Category: اہم خبریں

تلہ گنگ سے افغان دہشت گرد کو گرفتار کر لیا گیا جس کا بیان بھی سامنے آیا ہے

گرفتار دہشت گرد نے کہا کہ میرا نام قاسم عرف حسن ہے، میری قوم دلوذی اور میں افغانستان گردیزولایت کا رہنے والا ہوں،میں 10سال پہلے افغانستان سے لکی مروت پاکستان آیا، وہ یہاں پلا بڑھا، رزق کمایا اور یہاں کے لوگوں سے پیار ملا،سرہ درگہ میں میری 2025 میں طالبان کمانڈر ارمانی کے ساتھ ملاقات ہوئی جس نے مجھے جہاد کی طرف دعوت دی، کمانڈر ارمانی نے مجھے فدائی کرنے کا کہا، کمانڈر ارمانی نے فوجی قلعہ پر فدائی کرنے کی غرض سے ریکی کرائی لیکن مناسب موقع نہ ملنے پر ہم فوجی قلعہ پر فدائی حملہ نہیں کر سکے۔

گرفتار دہشت گرد نے کہا کہ کمانڈر ارمانی کے مشورے پر میں تنظیم میں واپس چلا گیا، تنظیم میں کمانڈر ارمانی نے مجھے نئے لوگ تلاش کرنے کے لیے کہا، میں نے 5 بندے کمانڈر ارمانی کے حوالے کیے، فی بندہ مجھے 10ہزار روپے ملے،میں ستمبر میں پنجاب چلا گیا جس کا مقصد لڑکے تلاش کرنا اور انہیں تنظیم میں شامل کرنا تھا۔ پنجاب میں کچھ دن گزارنے کے بعد مجھے پولیس نے گرفتار کر لیا۔

کالعدم تنظیم بی ایل ایف خواتین کو بلیک میل کر کے خود کش حملوں پر مجبور کرتی ہے.

فتنہ الہندوستان کی کالعدم تنظیمیں، خصوصاً بی ایل اے اور بی ایل ایف، خواتین کی نازیبا ویڈیوز بنا کر انہیں خود کش حملوں کے لیے مجبور کرتی ہیں۔ گرفتار ہونےوالی خود کش بمبار عدیلہ بلوچ نے بتایا تھا کہ کس طرح نازیبا ویڈیو بناکر اسے بلیک میل کیا گیا۔ نوکنڈی میں خود کش حملہ کرنے والی زرینہ رفیق کو بھی بی ایل ایف کے کمانڈر نے جنسی درندگی کا نشانہ بنایا، اس کی ویڈیو بنائی اور خود کش حملہ کرنے پر دھمکایا کہ اگر انکار کیا تو ویڈیو نیٹ پر جاری کر دی جائے گی،یہ درندے خواتین کو اپنے مذموم مقاصد کے لیے استعمال کر رہے ہیں.

اسلامی اور بلوچی روایات کی دھجیاں اڑانے والوں نے ایک بار پھر بلوچستان نوکنڈی حملے میں عورت کا استعمال کیا،یہ بلوچ عزت کی کھلی پامالی ہے۔بی وائی سی اور نام نہاد ہیومن رائٹس بلوچستان کے وہی لوگ آکر اب یہ منظر بھی دیکھ لیں،چند ہفتے قبل حب میں نسرینہ بلوچ کی گمشدگی پر روایات یاد دلانے والوں کی آج زبانیں بند ہیں، اور ان کا دوہرا معیار بے نقاب ہو چکا ہے۔

قبل ازیں نوکنڈی پر ناکام حملے کے بعد، دہشتگردوں کے ایک اور گروپ نے پنجگور میں حملہ کیا،جوانوں نے فوری کارروائی کرتے ہوئے دہشت گردوں کو پسپا کردیا۔ دریں اثنا فتنہ الہندوستان کے دہشت گردوں نے ایف سی ہیڈ کوارٹر نوکنڈی پر بزدلانہ حملے کی ناکام کوشش کی، تاہم سیکیورٹی فورسز کی بروقت اور موثر کارروائی نے دشمن کے ناپاک عزائم خاک میں ملا دیے۔ ایک خودکش حملہ آور نے مرکزی گیٹ پر خود کو دھماکے سے اڑا لیا، جس کے فوراً بعد کوئیک رسپانس فورس نے فوری جوابی کارروائی کرتے ہوئے باقی تین دہشت گردوں کو جہنم واصل کر دیا۔سیکیورٹی فورسز کی جانب سے آپریشن جاری ہے،جلد باقی ماندہ دہشت گرد کو انجام تک پہنچایا جائے گا۔

اتوار کی شب ساڑھے آٹھ بجے کے قریب چار حملہ آوروں نے کیمپ پر حملہ کیا، جن میں سے ایک خاتون خودکش بمبار زرینہ فاروق عرف ترانگ ماہو نے کیمپ کے مرکزی گیٹ پر ناکام خودکش دھماکہ کیا۔ باقی حملہ آور سیکیورٹی فورسز کی بروقت کارروائی میں ہلاک ہو گئے۔ ایس ایس پی چاغی محمد شریف کے مطابق جوابی کارروائی کے بعد کلیئرنس آپریشن جاری ہے اور علاقے میں صورتحال مکمل طور پر کنٹرول میں ہے اور معمول زندگی رواں دواں ہے۔

فیلڈ مارشل سید عاصم منیر سے مصر کے وزیرِ خارجہ ڈاکٹر بدر احمد محمد عبدالعاطی نے ملاقات کی۔

ڈی جی آئی ایس پی آر کے مطابق ملاقات میں پاکستان اور مصر کے برادرانہ تعلقات کا جائزہ لیا گیا، ملاقات میں دفاع اور سیکیورٹی تعاون، عسکری روابط، ٹریننگ کے اشتراک اور علاقائی امن و استحکام پر تبادلہ خیال کیا گیا، دونوں ممالک نے دفاع اور وسیع تر اسٹریٹجک شعبوں میں ہم آہنگی کو مزید مضبوط اور دیرینہ تعلقات کو مضبوط کرنے کے عزم کا اعادہ کیا،مصر کے وزیرِ خارجہ نے مصری قیادت کی جانب سے نیک خواہشات بھی پہنچائیں، مصر نے پاکستان کے ساتھ تمام شعبوں میں تعاون کو مزید فروغ دینے میں گہری دلچسپی کا اظہار کیا۔

ڈی جی آئی ایس پی آر کے مطابق فریقین نے بدلتی علاقائی سیکیورٹی صورتِ حال کے تناظر میں درپیش چیلنجز سے نمٹنے کے لیے اعلیٰ سطحی روابط کے تسلسل کی اہمیت پر زور دیا۔

ملک بھر میں دہشت گردی کے خلاف جاری سکیورٹی آپریشنز اور مختلف علاقوں میں پیش آنے والے واقعات کے سلسلے میں خیبر پختونخوا اور بلوچستان کے متعدد اضلاع سے اہم اطلاعات موصول ہوئی ہیں۔ سکیورٹی فورسز، پولیس اور قانون نافذ کرنے والے ادارے مختلف کارروائیوں میں مصروف ہیں،

جنوبی وزیرستان لوئر کے علاقے اعظم ورسک، کجاہ پینگا میں سکیورٹی فورسز اور دہشت گردوں کے درمیان شدید فائرنگ کا سلسلہ جاری ہے۔مقامی ذرائع کے مطابق جھڑپ میں ہلکے اور بھاری دونوں قسم کے ہتھیار استعمال کیے جا رہے ہیں۔ فورسز نے علاقے کو مکمل گھیرے میں لے لیا ہے اور سرچ آپریشن جاری ہے۔ مزید تفصیلات صورتحال واضح ہونے پر سامنے آئیں گی۔

کوہاٹ کے علاقے نصرت خیل میں نئی تعمیر شدہ اہلِ حدیث جماعت کی مرکزی مسجد کو IED حملے کا نشانہ بنایا گیا۔
نامعلوم افراد نے رات گئے مسجد کے قریب دیسی ساختہ بم نصب کیا، جب کہ مسجد کے منتظم کے گھر پر فائرنگ اور ہینڈ گرنیڈ بھی پھینکا۔ دھماکے سے مسجد کو جزوی نقصان پہنچا۔ایس ایچ او خضر فرید کا کہنا ہے کہ حملہ آوروں کی شناخت کے لیے تحقیقات جاری ہیں اور فورسز نے علاقے کو گھیرے میں لے کر سرچ آپریشن شروع کر دیا ہے۔

ضلع خیبر کی تحصیل تیراہ میں 45 روز قبل کالعدم تنظیم یونائیٹڈ مجاہدین کے ہاتھوں اغوا کیے گئے ایف سی اہلکار علی اکبر کو بحفاظت بازیاب کروا لیا گیا۔بازیابی مقامی عمائدین اور حکام کی کوششوں کے نتیجے میں ممکن ہوئی۔ اغوا کے دوران ایک ایف سی اہلکار شہید بھی ہوا تھا۔ سکیورٹی ادارے واقعے کی تفتیش کر رہے ہیں۔

بنوں میں میراں شاہ روڈ پر ایئرپورٹ کے قریب سکیورٹی فورسز کے قافلے پر حملہ کیا گیا، جس میں ایک اہلکار شہید جبکہ دو زخمی ہو گئے۔زخمیوں کو فوری طور پر سی ایم ایچ منتقل کیا گیا۔ علاقے میں سرچ آپریشن شروع کر دیا گیا ہے۔

باجوڑ میں سالارزئی قبیلے کے عمائدین نے حالیہ دہشت گردی، بھتہ خوری اور امن و امان کی خراب صورتحال پر گرینڈ جرگہ منعقد کیا۔جرگے میں فیصلہ کیا گیا کہ دہشت گردی کسی بھی جگہ ہو، پورا قبیلہ مشترکہ طور پر جواب دے گا۔دہشت گردوں اور ان کے سہولت کاروں کے خلاف اجتماعی کارروائیاں کی جائیں گی۔آٹھ نکاتی مطالبات انتظامیہ کے سامنے رکھے گئے۔عمائدین کا کہنا تھا کہ سالارزئی قبیلہ ہمیشہ ریاست کے ساتھ کھڑا رہا ہے اور بھتہ خوری میں اضافے پر شدید تشویش پائی جاتی ہے۔

باجوڑ کے علاقوں خواڑزئی ماموند اور لوئی سم میں سکیورٹی فورسز نے سرچ آپریشن کے دوران مارٹر گولے برآمد کیے، جنہیں بم ڈسپوزل اسکواڈ نے موقع پر ناکارہ بنا دیا۔پولیس نے عوام سے کہا ہے کہ کسی بھی مشکوک شے کی اطلاع فوراً کنٹرول روم کو دیں۔

کلاچی میں سکیورٹی فورسز نے خفیہ اطلاعات پر آپریشن کیا، جس میں چھ دہشت گرد مارے گئے جبکہ متعدد زخمی ہوئے۔
۔ علاقے میں کلیئرنس آپریشن جاری ہے۔

وسطی کرم کے علاقے چنارک میں دہشت گردوں نے پولیس پوسٹ پر حملہ کر دیا۔جوابی کارروائی میں چار دہشت گرد مارے گئے جبکہ دو پولیس اہلکار، کانسٹیبل وحید اور کانسٹیبل فضل الرحمان شہید ہوئے،ایک اہلکار زخمی ہوا۔علاقے کو گھیرے میں لے کر سرچ آپریشن شروع کر دیا گیا ہے۔

اسلام آباد میں سبزی منڈی تھانے کی حدود میں اے ایس آئی اکبر علی کے قتل کا معمہ حل ہو گیا۔پہلے فائرنگ کا شبہ تھا مگر پوسٹ مارٹم سے معلوم ہوا کہ وہ چاقو کے پے در پے وار سے جان کی بازی ہار گئے۔سی آئی اے نے تفتیش کے دوران معلوم کیا کہ حملہ خاندانی تنازع کا نتیجہ تھا۔دو ملزمان، جو مبینہ طور پر مقتول کے بہنوئی ہیں، گرفتار کر لیے گئے ہیں۔

پنجگور میں سکیورٹی فورسز نے خفیہ اطلاع پر کارروائی کرتے ہوئے بڑی مقدار میں اسلحہ، بارودی مواد اور تخریبی سامان برآمد کر لیا۔برآمد شدہ سامان میں خودکش جیکٹ،RPG7 راکٹ لانچر اور 5 راکٹ،M16 رائفلیں، 29 میگزین، 800 راؤنڈ،20 دستی بم، 22 فیوز،STOS ڈیوائسز،ریموٹ کنٹرول ڈیٹو نیٹر،نائٹ وژن اور لیزر آلات شامل ہیں،حکام کے مطابق یہ سامان بڑے حملوں کے لیے تیار کیا گیا تھا، جو بروقت کارروائی سے ناکام بنا دیا گیا۔

تافتان کے علاقے نوکانڈی میں ایف سی ہیڈکوارٹر کے گیٹ پر خودکش حملہ آور نے خود کو دھماکے سے اڑا لیا۔فوری ردعمل دیتے ہوئے QRF نے پہنچ کر مزید تین دہشت گردوں کو ہلاک کر دیا۔علاقہ سیل کر کے سرچ آپریشن جاری ہے۔

‏دنیا بھر میں قید پاکستانیوں کی تفصیلات سامنے آگئیں

21 ہزار سے زائد پاکستانی بیرون ممالک جیلوں میں قید ہیں،سعودی عرب میں سب سے زیادہ پاکستانی قیدی ہونے کا انکشاف سامنے آیا ہے،وزارت داخلہ کی رپورٹ سینٹ کی قائمہ کمیٹی برائے انسانی حقوق میں پیش کر دی گئی،رپورٹ کے مطابق دنیا بھر کی جیلوں میں قید 8,569 پاکستانی شہری سزا یافتہ ہیں ، دنیا بھر میں قید 13,078 پاکستانی شہریوں کے مقدمات زیر سماعت ہیں،بھارتی جیلوں میں 738 پاکستانی شہری قید ہیں ، سعودی عرب کے شہر جدہ میں 3335 پاکستانی قیدیوں کو سزا جبکہ 2110 شہریوں کے مقدمات زیرِ سماعت ہیں،سعودی عرب کے شہر ریاض میں 2665 پاکستانی قیدیوں کے مقدمات زیر سماعت جبکہ 2635 قیدوں کو سزا ہوچکی ہے ،متحدہ عرب امارات کی جیلوں میں 5297 پاکستانی قیدی موجود ہیں ،چین میں 652 پاکستانی شہری قید ہیں،افغانستان میں 91 پاکستانی قید ہیں ،کینیڈا میں 9 پاکستانی قیدی شہریوں کو سزائیں ہوچکی ہیں ،کینیڈا میں قیدیوں کا ڈیٹا پرائیویسی لاز کے تحت شیئر نہیں کیا جاتا،ترکی میں 190 پاکستانی شہری قید ہیں ، برطانیہ کی جیلوں میں 23 پاکستانی قیدی موجود ہیں،امریکہ کی جیلوں میں141 پاکستانی شہری قید ہیں ایران میں 101 پاکستانی شہریوں کو سزا جبکہ 68 قیدیوں کے مقدمات زیرِ سماعت ہیں، عراق میں قید 51 پاکستانیوں کو سزا جبکہ 30 قیدیوں کے مقدمات زیر سماعت ہیں اٹلی میں 133 پاکستانی قیدیوں کے مقدمات زیر سماعت جبکہ 220 قیدیوں کو سزا ہوچکی ہے، جاپان میں 7 پاکستانی قیدیوں کو سزا جبکہ 16 قیدیوں کے مقدمات زیر سماعت ہیں، کویت میں قید 35 پاکستانی شہری سزا یافتہ جبکہ 5 شہریوں کے مقدمات زیر سماعت ہیں ، آسٹریلیا میں 27 پاکستانی قید ہیں ، قطر میں599 پاکستانی شہری قید ہیں ، ارجنٹینا میں 2 پاکستانی قید ہیں جو سزا یافتہ ہیں،آسٹریا میں 3 پاکستانی قید 3 ہیں جو سزا یافتہ ہیں، آذربائیجان میں 23 پاکستانی قید ہیں ،جارجیا میں 17 پاکستانی قید ہیں بحرین میں پاکستانی قیدیوں کی تعداد 218 ہے ،بنگلہ دیش میں 5 پاکستانی شہری قید ہیں جو سزا یافتہ ہیں،بیلاروس میں 4 پاکستانی شہری قید ہیں بیلجیم میں 2 پاکستانی شہری قید ہیں ، ایک پاکستانی قید شہری کا مقدمہ زیرِ سماعت جبک ایک شہری سزا یافتہ ہے، برازیل میں بھی ایک قید پاکستانی شہری کا مقدمہ زیرِ سماعت جبکہ ایک سزا یافتہ ہے،بلغاریہ میں 21 پاکستانی شہری قید ہیں،کمبوڈیا میں 19 پاکستانی قیدیوں کے مقدمات زیرِ سماعت جبکہ 3 سزا یافتہ ہیں،چک ریپبلک میں دو پاکستانی قیدیوں پر ریپ کے الزامات ہیں.

وفاقی حکومت نے چیف آف ڈیفنس فورسز (سی ڈی ایف) کے نوٹیفکیشن سے متعلق اپنے مؤقف کی وضاحت کرتے ہوئے کہا ہے کہ تعیناتی کا عمل باضابطہ طور پر شروع کر دیا گیا ہے اور نوٹیفکیشن مقررہ وقت پر جاری ہوگا۔

سوشل میڈیا پلیٹ فارم ایکس پر جاری بیان میں وزیر دفاع خواجہ آصف نے کہا کہ سی ڈی ایف کے نوٹیفکیشن کے حوالے سے بے بنیاد اور غیر ضروری قیاس آرائیاں کی جا رہی ہیں، جب کہ اب کسی نئی بحث یا اندازے کی گنجائش باقی نہیں رہی۔ انہوں نے بتایا کہ نوٹیفکیشن کا پراسیس آغاز ہو چکا ہے اور مقررہ وقت پر مکمل کر دیا جائے گا۔خواجہ آصف کا کہنا تھا کہ وزیراعظم شہباز شریف جلد وطن واپس لوٹ رہے ہیں اور اُن کی واپسی پر سی ڈی ایف تعیناتی کا نوٹیفکیشن جاری کر دیا جائے گا۔

یاد رہے کہ 27ویں آئینی ترمیم کے تحت چیئرمین جوائنٹ چیفس آف اسٹاف کمیٹی کا عہدہ ختم کر دیا گیا ہے اور اس کی جگہ نیا منصب چیف آف ڈیفنس فورسز متعارف کرایا گیا ہے، جس پر صرف بری فوج کے سربراہ ہی تعینات ہوں گے۔واضح رہے کہ صدر آصف علی زرداری نے 13 نومبر کو 27ویں ترمیم پر دستخط کرتے ہوئے اسے آئین کا حصہ بنایا، جس کے بعد افواجِ پاکستان اور عدلیہ کے انتظامی ढانچے میں اہم تبدیلیاں نافذ ہو چکی ہیں۔

عمران سے ذاتی جھگڑانہیں،ضرورت پڑی تو اسلام آباد کا رخ کریں گے ،مولانا فضل الرحمان

جمعیت علمائے اسلام کے سربراہ مولانا فضل الرحمان نے کہا ہے کہ کہا جاتا تھا عمران خان مغربی ایجنڈے پرکام کررہے تھے لیکن مغرب کے اصل ایجنڈے پر موجودہ حکومت عملدرآمد کر رہی ہے۔

مردان میں تقریب سے خطاب میں مولانا فضل الرحمان کا کہنا تھاکہ جس ٹرمپ کے ہاتھ سے فلسطینیوں کا خون ٹپک رہا ہے، میرا شہباز شریف کہتا ہے اس کو امن کا نوبل انعام ملنا چاہیے۔ یہ ہمارا شہباز ہے بھائی، جس کی پرواز ہے ثریا تک، امن کا نوبل انعام لا حول ولاقوۃ إلا باللہ،پاکستان، افغانستان کو اپنے رویوں پر نظرثانی کرنا ہوگی، مسلح گروہ جنگ چھوڑ دیں، جنگ کسی مسئلے کا حل نہیں، ملک کی معیشت تباہ ہو چکی، پاکستان وہ نہیں جس کی عوام نے امیدیں لگائی تھیں، حکومت عوام کو ان کے حقوق دے، آج آئین کو کھلونا بنا دیا گیا ہے اور عوامی خواہشات کے بجائے بڑے لوگوں کی مرضی چل رہی ہے، 27 ویں ترمیم کیلئے ارکان خریدے گئے اور جعلی اکثریت سے 27ویں ترمیم منظور کی گئی۔

مولانا فضل الرحمان کا مزید کہنا تھا کہ کہا جاتا تھاکہ بانی پی ٹی آئی مغربی ایجنڈے پرکام کررہے تھے لیکن مغرب کے اصل ایجنڈے پر موجودہ حکومت عملدرآمد کر رہی ہے،عمران خان سے کوئی ذاتی جھگڑا نہیں صرف ان کی حکومت کی پالیسیوں سے اختلاف تھا اور اگر یہی حکومت ان کی پالیسیوں کو تسلسل دیتا ہے تو ان کے خلاف بھی بھرپور جدوجہد کریں گے،راستہ تبدیل نہیں ہوگا، ضرورت پڑی تو اسلام آباد کا رخ کریں گے ، ہماری افغان پالیسی مکمل طور پر ناکام ہو چکی ہے، 78 سال میں ہم افغانستان کو اپنا دوست نہیں بنا سکے۔

پاکستان نے 27 ویں آئینی ترمیم سے متعلق اقوام متحدہ کے ہائی کمشنر برائے انسانی حقوق کے بیان کو مسترد کر دیا۔

دفتر خارجہ کا کہنا ہے کہ پاکستان کی پارلیمنٹ کی منظور کردہ 27 ویں آئینی ترمیم پر اقوام متحدہ کی بے جا تشویش ناقابل فہم ہے،آئینی ترامیم عوام کے منتخب نمائندوں کا مکمل اختیار ہے، جمہوری طریقہ کار کا احترام ہونا چاہیے، پاکستان انسانی حقوق، انسانی وقار، بنیادی آزادیوں، قانون کی حکمرانی کے تحفظ کے عزم پر قائم ہے،پاکستان کا مؤقف اور زمینی حقائق اقوام متحدہ کے بیان میں شامل نہیں کیے گئے، یو این ہائی کمشنر خودمختار فیصلوں کا احترام کریں اور سیاسی تعصب اور غلط معلومات پر مبنی تبصروں سےگریز کریں۔

یاد رہے کہ اقوام متحدہ کے انسانی حقوق کے کمشنر نے اپنے بیان میں کہا تھا کہ پاکستان میں جلد بازی میں منظور کی گئی آئینی ترمیم عدلیہ کی آزادی کو کمزور کرتی ہے،ولکر ٹرک نے ایک بیان میں ملٹری احتساب سے متعلق بھی تحفظات کا اظہار کیا تھا اور کہا تھا کہ گزشتہ سال 26 ویں آئینی ترمیم کی طرح یہ ترمیم بھی وکلا براداری اور سول سوسائٹی سے بڑے پیمانے پر مشاورت اور بحث کے بغیر کی گئی۔

ڈی جی آئی ایس پی آر کی جانب سے سال 2025 کی انسدادِ دہشت گردی حکمتِ عملی اور آپریشنز کے حوالے سے اہم ترین بریفنگ میں انکشاف کیا گیا ہے کہ پاکستان کے سکیورٹی اداروں نے دہشت گردی کی کمر توڑنے کے لیے ریکارڈ تعداد میں آپریشنز کیے ہیں۔ اس دوران ملک دشمن عناصر، خصوصاً افغانستان سے سرگرم نیٹ ورکس کی کارروائیوں کو مؤثر انداز میں ناکام بنایا گیا۔

ڈی جی آئی ایس پی آر کے مطابق رواں سال اب تک 67,023 انٹیلی جنس بیسڈ آپریشنز (IBOs) کیے گئے،1,873 دہشت گرد ہلاک کیے گئے،جن میں 136 افغان شہری بھی شامل ہیں،4 نومبر کے بعد دہشت گردی کی لہر میں اضافہ دیکھتے ہوئے اداروں نے آپریشنز مزید تیز کر دیے،4,910 آپریشنز کئے گئے،206 دہشت گردوں کا خاتمہ کیا گیا، خیبر پختونخوا میں 12,857 آپریشنز،بلوچستان میں 53,309 آپریشنزکئے گئے،بلوچستان میں زیادہ تعداد اس بات کا ثبوت ہے کہ دہشت گردی کا سب سے بڑا دباؤ اس خطے پر رہا، جہاں سرحد پار سے دراندازی سب سے زیادہ ریکارڈ کی گئی۔

ڈی جی آئی ایس پی آر نے واضح کیا کہ افغانستان کی عبوری طالبان حکومت کی سرزمین اب بھی القاعدہ، داعش خراسان (IS-KP) اور دیگر تنظیموں کے لیے محفوظ پناہ گاہ کا کردار ادا کر رہی ہے۔پاکستان پر حملہ کرنے والے کئی گروہ اسلحہ، فنڈنگ اور تربیت افغانستان سے لے رہے ہیں۔متعدد حملوں میں شامل دہشت گردوں نے اعتراف کیا کہ وہ افغانستان میں منظم ہو کر پاکستان پر حملے کرتے ہیں۔پاکستان نے ان الزامات کو عالمی فورمز پر بھی اٹھایا ہے اور افغانستان سے پرامن سرحدی نظم کے لیے تعاون کا مطالبہ کیا ہے۔

پاک افغان سرحد کی کل لمبائی 1,229 کلومیٹرہے اورصرف 20 قانونی سرحدی راستے ہیں،محض فینسنگ کافی نہیں ،سرحد کو محفوظ بنانے کے لیے، ڈرون نگرانی،ماڈرن واچ ٹاورزضروری قرار دیے گئے۔مزید یہ کہ کئی خودکش حملوں اور بارڈر کراسنگ میں نان کسٹم پیڈ گاڑیوں کے استعمال کی نشاندہی بھی کی گئی ہے جو ایک سنگین سلامتی خطرہ تصور ہوتی ہیں۔بریفنگ میں یہ بھی بتایا گیا کہ افغانستان کی موجودہ طالبان حکومت کے پاس 7.2 ارب ڈالر مالیت کا امریکی فوجی اسلحہ موجود ہےجس سے نہ صرف پاکستان بلکہ پورے خطے اور عالمی امن کو خطرات لاحق ہو گئے ہیں۔یہ جدید اسلحہ دہشت گرد گروہوں تک پہنچنے کا خدشہ بھی ظاہر کیا گیا۔

پاکستان نے غیر قانونی افغان باشندوں کی مرحلہ وار وطن واپسی کا عمل تیز کر دیا ہے،سال 2024: 366,704 افغان شہری واپس گئے،سال 2025: 971,604 (تاحال)واپس گئے،صرف نومبر 2025 میں 239,574 افغان شہریوں کی واپسی ہوئی ہے،حکومتِ پاکستان کے مطابق اس اقدام کا مقصد داخلی سکیورٹی کو بہتر بنانا ہے، جبکہ واپسی کے تمام مراحل انسانی بنیادوں پر انجام دیے جا رہے ہیں۔

2025 پاکستان کے لیے دہشت گردی کے خلاف فیصلہ کن سال ثابت ہو رہا ہے۔ ریاستی اداروں کی بھرپور کارروائیوں نے دہشت گرد نیٹ ورکس کو شدید نقصان پہنچایا ہے، تاہم سرحد پار خطرات بدستور موجود ہیں۔ پاکستان نے واضح کیا ہے کہ دہشت گردی کے مکمل خاتمے تک آپریشنز جاری رہیں گے۔