی کی۔
جرنلسٹس ایسوسی ایشن آف پاکستان/یوکے (رجسٹرڈ) نے حکومتِ پاکستان سے مطالبہ کیا کہ واقعے میں ملوث عناصر کو فوری طور پر گرفتار کر کے قانون کے کٹہرے میں لایا جائے اور دہشت گردی کے خلاف جاری جنگ کو مزید مؤثر اور تیز کیا جائے تاکہ شہریوں کی جان و مال کا تحفظ یقینی بنایا جا سکے۔
بیان میں کہا گیا کہ دہشت گردی کے ناسور کے خاتمے کے لیے قومی سطح پر مضبوط اور مستقل پالیسیوں کی ضرورت ہے، جبکہ سکیورٹی اداروں کو مزید وسائل اور اختیارات فراہم کیے جائیں تاکہ ایسے واقعات کا سدباب ممکن ہو سکے۔
تنظیم نے میڈیا برادری سے بھی اپیل کی کہ وہ ذمہ دارانہ اور محتاط رپورٹنگ کے ذریعے دہشت گرد عناصر کے عزائم کو ناکام بنانے میں اپنا کردار ادا کرے اور قومی اتحاد و یکجہتی کو فروغ دے۔
آخر میں جرنلسٹس ایسوسی ایشن آف پاکستان/یوکے (رجسٹرڈ) نے اس عزم کا اعادہ کیا کہ وہ دہشت گردی کے خلاف ہر فورم پر آواز بلند کرتی رہے گی اور پاکستانی عوام کے شانہ بشانہ کھڑی رہے گی۔
دراہمہ میں ڈاکو راج، پولیس ناکام، شہری غیر محفوظ
دراہمہ(باغی ٹی وی،نامہ نگارمحمدعلی مکھن) علاقہ میں ڈاکو راج قائم ہو چکا ہے، ایک ہی واردات میں تین ہنڈا 125 موٹر سائیکلیں اور درجنوں قیمتی موبائل فون چھین لیے گئے۔ تھانہ دراہمہ پولیس اور موجودہ ایس ایچ او جرائم کی روک تھام میں مکمل طور پر ناکام دکھائی دے رہے ہیں، جس کے باعث شہری خود کو غیر محفوظ محسوس کر رہے ہیں۔
تفصیلات کے مطابق گزشتہ رات ٹھہڑی کے قریب میرو مائنر پر دوست کی شادی سے واپس آنے والے تقریباً ایک درجن افراد کو پانچ مسلح ڈاکوؤں نے گھیر لیا۔ زنگلانی ہاؤس کے قریب ڈاکو اسلحہ کے زور پر تین عدد ہنڈا 125 (ماڈل 2026)، نقدی اور آدھے درجن سے زائد موبائل فون چھین کر فرار ہو گئے، حتیٰ کہ متاثرین کی جیکٹس تک اتار لی گئیں۔
علاقہ مکینوں کے مطابق گزشتہ ایک ہفتے کے دوران پانچ سے زائد موٹر سائیکلیں اور درجنوں موبائل فون لوٹے جا چکے ہیں، جبکہ اوورسیز پاکستانی خاص طور پر ڈاکوؤں کے نشانے پر ہیں۔ مزاحمت پر ایک نوجوان کے قتل کا واقعہ بھی پیش آ چکا ہے، مگر پولیس تاحال نہ ملزمان کو گرفتار کر سکی اور نہ ہی لوٹا گیا سامان برآمد ہو سکا۔
واقعے کی اطلاع پر ڈی ایس پی صدر سرکل اور سی سی ڈی انچارج زاہد خان لغاری موقع پر پہنچے اور شواہد اکٹھے کیے، تاہم عملی پیش رفت سامنے نہیں آ سکی۔ شہریوں کا کہنا ہے کہ موجودہ ایس ایچ او کی ناقص حکمت عملی کے باعث جرائم پیشہ عناصر بے خوف ہو چکے ہیں اور علاقہ عملاً ڈاکوؤں کے رحم و کرم پر ہے۔
شہریوں نے آئی جی پنجاب، آر پی او ڈیرہ غازی خان اور ڈی پی او سے مطالبہ کیا ہے کہ تھانہ دراہمہ میں فوری طور پر مؤثر پولیسنگ یقینی بنائی جائے، موجودہ ایس ایچ او کی کارکردگی کا جائزہ لے کر سخت کارروائی کی جائے، بصورت دیگر احتجاج کرنے پر مجبور ہوں گے.
گوجرہ:شیعہ علماء کونسل وسطی پنجاب نے اسلام آباد امام بارگاہ دھماکے کی شدید مذمت، فوری کارروائی کا مطالبہ
گوجرہ (نامہ نگار عبد الرحمن جٹ) شیعہ علماء کونسل وسطی پنجاب کی صوبائی، ڈویزنل اور ضلعی قیادت نے اسلام آباد کے علاقے ترلائی کلاں میں واقع امامبارگاہ خدیجہ الکبریٰ میں نمازِ جمعہ کے دوران ہونے والے خودکش دھماکے کی شدید الفاظ میں مذمت کی ہے اور ذمہ داران کے خلاف فوری کارروائی کا مطالبہ کیا ہے۔
شیعہ علماء کونسل کے نائب صدر سید آصف شیرازی، ڈپٹی انفارمیشن سیکرٹری سید طاہر کاظمی، ڈویزنل صدر سبطین رضا اور ضلعی صدر سید ثقلین کاظمی نے مشترکہ بیان میں کہا کہ اس بزدلانہ دہشتگردی میں بے شمار بے گناہ نمازی شہید جبکہ متعدد زخمی ہوئے ہیں۔ دورانِ نماز کلمہ گو مسلمانوں کو نشانہ بنانا کھلی دہشتگردی اور انسانیت کے خلاف سنگین جرم ہے۔
سید آصف شیرازی نے کہا کہ یہ کارروائی کرنے والے عناصر کالعدم دہشتگرد تنظیمیں اور فتنۂ خوارج ہیں، جنہوں نے ماہِ رمضان سے قبل ملک کے دارالحکومت کی پُرامن فضا کو خون میں نہلا دیا۔ انہوں نے وزیراعظم پاکستان اور آرمی چیف جنرل سید عاصم منیر سے مطالبہ کیا کہ امامبارگاہ سانحہ میں ملوث ذمہ داران کو فوری گرفتار کر کے قرار واقعی سزا دی جائے اور تمام کالعدم تنظیموں کے خلاف بھرپور آپریشن کیا جائے جو دہشتگردوں کو پروان چڑھا رہی ہیں۔
انہوں نے خبردار کیا کہ اسلام آباد میں بعض کالعدم تنظیموں کے افراد کھلے عام اجتماعات اور اہلِ تشیع مخالف نعرے بازی کرتے رہے، جس پر فوری کارروائی نہ ہونا تشویشناک ہے۔ آخر میں انہوں نے کہا کہ اگر حکومت نے مؤثر اقدامات نہ کیے تو احتجاجی لائحہ عمل اختیار کیا جائے گا۔
اوچ شریف:اڈہ محمود شہید پر دو موٹر سائیکلیں تصادم، 5 افراد زخمی
اوچ شریف (باغی ٹی وی نامہ نگار حبیب خان) اڈہ محمود شہید چوک، بھٹہ روڈ سے ملکانی پوسٹ کوٹلہ موسیٰ خان روڈ پر تیز رفتاری اور لاپرواہی کے باعث دو موٹر سائیکلیں آمنے سامنے ٹکرا گئیں، جس کے نتیجے میں خواتین اور ایک کمسن بچی سمیت پانچ افراد زخمی ہو گئے۔
ریسکیو ذرائع کے مطابق حادثہ اچانک پیش آیا، جہاں دونوں موٹر سائیکلیں تیز رفتار ہونے کی وجہ سے بے قابو ہو کر آپس میں ٹکرا گئیں۔ موقع پر پہنچنے والی ریسکیو 1122 کی ٹیم نے فوری طور پر زخمیوں کو ابتدائی طبی امداد فراہم کی اور بعد ازاں تحصیل ہیڈ کوارٹر ہسپتال احمد پور شرقیہ منتقل کر دیا۔
زخمیوں میں حضور بخش (50 سال)، عدنان (20 سال)، شہناز بی بی (35 سال)، نگینہ بی بی (18 سال) اور چار سالہ ہانیہ شامل ہیں۔ ریسکیو ذرائع کے مطابق زخمیوں کی حالت فی الحال مستحکم ہے، تاہم طبی نگرانی جاری ہے۔
