Category: اہم خبریں

پاکستان کے مختلف شہروں میں اسرائیلی حملوں کے ردعمل میں غیر ملکی فوڈ چینز، خاص طور پر کے ایف سی، پر مشتعل افراد نے حملے کیے ہیں۔ کراچی، لاہور اور لاڑکانہ میں ہونے والے ان حملوں میں پتھروں اور ڈنڈوں کا استعمال کیا گیا، جبکہ ریسٹورنٹس کی توڑ پھوڑ کی گئی۔ ان واقعات میں جانی نقصان نہیں ہوا، لیکن حملہ آور فرار ہو گئے۔

کراچی کے علاقے ڈیفنس خیابان اتحاد میں 9 اپریل کو واقع ایک نجی ریسٹورنٹ (کے ایف سی) پر مشتعل افراد نے حملہ کر کے شدید توڑ پھوڑ کی۔ واقعے کی اطلاع ملتے ہی پولیس نے فوری طور پر کارروائی کرتے ہوئے حملہ آوروں کو گرفتار کیا۔ ایس ایس پی ساؤتھ، مہظور علی کے مطابق، پولیس نے دس افراد کو حراست میں لے لیا، جن میں سے ایک شخص کے قبضے سے ہتھوڑا بھی برآمد کیا گیا۔ پولیس نے اضافی نفری تعینات کرکے علاقے میں امن و امان بحال کر لیا۔ ایس ایس پی نے مزید کہا کہ اس واقعے کی مکمل تحقیقات جاری ہیں اور قانون کے مطابق سخت کارروائی کی جائے گی۔

لاڑکانہ میں بھی کے ایف سی پر حملہ کیا گیا، جہاں مشتعل افراد نے ریسٹورنٹ کو جلانے کی کوشش کی۔ پولیس نے حملہ آوروں کو روکنے کے لیے ہوائی فائرنگ کی اور صورتحال پر قابو پا لیا۔ اس واقعے میں کسی قسم کا جانی نقصان نہیں ہوا۔

لاہور کے علاقے ڈیفنس فیز 6 میں بھی غیر ملکی فوڈ چینز، خاص طور پر کے ایف سی، پر حملہ کیا گیا۔ موٹر سائیکلوں پر سوار حملہ آوروں نے ریسٹورنٹ پر پتھروں سے حملہ کیا اور توڑ پھوڑ کی۔ اس حملے میں کوئی جانی نقصان نہیں ہوا، تاہم ریسٹورنٹ کے عملے اور گاہکوں میں خوف و ہراس پھیل گیا۔ پولیس نے فوری طور پر موقع پر پہنچ کر تفتیش شروع کر دی ہے اور حملہ آوروں کی تلاش جاری ہے۔ ایس پی کینٹ کیپٹن ریٹائرڈ قاضی علی رضا نے کہا کہ ملزمان کو سی سی ٹی وی کیمروں اور دیگر ذرائع کی مدد سے تلاش کیا جا رہا ہے۔

مذہبی رہنما حافظ ہشام الہیٰ ظہیر نے ان حملوں کی سخت مذمت کی ہے اور کہا کہ "کے ایف سی یا کسی بھی غیر ملکی فرنچائز پر حملہ کرنا کسی صورت جائز نہیں ہے۔ یہ لوکل پاکستانی لوگوں کا کاروبار ہے اور اس پر حملہ کرنا قابل قبول نہیں۔ اس عمل کو ہوا دینے والے افراد کے خلاف بھی ایک دن کارروائی کی جائے گی۔

پاکستان میں اسرائیلی حملوں کے ردعمل میں ہونے والے یہ حملے غیر ملکی ریسٹورنٹس پر شدید نوعیت کے ہیں، اور مختلف شہروں میں پولیس کی کارروائیاں جاری ہیں۔ حکومت اور پولیس نے قانون کے مطابق سخت کارروائی کی یقین دہانی کرائی ہے اور امن و امان کی بحالی کے لیے اقدامات کیے جا رہے ہیں۔

پاکستان منرلز انویسٹمنٹ فورم 2025 کا کامیاب انعقاد ایس آئی ایف سی (پاکستان سٹریٹجک انویسٹمنٹ فاؤنڈیشن) کے تعاون اور حکومتی کاوشوں کی بدولت ممکن ہوا۔ اس فورم میں عالمی اور مقامی سرمایہ کاروں نے بھرپور شرکت کی اور معدنی شعبے کی ترقی کے لیے اپنے خیالات کا اظہار کیا۔

پاکستان منرلز انویسٹمنٹ فورم 2025 میں سعودی عرب کے جیولوجیکل سروے کے سی ای او عبداللہ الشرمانی نے شرکت کی اور اس ایونٹ کے حوالے سے خوشی کا اظہار کیا۔ عبداللہ الشرمانی نے فورم میں کہا، "پاکستان منرلز انویسٹمنٹ فورم نہ صرف پاکستان کے معدنی شعبے کے لیے بلکہ پوری دنیا کے لیے فائدہ مند ثابت ہوگا۔” ان کے مطابق، اس فورم کے ذریعے عالمی سطح پر پاکستان کے معدنی وسائل کی اہمیت اجاگر ہوئی ہے اور اس سے عالمی سرمایہ کاروں کا اعتماد بڑھا ہے۔

کامران راجہ، جو اس ایونٹ میں شریک ہوئے، نے کہا، "منرلز انویسٹمنٹ فورم سے پاکستان کو خاطرخواہ فائدہ ہو گا، کیونکہ اس طرح کے ایونٹس سرمایہ کاروں کا اعتماد بڑھاتے ہیں۔ عالمی سرمایہ کاروں کی حوصلہ افزائی سے پاکستان میں سرمایہ کاری کو فروغ ملے گا۔”

چئیرمین مائنز اینڈ منرلز کمیٹی راجہ نوید اختر نے اس فورم کی کامیابی کو خوش آئند قرار دیتے ہوئے کہا، "حکومت کا معدنی شعبے کی ترقی کے لیے منرلز انویسٹمنٹ فورم کی صورت میں کیا جانے والا یہ عملی اقدام قابل تحسین ہے۔” ان کے مطابق، اس طرح کے اقدامات سے پاکستان کی معیشت کو نیا اُفق ملے گا اور عالمی سطح پر اس کی معدنی صنعت کا تشخص مضبوط ہوگا۔

اس فورم میں حکومت کے معدنی شعبے کی خوشحالی و ترقی کے لیے ایس آئی ایف سی کی معاونت کو سراہا گیا۔ فورم کے شرکاء نے اس بات پر زور دیا کہ اس طرح کے ایونٹس نہ صرف سرمایہ کاری کو فروغ دیتے ہیں بلکہ عالمی سطح پر پاکستان کے معدنی وسائل کی ساکھ کو بھی مزید مستحکم کرتے ہیں۔پاکستان منرلز انویسٹمنٹ فورم 2025 کے انعقاد سے عالمی سرمایہ کاری کی جانب اہم پیشرفت ہوئی ہے، جو پاکستان کے معدنی شعبے کی ترقی کی راہ ہموار کرے گی اور عالمی سطح پر پاکستان کو ایک اہم اقتصادی قوت کے طور پر اُبھرنے میں مدد فراہم کرے گی۔

سربراہ نیشنل پارٹی ڈاکٹر عبدالمالک بلوچ کی سربراہی میں نیشنل پارٹی کا وفد جاتی امرا پہنچ گیا
وفد میں سینیٹر جان محمد بلیدی،چیئرمین اسلم بلوچ و دیگر رہنما شامل ہیں،ڈاکٹر مالک بلوچ کی صدر مسلم لیگ ن و سابق وزیراعظم میاں نوازشریف سے ملاقات ہوئی ہے، اس موقع پر ن لیگی رہنما بھی موجود تھے، صدر ڈاکٹر عبدالمالک بلوچ اور نواز شریف کی ملاقات کے دوران ملکی سیاسی صورتحال اور بلوچستان کے امور پر تبادلہ خیال کیا گیا ڈاکٹر عبدالمالک کی جانب سے مہنگائی اور بجلی قیمتوں میں کمی پر مبارکباد دی گئی،

ملاقات کے بعد میڈیا سے بات کرتے ہوئے عبدالمالک بلوچ کا کہنا تھا کہ اس وقت پاکستان اور بلوچستان کے عوام کی نواز شریف سے اُمیدیں جُڑیں ہیں، چاہیں وہ بلوچستان کے سیاسی مسئلے ہوں یا معاشی، نواز شریف نے بلوچستان میں اپنا سیاسی کردار ادا کرنے کی یقین دہانی کروائی ہے،نواز شریف نے بلوچستان کا دورہ کرنے کی درخواست قبول کر لی، بلوچستان میں بے گناہوں کا قتل قابل مذمت ہے،

مسلم لیگ ن کے رہنما خواجہ سعد رفیق نے کہا کہ ڈاکٹرعبدالمالک بلوچ نے نواز شریف سے ملاقات میں بلوچستان کی تازہ ترین صورتحال اور وہاں کے سلگتے ہوئے مسائل کو اجاگر کیا ہے، لااینڈ آرڈر اور ترقیاتی منصوبوں پر بھی بات ہوئی، صوبے کی پسماندگی کے حوالے سے بھی بات چیت ہوئی، ڈاکٹر عبدالمالک بلوچ نے میاں نواز شریف سے بطور سینیئر سیاسی رہنما اور سابق وزیراعظم کے طور پر صوبے کی بحراتی کیفیت سے نکالنے میں اپنا کردار ادا کرنے کی درخواست کی ہے، نواز شریف اور مسلم لیگ ن کے دیگر رہنماؤں نے ڈاکٹر عبدالمالک بلوچ کی بات غور سے سنی اور اس پر مشاورت بھی کی ہے، نواز شریف نے ڈاکٹرعبدالمالک بلوچ اور ان کی پارٹی قیادت کو یقین دہانی کروائی ہے کہ بلوچستان کے امن و استحکام، جمہوری رویوں کے فروغ اور ترقی کے لیے اپنا کردار ادا کریں گے۔

دوسری جانب وفاقی وزیر دفاع خواجہ آصف نے کہا کہ نواز شریف نے فیصلہ کیا ہے کہ بلوچستان کے مسئلے کا سیاسی طور پر حل نکالا جائے گا، نواز شریف نے ملاقات میں اختر مینگل اور بلوچستان کے اسٹیک ہولڈرز سے بات چیت کرنے کا کہا ہے جبکہ ماہرنگ بلوچ کے حوالے سے نواز شریف نے کوئی ذکر نہیں کیا،

پاکستان نےامریکہ کے ساتھ تجارتی تعلقات کے فروغ اور نئے ٹیرف کے حوالے سے مذاکرات کیلئے اعلی سطحی وفد بھیجنے کا فیصلہ کیا ہے

وزیرِ اعظم کی ہدایت پر وفد میں معروف کاروباری شخصیات اور برآمد کندگان کی بھی شمولیت ہو گی،وفد کو وزیرِ اعظم کی جانب سے امریکہ کی جانب سے درآمدات پر لگائے گئے نئے ٹیرف پر مذاکرات کے بعد مستقبل کیلئے باہمی طور پر مفید لائحہ عمل طے کرنے کا ٹاسک سونپ دیا گیا،وزیرِ اعظم محمد شہباز شریف کی زیرِ صدارت ملکی برآمدات میں اضافے اور امریکہ کی جانب سے درآمدات پر لگائے گئے نئے ٹیرف پر جائزہ اجلاس آج اسلام آباد میں منعقد ہوا. اجلاس میں نائب وزیرِ اعظم و وزیرِ خارجہ محمد اسحاق ڈار، وفاقی وزراء احد خان چیمہ، محمد اورنگزیب، علی پرویز ملک، مشیر وزیرِ اعظم سید توقیر شاہ، معاونین خصوصی طارق فاطمی، ہارون اختر، وزیرِ اعظم کے کوارڈینیٹر رانا احسان افضل اور متعلقہ اعلی حکام نے شرکت کی.

وزیراعظم شہباز شریف کا کہنا تھا کہ امریکہ پاکستان کے تجارتی تعلقات دہائیوں پر محیط ہیں.حکومت، امریکہ کے ساتھ تجارتی شراکت داری کو مزید مضبوط بنانے کی خواہاں ہے.

وزیرِ اعظم کو اجلاس میں امریکہ کی جانب سے لگائے گئے نئے ٹیرف پر، اسٹئیرنگ کمیٹی اور ورکنگ گروپ کی رپورٹ اور مستقبل کا مجوزہ لائحہ عمل پیش کیا گیا. اجلاس کو مختلف متبادل لائحہ عمل پیش کئے گئے. اجلاس کو بتایا گیا کہ امریکہ میں پاکستانی سفارتخانہ مسلسل امریکی حکومت کے ساتھ رابطے میں ہے. وزیرِ اعظم نے امریکہ کے ساتھ اس حوالے سے مذاکرات کیلئے وفد کی تشکیل کے دوران معروف کاروباری شخصیات اور برآمد کندگان کی شمولیت یقینی بنانے کی ہدایت کی.

: جی ایچ کیو حملہ کیس کی آئندہ سماعت پر سابق وزیر اعظم عمران خان، سابق وزیر خارجہ شاہ محمود قریشی اور دیگر 119 ملزمان کو عدالت میں پیش ہونے کا حکم دے دیا گیا۔ یہ فیصلہ انسداد دہشت گردی کی خصوصی عدالت کے جج امجد علی شاہ نے کیا۔

جی ایچ کیو حملہ کیس کی سماعت انسداد دہشت گردی کی عدالت میں ہوئی، جس میں سابق صوبائی وزیر پنجاب راجہ بشارت انسداد دہشت گردی کی عدالت میں پیش ہوئے۔ اس دوران، وزیر اعلی خیبر پختونخوا علی امین گنڈا پور کی بھی حاضری لگائی گئی۔ عدالت نے اس کیس کے تمام 119 ملزمان کو طلبی کے نوٹس جاری کر دیے ہیں۔عدالت نے 2 گواہان کے طلبی کے نوٹس بھی جاری کیے ہیں، اور بانی چیئرمین پی ٹی آئی عمران خان کو جیل عدالت میں پیش ہونے کا حکم دیا۔ شاہ محمود قریشی کو لاہور جیل سے 12 اپریل کو پیش کرنے کا حکم بھی دیا گیا۔

سماعت کے دوران، عدالت نے وکلائے صفائی کو گواہان پر جرح کرنے کا حکم دیا۔ مزید برآں، عدالت نے جی ایچ کیو حملہ کیس کی تفتیشی ٹیم کو مکمل ریکارڈ سمیت اڈیالہ جیل پیش ہونے کا حکم دیا اور کہا کہ آئندہ سماعت پر مجسٹریٹ مجتبی اور گواہ سب انسپکٹر ریاض کی طلبی کا نوٹس بھی جاری کیا گیا۔عدالت نے اپنے ریمارکس میں کہا کہ سپریم کورٹ کی ہدایات کے مطابق کیس کا فیصلہ کیا جائے گا اور آئندہ کسی بھی فریق کو بلاجواز التوا نہیں ملے گا۔ عدالت نے یہ بھی اعلان کیا کہ جی ایچ کیو حملہ کیس کی سماعت ہفتے میں دو بار ہوگی۔ اب تک اس کیس میں 25 گواہان کے بیانات ریکارڈ کیے جا چکے ہیں۔عدالت نے جی ایچ کیو حملہ کیس کی سماعت 12 اپریل تک ملتوی کرتے ہوئے آئندہ سماعت اڈیالہ جیل میں کرنے کا فیصلہ کیا ہے۔

اسلام آباد: وزیر اعظم پاکستان، شہباز شریف سے امریکی وفد نے ملاقات کی، جس کی قیادت ایرک میئر کر رہے تھے۔ اس ملاقات میں دونوں ممالک کے درمیان دو طرفہ تعلقات کو مزید مستحکم کرنے کی ضرورت پر تبادلہ خیال کیا گیا۔

امریکی وفد پاکستان منرلز انویسٹمنٹ فورم میں شرکت کے لیے پاکستان آیا تھا۔ اس موقع پر وزیراعظم شہباز شریف نے کہا کہ پاکستان کے معدنیات کے شعبے میں بے شمار مواقع اور وسیع استعداد موجود ہے اور وہ امریکی کمپنیوں کو اس شعبے میں سرمایہ کاری کے مواقع سے فائدہ اٹھانے کی دعوت دیتے ہیں۔وزیراعظم نے امریکہ کے ساتھ دو طرفہ تعلقات کو مزید مستحکم کرنے کی خواہش کا اظہار کیا اور اس بات پر زور دیا کہ دونوں ممالک کو تجارت، سرمایہ کاری، اور دیگر باہمی دلچسپی کے شعبوں میں تعاون کو بڑھانا چاہیے۔شہباز شریف نے اس موقع پر مزید کہا، "یہ ایک خوشخبری ہے کہ ہماری قومی ایئر لائن نے 20 سال کے بعد پہلی بار منافع کمایا ہے، جو کئی دہائیوں سے جاری خسارے کے بعد ایک بڑی تبدیلی ہے۔ وزیرِ ہوا بازی کی قیادت میں ٹیم کی محنت قابل تعریف ہے۔” انہوں نے کہا کہ پاکستان کا مستقبل تابناک ہے۔

امریکی وفد نے پاکستان منرلز انویسٹمنٹ فورم کے کامیاب انعقاد پر پاکستان کو مبارکباد دی اور پاکستان کے معدنیات کے شعبے میں موجود وسیع امکانات کا اعتراف کیا۔ ایرک میئر نے اس بات کا بھی ذکر کیا کہ امریکی کمپنیاں پاکستان میں سرمایہ کاری میں دلچسپی رکھتی ہیں اور دونوں ممالک کے درمیان مشترکہ دلچسپی کے امور پر کام کرنے کے لیے تیار ہیں۔انہوں نے کہا کہ امریکا پاکستان کے ساتھ اپنے دو طرفہ تعلقات کو مزید فروغ دینے کا خواہاں ہے، اور اس بات پر زور دیا کہ دونوں ممالک کو اقتصادی اور تجارتی شعبوں میں مزید قریبی تعاون کی ضرورت ہے۔

یہ ملاقات دونوں ممالک کے تعلقات میں نئے افق کو کھولنے کی ایک اہم کوشش سمجھی جا رہی ہے، خاص طور پر پاکستان کے معدنیات کے شعبے میں امریکی سرمایہ کاری کے امکانات کے حوالے سے۔

آرمی چیف جنرل سید عاصم منیر نے کہا ہے کہ مجھے پختہ یقین ہے پاکستان عالمی معدنی معیشت میں ایک رہنما کے طور پر ابھرنے کےلیے تیار ہے۔

پاکستان منرل انویسٹمنٹ فورم 2025 سے خطاب کرتے ہوئے آرمی چیف جنرل سید عاصم منیر کا کہنا تھا کہ ہمارا مقصد معدنی شعبے کےلیے افرادی قوت، مہارت اور انسانی وسائل پیدا کرنا بھی ہے۔ وسائل کی ترقی اور سرمایہ کاری کےلیے عالمی ادارے شراکت داری کریں۔ اقتصادی سلامتی، قومی سلامتی کے ایک اہم جُزو کے طور پر ابھری ہے۔ آگے بڑھیں اور جدوجہد کریں ملک کےلیے اور اپنے لیے، آپ پاکستان پر پُراعتماد پارٹنر کے طور پر بھروسہ کر سکتے ہیں،پاکستان میں اپ اسٹریم اور ڈاؤن اسٹریم معدنی صنعتوں کی ترقی کو بھی یقینی بنایا جائے گا۔

آرمی چیف جنرل سید عاصم منیر کا مزید کہنا تھا کہ پاک فوج شراکت داروں اور سرمایہ کاروں کو مضبوط سیکیورٹی فریم ورک اور فعال اقدامات کو یقینی بنائے گی۔ پاکستان میں ریفائننگ اور ویلیو ایڈیشن میں سرمایہ کاری کی جائے۔ ہم بین الاقوامی اداروں کو خوش آمدید کہتے ہیں کہ وہ اپنی مہارت سے پاکستان کو روشناس کرائیں، سرمایہ کاری کے مواقع تلاش کریں۔ بین الاقوامی ادارے وسائل کی وسیع صلاحیت کی ترقی میں ہمارے ساتھ شراکت داری کریں۔پاکستان کی معدنیات کی دولت کو اخذ کرنے کے لیے انجنیئر ، جیالوجسٹ، آپریٹر اور بہت سے ماہر کان کن درکار ہیں۔ہم اس شعبے کی ترقی کے لیے طلبا کو بیرون ملک تربیت کےلیے بھی بھیج رہے ہیں اس وقت بلوچستان کے 27 طلباء زیمبیا اور ارجنٹینا میں منرل ایکسپلوریشن میں تربیت حاصل کر رہے ہیں۔ پاکستانی عوام کے پیروں کے نیچے وسیع معدنی ذخائر ہوتے ہوئے مایوسی اور بےعملی کی کوئی گنجائش نہیں۔ کاروبار اور معدنی دولت سے استفادہ کےلیے آپ کی مہارت سے مستفید ہونا ہماری اجتماعی قومی خواہش ہے۔میں بلوچ قبائلی عمائدین کی کاوشوں کا بھی معترف ہوں۔ بلوچ قبائلی عمائدین نے کان کنی کے فروغ اور بلوچستان کی ترقی اور پیشرفت میں اہم کردار ادا کیا ہے۔ مل کر کام کرنے سے پاکستان کا معدنی شعبہ اجتماعی فائدے کےلیے علاقائی ترقی، خوشحالی اور پائیداری کو فروغ دے سکتا ہے۔