بھارتی ریاست اتر پردیش کے شہر آگرہ میں پولیس نے ایک خاتون کو اپنے شوہر کے مبینہ قتل اور اس کی لاش گھر کے باتھ روم میں دفن کرنے کے الزام میں گرفتار کر لیا۔
بھارتی میڈیا رپورٹس کے مطابق مقتول سریندر شرما گزشتہ 45 روز سے لاپتہ تھا۔ اس کی گمشدگی کی رپورٹ بھی ملزمہ روبی نے خود پولیس کو درج کرائی تھی اور دورانِ تفتیش وہ پولیس کے ساتھ شوہر کی تلاش کا ڈرامہ بھی کرتی رہی۔ اہلِ محلہ کے سامنے بھی وہ خود کو غم زدہ ظاہر کرتی رہی تاکہ کسی کو اس پر شک نہ ہو۔پولیس کے مطابق تحقیقات میں اس وقت اہم پیش رفت ہوئی جب مقتول کے بھائی نے ملزمہ کے بیانات پر شکوک و شبہات کا اظہار کیا، جس کے بعد روبی سے سخت پوچھ گچھ کی گئی۔تفتیش کے دوران ملزمہ کے انکشاف پر پولیس نے مزدوروں کی مدد سے گھر کے باتھ روم کا فرش تڑوایا، جہاں سے سریندر شرما کی لاش برآمد کر لی گئی۔پولیس کا کہنا ہے کہ واقعے کی مزید تحقیقات جاری ہیں تاکہ یہ معلوم کیا جا سکے کہ قتل اور لاش چھپانے میں کسی اور شخص کا بھی کردار تھا یا نہیں۔
