Category: اہم خبریں

تحریک انصاف اور اپوزیشن اتحاد نے جعفر ایکسپریس کے سانحے کے بعد سیکیورٹی کی صورتحال پر آل پارٹیز قومی کانفرنس بلانے کا اعلان کیا ہے۔ اس حوالے سے ایک مشترکہ پریس کانفرنس میں تحریک انصاف کے چیئرمین بیرسٹر گوہر نے کہا کہ سیکیورٹی فورسز نے گزشتہ دنوں ہونے والے سانحہ اے پی ایس کی طرح کسی بڑے نقصان کو ہونے سے بچا لیا، ان کی کوششوں کو سراہتے ہیں۔ تاہم، انہوں نے کہا کہ جعفر ایکسپریس کا واقعہ پاکستان کے لیے ایک سنگین زخم ہے اور سویلین کو نشانہ بنانے کی مذمت کرتے ہیں۔

بیرسٹر گوہر نے مزید کہا کہ وزیراعظم نے اس واقعے پر سب سے پہلے پی ٹی آئی کو تنقید کا نشانہ بنایا، اور چند بیانات کا سہارا لے کر قوم کو تقسیم کرنے کی کوشش کی۔ اس تناظر میں اپوزیشن اتحاد نے فیصلہ کیا ہے کہ سیکیورٹی کے حوالے سے آل پارٹیز کانفرنس بلائی جائے، تاکہ تمام سیاسی جماعتیں اس اہم مسئلے پر مل کر بات کر سکیں۔

محمود خان اچکزئی کی سیکیورٹی نظام پر تجاویز
اپوزیشن اتحاد کے رکن محمود خان اچکزئی نے کہا کہ ہمیں ایک ہمہ جہت کانفرنس بلانی چاہیے تاکہ اجتماعی طور پر ایک ایسا نظام بنایا جا سکے جس سے ملک کو مزید بربادی سے بچایا جا سکے۔ انہوں نے الیکشن سے قبل اس بات کی تجویز دی تھی کہ تمام ادارے ایک مشترکہ گیم پلان تیار کریں۔ انہوں نے کہا کہ حکومت نے زر اور زور کی طاقت سے الیکشن جیتا اور اس سے ملک کی صورتحال مزید پیچیدہ ہوئی۔

صاحبزادہ حامد رضا کا پارلیمنٹ میں ان کیمرا سیشن کا مطالبہ
تحریک انصاف کے رہنما صاحبزادہ حامد رضا نے پارلیمنٹ میں ان کیمرا سیشن بلانے کا مطالبہ کرتے ہوئے کہا کہ جعفر ایکسپریس واقعے کے بعد 36 گھنٹے تک حکومتی وزراء نے قوم کو بتانے کی ضرورت نہیں سمجھی کہ کیا ہو رہا ہے۔ انہوں نے اس واقعے کے ذمہ دار وزیر دفاع کو قرار دیتے ہوئے انکوائری کا مطالبہ کیا۔ صاحبزادہ حامد رضا نے کہا کہ سیکیورٹی اہلکاروں سے اظہار تعزیت کرتے ہیں، لیکن اس واقعے کی مکمل تحقیقات ہونی چاہیے۔

اسد قیصر کی حکومت پر سخت تنقید

پی ٹی آئی کے رہنما اسد قیصر نے کہا کہ وزیراعظم نے جعفر ایکسپریس پر بات کرنے کے بجائے پی ٹی آئی پر الزامات لگانے کی کوشش کی۔ انہوں نے کہا کہ وزیراعظم کو اس سانحے پر فوری طور پر ردعمل دینا چاہیے تھا، مگر وہ لیپ ٹاپ تقسیم کرتے رہے۔ اسد قیصر نے حکومت پر شدید تنقید کرتے ہوئے کہا کہ اگر اس حکومت کو ملک کا خیال ہوتا تو وہ قوم سے معافی مانگ کر استعفیٰ دیتے۔

اس تمام صورتحال میں اپوزیشن اتحاد اور تحریک انصاف نے مل کر سیکیورٹی کے مسائل پر بحث کرنے کے لیے آل پارٹیز کانفرنس بلانے کا فیصلہ کیا ہے، تاکہ ملک کے سیکیورٹی نظام کو بہتر بنایا جا سکے اور مستقبل میں ایسے سانحات کو روکنے کے لیے ٹھوس اقدامات کیے جا سکیں۔

سانحہ جعفر ایکسپریس ، ڈی جی آئی ایس پی آر لیفٹینٹ جنرل احمد شریف اور وزیر اعلی بلوچستان سرفراز بگٹی نے پریس کانفرنس کی ہے

ڈی جی آئی ایس پی آر لیفٹینٹ جنرل احمد شریف کا کہنا تھا کہ بلوچستان میں جہاں حملہ ہوا وہاں موبائل سروس نہیں ہے ،یہ جگہ دشوار گزار پہاڑی علاقہ ہے، دہشت گردوں نے ٹرین پر حملے سے قبل ایف سی کی قریبی چیک پوسٹ پر حملہ کیا جس میں تین جوان شہید ہوئے. دہشت گردوں نے دشوار گزار علاقے میں جعفر ایکسپریس پر حملہ کیا، حملے کے ساتھ میڈیا پر جنگ شروع ہوئی جو بھارت سے چلائی جا رہی تھی.11 مارچ کو ایک بجے کے قریب دھماکا کر کے ٹرین کو روکا گیا، دہشت گرد مختلف گروپس میں بٹے ہوئے تھے.بھارتی میڈیا نے ٹرین پر دہشتگردی کو کارنامے کے طور پر پیش کیا.انڈین میڈیا نے پرانی ویڈیوز دکھا کر ایک بیانیہ بنا دیا ہے،اس انفارمیشن وار کو بھارت ہینڈل کر رہا تھا.دہشت گردوں نے منظم انداز میں کاروائی کی.دہشت گردوں نے مسافروں کو یرغمال بنا کر رکھا.اے آئی تصاویر،جعلی ویڈیو دکھا کر پروپیگنڈہ کیا گیا.

جعفر ایکسپریس ہائی جیک کرنے والے دہشتگرد افغانستان میں اپنے ہینڈلر کے ساتھ رابطے میں تھے، ترجمان پاک فوج
ترجمان پاک فوج کا مزید کہنا تھا کہ دہشت گردوں نے لسانی بنیادوں پر کچھ مسافروں کو چھوڑا.اور بعد میں سوشل میڈیا پر تاثر پیدا کیا گیا کہ یہ انسانی ہمدردی کا کام ہے.جعفر ایکسپریس ہائی جیک کرنے والے دہشتگرد افغانستان میں اپنے ہینڈلر کے ساتھ رابطے میں تھے، اس حملے کے دوران ان دہشت گردوں کو بھارتی میڈیا سپورٹ کر رہا تھا. دہشت گردوں کی کمیونیکیشن سے واضح ہوا کہ ان کے درمیان خودکش بمبار موجود ہے ، خودکش بمباروں کی وجہ سے محتاط انداز میں آپریشن کیا گیا، جب 12 مارچ کو سیکورٹی فورسز نے دہشت گردوں کو اسنائپر سے انگیج کرنا شروع کیا تو کئی یرغمالی اس دوران دہشت گردوں کے شکنجے سے نکلے.آپریشن کے دوران کسی یرغمالی کی جان نہیں گئی، بلوچستان میں دہشتگردی کا اسپانسر بھارت ہے، موجودہ دہشتگردی واقعے کا تعلق پڑوسی ملک افغانستان سے ملتا ہے۔ پاکستان ایئرفورس نے آپریشن کے دوران بہت اہم کردار ادا کیا، ٹرین ہائی جیکنگ کے واقعات میں یہ سب سے کامیاب ترین آپریشن تھا، افواج پاکستان نے قوم کی دعاؤں سے یہ کامیاب آپریشن کیا، ان لوگوں کا نہ بلوچیت سےتعلق ہے، نہ پاکستان سے، نہ اسلام سے، جو لوگوں میں فرق نسلی بنیادوں پر کر رہے تھے، پورے آپریشن کو مہارت احتیاط اور پروفیشنل ازم کے ساتھ کیا گیا، انڈین میڈیا پر کفن اور ریل کی پرانی ویڈیو سوشل میڈیا سے اٹھا کر چلائی گئی۔ دہشتگردوں اور بھارتی میڈیا کا گٹھ جوڑ بےنقاب ہو گیا،بنوں واقعہ میں بھی افغان دہشت گرد ملوث تھے ،افغانستان سے جدید غیر ملکی اسلحہ پاکستان میں دہشتگردی کی کارروائیوں میں استعمال کیا جاتا ہے،

ڈی جی آئی ایس پی آر کے مطابق فائنل کیلئرنس آپریشن میں دہشتگرد کسی کو نقصان نہ پہنچا سکے ، دہشتگرد شہریوں کو شہید کرتے رہے تاکہ خوف پھیلا رہے، دہشت گرد جو ٹرین کی سائیڈ پر موجود تھے ان کو ہلاک کیاگیا، پہاڑ سے فائر کرنے والے دہشت گرد کو نشانہ بنا کر ہلاک کیا گیا، پورے آپریشن کے دوران کسی مسافرکو نقصان نہیں پہنچا، دہشت گردوں کے پاس غیر ملکی اسلحہ موجود تھا۔پاکستان میں خارجیوں سمیت افغانی بھی دہشت گردی میں ملوث ہیں، بلوچستان میں یہ جو ٹرین کا واقعہ ہوا اور اس سے پہلے جو واقعات ہوئے اس کا مین اسپانسر مشرقی پڑوسی ملک ہے۔ افغانستان سے جدید غیر ملکی اسلحہ پاکستان میں دہشت گردی کی کارروائیوں میں استعمال کیا جاتا ہے، جعفرایکسپریس کا واقعہ بھارت کی دہشت گرد ذہنیت کا تسلسل ہے۔

جنوبی وزیرستان کے علاقے اعظم ورسک بازار کی ایک مسجد میں دھماکہ ہوا جس کے نتیجے میں جے یو آئی کے ضلعی امیر عبداللہ ندیم سمیت متعدد افراد زخمی ہو گئے۔ پولیس کے مطابق دھماکا مسجد میں نصب دھماکہ خیز مواد کے سبب ہوا۔

دھماکے کی اطلاع ملتے ہی پولیس اور ریسکیو ٹیمیں موقع پر پہنچ گئیں اور زخمیوں کو قریبی اسپتال منتقل کیا گیا۔ ڈسٹرکٹ پولیس آفیسر (ڈی پی او) آصف بہادر نے بتایا کہ دھماکا خیز مواد مسجد کے اندر نصب کیا گیا تھا، جس کے نتیجے میں 4 افراد زخمی ہوئے جن میں جے یو آئی کے ضلعی امیر عبداللہ ندیم بھی شامل ہیں۔اس دھماکے سے علاقے میں خوف و ہراس کی لہر دوڑ گئی ہے، اور قانون نافذ کرنے والے ادارے تحقیقات میں مصروف ہیں تاکہ دھماکے کے اسباب اور ملزمان کا سراغ لگایا جا سکے۔

یاد رہے کہ کچھ عرصہ قبل نوشہرہ کے دارالعلوم حقانیہ اکوڑہ خٹک کی مسجد میں بھی خودکش حملہ ہوا تھا، جس میں جے یو آئی (س) کے سربراہ مولانا حامد الحق سمیت 8 افراد شہید اور کئی زخمی ہو گئے تھے۔ یہ حملہ بھی مذہبی رہنماؤں کو نشانہ بنانے کی ایک کوشش کا حصہ سمجھا جاتا ہے۔

اس واقعہ کے بعد علاقے میں سیکیورٹی انتظامات مزید سخت کر دیے گئے ہیں تاکہ ایسے حملوں کا سدباب کیا جا سکے اور عوام کی جان و مال کی حفاظت کی جا سکے۔

جوڈیشل مجسٹریٹ اسلام آباد نے ڈپلومیٹک پاسپورٹ کے غلط استعمال کے کیس میں سابق وزیراعظم آزاد کشمیر سردار تنویر الیاس پر فرد جرم عائد کرنے کے لیے 12 اپریل کی تاریخ مقرر کردی ہے۔

جوڈیشل مجسٹریٹ احمد شہزاد گوندل کی عدالت میں سابق وزیراعظم آزاد کشمیر سردار تنویر الیاس کے خلاف ڈپلومیٹک پاسپورٹ کے غلط استعمال کے کیس کی سماعت ہوئی۔ اس دوران سردار تنویر الیاس کی جانب سے حاضری سے استثنی کی درخواست دائر کی گئی، جسے عدالت نے منظور کرلیا۔عدالت نے ملزم کے وکیل کو فرد جرم کے لیے چالان کی کاپیاں فراہم کرنے کی ہدایت کرتے ہوئے آئندہ سماعت پر فرد جرم عائد کرنے کی تاریخ 12 اپریل مقرر کردی۔ کیس کی مزید سماعت اسی تاریخ کو ہوگی۔

واضح رہے کہ سابق وزیراعظم آزاد کشمیر سردار تنویر الیاس کے خلاف ایف آئی اے (فیڈرل انویسٹی گیشن ایجنسی) میں ڈپلومیٹک پاسپورٹ کے غلط استعمال کے الزام میں مقدمہ درج ہے۔

بنوں کینٹ میں 4 مارچ کو ہونے والے خودکش حملے کے پانچویں حملہ آور کی شناخت ہوگئی ہے، جو کہ افغان شہری تھا۔ حملہ آور کی شناخت محمد فاروق عرف فاروقی کے نام سے ہوئی ہے، جو مولوی شاہ محمد کا بیٹا اور افغانستان کے صوبہ ننگرہار، ضلع جلال آباد، علاقے اخونزادہ کا رہائشی تھا۔

ذرائع کے مطابق، خارجی محمد فاروق افغان طالبان کا متحرک رکن تھا۔ اس کی ایک تصویر طالبان کے یونیفارم میں جبکہ دوسری بنوں کینٹ میں کلیئرنس آپریشن کے بعد لی گئی تصویر منظر عام پر آئی ہے، جس سے اس کے عسکری تعلقات واضح ہو رہے ہیں۔ خارجی محمد فاروق کی فاتحہ خوانی اور تعزیتی نشست آج بروز جمعہ، 14 مارچ کو شہید عبدالولی مسجد میں سہ پہر 1:30 بجے سے 3:30 بجے تک افغانستان میں منعقد ہوگی۔خارجی کے سوگواروں میں اس کے بھائی محمد ابراہیم، محمد ادریس اور مشعل شامل ہیں، جبکہ چچا حاجی ہاشم، حاجی عبداللہ، محمد گل، امان اللہ، اسد اللہ اور حمید اللہ بھی خاندان کا حصہ ہیں۔

4 مارچ کو بنوں کینٹ پر ہونے والے دہشتگرد حملے کی تحقیقات میں پیش رفت جاری ہے۔ سیکیورٹی حکام کے مطابق، 16 حملہ آوروں میں سے 5 کی شناخت افغان شہریوں سے ہوئی

#نمبر 1۔عبدالہادی عرف حماس مہاجر والد حاجی فضل الرحمٰن .
افغانستان کے صوبہ پکتیا، ضلع گردیز کا رہائشی تھا۔

#نمبر 2۔ نام شمس اللہ حیدری والد حاجی مرام ۔
افغانستان کے صوبہ پکتیا کے ضلع جانی خیل کے علاقے دروزی کلی کا رہائشی تھا۔

#نمبر3۔ نام عبدالرزاق حِجران عرف اظہار والد جنت گل۔
افغانستان کے صوبہ پکتیا، ضلع زرمت کے گاؤں شنکلین کا رہائشی تھا۔
عبدالرزاق کو "الحمزہ خودکش بریگیڈ” کے تحت دہشتگردانہ کارروائیوں کی خصوصی تربیت دی گئی تھی۔ دستیاب تصاویر اور شواہد میں اسے دیگر شدت پسندوں کے ساتھ حملے کی تیاری کرتے ہوئے دیکھا جا سکتا ہے، جو ایک منظم نیٹ ورک کی نشاندہی کرتا ہے۔

#نمبر4 شناخت محمد فاروق عرف فاروقی والد مولوی شاہ محمد۔
افغانستان کے صوبہ ننگرہار، ضلع جلال آباد، علاقے اخونزادہ کا رہائشی تھا۔
محمد فاروق افغان طالبان کا متحرک رکن تھا۔ اس کی ایک تصویر طالبان کے یونیفارم میں جبکہ دوسری بنوں کینٹ میں کلیئرنس آپریشن کے بعد لی گئی تصویر منظر عام پر آئی ہے، جس سے اس کے عسکری تعلقات واضح ہو رہے ہیں۔

یہ امر نہایت تشویشناک ہے کہ پکتیا صوبے سے تعلق رکھنے والا یہ تیسرا افغان شہری ہے جو پاکستان میں خودکش حملے میں ملوث پایا گیا۔ سیکیورٹی ادارے اس حملے کے پس پردہ نیٹ ورک اور اس کے سہولت کاروں کا سراغ لگانے کے لیے مزید تحقیقات میں مصروف ہیں۔

ٹانک میں پاک فوج کی چیک پوسٹ پہ خارجیوں کا خود کش حملہ،حملہ اور نے گاڑی ایف سی کیمپ سے ٹکرا دی

خیبر پختونخوا کے ضلع ٹانک کے علاقے جنڈولہ میں سیکورٹی اداروں کی پوسٹ پر خودکش حملہ کیا گیا، جس کے بعد سیکیورٹی فورسز اور حملہ آوروں کے درمیان شدید فائرنگ ہوئی، جوابی کارروائی میں 10 دہشت گردوں کو جہنم واصل کر دیا گیا.

نوٹ یہ ابتدائی خبر ہے

سانحہ جعفر ایکسپریس پر قومی اسمبلی نے متفقہ قرارداد منظور کر لی۔

قرارداد کے متن میں کہا گیا ہے کہ ایوان جعفر ایکسپریس واقعے اور تمام دہشتگرد واقعات کی مذمت کرتا ہے۔ ایسے تمام نظریات جو قومی سلامتی کے متصادم ہیں انہیں پھیلنے کی اجازت نہیں دی جائے گی۔ ملک کو عدم استحکام کا شکار کرنے والوں کے خلاف سخت کارروائی کی جائے گی۔ایوان حادثے میں جاں بحق ہونے والے معصوم شہریوں کے ساتھ اظہارِ یکجہتی کرتا ہے۔ ایوان بہادر سیکیورٹی فورسز کی ستائش کرتاہے۔ ایوان بلا تفریق رنگ و نسل عوام سے دہشتگردی کے خلاف منظم ہونے کا اعادہ کرتا ہے۔

علاوہ ازیں وزیر دفاع خواجہ آصف نے قومی اسمبلی میں اظہار خیال کرتے ہوئے کہا کہ جنرل فیض اور جنرل باجوہ نے ایوان میں بریفنگ میں کہا کہ دہشتگردوں کو واپس لاکر بسانا بہت ضرور ی ہے، بلوچستان میں جعفر ایکسپریس پر حملہ انتہائی افسوسناک ہے، پاک فوج نے دہشتگردی کے خلاف آپریشن میں ایک تاریخ رقم کی ہے، پاک فوج نے کم سے کم نقصان میں بہترین کارکردگی دکھائی، ہمارے جوانوں نے بہادری سے دہشتگردوں کا مقابلہ کیا، جعفر ایکسپریس حملے پر پی ٹی آئی کے سوشل میڈیا نے منفی کردار ادا کیا، دہشت گردوں نے نہتے مسافروں کو نشانہ بنایا، پی ٹی آئی سوشل میڈیا بریگیڈ نے دہشت گردوں کو کریڈٹ دیا، سوشل میڈیا پر کہا گیا کہ دہشت گردوں نے مسافروں کو خود چھوڑا، سازش کرنے والے پی ٹی آئی کے سوشل میڈیا کے لوگ اوورسیز ہیں، یہ بھگوڑے ہیں باہر بیٹھ کر سازشیں کر رہے ہیں، مارشل لاء کی پیداوار نے ہمیں فارم 47 کا طعنہ دیا، دوسروں پر انگلی اٹھانے والوں کو اپنا ماضی بھی دیکھنا چاہیے، دہشتگردوں کو پاکستان لا کر بسانے کی باتیں کس نے کیں، کون نہیں جانتا،سرفراز بگٹی دہشت گردوں کے خلاف ڈٹ کر کھڑے ہیں، خیبرپختونخوا میں دہشت گردی کیخلاف ڈٹ کر کیوں نہیں بیان دیا جاتا، یہ تو دہشتگردوں کے حق میں یہاں کھڑے ہو کر بیان دیتے رہے، جعفر ایکسپریس حملے پر ایوان میں متفقہ آواز نہیں اٹھائی گئی، کوئی شرم ہوتی ہے کوئی حیا ہوتی ہے، جمہوریت کا سبق وہ دیتے ہیں جنہوں نے جمہوریت کیلئے قربانیاں دی ہوئی ہیں، پی ٹی آئی کی 4 سال حکومت رہی، یہاں جنرل باجوہ اور جنرل فیض حمید بیٹھے ہوئے تھے، بریفنگ دی گئی کہ دہشتگردی کو یہاں لا کر بسانا بہت اچھا عمل ہے،بیرسٹرگوہر بھی اس پارٹی میں ہجرت کر کے آئے ہوئے ہیں، یہ سارے کے سارے اپنے ماضی کی طرف نظر دوڑائیں، سوات کا قصاب کون تھا جسے یہاں بسایا گیا، چار ماہ ہوگئے کرم اور پاراچنار میں امن ہوا؟ ہمارا ایک مارشل لا حکومت سے تعلق رہا اس کی کئی بار معذرت کر چکا ہوں آج بھی کر رہا ہوں، یہ لوگ پرویز مشرف کے ساتھ بھی بیٹھے رہے،یہ تو دہشتگردوں کے خلاف بیان دیتے بھی ڈرتے ہیں، شیر افضل مروت حقیقت اور ان کا اصل چہرہ بیان کرتے ہیں، ان سے تو شیر افضل مروت نہیں سنبھالے گئے، یہ افواج اور شہداء کی توہین کرتے ہیں، یہ دہشتگردوں کے خلاف جنگ لڑنے کیلئے انکاری ہیں، یہ اقتدا ر کی جنگ لڑ سکتے ہیں لیکن ملک کی جنگ لڑنے سے انکاری ہیں، یہ نعرہ لگاتے ہیں خان نہیں تو پاکستان نہیں، وہ باتیں مت کریں جس سے شرمندگی ہوتی ہے، قرآن اُٹھا کر انہوں نے یہاں جھوٹ بولے ہوئے ہیں، یہ درودیوار ان کے جھوٹوں کی گواہ ہے، ملک کے معاشی اشاریے ٹھیک ہوئے ہیں، بہادرافواج دہشتگردی کے خلاف لڑ رہی ہیں کیا یہاں اعتراف ہوا؟ یہ جنرل باجوہ کو باپ بنا لیتے تھے، جو لوگ سیاست کیلئے باپ بدل لیں ان کی کیا کوالٹی ہوگی۔

خواجہ آصف کا مزید کہنا تھا کہ یہ اپنی تقریر میں مسلح افواج کو نشانہ بناتے ہیں، جب مسلح افواج ملک میں مارشل لا لگائے تو یہ اس کے ساتھی بن جاتے ہیں، ریفرنڈم کے اندر بانی پی ٹی آئی پرویز مشرف کے ساتھ کھڑے تھے، میں تو معذرت کرتا رہوں گا آپ بھی تو کریں،ماضی کے جھرونکوں میں جا کر دیکھیں آپ اور آپ کے لیڈر کا کیا کردار تھا، جنرل باجوہ کے پاؤں پکڑ کر کہتے تھے ساری زندگی کی ایکسٹینشن دے دوں گا، آپ نے جعفر ایکسپریس اور بی ایل اے میں سارا کریڈٹ دہشتگردوں کو دیدیا، یہ ماضی کو بھول جاتے ہیں، جب پی ٹی آئی گورنمنٹ تھی تو کیا کیا واردات ہوئی، لیڈر آف اپوزیشن نے سرکاری بنچز پر ایک عمر گزاری ہوئی ہے، سب سے زیادہ آئی پی پیز جنرل مشرف کے دور میں لگے، اُس وقت ان کو نہیں پتہ لگا کہ ملک میں کیا ہو رہا ہے،ساری دنیا جعفر ایکسپریس واقعے کے متاثرہ افراد کے ساتھ کھڑی ہے اور یہ مخالف، یہ اس نعرے کے ساتھ کھڑے ہیں خان نہیں تو پاکستان نہیں، یہ ہمیں نااہل اور اپنے آپ کو اہل قرار دیتے ہیں، اپوزیشن بنچز سے درخواست ہے پاکستان کی سالمیت اور بقا کی جنگ لڑیں، اپوزیشن صرف ایک شخص کے اقتدار کی جنگ نہ لڑے،ان کیلئے صرف ایک شخص ریفرنس پوائنٹ ہے، میرے لئے پاکستان اور اس کی سالمیت ریفرنس پوائنٹ ہے۔

قبل ازیں سپیکر قومی اسمبلی نے قومی اسمبلی کے اجلاس کے دوران بلوچستان میں جعفر ایکسپریس کو پیش آنے والے سانحہ کی مذمت کرتے ہوئے اس سانحہ کے نتیجے میں سکیورٹی اہلکاروں اور نہتے مسافروں کی شہادتوں پر گہرے دکھ اور افسوس کا اظہار کیا،انہوں نے ایوان کو اس فیصلے سے آگاہ کیا کہ آج کے اجلاس میں دیگر کارروائی کو ملتوی کر کے جعفر ایکسپریس سانحہ کو زیر بحث لایا جائے گا،سپیکر قومی اسمبلی نے وفاقی وزیر/پارلیمانی چیف وہپ ڈاکٹر طارق فضل چودھری کو قومی اسمبلی میں قواعد و ضوابط کے طریقہ کار 2007 کے قاعدہ 288 کے تحت ہاؤس کی دیگر کارروائی کو ملتوی کر کے جعفر ایکسپریس سانحہ پر بحث کیلئے تحریک پیش کرنے کا کہا۔

ترجمان دفتر خارجہ شفقت علی خان نے ہفتہ وار بریفنگ میں کہا کہ جعفر ایکسپریس پر حملہ بیرون ملک بیٹھی قیادت نے کرایا اور اس دہشتگردی کے پیچھے بھارت کا ہاتھ ہے۔ پاکستان نے جعفر ایکسپریس پر حملے کے بعد ریسکیو آپریشن مکمل کر لیا ہے، اور اس حملے کے پیچھے بھارت کی معاونت کا شبہ ظاہر کیا ہے۔

ترجمان نے مزید کہا کہ بلوچستان میں حالیہ دہشتگردی میں ملوث دہشتگرد افغانستان میں اپنے ساتھیوں سے رابطے میں تھے۔ اس واقعہ کے دوران ٹریس شدہ کالز میں افغانستان سے رابطوں کا سراغ ملا ہے، جس سے یہ بات واضح ہوتی ہے کہ دہشتگردوں کی افغانستان میں محفوظ پناہ گاہیں موجود ہیں۔ پاکستان نے افغان عبوری حکومت سے بار بار مطالبہ کیا ہے کہ وہ دہشتگرد گروپوں کو اپنی سرزمین کے استعمال سے روکے، خاص طور پر بلوچ لبریشن آرمی (بی ایل اے) جیسے گروپوں کو۔

انہوں نے کہا کہ پاکستان اپنی سرحدوں کے باہر سے ہونے والی دہشتگردی کا شکار ہو رہا ہے، اور اس پر عالمی سطح پر تشویش کا اظہار کیا ہے۔ تاہم، ترجمان نے کہا کہ پاکستان سفارتی تعلقات کو پبلک فورمز پر بیان کرنے کی پالیسی پر عمل نہیں کرتا، اور ماضی میں بھی افغانستان کے ساتھ دہشتگردی کے واقعات کی مکمل تفصیلات شیئر کی جاتی رہی ہیں۔ یہ ایک مسلسل عمل ہے جو جاری ہے۔

ترجمان دفتر خارجہ نے اس بات پر زور دیا کہ افغانستان کے ساتھ پاکستان کی بنیادی ترجیح دوستانہ اور قریبی تعلقات کا فروغ ہے۔ اس سمت میں تعلقات کی تسلسل کی اہمیت پر بھی روشنی ڈالی، اور دہشتگردی کو ایک سنگین مسئلہ قرار دیتے ہوئے کہا کہ اس پر پاکستان اپنے دوست ممالک کے ساتھ بھرپور تعاون جاری رکھے گا۔