Category: اہم خبریں

سپریم کورٹ، نو مئی کے آٹھ مقدمات میں عمران خان کی ضمانت منظور کر لی گئی

چیف جسٹس یحییٰ آفریدی کی سربراہی میں تین رکنی بینچ نے کیس کی سماعت کی،دوران سماعت اسپیشل پراسیکیوٹر ذوالفقار نقوی نے عدالت کو بتایا کہ کل طبیعت ناسازی کے باعث پیش نہیں ہو سکا، جس پر چیف جسٹس نے کہا کوئی بات نہیں،چیف جسٹس پاکستان نے کہا آپ دونوں سے عدالت کے دو سوالات ہیں، لاہور ہائیکورٹ کا فیصلہ پڑھا ہو گا۔پہلا سوال! کیا ضمانت کیس میں حتمی فائنڈنگ دی جا سکتی ہے؟دوسرا سوال! ماضی میں سازش کے الزام پر سپریم کورٹ نے ملزمان کو ضمانت دی، کیا تسلسل کا اصول اس کیس پر اپلائی ہوگا؟

اسپیشل پراسیکیوٹر ذوالفقار نقوی نے کہا ضمانت کیس میں عدالت کی آبزرویشن ہمیشہ عبوری نوعیت کی ہوتی ہے، عدالتی آبزرویشن کا ٹرائل پر کوئی فرق نہیں پڑتا، سپریم کورٹ نے ضمانت سے متعلق گائیڈ لائنز دی ہوئی ہیں جو کبھی فالو ہوتی ہیں کبھی نہیں ہوتی،پراسیکیوٹر ذوالفقار نقوی نے سپریم کورٹ کا ضمانت سے متعلق فیصلہ پڑھا۔اسپیشل پراسیکیوٹر نے اعجاز احمد چوہدری کیس میں ضمانت منظوری کا فیصلہ عدالت میں پڑھا۔چیف جسٹس پاکستان نے ریمارکس دیے کہ سپریم کورٹ میں سازش سے متعلق کیسز میں ضمانت مسترد ہونے کے فیصلے پڑھ کر آئیں۔جسٹس یحییٰ آفریدی نے اسپیشل پراسیکیوٹر سے مکالمہ کرتے ہوئے کہا آپ کیس میں سازش کی بات کرتے ہیں، کوئی ایسا کیس ہے جس میں سازش ہوئی ہو اور ضمانت مسترد ہوئی ہو؟

چیف جسٹس یحییٰ آفریدی نے کہا حال ہی میں سپریم کورٹ میں جتنے سازش سے متعلق کیس آئے ان میں ضمانت منظور ہوئی ہے، سپریم کورٹ نے ایسے ہی الزام کے 3 کیسز میں ضمانتیں منظور کی ہیں، اپنے کیس کو سازش سے متعلق دیگر کیسز سے الگ ثابت کریں۔اسپیشل پراسیکیوٹر ذوالفقار نقوی نے کہا سپریم کورٹ میں سازش سے متعلق ضمانت منظور ہونے والےکیسز میں ثبوت نہیں ہوں گے، موجودہ کیس میں سوشل میڈیا پر سازش سے متعلق ثبوت موجود ہیں۔

چیف جسٹس یحییٰ آفریدی نے کہا آپ لوگوں نے ضمانت کی اسٹیج پر میرٹ پر بات نہیں کرنی۔عمران خان کے وکیل سلمان صفدر بولے میرے پاس سازش سے متعلق ضمانت کے تمام کیسز موجود ہیں۔چیف جسٹس نے اسپیشل پراسیکیوٹر کوضمانت مسترد سے متعلق فیصلے کی تفصیلات دینے کی ہدایت کی اور کہا پراسیکیوٹر سپریم کورٹ کے ایسےکیس کا حوالہ دیں کہ سازش کے الزام میں ضمانت منسوخ ہوئی ہو، سازش کے جن 3 مقدمات میں ضمانت دی۔

استغاثہ ذوالفقار نقوی نے عدالت کو بتایا کہ ان میں نام ایف آئی آر میں شامل نہیں تھے، جس پر چیف جسٹس نے کہا سازش کے جرم کے مقدمات میں ضمانت نہ دینا تھوڑا مشکل ہوتا ہے، کیس کے میرٹس پر کسی فریق کو نہیں سنیں گے، دونوں فریقین سمجھ لیں کیس کے مرکزی حقائق پر بات نہیں کرنے دیں گے، میرٹس ٹرائل کورٹ نے خود طے کرنے ہیں۔اسپیشل پراسیکیوٹر نے کہا کہ سپریم کورٹ نے 2014 میں ایک فیصلے میں فریم ورک طے کیا، فیصلے میں قرار دیا گیا ضمانت کیس میں دی گئی آبزرویشنز عارضی نوعیت کی ہوتی ہیں، 1996 اور 1998 میں یہی اصول اپنایا گیا کہ ضمانت میں دی گئی آبزرویشنز عارضی ہوتی ہیں۔ذوالفقار نقوی کا کہنا تھا عدالتی فیصلوں میں قرار دیا گیا کہ ضمانت میں دی گئی آبزرویشنز ٹرائل کو متاثر نہیں کرتیں، 2022 میں محمدرفیق بنام اسٹیٹ کیس میں بھی یہی اصول طے کیا گیا۔

پاکستان نے افغان سرزمین سے حملوں پر افغانستان سے مؤثر کارروائی کا مطالبہ کیا ہے۔

وزیر خارجہ اسحاق ڈار نے افغان وزیر خارجہ امیر خان متقی سے ملاقات میں دہشت گردی کے خلاف تعاون میں سست روی پر اظہارِ تشویش کیا اور افغان سرزمین سے حملوں پر مؤثر کارروائی کا مطالبہ کیا،نائب وزیراعظم نے کالعدم تحریک طالبان اور بی ایل اے، مجید بریگیڈ کے خلاف قابل تصدیق اقدامات کی ضرورت پر زور دیا،ترجمان دفتر خارجہ کے مطابق اس دوران افغان وزیر خارجہ نے یقین دلایا کہ افغان سرزمین کسی ملک کے خلاف استعمال نہیں ہونے دی جائے گی،دوران ملاقات دونوں وزرائے خارجہ نے سیاسی اور معاشی تعلقات میں مثبت پیشرفت پر اطمینان کا اظہار کیا،ترجمان دفتر خارجہ کے مطابق خطے میں دہشت گردی کے خاتمے، امن اور استحکام کےلیے قریبی تعاون جاری رکھنے پر اتفاق کیا گیا جبکہ تعلقات میں مثبت پیشرفت پر اطمینان کا اظہار کیا۔

دوسری جانب افغانستان کے دارالحکومت کابل میں سہ فریقی اجلاس میں سی پیک کو افغانستان تک توسیع دینے پر بھی اتفاق کیا گیا ہے،پاکستان، چین اور افغانستان وزرائے خارجہ کے درمیان چھٹا سہ فریقی اجلاس کابل میں ہوا۔دفتر خارجہ کے مطابق سہ فریقی اجلاس میں سیاسی، اقتصادی اور سیکیورٹی تعاون پر بات چیت ہوئی، اجلاس میں تینوں ممالک نے دہشتگردی کےخلاف مشترکہ کوششیں تیز کرنے کا عزم کیا۔ترجمان نے بتایا کہ سہ فریقی اجلاس میں تجارت، ٹرانزٹ، علاقائی ترقی، صحت، تعلیم و ثقافتی تعاون بڑھانے اور سی پیک کو افغانستان تک توسیع دینے پر اتفاق کیا گیا۔بعد ازاں نائب وزیر اعظم اسحاق ڈار کابل کا ایک روزہ دورہ مکمل کرکے پاکستان کیلئے روانہ ہوگئے، اسحاق ڈار کے ہمراہ افغانستان کے لیے خصوصی نمائندہ محمد صادق بھی شریک تھے۔وزارتِ خارجہ کے سینئر حکام بھی نائب وزیراعظم اسحاق ڈار کے ساتھ موجود تھے، اسحاق ڈار کی افغان نگراں وزیر خارجہ سے ملاقات بھی ہوئی۔

وزیراعظم محمد شہباز شریف نے وفاقی وزراء اور چیف آف آرمی اسٹاف، فیلڈ مارشل سید عاصم منیر، کے ہمراہ خیبر پختونخواہ کے سیلاب متاثرہ اضلاع سوات، بونیر، شانگلہ اور سواتی کا دورہ کیا۔ اس موقع پر وزیراعظم اور آرمی چیف کو جاری ریسکیو اور ریلیف آپریشنز کے حوالے سے تفصیلی بریفنگ دی گئی۔

وزیراعظم نے سیلاب متاثرین سے ملاقات کے دوران وفاقی حکومت اور پاک فوج کی جانب سے ان کی ہر ممکن مدد کے لیے بھرپور عزم کا اعادہ کیا۔ انہوں نے افواجِ پاکستان اور سول انتظامیہ کی انتھک محنت کو سراہتے ہوئے متاثرہ عوام کے ساتھ یکجہتی کا اظہار کیا اور یقین دلایا کہ حکومت ہر قسم کی مدد فراہم کرے گی۔وزیراعظم نے کہا کہ ملک کے تمام دستیاب وسائل کو متحرک کیا جائے گا تاکہ متاثرہ علاقوں میں جلد از جلد بحالی اور معمولات زندگی کی بحالی کو ممکن بنایا جا سکے۔

انہوں نے خاص طور پر غیر قانونی تجاوزات، لکڑی مافیا، اور ندی نالوں میں غیر قانونی کان کنی اور توڑ پھوڑ کی جانب توجہ دلائی، جو جانی و مالی نقصان کا باعث بنتی ہیں۔ انہوں نے واضح کیا کہ پاکستان ایک مضبوط ریاست ہے جہاں قانون کی حکمرانی لازم ہے اور قانون شکنی کرنے والوں کے خلاف بلا تفریق سخت کارروائی کی جائے گی۔

آرمی چیف فیلڈ مارشل سید عاصم منیر نے بھی ریسکیو آپریشنز میں مصروف افواج، پولیس اور سول انتظامیہ کے اہلکاروں سے ملاقات کی اور ان کی خدمات کو سراہا۔ انہوں نے کہا کہ سیلاب متاثرین کی مدد کے لیے ہر ممکن کوشش کی جائے گی اور زمین پر کام کرنے والے افسران و جوانوں سے کہا کہ اس مشن کو مکمل عقیدت اور دیانتداری کے ساتھ انجام دیں۔ انہوں نے کہا کہ شہریوں کی حفاظت اور راحت ان کی اولین ترجیح ہونی چاہیے۔وزیراعظم اور دیگر شرکاء نے اس قدرتی آفت میں جان بحق ہونے والوں کے ایصال ثواب کے لیے فاتحہ خوانی بھی کی۔

تحریک انصاف کے اندر شدید سیاسی انتشار اور اختلافات نے پارٹی قیادت کو سخت مشکل میں ڈال دیا ہے۔ ذرائع کے مطابق پارٹی کے سابق چیئرمین عمران خان نے تحریک انصاف کے اپنے ہی اراکین اسمبلی پر اعتماد کھو دیا ہے۔ عمران خان پارٹی کے اراکین کی طرف سے پارٹی کی حکمت عملی کے خلاف اپنی مرضی کی باتیں عوام میں کرنے پر شدید نالاں ہیں۔

عمران خان جیل میں ہیں اور سزا کاٹ رہے ہیں، ایسے میں اراکین اسمبلی کو پی ٹی آئی کے ٹکٹ یا پارٹی کی حمایت سے آزادمنتخب ہو کر ایوان میں پہنچے وہ عمران خان کی پالیسیوں کے خلاف چل رہے ہیں،پارٹی ذرائع بتاتے ہیں کہ عمران خان اب اپنے اراکین اسمبلی کو اپنی بات منوانے اور پارٹی کی مجموعی پالیسی پر عمل کروانے میں ناکام ہو چکے ہیں۔ اس کا اظہار اس وقت ہوا جب قومی اسمبلی میں عمر ایوب کی نااہلی کے بعد اپوزیشن لیڈر کا عہدہ خالی ہوا، لیکن عمران خان نے تحریک انصاف کے کسی رکن کو اپوزیشن لیڈر نامزد نہیں کیا۔کیونکہ عمران خان کو اب پی ٹی آئی اراکین پر اعتماد نہیں رہا، عمران خان نے قومی اسمبلی میں اپوزیشن لیڈر کے عہدے کے لیے پارٹی کے کسی رکن اسمبلی کو منتخب کرنے کی بجائے محمود خان اچکزئی کو نامزد کیا ہے۔ اس کے ساتھ ہی سینیٹ میں اپوزیشن لیڈر کا عہدہ اعظم خان سواتی کو دیا گیا ہے۔

یہ فیصلہ تحریک انصاف کے اندرونی اختلافات کی عکاسی کرتا ہے، جس میں پارٹی قیادت اور ارکان اسمبلی کے مابین اعتماد ختم ہو چکا ہے۔اب یہ بات واضح ہو چکی ہے کہ پارٹی اپنی حد تک بھی اپنا نمائندہ اپوزیشن لیڈر منتخب کرنے سے قاصر ہے۔ سیاسی مبصرین کا کہنا ہے کہ پی ٹی آئی ختلافات کے باعث ختم ہونے کے قریب پہنچ چکی ہے۔

اسلام آباد: وزیراعظم شہباز شریف اور آرمی چیف فیلڈ مارشل عاصم منیر نے سیلاب سے شدید متاثرہ علاقوں کا دورہ کرنے کے لیے اپنی روانگی کا آغاز کر دیا ہے۔

وزیراعظم اور آرمی چیف سب سے پہلے خیبر پختونخوا کے ضلع سوات پہنچے، جہاں ان کا پرتپاک استقبال وفاقی وزیر امیر مقام نے کیا۔ذرائع کے مطابق، وزیراعظم اور فیلڈ مارشل سوات کے بعد بونیر روانہ ہو گئے ہیں تاکہ سیلاب سے شدید متاثرہ علاقوں کا تفصیلی جائزہ لیا جا سکے اور وہاں موجود عوام کی مشکلات کا ازالہ کیا جا سکے۔

خیبر پختونخوا میں حالیہ شدید بارشوں اور سیلاب کی تباہ کاریوں کے باعث اب تک 350 سے زائد افراد جان کی بازی ہار چکے ہیں جن میں سب سے زیادہ تعداد 228 افراد بونیر سے ہے، جہاں سیلاب نے بڑے پیمانے پر تباہی مچائی ہے۔دوسری جانب، نیشنل ڈیزاسٹر مینجمنٹ اتھارٹی (این ڈی ایم اے) کی جانب سے خیبر پختونخوا کے سیلاب زدہ علاقوں میں امدادی کارروائیاں جاری ہیں۔ این ڈی ایم اے نے آج صبح باجوڑ اور مانسہرہ کے لیے دو الگ الگ امدادی قافلے روانہ کیے ہیں جن میں خیمے، کمبل، جنریٹر، ڈی واٹرنگ پمپس، راشن بیگز اور ادویات شامل ہیں۔این ڈی ایم اے حکام نے بتایا ہے کہ امدادی سامان متعلقہ ضلعی انتظامیہ کو حوالے کیا جائے گا تاکہ متاثرین میں بروقت تقسیم ممکن ہو سکے۔ این ڈی ایم اے، مسلح افواج اور مختلف فلاحی اداروں کے تعاون سے خیبر پختونخوا اور گلگت بلتستان کے لیے امدادی سامان پہنچا رہا ہے تاکہ سیلاب متاثرین کو فوری ریلیف فراہم کیا جا سکے۔

سیلاب کی تباہ کاریوں اور امدادی سرگرمیوں کے حوالے سے وزیراعظم شہباز شریف اور آرمی چیف کا یہ دورہ متاثرہ علاقوں میں حکومتی سنجیدگی اور عوامی فلاح و بہبود کے عزم کی عکاسی کرتا ہے۔

آذر بائیجان کے اعلیٰ سطح کے دفاعی وفد نے ائیر ہیڈ کوارٹرز کا دورہ کیا اور ملٹی ڈومین وار فیئرکے حوالے سے پاک فضائیہ کی مکمل حکمت عملی سیکھنےکی خواہش ظاہر کی۔

ڈی جی آئی ایس پی آر کے مطابق آذر بائیجان کے اعلیٰ سطح کے دفاعی وفدکی قیادت نائب وزیر اور ڈی جی دفاع ایگل گوربانوف کر رہے تھے، آذربائیجان کےدفاعی وفد نے سربراہ پاک فضائیہ ائیرچیف مارشل ظہیراحمد بابر سدھو سے ملاقات کی جس میں باہمی دلچسپی کے امور پر تفصیلی گفتگو کی گئی۔ ملاقات میں تربیت، جدیدیت اور تکنیکی مہارت اور دفاعی تعاون کو فروغ دینے کے مشترکہ عزم پر زور دیا گیا،اس موقع پر ائیرچیف نے پاک فضائیہ کے جاری منصوبوں،آپریشنل ڈھانچے کے حوالے سے وفد کو آگاہ کیا۔ائیر چیف نے وفد کو اہداف اور مستقبل کی جنگی ضروریات پر مبنی منصوبوں سے آگاہ کیا۔ سربراہ پاک فضائیہ نے آذربائیجان کی فضائیہ کو افرادی قوت کی استعداد کار بڑھانے کی یقین دہانی کے ساتھ مینٹیننس کےمعیار کو بھی بہتر بنانے اور آپریشنل تربیت میں بھرپور تعاون کی یقین دہانی کرائی۔

آئی ایس پی آر کے مطابق آذربائیجان کے وفد کے سربراہ نے پاک فضائیہ کے عملے کی مثالی پیشہ ورانہ صلاحیتوں کو سراہا۔ انہوں نے ایرو اسپیس ٹیکنالوجیز کے میدان میں ترقی کے ذریعے حاصل غیرمعمولی کامیابیوں کو سراہا، آذربائیجان کے نائب وزیر نے ملٹری ٹو ملٹری تعاون میں اضافے کے لیے گہری دلچسپی ظاہر کی۔ آذربائیجان کے وفد نے دوطرفہ مشقوں کے ذریعے مشترکہ تربیتی سرگرمیوں کی اہمیت پر زور دیا اور کہا کہ اس تعاون سے باہمی تعاون اور پیشہ وارانہ مہارت میں اضافہ ہوگا،وفد نے ملٹی ڈومین آپریشنز میں تعاون کے لیے آذربائیجان کی شدید خواہش کا اظہار کیا اور کہا کہ پاک فضائیہ کا بھرپور آپریشنل تجربہ آذربائیجان کے لیے ایک قیمتی ماڈل ہے۔ آذربائیجان ملٹی ڈومین وارفیئرکے حوالے سے پاک فضائیہ کی مکمل حکمتِ عملی سیکھنے کا خواہاں ہے،وفد نے اپنے ملک کے پورے تربیتی نظام کو ازسرنو ترتیب دینے کے ارادے کا اعادہ کیا اور کہا کہ پاک فضائیہ کے ساتھ تعاون آذربائیجان کی فضائیہ کی جدیدیت اورپیشہ ورانہ ترقی میں نمایاں کردارادا کرےگا۔

ڈی جی آئی ایس پی آر کے مطابق آذربائیجان کے دفاعی وفد کا دورہ اسٹریٹجک شراکت داری مزید مضبوط بنانے کے باہمی عزم کا عکاس ہے۔ یہ دورہ خطے میں امن، سلامتی اور استحکام کے مشترکہ مقاصد کو بھی تقویت دیتا ہے۔

کراچی میں موسلا دھار بارش کا سلسلہ جاری ہے اور محکمہ موسمیات نے شہر قائد میں آئندہ 2 روز بارش کے حوالے سے اہم قرار دیے ہیں۔

محکمہ موسمیات کے مطابق شہر میں ایک سے 2 گھنٹے بعد مزید بارش ہوسکتی ہے، شہر میں آج کے مقابلے میں کل زیادہ بارش کا امکان ہے،کراچی میں منگل کی صبح سے وقفے وقفے سے موسلا دھار بارش کا سلسلہ جاری ہے جس کے باعث شہر میں اربن فلڈنگ کی صورتحال پیدا ہوچکی ہے، نشیبی علاقے زیر آب آگئے ہیں اور کئی علاقوں میں پانی گھروں میں داخل ہوگیا ہے۔قائد آباد، لانڈھی، ملیر، گلشن حدید، لیاقت آباد سی ون ایریا اور دیگر علاقوں میں پانی گھروں میں داخل ہوگیا ہے جب کہ شاہراہ فیصل، آئی آئی چندریگر روڈ، ایم آر کیانی روڈ سمیت شہر کی بیشتر شاہراہیں تالاب کا منظر پیش کررہی ہیں۔شاہراہوں پر پانی جمع ہونے کے باعث ٹریفک جام میں ہزاروں شہری پھنس گئے۔ریسکیو حکام کے مطابق شہر میں مختلف حادثات میں 8 افراد جاں بحق ہوئے۔ریسکیو حکام کے مطابق گلستان جوہر بلاک 12 میں گھر کی دیوار گرنے سے 4 افراد جاں بحق ہوئے جبکہ اورنگی سیکٹر ساڑھے 11 میں گھر کی دیوار گرنے سے ایک بچہ جاں بحق ہوا۔نارتھ کراچی میں کرنٹ لگنے سے ایک شخص جاں بحق ہوا جبکہ ڈیفنس خیابان بخاری میں کرنٹ لگنے سے ایک شخص جاں بحق ہوا۔ریسکیو حکام کا بتانا ہے کہ ملیر 15 میں پیٹرول پمپ پرآگ لگنے سے ایک شخص جاں بحق ہوا۔

موسمیاتی تجزیہ کار جواد میمن کا کہنا ہےکہ شہر کے اوپر مزید بادل بن رہے ہیں جس سے شہر میں مزید بارش ہوگی۔
ترجمان محکمہ موسمیات کے مطابق بھارتی ریاست مغربی اوڑیسہ کے پاس ایک سسٹم ڈپریشن کی صورت میں موجود ہے، یہ سسٹم آئندہ ایک سے ڈیڑھ دن میں بھارتی گجرات پہنچ جائے گا۔ ترجمان نے بتایا کہ اس دوران 23 اگست تک بارشوں کا سسٹم سندھ پر اثرانداز رہے گا جس سے صوبے کے اکثر مقامات پر درمیانی اور کہیں شدید موسلا دھار بارش ہوسکتی ہے۔ترجمان کے مطابق بارشوں کا یہ اچھا سسٹم لگ رہا ہے، آئندہ 2 روز کراچی میں بھی بارش کے حوالے سے بہت اہم ہیں جس دوران درمیانی سے تیز موسلادھار بارش کے باعث شہر میں اربن فلڈنگ ہوسکتی ہے۔موسمیاتی ماہرین کا کہنا ہےکہ مون سون سسٹم بحیرہ عرب میں موجود ہے جس کے باعث کراچی میں آج وقفے وقفے سے بارش ہوتی رہے گی، شہر میں آج تیز بارش ہوئی اور درجہ حرارت میں کمی آئی توکل معتدل بارش کا امکان ہے۔موسمیاتی ماہرین نے عوام سے اپیل کی کہ شدیدگرج چمک کے دوران شہری گھروں سے باہر نہ نکلیں اور گرج چمک کےدوران صرف ایمرجنسی کالز کےلیےفون استعمال کریں۔موسمیاتی ماہرین نے ہدایت کی کہ سڑک پر موجود افراد درخت، باڑ اور کھمبوں سے دور رہیں، آسمانی بجلی کی زد میں آنے والی ہر چیز پر براہ راست اثر ہوتاہے۔

کراچی شہر میں صبح سے اب تک ہونے والی بارش کے اعداد و شمار سامنے آگئے،محکمہ موسمیات کے مطابق آج سب سے زیادہ بارش گلشن حدید میں 145 ملی میٹر جبکہ کیماڑی میں 137ملی میٹر بارش ریکارڈ کی گئی۔جناح ٹرمینل پر 135 ملی میٹر جبکہ اولڈ ائیرپورٹ پر 125 ملی میٹر بارش ریکارڈ ہوئی، سعدی ٹاؤن میں 123 اورگلستان جوہر میں 122 ملی میٹر بارش ریکارڈ ہوئی۔کلفٹن ڈی ایچ اے میں 121 ملی میٹر، فیصل بیس پر 114، سرجانی ٹاؤن میں 111،نارتھ کراچی 108ملی میٹربارش ریکارڈ ہوئی۔کورنگی میں 96.6، ناظم آباد میں 82 اور مسرور بیس پر 75 ملی میٹر بارش ریکارڈ کی گئی جبکہ گلشن معمار میں 75.2 ملی میٹر اور اورنگی ٹاؤن میں 66.2 ملی میٹر بارش ریکارڈ ہوئی۔

سندھ حکومت نے کل کراچی میں اسکولز بند رکھنے کا اعلان کردیا،وزیر تعلیم سندھ سردار شاہ کا کہنا ہے کہ کل ممکنہ بارشوں کے باعث شہر کے اسکول بند رہیں گے،سندھ کے سینیئر وزیر شرجیل انعام میمن کا بھی کہنا ہے کہ کل کراچی میں نجی اور سرکاری اسکولز بند رہیں گے،شرجیل میمن نے کہا کہ کراچی میں بارشوں کے دوران حکومت کی پوری مشینری فعال ہے، نکاسی آب کا کام جاری ہے، عوام کی جان اور حفاظت سب سے مقدم ہے، شہری غیرضروری طور پر گھروں سے باہر نہ نکلیں،سندھ حکومت عوام کو ہرگز اکیلا نہیں چھوڑے گی اور شہریوں کو ہر ممکن سہولت فراہم کی جا رہی ہے۔

میئر کراچی مرتضیٰ وہاب کا کہنا ہے کہ اگر 40 ملی میٹر سے زائد بارش ہوتی ہے تو صورتحال خراب ہوتی ہے، صبح سے اب تک شہر میں 100 ملی ملیٹر سے زائد بارش ہوچکی ہے، تنقید کرنا لوگوں کا حق ہے، لیکن حقائق بھی جان لینے چاہییں، شہر میں 2 گھنٹے مسلسل بارش ہوئی، ابھی بھی جاری ہے، ہم سب سڑکوں پر ہیں اور صورتحال کو دیکھ رہےہیں،مجھے اندازہ ہے کہ لوگ پریشان ہیں، لوگ غیر ضروری طور پر گھروں سے نہ نکلیں، انہوں نے کہا کہ بارش کے سلسلہ ختم ہونے کے بعدڈیڑھ گھنٹے کے بعد صورتحال معمول پر آتی ہے،شہر میں 100 ملی میٹر سے زائد بارش ہوچکی، اگر 40 ملی میٹر سے اوپر بارش ہوتی ہے تو صورتحال خراب ہوتی ہے۔

کراچی میں موسلا دھار بارش کے باعث فضائی آپریشن شدید متاثر ہواہے، متعدد پروازیں منسوخ اور تاخیر کا شکار ہیں،شہر قائد میں جاری موسلا دھار بارش نے جہاں معمولات زندگی کو شدید متاثر کیاہے وہیں جناح انٹرنیشنل ائیرپورٹ پر فضائی آپریشن بھی شدید متاثر ہوا ہے،ایوی ایشن ذرائع کے مطابق بارش اور خراب موسم کے باعث 8 پروازیں منسوخ جب کہ 20 سے زائد پروازیں تاخیر کا شکار ہو چکی ہیں،اسکردو سے کراچی آنے والی پی آئی اے کی پرواز PK-456 لینڈ نہ کرسکی اور اسے متبادل ائیرپورٹ کی جانب موڑ دیا گیا۔ اسی طرح دبئی سے آنے والی پرواز FZ 335 کو کراچی کے بجائے ملتان روانہ کر دیا گیا،کراچی سے اسلام آباد کی 4 پروازوں کی آمد و روانگی میں بھی تاخیر ریکارڈ کی گئی جب کہ جدہ، دبئی، شارجہ، ابوظبی اور کولمبو سے آنے والی پروازیں بھی وقت پر لینڈ نہ کرسکیں،کراچی سے مدینہ، دبئی، پشاور،ٹورنٹو، جدہ کی پروازوں میں 1 سے 5 گھنٹے تاخیرہوئی،کراچی کوئٹہ کی قومی ائیرلائنز کی 2 پروازیں پی کے 310، 311 منسوخ کر دی گئیں،کراچی اسلام آبادکی قومی ائیر کی 2 پروازیں پی کے 308، 309 بھی منسوخ ہوگئیں۔کراچی سے دبئی کی دو پروازیں بھی منسوخ کر دی گئیں۔ترجمان پی آئی اے کا کہنا ہےکہ تیز ہواؤں اور بارش سے پروازوں کی آمدورفت میں معمولی تبدیلی کی گئی ہے، چند پروازوں کی منزل تبدیل ہوگئی اور ان کو متبادل ائیر پورٹس پر اتارا گیا ہے،ترجمان کا کہنا ہےکہ موسم کی خرابی کے باعث پروازوں کی آمدورفت میں تاخیر ہوسکتی ہے۔موسم کی غیر متوقع صورتحال کے پیش نظر مسافر پروازوں کے متعلق معلومات لیں۔