Category: اہم خبریں

18 اپریل 2025 کو سوات ضلع میں سیکیورٹی فورسز اور قانون نافذ کرنے والے اداروں نے مشترکہ طور پر ایک خفیہ اطلاعات پر مبنی آپریشن کیا، آپریشن کے دوران سیکیورٹی فورسز نے انتہائی مؤثر طریقے سے خوارج کی موجودگی والے مقام کو نشانہ بنایا، جس کے نتیجے میں چار خوارج ہلاک ہو گئے۔ ہلاک ہونے والے دہشت گرد وہ لوگ تھے جو علاقے میں متعدد دہشت گردی کی کارروائیوں میں ملوث تھے۔ ان کے قبضے سے اسلحہ اور گولہ بارود بھی برآمد ہوا ہے، جو ان کے دہشت گردی کے نیٹ ورک کے ساتھ ان کے تعلقات کی نشاندہی کرتا ہے۔

اس کے علاوہ، سیکیورٹی فورسز کی طرف سے علاقے میں مزید خوارج کی موجودگی کا پتہ لگانے کے لیے ایک آپریشن جاری ہے۔ یہ آپریشن اس بات کو یقینی بنانے کے لیے کیا جا رہا ہے کہ علاقے میں کسی بھی دہشت گرد کو پناہ نہ مل سکے۔پاکستان کی سیکیورٹی فورسز اور قانون نافذ کرنے والے ادارے اس عزم کے ساتھ سرگرم ہیں کہ دہشت گردی کے اس ناسور کو جڑ سے اکھاڑ پھینکا جائے اور ملک کو اس دہشت گردی کی لعنت سے پاک کیا جائے۔

اس آپریشن کی کامیابی ایک اور مثال ہے کہ پاکستان کی سیکیورٹی فورسز دہشت گردوں کے خلاف بے رحمی سے کارروائی جاری رکھے ہوئے ہیں اور ملک بھر میں امن و سکون کو بحال کرنے کے لیے بھرپور کوششیں کر رہی ہیں۔پاکستان کی عوام سیکیورٹی فورسز کی اس محنت کو سراہتے ہیں اور ان کے ساتھ مکمل تعاون کا عہد کرتی ہیں۔

وزیراعظم شہباز شریف کی زیر صدارت امن و امان کی صورتحال پر اہم جائزہ اجلاس ہوا

وزیراعظم شہباز شریف کا کہنا تھا کہ ملک سے دہشت گردی کو جڑ سے اکھاڑنے کے لئے ہمارا جہاد جاری رہے گی، دہشت گردوں کو ایسی عبرتناک شکست دیں گے کہ وہ پاکستان کی طرف میلی آنکھ سے دیکھنے کی جرات نہیں کر سکیں گے ،پاکستان کے دشمن ہماری معاشی کامیابیوں سے خائف ہیں،دہشت گردی کے خلاف بھرپور اقدامات اور کاروائیوں کے حوالے سے تمام اداروں اور صوبوں کی کوششیں لائق تحسین ہیں ، دہشت گردی اور انتہاپسندی کے مکمل خاتمے کیلئے وفاقی حکومت تمام صوبوں کی استعداد بڑھانے کے لئے بھرپور تعاون کرےگا ،ہمیں آپس کے تمام اختلافات بھلا کر دہشت گردی کے خاتمے کے لیے مل کر کام کرنا ہے ،ہماری سیکیورٹی فورسز کے بہادر جوان اور افسر دن رات دہشت گردوں سے نبرد آزما ہیں اور اپنی جانوں کا نذرانہ پیش کر رہے ہیں ،

وزیراعظم شہباز شریف نے ہدایت کی کہ اسمگلنگ کے خلاف تمام ادارے اپنی کوششیں مزید تیز کریں ،انسانی اسمگلنگ کے نیٹ ورک کے گرد گھیرا مزید تنگ کیا جائے اور اسمگلروں کو قانون کے شکنجے لایاجائے،ملک کے اہم شہروں میں سیف سٹی منصوبوں کو جلد از جلد مکمل کیا جائے ،دہشت گردی کے خلاف بیانئے کے حوالے سے وفاق اور صوبے مل کر کام کر رہے ہیں جو کہ انتہائی خوش آئند ہے

اجلاس کو ملک میں امن و امان کے قیام کے حوالے اقدامات پر تفصیلی بریفنگ دی گئی جس میں بتایا گیا کہ نیکٹا میں نیشنل اینڈ پرونشئل انٹیلیجنس فیوژن اینڈ تھریٹ اسیسمینٹ مرکز کا قیام عمل میں لایا جا چکا ہے،پنجاب کے دس شہروں میں سیف سٹی منصوبہ کام کر رہا ہے،کراچی، حیدرآباد، سکھر، لاڑکانہ، میر پور خاص اور نواب شاہ میں سیف سٹی منصوبے لگائے جا رہے ہیں،پشاور میں سیف سٹی منصوبہ منظور ہو چکا؛ اگلے مرحلے میں ڈیرہ اسماعیل خان ، بنوں، لکی مروت میں سیف سٹی منصوبے لگائے جائیں گے ،گوادر سیف سٹی منصوبہ جلد مکمل کر لیا جائے گا جبکہ قومی شاہراہ 25 N اور قومی شاہراہ 40 N پر واقع تمام اہم شہروں میں سیف سٹی منصوبہ لگایا جائے گا ،اسمگلنگ کی روک تھام کے حوالے سے مختلف شاہراہوں اور پلوں پر ڈیجیٹل انفورسمنٹ اسٹیشنز کا قیام عمل میں لایا جا رہا ہے ،ملک کے اہم شہروں کے گردونواح میں موجود تمام غیر قانونی تعمیرات کو ختم کرنے کے حوالے سے وفاقی اور صوبائی حکومتیں کاروائیاں کر رہی ہیں،ملک بھر میں بھکاریوں کے خلاف بھی کریک ڈاؤن کیا جا رہا ہے اور ایسے عناصر کو بیرون ملک سفر سے روکنے کے حوالے سے بھی اقدامات اٹھائے جا رہے ہیں ،اسلام آباد میں فارینسک سائنس ایجنسی قائم کی جاچکی ہے جبکہ پنجاب میں فارنسک سائنس ایجنسی کو مزید بہتر بنایا جا رہا ہے

اجلاس میں وفاقی وزیر قانون و انصاف اعظم نذیر تارڑ، وفاقی وزیر داخلہ محسن رضا نقوی ، وفاقی وزیر اقتصادی امور احد خان چیمہ ، وفاقی وزیر اطلاعات و نشریات عطاء اللہ تارڑ ، وزیراعظم کے مشیر برائے بین الصوبائی روابط رانا ثناءاللہ ، وزیر مملکت برائے داخلہ طلال چوہدری , وزیر اعلیٰ خیبر پختونخوا کے مشیر اطلاعات بیرسٹر سیف، وزیر داخلہ گلگت بلتستان شمس الحق لون، وزیر داخلہ آزاد جموں و کشمیر کرنل ریٹائرڈ وقار نون، چاروں صوبوں ، گلگت بلتستان اور آزاد جموں و کشمیر کے چیف سیکریٹریز اور انسپکٹرز جنرل پولیس، چیف کمشنر اسلام آباد کیپیٹل ٹیریٹری ، آئی جی اسلام آباد پولیس اور دیگر متعلقہ سرکاری اداروں کے افسران نے شرکت کی ۔

رات گئے، تقریباً 1:30 بجے، سیکیورٹی فورسز نے چکدرہ انٹرچینج،ٹول پلازہ کے قریب لنک روڈ آلا دھند کے علاقے میں ایک بڑی کارروائی کرتے ہوئے چار دہشت گردوں کو ہلاک کر دیا۔ یہ دہشت گرد کالعدم تنظیم تحریک طالبان پاکستان (ٹی ٹی پی) سے تعلق رکھتے تھے، جو پاکستان کے مختلف علاقوں میں دہشت گردی کی کارروائیوں میں ملوث رہی ہے۔

یہ آپریشن پولیس اسٹیشن آلا دھند اور بیزئی کی حدود میں کیا گیا۔ سیکیورٹی فورسز نے ان علاقوں میں انٹیلیجنس کی بنیاد پر کارروائی کی۔ آپریشن میں شامل فورسز نے نہ صرف دہشت گردوں کی پناہ گاہوں کی نشاندہی کی بلکہ ان کے ٹھکانے پر چھاپہ مارا، جس کے نتیجے میں دہشت گردوں کا سامنا سیکیورٹی فورسز سے ہوا۔ہلاک ہونے والوں میں سے ایک، سلیم ولد شیرزادہ تھا، جو دربار بدوان، تحصیل اڈانزئی، لوئر دیر کا رہائشی تھا۔ سلیم کو ایک تربیت یافتہ دہشت گرد کے طور پر جانا جاتا تھا، جو متعدد دہشت گردانہ کارروائیوں میں ملوث تھا۔ دوسرا ہلاک ہونے والا دہشت گرد محمد عثمان ولد سادبار تھا، جو جالوڑن ڈھری، آلا دھند کا رہائشی تھا۔ دونوں دہشت گردوں کا تعلق مقامی گروپوں سے تھا اور وہ علاقے میں دہشت گردانہ کارروائیاں کرنے کی کوشش کر رہے تھے۔

اس آپریشن میں دو مزید دہشت گرد ہلاک ہوئے، جو افغان شہری تھے۔ ان دہشت گردوں کا تعلق بھی ٹی ٹی پی سے تھا اور وہ سرحد پار سے پاکستان میں دہشت گردی کی سرگرمیوں کو فروغ دینے کی کوشش کر رہے تھے۔سیکیورٹی فورسز کے مطابق، یہ آپریشن ایک بڑی کامیابی ہے اور اس سے ٹی ٹی پی کے نیٹ ورک کو علاقے میں ایک بڑا دھچکہ پہنچا ہے۔ فورسز نے دہشت گردوں کی کارروائیوں کے خلاف اپنی سخت کارروائی جاری رکھنے کا عزم ظاہر کیا ہے اور ان کے ٹھکانوں کی مکمل نگرانی کا وعدہ کیا ہے تاکہ مزید دہشت گردانہ سرگرمیوں کو روکا جا سکے۔

امن و امان کا قیام ضروری ،فارن انویسمنٹ سے معیشت میں استحکام آئے گا.حافظ طلحہ سعید

پاکستان مرکزی مسلم لیگ کے نائب صدر حافظ طلحہ سعید نے کہا ہے کہ اوورسیز کنونشن میں آرمی چیف کا خطاب پاکستان کی وحدت، استحکام اور نظریاتی اساس کے تحفظ کی مضبوط آواز تھا،پاکستان کی سیکورٹی انتہائی اہمیت کی حامل ہے،پاکستان میں امن و امان کا قیام ضروری ہے،فارن انویسمنٹ آنے سے پاکستان کی معیشت میں استحکام آئے گا.

حافظ طلحہ سعید کا کہنا تھا کہ موجودہ ملکی و بین الاقوامی حالات میں آرمی چیف کا دوٹوک موقف قوم کے لیے حوصلہ افزا ہے ، ملک میں امن و امان کا قیام معاشی ترقی اور بیرونی سرمایہ کاری کے دروازے کھولنے کی بنیاد بنتی ہے،پاکستان میں سیاسی استحکام اور امن ہوگا تو بیرونِ ملک مقیم پاکستانی اور دیگر بین الاقوامی سرمایہ کار پاکستان میں سرمایہ کاری کرنے کے لیے اعتماد محسوس کریں گے، جس سے معیشت میں بہتری آئے گی، وطن عزیز پاکستان کو جن چیلنجز کا سامنا ہے آرمی چیف جنرل سید عاصم منیر نے ان پر شاندار گفتگو کی ہے ،آرمی چیف کا خطاب نہ صرف قومی غیرت و حمیت کا عکاس بلکہ ہر محب وطن پاکستانی کی آواز تھا، دنیا بھر میں مقیم پاکستانی درحقیقت وطن عزیز کے سفیر ہیں، آرمی چیف کی طرف سے ان کی خدمات کو سراہنا ان کے حوصلے بلند کرنے کا ذریعہ بنے گا،

حافظ طلحہ سعید کا مزید کہنا تھا کہ سوشل میڈیا پر منفی پروپیگنڈے کے خلاف آرمی چیف کی دو ٹوک گفتگوسے قوم کو مثبت پیغام ملا ہے ،مٹھی بھر شرپسند عناصر پاکستان کے روشن مستقبل کو داغدار نہیں کر سکتے،پاکستانی قوم اپنی افواج اور سکیورٹی اداروں کے ساتھ چٹان کی طرح کھڑی ہے۔پاکستان مرکزی مسلم لیگ افواج پاکستان کے ساتھ مکمل یکجہتی کا اظہار کرتی ہے اور اس عزم کا اعادہ کرتی ہے کہ ہم ملک کی نظریاتی و جغرافیائی سرحدوں کے تحفظ کے لیے ہر محاذ پر افواج پاکستان کے شانہ بشانہ کھڑے ہیں۔