Category: جرائم و حادثات

اوکاڑہ (نامہ نگار ملک ظفر):جرنلسٹس ایسوسی ایشن آف پاکستان/یوکے (رجسٹرڈ) نے اسلام آباد کے علاقے ترلائی میں امام بارگاہ میں ہونے والے خوفناک خودکش دھماکے کی شدید الفاظ میں مذمت کی ہے، جس کے نتیجے میں قیمتی انسانی جانیں ضائع ہوئیں اور متعدد افراد زخمی ہوئے۔

اپنے مذمتی بیان میں ایسوسی ایشن نے کہا کہ بے گناہ شہریوں کو نشانہ بنانا بدترین دہشت گردی ہے جس کی کسی صورت اجازت نہیں دی جا سکتی۔ تنظیم نے شہداء کے لواحقین سے دلی تعزیت اور ہمدردی کا اظہار کرتے ہوئے زخمیوں کی جلد صحت یابی کے لیے دعا بھی کی۔

جرنلسٹس ایسوسی ایشن آف پاکستان/یوکے (رجسٹرڈ) نے حکومتِ پاکستان سے مطالبہ کیا کہ واقعے میں ملوث عناصر کو فوری طور پر گرفتار کر کے قانون کے کٹہرے میں لایا جائے اور دہشت گردی کے خلاف جاری جنگ کو مزید مؤثر اور تیز کیا جائے تاکہ شہریوں کی جان و مال کا تحفظ یقینی بنایا جا سکے۔

بیان میں کہا گیا کہ دہشت گردی کے ناسور کے خاتمے کے لیے قومی سطح پر مضبوط اور مستقل پالیسیوں کی ضرورت ہے، جبکہ سکیورٹی اداروں کو مزید وسائل اور اختیارات فراہم کیے جائیں تاکہ ایسے واقعات کا سدباب ممکن ہو سکے۔

تنظیم نے میڈیا برادری سے بھی اپیل کی کہ وہ ذمہ دارانہ اور محتاط رپورٹنگ کے ذریعے دہشت گرد عناصر کے عزائم کو ناکام بنانے میں اپنا کردار ادا کرے اور قومی اتحاد و یکجہتی کو فروغ دے۔

آخر میں جرنلسٹس ایسوسی ایشن آف پاکستان/یوکے (رجسٹرڈ) نے اس عزم کا اعادہ کیا کہ وہ دہشت گردی کے خلاف ہر فورم پر آواز بلند کرتی رہے گی اور پاکستانی عوام کے شانہ بشانہ کھڑی رہے گی۔

رینالہ خورد (نامہ نگار) موبائل مارکیٹ میں سیل شدہ دکان استعمال کرنے پر ایک شہری کے خلاف مقدمہ درج کر دیا گیا ہے، جبکہ دیگر خلاف ورزی کرنے والے افراد کے خلاف کوئی کارروائی نہیں کی گئی۔ متاثرہ دوکاندار نے میونسپل کمیٹی کے انفورسمنٹ انسپکڑ کاشف شریف کی جانب سے دوہرا معیار اپنانے پر شدید تحفظات کا اظہار کرتے ہوئے وزیر اعلیٰ پنجاب سے فوری کارروائی کا مطالبہ کر دیا ہے۔

تفصیلات کے مطابق، تقریباً ایک سال قبل پرانی سبزی منڈی رینالہ خورد کی اراضی پر دوکانات تعمیر کی گئیں اور ان کی نیلامی کی گئی۔ چند ماہ بعد زائد کرایہ کی عدم ادائیگی پر ان دوکانوں کو سیل کر دیا گیا۔

ذرائع کے مطابق، متعدد دوکانداروں نے مبینہ طور پر سیل شدہ دوکانیں خود ہی ڈی سیل کرکے استعمال شروع کر دیا، مگر خلاف ورزی کرنے والے دیگر دوکانداروں کے خلاف کارروائی کرنے کے بجائے، صرف ایک دوکاندار، سابق فوجی محمد اکرم، کے خلاف مقدمہ درج کر دیا گیا۔

محمد اکرم نے وزیر اعلیٰ پنجاب، کمشنر ساہیوال، ڈپٹی کمشنر اوکاڑہ اور اسسٹنٹ کمشنر رینالہ خورد سے مطالبہ کیا ہے کہ اس معاملے میں یکساں اور شفاف کارروائی کی جائے تاکہ کسی کے ساتھ امتیازی سلوک نہ ہو۔

اوکاڑہ (نامہ نگار ملک ظفر)اوکاڑہ میں پتنگ بازی، پتنگ سازی اور پتنگ فروشی کے خلاف پولیس کی جانب سے بھرپور کریک ڈاؤن جاری ہے۔ ضلع بھر میں زیرو ٹالرنس پالیسی کے تحت مؤثر اور بلا امتیاز کارروائیاں عمل میں لائی جا رہی ہیں۔

ترجمان اوکاڑہ پولیس کے مطابق ماہِ جنوری کے دوران پتنگ بازی اور پتنگ فروشی میں ملوث 25 افراد کے خلاف مقدمات درج کیے گئے، جبکہ مختلف کارروائیوں کے دوران 622 پتنگیں اور 62 کیمیکل ڈور برآمد کی گئی۔

پتنگ بازی کی روک تھام کو یقینی بنانے کے لیے ضلع بھر میں خصوصی پولیس ٹیمیں تشکیل دی گئی ہیں، جو مسلسل گشت اور مؤثر نگرانی کر رہی ہیں۔ اس سلسلے میں حساس علاقوں کی کڑی مانیٹرنگ کے لیے ڈرون کیمروں اور سیف سٹی کیمروں کی مدد بھی حاصل کی جا رہی ہے۔

ڈی پی او اوکاڑہ نے کہا ہے کہ پتنگ بازی، پتنگ سازی اور پتنگ فروشی پر مکمل پابندی عائد ہے، اور قانون کی خلاف ورزی کرنے والوں کے خلاف بلا تفریق سخت قانونی کارروائی کی جا رہی ہے۔ انہوں نے واضح کیا کہ غیر محفوظ پتنگ بازی انسانی جانوں کے لیے سنگین خطرہ ہے، اس لیے کسی قسم کی رعایت نہیں دی جائے گی۔

اوکاڑہ پولیس نے والدین سے اپیل کی ہے کہ وہ اپنے بچوں پر کڑی نظر رکھیں اور انہیں پتنگ بازی جیسے خطرناک اور جان لیوا مشغلے سے دور رکھیں۔ شہریوں سے بھی کہا گیا ہے کہ وہ پتنگ بازی کی روک تھام میں پولیس کے ساتھ مکمل تعاون کریں۔

ترجمان اوکاڑہ پولیس کا مزید کہنا تھا کہ عوامی تعاون کے بغیر اس ناسور کا مکمل خاتمہ ممکن نہیں، اور پولیس عوام کے جان و مال کے تحفظ کے لیے ہر ممکن اقدامات جاری رکھے گی۔