Category: اہم خبریں

وزیراعظم محمد شہباز شریف کی زیر صدارت وفاقی کابینہ کا اجلاس آج وزیراعظم ہاؤس, اسلام آباد میں منعقد ہوا۔

وفاقی کابینہ نے وزارت بحری امور کی سفارش پر سی کیرج شپنگ ڈاکیومینٹس (Sea Carriage Shipping Documents) بل، 2025 کے مسودے کے حوالے سے ضروری قانونی کاروائی شروع کرنے کی منظوری دے دی۔وفاقی کابینہ نے وزارت سمندر پار پاکستانی و ترقی انسانی وسائل کی سفارش پر ایمپلائیز اولڈ ایج بینیفٹس انسٹیٹیوشن (EOBI) کی پینشن میں 15 فیصد اضافے کی منظوری دے دی جس کا اطلاق یکم جنوری، 2025 سے ہو گا. پینشن میں یہ اضافہ ادارہ اپنے وسائل سے پورا کرے گا۔

وزیراعظم نے ایمپلائیز اولڈ ایج بینیفٹس انسٹیٹیوشن(EOBI ) میں اداراتی اصلاحات کے حوالے سے کابینہ کی کمیٹی تشکیل کرنے کی ہدایت کی ۔ یہ کمیٹی ادارے کی اصلاحات کے ساتھ ساتھ غیر منظم لیبر سیکٹر جیسا کہ گھریلو ملازمین، کاشتکاری سے وابستہ ملازمین اور اس طرح کے دیگر شعبوں کے ملازمین جنہیں اب تک نظر انداز کیا جاتا رہا، کو اولڈ ایج بینیفٹس کی فراہمی کے حوالے سے تجاویز پر غور و خوض کرے گی۔ غیر منظم سیکٹر کی اصلاحات سے اب تک نظر انداز کئے گئے سیکٹرز کے ملازمین کو انکے حقوق ملیں گے.

وفاقی کابینہ نے وزارت قومی صحت کی سفارش پر اسپتالوں اور متعلقہ صحت کےاداروں میں استعمال ہونے والی انسداد کینسر، دل کے امراض اور زندگی بچانے والی ادویات کی درآمد پر میں پانچ سال کی مزید استثنٰی کی منظوری دے دی۔ یہ ادویات انسانی زندگیوں کو بچانے کے لئے انتہائی اہم ہیں اور انکی فوری دستیابی کی ضرورت کو مدنظر رکھتے ہوئے یہ استثنی دیا گیا ہے. یہ ادویات صرف اسپتالوں اور متعلقہ اداروں میں دستیاب ہوں گی اور ان کی کھلے عام فروخت پر پابندی ہو گی اور ان ادویات کی درآمد کے لئے پہلے لائسینسنگ اتھارٹی سے منظوری درکار ہو گی۔وفاقی کابینہ نے کابینہ کمیٹی برائے لیجسلیٹو کیسز کے 2 جولائی 2025 اور 3 جولائی 2025 کو ہوئے اجلاس میں لئے گئے فیصلوں کی توثیق کردی۔

سیکورٹی فورسز کی جانب سے جنوبی وزیرستان میں فتنہ الہندوستان کے خلاف آپریشن کامیابی سے جاری ہیں۔ایک کارروائی کے دوران خارجی حمید اللہ جہنم واصل ہوگیا جو مختلف دہشتگردانہ حملوں میں ملوث تھا ۔ہلاکت کے بعد خارجی حمید اللہ کے ورثاء نے لاش لینے سے انکار کر دیا ۔

خارجی کے والد کا کہنا تھا کہ حمید اللہ نے جو دہشتگردانہ حملے کئے وہ ہمارے عقیدے ، اسلام کے برعکس اور غیر قانونی ہیں، حکومت پاکستان سے درخواست کرتا ہوں کہ وہ اس کی لاش کو ختم کردیں۔خارجی حمید اللہ کے بھائی کا کہنا تھا کہ ان کے بھائی نے جو حملے کئے وہ اسلامی روایات کہ خلاف ہیں ۔

ورثاء کا لاش لینے سے انکار اس بات کی دلیل ہے کہ پاکستان کے شہری دہشت گردی کے خلاف متحد ہیں۔یہ پیغام ان نوجوانوں کے لیے بھی ایک انتباہ ہے جو شدت پسندی کی طرف مائل ہو کر صرف بدنامی، رسوائی اور بربادی کا باعث بن جاتے ہیں

آپریشن بنیان مرصوص میں شکست کے بعد بھارتی قومی سلامتی کے مشیر اجیت دوول کی ہزیمت چھپانے کی ناکام کوشش سامنے آئی ہے

اجیت دوول نے حقیقت کو مسخ کرکے بی جے پی کی ہندوتوا ذہنیت کے تحت جھوٹا بیانیہ گھڑا،آپریشن سندور کے بارے میں آئی آئی ٹی مدراس کے طلبہ سے خطاب کرتے ہوئے اجیت دوول نے کہا؛”آپ مجھے ایک بھی تصویریا ثبوت دکھائیں جس سے ثابت ہو کہ کسی بھارتی عمارت کو نقصان پہنچا ہو”بھارت 2047 تک دنیا کی سب سے بڑی فوج بن سکتا ہے،

بھارتی مشیر کا دنیا کی سب سے بڑی فوج بننے کا دعویٰ ، بی جے پی کی خطے کو جنگ میں جھونکنے کی ذہنیت کا عکاس ہے،دوسری جانب بھارتی فوجی قیادت متعدد بار بھارتی طیاروں کے تباہ ہونے اور نقصانات کا اعتراف کر چکی ہے،11 مئی کو ائر مارشل اے کے بھارتی، ڈائریکٹر جنرل ائر آپریشنز نے اعتراف کیا کہ "جنگ میں نقصان ہوتے ہیں”31 مئی کو *جنرل انیل چوہان (چیف آف ڈیفنس اسٹاف)* نے اعتراف کیا کہ ؛”جنگ کے اگلے دو دن تک ہماری پروازوں کی صلاحیت متاثر رہی”انڈین نیوی کیپٹن شیو کمار نے کہا کہ بھارت کے جنگ کے دوران طیارے ضرور ضائع ہوئے، انڈین ڈپٹی آرمی چیف لیفٹیننٹ جنرل راہول سنگھ نے اعتراف کیا کہ پاکستانی افواج کو ہماری ائیر فورس کی نقل و حرکت کی مکمل معلومات تھیں، ونگ کمانڈر ویومیکا سنگھ کا کہنا تھا کہ ادھم پور، پٹھان کوٹ ، آدم پور اور بھج کے فضائی اڈوں پر سامان اور اہلکار متاثر ہوئے،

اعلیٰ بھارتی فوجی افسران کی جانب سے نقصانات کا اعتراف بھارت کی عسکری ناکامی کا واضح ثبوت ہے،آپریشن بنیان مرصوص میں پاکستانی افواج نے بھارتی فوجی تنصیبات کو کامیابی سے نشانہ بنا کر دفاعی برتری ثابت کر دی،پاکستان نےثابت کیا کہ پاکستان اپنے دفاع میں بھارت میں کسی بھی جگہ پر جوابی حملہ کرنے کی صلاحیت رکھتا ہے،اجیت دوول کا بیان خطے میں عدم استحکام پیدا کرنے کی سوچ اور بھارت کی جنگی جنون کو بے نقاب کرتا ہے،مودی سرکاراپنی بدانتظامی اور نااہلی پر پردہ ڈالنے کے لیے نفرت، تعصب، اسلاموفوبیا اور جنگی جنون کا سہارا لے رہی ہے،بھارتی قیادت سیاسی مفادات کے حصول کے لیے نفرت انگیز بیانیہ اپنا کر خطے کے امن سے کھیل رہی ہے

برطانیہ نے پاکستانی ائیر لائنز پر عائد طویل عرصے سے جاری پابندیاں ختم کرنے کا اعلان کر دیا ہے، جس کے بعد پاکستانی ائیر لائنز برطانیہ کے لیے پروازوں کے لیے درخواست دے سکتی ہیں۔ برطانوی ہائی کمیشن نے تصدیق کی ہے کہ پاکستانی ائیر لائنز اب یوکے کی سول ایوی ایشن اتھارٹی سے اجازت لے کر پروازیں چلا سکیں گی۔

برطانوی ہائی کمیشن کے مطابق یہ پابندیوں کا خاتمہ سیفٹی لسٹ سے پاکستان کو نکالنے اور تکنیکی عمل کی کامیابی کی بنیاد پر ممکن ہوا ہے۔ پاکستان میں برطانیہ کی ہائی کمشنر جین میریٹ نے اس موقع پر کہا کہ وہ جلد ہی پاکستانی ائیر لائن کے ذریعے سفر کرنے کی خواہش مند ہیں اور اس فیصلے سے دونوں ممالک کے درمیان فضائی رابطوں میں بہتری آئے گی، جس سے خاندانوں کے آپس میں ملاپ میں بھی مدد ملے گی۔

یہ پابندیاں مئی 2020 میں کراچی میں پی آئی اے کے ایک طیارے کے حادثے کے بعد عائد کی گئی تھیں۔ اس حادثے کے بعد اس وقت کے وزیر ہوا بازی نے پارلیمنٹ کو آگاہ کیا تھا کہ پاکستان میں ایک تہائی کمرشل پائلٹس کے پاس جعلی ڈگریاں ہیں، جس کی وجہ سے جون 2020 میں برطانیہ اور یورپی یونین نے پاکستانی پروازوں پر پابندی عائد کر دی تھی۔

حکومت پاکستان کی مسلسل کوششوں اور اصلاحاتی اقدامات کے نتیجے میں گزشتہ برس نومبر میں یورپی یونین نے پاکستانی ائیر لائنز پر سے پابندیاں ہٹا دی تھیں۔ اب برطانیہ نے بھی اسی طرز پر پاکستانی ائیر لائنز کو برطانیہ کے لیے پروازیں چلانے کی اجازت دے دی ہے، جو پاکستان کی ایوی ایشن انڈسٹری کے لیے ایک بڑا مثبت قدم تصور کیا جا رہا ہے۔

انڈونیشیا کے وزیردفاع نے ایک اعلیٰ سطحی وفد کے ہمراہ جنرل ہیڈکوارٹرز (جی ایچ کیو) راولپنڈی کا دورہ کیا۔ پاک فوج کے شعبہ تعلقات عامہ ( آئی ایس پی آر) کے مطابق وفد میں مختلف سروسز اور انٹیلیجنس ایجنسیوں کے نمائندے شامل تھے۔

ڈی جی آئی ایس پی آر کے مطابق دورے کے دوران انڈونیشیا کے وزیردفاع اور وفد نے آرمی چیف فیلڈ مارشل عاصم منیر سے ملاقات کی۔ اس موقع پر دونوں ممالک کے درمیان دوطرفہ دفاعی تعاون پر تبادلہ خیال کیا گیا، ملاقات کےدوران عسکری تعلقات کو مزید مضبوط بنانےکے امکانات اور علاقائی سلامتی کی صورتحال پر تفصیلی تبادلہ خیال کیا گیا۔ ملاقات میں پاکستان اورانڈونیشیا کے درمیان دیرینہ دوستی اور تعاون پر زور دیا گیا،فیلڈ مارشل عاصم منیر نے خطے میں امن واستحکام کےلیے باہمی تعاون کی اہمیت پرروشنی ڈالی، انڈونیشیا کے وزیردفاع نے دہشت گردی کے خلاف جنگ میں پاک فوج کے کردار کو سراہا اور پاکستان کے ساتھ دفاعی تعلقات کو مزید فروغ دینے کے عزم کا اعادہ کیا۔

سنٹرل جیل راولپنڈی کے سپرنٹنڈنٹ کی جانب سے آج ایک اہم وضاحتی پریس ریلیز جاری کی گئی ہے جس میں بانی پاکستان تحریک انصاف (پی ٹی آئی) کو جیل میں حاصل سہولیات کے حوالے سے سوشل میڈیا اور بعض سیاسی حلقوں کی جانب سے پھیلائی جانے والی افواہوں کی سختی سے تردید کی گئی ہے۔ پریس ریلیز میں واضح کیا گیا ہے کہ بانی پی ٹی آئی کو جیل قوانین کے مطابق بی کلاس کی تمام سہولیات میسر ہیں۔

ترجمان جیل حکام کے مطابق بانی پی ٹی آئی کو نہ صرف معیاری خوراک، صحت کی سہولیات، مطالعے کے لیے اخبارات و کتب، بلکہ ورزش اور روزانہ واک کی سہولت بھی فراہم کی گئی ہے۔ ان کو سات سیلز پر مشتمل ایک الگ کمپلیکس میں رکھا گیا ہے جہاں کھلا میدان بھی موجود ہے تاکہ وہ چہل قدمی اور جسمانی ورزش کر سکیں۔پریس ریلیز میں بتایا گیا ہے کہ بانی پی ٹی آئی کو ایک ایکسسرسائز بائیک، LED ٹی وی، روزانہ تازہ اخبارات اور ان کے ذاتی انتخاب کی کتب دستیاب ہیں۔ یہاں تک کہ ان کے لیے ایک مخصوص قیدی کو بطور باورچی تعینات کیا گیا ہے جو ان کی خواہش کے مطابق ناشتہ، دوپہر اور رات کا کھانا تیار کرتا ہے۔ یہ سہولیات دیگر بی کلاس قیدیوں کو دستیاب نہیں ہیں۔

رپورٹ کے مطابق بانی پی ٹی آئی نے اب تک 413 مرتبہ ٹوئٹس جاری کروائیں جن کے ذریعے پارٹی رہنماؤں کو اہم سیاسی معاملات پر ہدایات دی گئیں۔ ان میں 2024 کے عام انتخابات، سمبڑیال کا ضمنی انتخاب، 26 نومبر کا احتجاج، حکومتی مذاکرات اور 26ویں آئینی ترمیم جیسے موضوعات شامل ہیں۔ ان کے بیانات 145 مرتبہ قومی میڈیا کی شہ سرخیوں میں شامل ہو چکے ہیں۔پریس ریلیز میں یہ انکشاف بھی کیا گیا ہے کہ بانی پی ٹی آئی نے 10 سے زائد بین الاقوامی میڈیا اداروں بشمول The Telegraph، Reuters، ITV، Wall Street Journal، اور Fox News سے روابط رکھے اور مختلف انٹرویوز اور ردعمل کے ذریعے اپنی بات دنیا تک پہنچائی۔

گزشتہ تین ماہ کے دوران بانی پی ٹی آئی سے 66 شخصیات نے ملاقاتیں کیں، جن میں پارٹی رہنما، وکلاء اور اہل خانہ شامل تھے۔ طبی حوالے سے بتایا گیا کہ جیل میں تعینات ڈاکٹرز کی ٹیم نے انہیں کم از کم تین بار طبی معائنے کے لیے چیک کیا اور حالیہ دو ہفتوں میں ان کی صحت مکمل طور پر ٹھیک اور تسلی بخش قرار دی گئی۔پریس ریلیز کے مطابق بانی پی ٹی آئی روزانہ دو گھنٹے کے لیے کھلے احاطے میں ورزش کرتے ہیں۔ جیل انتظامیہ ان کی سیکیورٹی، صحت اور سہولیات کے حوالے سے تمام ذمہ داریاں انتہائی دیانت داری سے نبھا رہی ہے۔ سوشل میڈیا پر زیرگردش خبروں کو بے بنیاد اور سنسنی خیز قرار دیتے ہوئے کہا گیا کہ بانی پی ٹی آئی کو جیل میں نہ صرف قانون کے مطابق، بلکہ دیگر قیدیوں کے مقابلے میں زیادہ سہولیات فراہم کی جا رہی ہیں، اور ان کے ساتھ کسی قسم کا امتیازی سلوک نہیں کیا جا رہا۔

اسلام آباد: قومی اسمبلی کے رکن جمشید دستی کے خلاف اسپیکر قومی اسمبلی نے ریفرنس منظور کر لیا ہے

الیکشن کمیشن آف پاکستان نے جمشید دستی کی نااہلی کے لیے دائر کی گئی دو درخواستیں منظور کر لی ہیں۔ درخواست گزاروں نے موقف اختیار کیا تھا کہ جمشید دستی نے قومی اسمبلی کے انتخاب میں حصہ لینے کے لیے جعلی تعلیمی اسناد جمع کروائی ہیں جو کہ انتخابی قوانین کی خلاف ورزی ہے۔الیکشن کمیشن نے درخواستوں کی سماعت کے بعد جمشید دستی کی تعلیمی اسناد کو جعلی قرار دیتے ہوئے ان کی نااہلی کے حوالے سے کارروائی کی منظوری دے دی ہے۔

اسپیکر قومی اسمبلی کی جانب سے منظور شدہ ریفرنس میں کہا گیا ہے کہ جمشید دستی نے انتخابی عمل کو دھوکہ دیا اور عوامی اعتماد کو ٹھیس پہنچائی۔ قانون کے تحت جعلی تعلیمی اسناد جمع کروانے والا کوئی بھی امیدوار نااہل قرار دیا جا سکتا ہے۔

نائب وزیرِ اعظم اور وزیر خارجہ سینیٹر محمد اسحاق ڈار نے شنگھائی تعاون تنظیم (ایس سی او) کے رکن ممالک کے وزرائے خارجہ کے وفد کے ہمراہ چین کے صدر شی جن پنگ سے مشترکہ ملاقات کی۔ اس موقع پر چین کے صدر نے تمام وفود کے سربراہان کا پرتپاک خیرمقدم کیا اور ایس سی او کے کردار اور اس کے تحت خطے میں تعاون کو مزید فروغ دینے کی اہمیت پر زور دیا۔

صدر شی جن پنگ نے اپنے خطاب میں کہا کہ شنگھائی تعاون تنظیم یوریشیا خطے کے وسیع رقبے اور دنیا کی سب سے بڑی آبادی کا حامل ایک اہم علاقائی فورم ہے۔ انہوں نے کہا کہ ایس سی او کی کوششیں خطے کی خوشحالی، امن، استحکام اور معاشی ترقی کے لیے نہایت اہم ہیں۔ انہوں نے تنظیم کے رکن ممالک کے درمیان تعلقات کو مزید گہرائی دینے اور باہمی اعتماد بڑھانے کی ضرورت پر بھی زور دیا۔

وزیر خارجہ محمد اسحاق ڈار نے اپنی ملاقات میں پاکستان کی جانب سے خطے میں پائیدار ترقی، امن و امان اور ہم آہنگی کے لیے بھرپور تعاون کا عزم دہرایا۔ انہوں نے کہا کہ پاکستان شنگھائی تعاون تنظیم کے ذریعے خطے میں باہمی اعتماد اور مشترکہ ترقی کے مواقع کو بڑھانے میں اپنا مثبت کردار ادا کرتا رہے گا۔محمد اسحاق ڈار نے چین کے ساتھ دوطرفہ تعلقات کو بھی مضبوط قرار دیتے ہوئے کہا کہ پاکستان چین کے ساتھ اپنے تاریخی تعلقات کو فروغ دینے کے لیے پرعزم ہے اور اس شراکت داری کو علاقائی امن و خوشحالی کے لیے مفید سمجھتا ہے۔

ملاقات میں دونوں فریقین نے عالمی اور خطائی سطح پر امن و استحکام کے فروغ کے لیے تعاون بڑھانے پر اتفاق کیا۔ اس موقع پر دیگر رکن ممالک کے وزرائے خارجہ بھی موجود تھے جنہوں نے مشترکہ تعاون کی اہمیت پر زور دیا۔

وزیرِ اعظم محمد شہباز شریف کی زیرِ صدارت ایف بی آر کی ڈیجیٹائیزیشن، مصنوعی ذہانت (AI) پر مبنی نظام کے اطلاق اور دیگر اصلاحات پر ہفتہ وار جائزہ اجلاس آج اسلام آباد میں منعقد ہوا.

اجلاس میں وفاقی وزراء احد خان چیمہ، عطاء اللہ تارڑ، علی پرویز ملک، وزیرِ مملکت برائے خزانہ بلال اظہر کیانی، چیف کوارڈینیٹر مشرف زیدی، چیئرمین ایف بی آر اور متعلقہ اعلی حکام نے شرکت کی.اجلاس کو ڈیجیٹل انوائسنگ، ای بلٹی، ٹیکس گوشواروں کو آسان بنانے، مصنوعی ذہانت پر مبنی اسیسمنٹ سسٹم، سینٹرل کمانڈ اینڈ کنٹرول سینٹر کے قیام اور کارگو ٹریکنگ سسٹم پر پیش رفت سے آگاہ کیا گیا. اجلاس کو ایف بی آر کے کمانڈ اینڈ کنٹرول یونٹ کے قیام کی پیش رفت کے حوالے سے آگاہ کیا گیا. اجلاس کو بتایا گیا کہ اسکے لئے بِڈنگ جلد مکمل کرکے ستمبر تک اسے مکمل طور پر فعال کر دیا جائے گا. اس سے نہ صرف مرکزی ڈیٹا میسر ہوگا بلکہ فیصلہ سازی میں بھی آسانی ہوگی. اجلاس کو مصنوعی ذہانت پر مبنی اسیسمنٹ نظام پر بھی بریفنگ دی گئی. اجلاس کو بتایا گیا کہ بحری جہازوں کی آمد سے پہلے تاجروں کو پیشگی گڈز ڈیکلریشن بھرنے کی سہولت فراہم کی گئی ہے جس کے تحت اپ-فرنٹ ڈیوٹیز اور ٹیکسز پر مکمل چھوٹ دی جائے گی. اس نظام کے اطلاق سے پیشگی گڈز ڈیکلریشن 3 فیصد سے بڑھ کر 95 فیصد سے زائد ہونے کی توقع ہے. اس طرح ایڈوانس گڈز ڈیکلریشن والے کنٹینروں کو بحری جہاز سے سیدھا فیکٹری پہنچنے کی سہولت میسر ہوگی. اجلاس کو بتایا گیا کہ ڈیجیٹل انوائسنگ کے ذریعے تمام چھوٹے اور بڑے کاروبار خرید و فروخت کے وقت ایف بی آر کے آن لائن نظام کے ذریعے رسید کا اجراء یقینی بنائیں گے. اس نظام کے تحت آئندہ چند ماہ میں 20 ہزار کے قریب کاروبار نظام کے ساتھ منسلک ہو جائیں گے. صرف ایک ماہ کے دوران اس نظام کے تحت 11.6 ارب روپے کی آٹھ ہزار انوائسز کا اجراء ہوا. اس نظام میں ٹیکس دہندگان کا پورٹل اور اسکی نگرانی کا ڈیش بورڈ شامل ہیں. اجلاس کو بتایا گیا کہ پرال (PRAL) کے تحت نظام سے منسلک ہونے کی سہولت بغیر کسی لاگت کے مفت فراہم کی جارہی ہے. مزید بتایا گیا کہ تاجروں کی اس نظام کے حوالے سے تربیت یقینی بنائی جارہی ہے. اس نظام کے مکمل اطلاق کے بعد تاجروں کو سیلز ٹیکس گوشوارے جمع کروانے کی ضرورت بھی نہیں رہے گی کیونکہ ہر خرید و فروخت خودکار طریقے سے نظام میں ریکارڈ ہورہی ہوگی.

اسکے علاوہ بین الاقوامی سطح پر رائج نظام سے ہم آہنگ 8 ہندسوں پر مبنی مخصوص HS کوڈ فیک اور فلائنگ انوائسنگ کا خاتمہ کرے گا. ڈیجیٹل انوائسنگ کے ذریعے سیلز ٹیکس نظام کی کارکردگی کو جانچنا مزید سہل ہوگا. اجلاس کو بتایا گیا کہ نظام کو مؤثر بنانے کیلئے کاروباری افراد کے تربیتی سیشن بھی منعقد کئے گئے. وزیرِ اعظم نے ہدایت کی کہ ڈیجیٹل انوائسنگ کی سہولت کا اردو میں بھی جلد اجراء کیا جائے.

ٹیکس گوشواروں کو ڈیجیٹل اور آسان بنانے کے حوالے سے اجلاس کو بریفنگ دیتے ہوئے بتایا گیا کہ 15 جولائی سے تنخواہ دار طبقے کیلئے اسکا اجراء کیا جارہا ہے جبکہ 30 جولائی کو باقی شعبوں کے ٹیکس دہندگان کیلئے بھی یہ سہولت میسر ہوگی. مزید بتایا گیا کہ تنخواہ دار طبقے کیلئے اردو ٹیکس گوشوارے 30 جولائی تک میسر ہونگے. اجلاس کو نئے اور آسان ٹیکس گوشوارے کو بھرنے کے عمل پر بریفنگ دی گئی. وزیرِاعظم کی اس حوالے سے ہیلپ لائن کے قیام اور تھرڈ پارٹی عوامی سروے کی ہدایت.

اجلاس کو کارگو ٹریکنگ سسٹم اور ای-بلٹی کے نظام پر پیش رفت سے بھی آگاہ کیا گیا. اجلاس کو بتایا گیا کہ اس نظام کے تحت اشیاء کی آمدورفت کی ریئل ٹائم مانیٹرنگ اور ان اشیاء پر ٹیکس ادائیگی کی نگرانی ہم آہنگ ہونے کے ساتھ ساتھ مصنوعی ذہانت سے اسیسمنٹ ممکن ہوگی جس سے ٹیکس انفورسمنٹ مزید مؤثر اور بہتر ہوگی. اجلاس کو بتایا گیا کہ نظام کے پاکستان میں اطلاق اور بین الاقوامی معیار یقینی بنانے کیلئے ترکیہ سے اس حوالے سے معاونت لی جارہی ہے. حال ہی میں وزیرِ اعظم کے دورہء آذربائیجان میں ترکیہ کے صدر سے گفتگو کے بعد ترک وفد پاکستان پہنچ گیا ہے اور اس نظام کی پاکستان میں جلد تشکیل و اجراء کیلئے وفد کے ساتھ مشاورت جاری ہے.