پاکستان آرمی نے آج ملکی سطح پر تیار کردہ جدید ترین فتح-4 گراؤنڈ لانچڈ کروز میزائل کا کامیاب تربیتی تجربہ کیا۔ اس میزائل کا دائرہ کار 750 کلومیٹر ہے اور یہ جدید ترین ایویونکس اور نیویگیشنل سسٹمز سے لیس ہے۔
آئی ایس پی آر کے مطابق، فتح-4 میں زمینی سطح کے قریب پرواز کرنے کی خصوصیت موجود ہے جس کی بدولت یہ دشمن کے میزائل ڈیفنس سسٹم کو باآسانی چکمہ دینے کی صلاحیت رکھتا ہے۔ یہ میزائل انتہائی درستگی کے ساتھ ہدف کو نشانہ بنانے کی بھرپور صلاحیت بھی رکھتا ہے، جس سے پاکستان آرمی کی روایتی میزائل فورس کی پہنچ، تباہ کن صلاحیت اور بقا مزید بڑھ گئی ہے۔
ترجمان کے مطابق یہ میزائل آرمی راکٹ فورس کمانڈ کا حصہ ہے اور اس کی شمولیت پاکستان کی دفاعی طاقت کو مزید مستحکم کرے گی۔ڈی جی آئی ایس پی آر کے مطابق میزائل لانچنگ کو چیف آف جنرل اسٹاف، مسلح افواج کے سینئر افسران، اور اس منصوبے پر کام کرنے والے محب وطن سائنسدانوں اور انجینئرز نے اپنی آنکھوں سے دیکھا۔
صدرِ مملکت، وزیرِ اعظم پاکستان، چیئرمین جوائنٹ چیفس آف اسٹاف کمیٹی اور تینوں مسلح افواج کے سربراہان نے فتح-4 کے کامیاب تربیتی تجربے پر افواجِ پاکستان، سائنسدانوں اور انجینئرز کو مبارکباد دی اور ان کی محنت اور جدوجہد کو خراجِ تحسین پیش کیا۔ذرائع کے مطابق فتح-4 کی شمولیت سے پاکستان کا روایتی دفاعی ڈھانچہ مزید مضبوط اور خطے میں طاقت کا توازن برقرار رکھنے میں مددگار ثابت ہوگا۔
وزیراعلیٰ سندھ سید مراد علی شاہ نے فتح 4 کروزمیزائل کے کامیاب تجربہ پر پوری قوم کو مبارکباد دی اور کہا کہ فتح 4 میزائل کا کامیاب تجربہ پاکستان کی دفاعی صلاحیت میں ایک اہم اضافہ ہے۔وزیراعلیٰ سندھ کا کہنا ہے کہ پاکستان امن پسند ملک ہے، اگر کسی نے ہماری طرف میلی آنکھ سے دیکھا تو بہت جلد وہ اپنے انجام سے واقف ہوگا۔وزیراعلیٰ سندھ نے اس شاندار کامیابی پر پاک فورسز، انجینئرز اور سائنسدانوں کو خراج عقیدت پیش کیا۔
