Category: اہم خبریں

وزیرِ اعظم میاں محمد شہباز شریف نے پاکستان پیپلز پارٹی کے چیئرمین بلاول بھٹو زرداری کو آج وفد سمیت افطار ڈنر پر مدعو کیا ہے۔

ذرائع کے مطابق، یہ افطار ڈنر وزیرِ اعظم ہاؤس میں ہو گا، جس دوران دونوں رہنماؤں کے درمیان حکومت سازی کے دوران کیے گئے معاہدوں پر تفصیلی گفتگو کی جائے گی۔ اس ملاقات میں پیپلز پارٹی اور حکومت کے درمیان مستقبل کے سیاسی اور حکومتی معاملات پر تبادلہ خیال کیا جائے گا۔ذرائع کا کہنا ہے کہ بلاول بھٹو شہباز شریف کو اپنے تحفظات سے آگاہ کریں گے اور حکومت کے ساتھ کئے گئے معاہدے کے حوالے سے تفصیلی بات چیت کریں گے۔

اس ملاقات میں وزیرِ اعلیٰ سندھ سید مراد علی شاہ، گورنر خیبر پختونخوا، اور پیپلز پارٹی کے دیگر اہم رہنما بھی شریک ہوں گے۔ وزیرِ اعظم شہباز شریف کے ہمراہ کابینہ کے ارکان اور مسلم لیگ ن کی اعلیٰ قیادت بھی اس اہم ملاقات میں شریک ہوگی۔

یاد رہے کہ گزشتہ ہفتے بلاول بھٹو زرداری کی وزیرِ اعظم شہباز شریف سے ملاقات مؤخر ہو گئی تھی، جس کی وجہ بلاول بھٹو کی مصروفیات بتائی گئی تھی۔ اس ملاقات کے بعد آج کے افطار ڈنر پر ہونے والی ملاقات کو انتہائی اہم سمجھا جا رہا ہے کیونکہ اس دوران دونوں رہنماؤں کے درمیان حکومت سازی اور دیگر سیاسی امور پر بات چیت کی توقع کی جا رہی ہے۔

سپریم کورٹ نے سانحہ 9 اور 10 مئی کے رواں اور آئندہ ہفتے سماعت کے لیے مقرر تمام مقدمات ڈی لسٹ کر دیے۔

سپریم کورٹ میں 9 مئی کے واقعات کے ملزمان کی ضمانت منسوخی کی اپیلوں پر سماعت ہوئی۔چیف جسٹس یحییٰ آفریدی کی سربراہی میں 3 رکنی بینچ نے مقدمات کی سماعت کی۔عدالت نے پنجاب حکومت کی مہلت کی استدعا منظور کرتے ہوئے کہا کہ تمام مقدمات کی سماعت اب عید کے بعد ہو گی۔ذوالفقار نقوی نے دوران سماعت کہا پنجاب حکومت نے مجھے 9 مئی کے مقدمات میں وکیل مقرر کیا ہے، سپریم کورٹ سے استدعا ہے کہ تیاری کے لیے وقت دیا جائے۔چیف جسٹس یحییٰ آفریدی نے ریمارکس دیے کہ 9 مئی کے مقدمات تو کل اور پرسوں بھی مقرر ہیں، گزشتہ سماعتوں پر ایڈیشنل پراسیکیوٹر پیش ہو کر وقت مانگتے رہے ہیں، آج آپ وقت مانگ رہے ہیں،

چیف جسٹس یحییٰ آفریدی نے برہمی کا اظہار کرتے ہوئے کہا کہ ایسے نہیں چلے گا، یہ کوئی ایک کیس نہیں 50 کے قریب اپیلیں ہیں۔پنجاب حکومت کے وکیل نے عدالت سے کہا کہ رواں ہفتے کے مقدمات ملتوی کر دیں آئندہ ہفتے والوں کی تیاری کر کے آؤں گا۔چیف جسٹس یحییٰ آفریدی نے کہا کچھ اپیلیں کیس منتقلی سے متعلق بھی ہیں، مگر کیس منتقلی کا معاملہ ختم ہو چکا ہے اس پر حکومت سے ہدایات لے لیں۔ذوالفقار نقوی نے عدالت کو بتایا کہ جج کا تبادلہ ہو چکا ہے صرف جرمانے اور کچھ آبزرویشنز کی حد تک اپیل کی پیروی کریں گے۔

واضح رہے کہ لاہور ہائی کورٹ نے 9 مئی کے ملزمان کی ضمانتیں منظور کی تھیں۔پنجاب حکومت نے ضمانتیں منسوخ کرنے کے لیے سپریم کورٹ سے رجوع کر رکھا ہے۔

پورا ملک بدامنی کی لپیٹ میں، نوجوانوں کو مایوس نہیں ہونے دیں گے، مزمل اقبال ہاشمی
نوجوانوں کو ہنر مند بنانے کے لئے عید کے بعد آئی ٹی پروگرام لا رہے ہیں. تابش قیوم

پاکستان مرکزی مسلم لیگ نے وطن عزیزپاکستان میں قیام امن کے لئے،قوم کو متحد و بیدار کرنے کے لئے ملک گیر تحریک چلانے کا اعلان کر دیا، صدر مرکزی مسلم لیگ خالد مسعود سندھو کا کہنا تھا کہ قائداعظم کے پاکستان کو مضبوط سے مضبوط تر بنائیں گے. رمضان میں پاکستان وجود میں آیا. عید کے بعد پاکستان میں دہشت گردی کے خلاف ملک تحریک چلانے کا اعلان کرتے ہیں. پاکستان کی تمام سیاسی و مذہبی جماعتوں کے ساتھ ملکر دہشت گردی کے خلاف مضبوط لائحہ عمل دیں گے.مرکزی مسلم لیگ امید کے ساتھ، مایوسیوں کا خاتمہ کرے گی.نوجوانوں کو آئی ٹی کے کورس کروائیں گے.

ان خیالات کا اظہار خالد مسعود سندھو نے مقامی ہوٹل میں سینئر صحافیوں، ایڈیٹرز، اینکر پرسن کے اعزاز میں منعقدہ افطار ڈنر کی تقریب سے خطاب کرتے ہوئے کیا. تقریب سے مرکزی مسلم لیگ کے ترجمان تابش قیوم، مرکزی مسلم لیگ لاہور کے سیکرٹری جنرل مزمل اقبال ہاشمی نے بھی خطاب کیا.خالد مسعود سندھو کا کہنا تھا کہ دہشت گردی کی لہر نے سب کو متاثر کیا ہے،کوئی محفوظ نہیں. مرکزی مسلم لیگ سب کو اکٹھا کرے گی .مولانا حامد الحق حقانی بم دھماکے میں شہید ہوئے . بنوں میں دہشت گردی کا واقعہ ہوا . عید کے بعد ملک گیر امن مارچ، جلسے جلسوس، ہوں گے.دہشت گردوں کے خلاف ملک گیر ،بلا تفریق آپریشن کرنے کی ضرورت ہے. دہشت گردوں سے ہمدردی رکھنے والا پاکستان کاہمدرد نہیں ہو سکتا. انتشار کی سیاست کی مخالفت کرتے ہیں.سیاسی جماعتیں بلدیاتی نظام کی کوشش کریں جس میں کسی قسم کی کوئی مداخلت نہ ہو، مرکزی مسلم لیگ مذاکرات پر یقین رکھتی ہے. حکومتی سطح پر مذاکرات کو بحال کیا جائے.

مرکزی مسلم لیگ لاہور کے سیکرٹری جنرل مزمل اقبال ہاشمی کا کہنا تھا کہ اس وقت پاکستان بہت سارےمسائل سے دو چار ہے ان میں سے ایک مایوسی ہے.لوگ ریاست پاکستان سے مایوس ہو چکے ہیں.پورا ملک اس وقت بدامنی کی لپیٹ ہے. دہشت گردی ہے، بلوچستان بڑی شدت کے ساتھ سلگ رہا ہے. کے پی کے میں کئی بار حالات ہاتھوں سے نکلتے نظر آ رہے. آنے والا منظر نامہ دنیا کا بڑی تیزی سے بدل رہا ہے. ضرور ت اس امر کی ہے کہ ہم پاکستان کی سیاست کو مفاہمتی سیاست کی طرف لے کر آئیں. میڈیا قوم کو متحد و بیدار کرنے کے لئے کردار ادا کرے، پاکستان مرکزی مسلم لیگ نے اس بات کا تہیہ کر رکھا ہے کہ ہم اپنی سیاست کو اخلاق، کردار کے دائرے میں رکھیں گے ،کسی صور ت الزام تراشی کی سیاست نہیں کریں گے، نوجوانوں کو مثبت انداز میں کام کے لئے تیار کریں گے.

تابش قیوم کا کہنا تھا کہ پاکستان مرکزی مسلم لیگ پاکستان کے سیاسی منظرنامے میں بظاہر نئی سیاسی جماعت ہے لیکن ان کے کام ، انکی خدمت، پاکستان سے وفا سے سب واقف ہیں، ملکی حالات میں لوگوں کی تربیت ،اصلاح کے کردار میں بہت بڑا ہے. روزگار پروگرام، خدمت پروجیکٹ، سحر و افطار دسترخوان مرکزی مسلم لیگ کے ملک بھر میں منصوبہ جات چل رہے.آئی ٹی کے حوالہ سے عید کے بعد بہت بڑا پروگرام لانچ کر رہے ہیں فری لانسنگ کے کورسز گلی محلوں، پارکوں ،گلیوں میں غرض ہر جگہ کروائیں گے تا کہ نوجوان سیکھیں اور خود کمائیں، اپنی معیشت بہتر کریں.اگر ہماری عوت محفوظ، ہنر مند،تعلیم یافتہ ہو گی تو ہماری قوم مضبوط ہو گی.

پاکستان کی حکومت نے فیصلہ کیا ہے کہ غیر قانونی طور پر مقیم غیر ملکیوں کی وطن واپسی کی ڈیڈ لائن میں مزید توسیع نہیں کی جائے گی۔ سیکیورٹی ذرائع کے مطابق، ان غیر قانونی افراد اور افغان سٹیزن کارڈ ہولڈرز کو پاکستان چھوڑنے کے لیے 31 مارچ 2025ء تک کا وقت دیا گیا ہے۔ مقررہ تاریخ کے بعد ان افراد کے خلاف قانونی کارروائی کی جائے گی اور انہیں گرفتار کر کے ملک بدر کیا جائے گا۔

یہ فیصلہ پاکستان میں بڑھتے ہوئے دہشت گردی کے واقعات کے پیش نظر کیا گیا ہے، جس میں افغان شہریوں کے ملوث ہونے کے شواہد ملے ہیں۔ سیکیورٹی ذرائع کے مطابق افغان دہشت گردوں کی سرگرمیاں پاکستان میں بڑھتی ہوئی تشویش کا باعث بنی ہیں، جس کے بعد یہ قدم اٹھایا گیا ہے تاکہ ملک میں امن و امان کی صورتحال کو بہتر بنایا جا سکے۔اس کے علاوہ، 4 مارچ 2025ء کو بنوں کنٹونمنٹ پر دہشت گردوں کی جانب سے کیے گئے خودکش حملوں میں 16 دہشت گرد مارے گئے تھے، جن میں افغان دہشت گرد بھی شامل تھے۔ ذرائع کا کہنا ہے کہ اس حملے کی منصوبہ بندی افغان سرزمین پر کی گئی تھی۔پاکستانی حکومت نے اس حوالے سے مزید کہا ہے کہ غیر قانونی طور پر مقیم غیر ملکیوں کی ملک بدری کا عمل یکم اپریل 2025ء سے شروع کر دیا جائے گا۔ حکومت نے اس بات پر زور دیا ہے کہ ملک کی داخلی سلامتی کے لیے ایسے اقدامات اٹھانا ضروری ہیں تاکہ دہشت گردی کے خطرات سے بچا جا سکے اور غیر قانونی مقیم افراد کی تعداد کم کی جا سکے۔

اس فیصلے کے بعد غیر قانونی طور پر مقیم غیر ملکیوں کے لیے یہ ایک آخری موقع ہوگا کہ وہ اپنی رضامندی سے ملک چھوڑ دیں، ورنہ انہیں قانونی کارروائی کا سامنا کرنا پڑے گا۔

اسلام آباد: وفاقی دارالحکومت اسلام آباد میں نئی دہلی کی طرز پر اسمبلی اور منتخب جمہوری حکومت بنانے کی سفارش کی گئی ہے، جس کے تحت اسمبلی اپنا لیڈر منتخب کرے گی جو میئر کہلائے گا۔

وفاقی دارالحکومت اسلام آباد کی انتظامی اصلاحات کے لیے قائم سب کمیٹی نے اپنی عبوری رپورٹ میں سفارش کی ہے کہ اسلام آباد میں نمائندہ حکومت اور جمہوری کنٹرول قائم کیا جائے۔ اس مقصد کے لیے وفاقی حکومت سے اسلام آباد حکومت کو اختیارات منتقل کیے جائیں اور مختلف بکھرے ہوئے محکموں کی بجائے مربوط انداز میں ادارے بنائے جائیں۔رپورٹ میں تجویز کیا گیا ہے کہ اسلام آباد کے انتظامی امور کے لیے ایک موزوں ڈھانچہ تشکیل دیا جائے جو گلگت بلتستان کی طرز پر صوبائی حکومت کی طرز پر ہو۔ سب کمیٹی نے تجویز دی ہے کہ اسلام آباد میں نئی دہلی کے ماڈل پر اسلام آباد کیپٹل ٹیرٹری حکومت تشکیل دی جائے، جس کے تحت ایک منتخب اسمبلی ہوگی۔ اس اسمبلی کے نمائندے براہ راست عوام کے ووٹوں سے منتخب ہوں گے۔ تاہم، مجوزہ صوبائی اسمبلی کے پاس ہوم، پولیس اور ماسٹر پلاننگ کے امور نہیں ہوں گے۔اسمبلی اپنا لیڈر منتخب کرے گی جو میئر کہلائے گا اور اسمبلی کو جوابدہ ہوگا۔ اس کے تحت آئی سی ٹی کے تمام محکمے صوبائی محکموں کی طرز پر تشکیل دیے جائیں گے۔ ان محکموں کی تعداد محدود ہوگی اور انہیں چار بڑے شعبوں میں تقسیم کیا جائے گا:سوشل،اکنامک،ڈویلپمنٹ،جنرل.داخلہ، پولیس اور ماسٹر پلاننگ کے محکمے وفاقی حکومت کے ماتحت رہیں گے جبکہ باقی تمام محکمے میئر کے ماتحت ہوں گے۔ داخلہ، پولیس اور ماسٹر پلاننگ کے محکموں کے انچارج وفاقی وزراء ہوں گے۔

سب کمیٹی نے تجویز دی ہے کہ کیپیٹل ڈویلپمنٹ اتھارٹی (CDA) سمیت تمام ادارے اسلام آباد کیپٹل ٹیرٹری (ICT) حکومت کے ماتحت کیے جائیں۔ اس کے علاوہ، چیف کمشنر کی جگہ چیف سیکرٹری ہوگا اور آئی جی پولیس کا عہدہ بھی متعارف کرایا جائے گا۔رپورٹ میں یہ بھی سفارش کی گئی ہے کہ آئی سی ٹی حکومت کو گلگت بلتستان کی طرز پر مکمل انتظامی اور مالی خود مختاری دی جائے۔ اس مقصد کے حصول کے لیے اسلام آباد کیپٹل ٹیرٹری ایکٹ 2025 منظور کیا جائے گا۔ عبوری طور پر، وفاقی حکومت کی ایڈوائس پر صدر مملکت آئین کے آرٹیکل 258 کے تحت ایک حکم نامہ جاری کر سکتے ہیں، جیسا کہ گلگت بلتستان آرڈر 2018 کے تحت کیا گیا تھا۔سب کمیٹی نے یہ بھی وضاحت کی ہے کہ آئی سی ٹی حکومت کے قیام کے لیے کسی نئے مالی انتظام کی ضرورت نہیں ہوگی کیونکہ زیادہ تر موجودہ اداروں کو ہی ری اسٹرکچر کیا جائے گا۔ اس حکومت کے دو شیڈول ہوں گے.شیڈول اے: داخلہ، پولیس اور ماسٹر پلاننگ کے محکمے جو وفاقی حکومت کے ماتحت ہوں گے۔شیڈول بی: 26 محکمے جو آئی سی ٹی حکومت کے ماتحت ہوں گے۔

ذرائع کے مطابق، یہ عبوری رپورٹ بیرسٹر ظفر اللہ کی سربراہی میں قائم سب کمیٹی نے تیار کی ہے، جس کے دیگر ارکان میں وفاقی وزیر پارلیمانی امور ڈاکٹر طارق فضل چوہدری، ایم این اے خرم شہزاد، انجم عقیل ایم این اے، ایڈیشنل سیکرٹری وزارت داخلہ، چیف کمشنر اسلام آباد، ڈپٹی کمشنر اسلام آباد اور سی ڈی اے کے نمائندے شامل ہیں۔سب کمیٹی کا اگلا اجلاس آئندہ ہفتے ہوگا جس میں سفارشات کو حتمی شکل دی جائے گی۔ بعد ازاں، یہ سفارشات وفاقی وزیر منصوبہ بندی و ترقیات احسن اقبال کی سربراہی میں قائم وزارتی کمیٹی کو پیش کی جائیں گی، جو حتمی منظوری دے گی۔