Category: اہم خبریں

ایرانی سپریم نیشنل سیکیورٹی کونسل کے سیکرٹری علی لاریجانی کی فیلڈ مارشل سید عاصم منیر سے ملاقات ہوئی ہے

ڈی جی آئی ایس پی آر کے مطابق یران کی سپریم نیشنل سیکیورٹی کونسل کے سیکرٹری علی لاریجانی نےجی ایچ کیو کا دورہ کیا۔ جہاں انہوں نے آرمی چیف فیلڈ مارشل عاصم منیر سے ملاقات کی۔ ملاقات میں دوطرفہ تعاون اور علاقائی سیکیورٹی پر گفتگو کی گئی پاکستان اور ایران نے اسٹریٹجک تعاون مزید مضبوط بنانے پر اتفاق کرلیا ہے۔ دوران ملاقات خطے کے سیکیورٹی ماحول اور چیلنجز پر تفصیلی بات چیت کی گئی۔اس موقع پر فیلڈ مارشل سید عاصم منیر کا کہنا تھا کہ پاکستان خطے میں امن و استحکام کیلئے پرعزم ہے۔ دہشت گردی کے خلاف ایران سے قریبی تعاون ضروری ہے۔

علی لاریجانی کا کہنا تھا کہ ایران علاقائی امن کے لیے پاکستان کے کردار کو سراہتا ہے۔ ایران پاکستان تعلقات کے فروغ کیلئے مل کر کام کریں گے۔

فیلڈ مارشل عاصم منیر کا کہنا ہے بیرونی حمایت یافتہ دہشتگردی اور پیچیدہ چیلنجز کے باوجود مسلح افواج قومی سلامتی کیلئے پُرعزم ہیں۔

پاک فوج کے شعبہ تعلقات عامہ آئی ایس پی آر کے مطابق 27 ویں نیشنل سکیورٹی ورکشاپ کے شرکا نے جی ایچ کیو کا دورہ کیا، نیشنل سکیورٹی ورکشاپ نیشنل ڈیفنس یونیورسٹی کا ایک اہم پروگرام ہے، یہ پروگرام پارلیمنٹیرینز، اعلیٰ سول و عسکری افسران اور تعلیمی و سماجی شعبوں سے تعلق رکھنے والے نمائندگان کو یکجا کرتا ہے،ورکشاپ کے شرکاء کو غیر قانونی سرگرمیوں کے خلاف جاری قومی اقدامات پر بھی بریفنگ دی گئی، منشیات کی اسمگلنگ اور منظم جرائم پیشہ نیٹ ورکس کے خلاف کارروائیوں پر بھی بریفنگ دی گئی۔ اس کے علاوہ بہتر بارڈر کنٹرولز اور غیر قانونی غیر ملکیوں کی واپسی کے حوالے سے تازہ پیشرفت سے بھی شرکا کو آگاہ کیا گیا۔

ورکشاپ کے شرکا سے خطاب کرتے ہوئے فیلڈ مارشل عاصم منیر کا کہنا تھا انٹیلی جنس، قانون نافذ کرنے والے ادارے بھی قومی سلامتی کے لیے بھرپور پیشہ ورانہ مہارت، عزم کا مظاہرہ کر رہے ہیں، علاقائی صورت حال تیزی سے بدل رہی ہے، بڑھتی ہوئی جیوپولیٹیکل مسابقت، سرحد پار دہشتگردی اور ہائبرڈ حربوں کے اثرات نمایاں ہیں. پاکستان ایک اہم ملک ہے اور اپنی حیثیت کے مطابق دنیا میں مقام حاصل کرنے کے لیے پُرعزم ہے، معرکہ حق میں پاک افواج کی پیشہ ورانہ صلاحیت، جذبے اور عزم نے عالمی سطح پر پاکستان کے وقار میں اضافہ کیا، ہماری سب سے بڑی طاقت قومی یکجہتی ہے، پاکستان آرمی کے لیے ملک کی سرحدی سالمیت، سکیورٹی اور ہر پاکستانی شہری کا تحفظ اولین ترجیح ہے، ملک کی سرحدی سالمیت، سکیورٹی اور ہر شہری کے تحفظ میں کسی قسم کا سمجھوتہ نہیں کیا جائے گا، ہم ان شاء اللہ اپنے دشمنوں کے تمام مذموم عزائم کو ناکام بنائیں گے۔

فیلڈ مارشل عاصم منیر نے وفاقی و صوبائی حکومتوں کے ساتھ مکمل تعاون کے عزم کا اعادہ کیا اور کہا کہ دیرپا امن، استحکام اور خوشحالی کے لیے مربوط قومی کاوشیں اور ادارہ جاتی ہم آہنگی نہایت ضروری ہیں۔

خیبر پختونخوا کے ضلع خیبر میں سیکیورٹی فورسز نے مدانک نامی پہاڑی علاقے میں خفیہ اطلاعات کی بنیاد پر کارروائی کرتے ہوئے ایک شدت پسند ٹھکانے کو نشانہ بنایا، جس کے نتیجے میں پانچ دہشت گرد مارے گئے۔ سیکیورٹی ذرائع کے مطابق کارروائی قابلِ اعتماد انٹیلی جنس کی بنیاد پر کی گئی تھی۔ آپریشن کے بعد علاقے کا محاصرہ کر کے کلیئرنس آپریشن شروع کر دیا گیا، جو تاحال جاری ہے۔ سیکیورٹی فورسز کو کسی قسم کا جانی نقصان نہیں ہوا۔ ہلاک افراد کی شناخت اور ان کی حالیہ سرگرمیوں کا تعین کیا جا رہا ہے۔

کرک کے علاقے ٹاپی سیشن کورٹ کے قریب نامعلوم مسلح افراد نے فائرنگ کر کے ایلیٹ فورس کے اہلکار سجاد کو شہید کر دیا۔ پولیس کے مطابق اہلکار ڈیوٹی کے بعد گھر جا رہا تھا کہ موٹر سائیکل سوار حملہ آوروں نے اسے نشانہ بنایا۔ حملہ آور فرار ہو گئے، جبکہ پولیس نے علاقے میں سرچ آپریشن شروع کر دیا ہے۔

لکی مروت کی تحصیل تخت خیل کے نوجوانوں نے ویڈیو پیغام میں اعلان کیا ہے کہ وہ علاقہ امن پسند ہے اور کسی بھی شدت پسند کو سرگرمیاں کرنے کی اجازت نہیں دی جائے گی۔ انہوں نے کہا کہ مقامی آبادی کو مکمل تحفظ فراہم کیا جائے گا۔ مقامی انتظامیہ صورتحال پر نظر رکھے ہوئے ہے۔

پشاور کے علاقے ریگی تھانے کی حدود میں نامعلوم موٹر سائیکل سواروں نے ایف سی اہلکار انتظار پر فائرنگ کر دی، جس سے وہ شدید زخمی ہو گیا۔ اہلکار کو تشویشناک حالت میں خیبر ٹیچنگ اسپتال منتقل کر دیا گیا ہے۔ پولیس نے ملزمان کی تلاش کے لیے سرچ آپریشن شروع کر دیا ہے۔

باجوڑ کے علاقوں میں سیکیورٹی فورسز نے کارروائی کے دوران دہشت گردوں کی جانب سے نصب بارودی مواد برآمد کر کے ناکارہ بنا دیا۔ حکام کے مطابق دھماکہ خیز مواد ایک سرچ آپریشن کے دوران دریافت ہوا۔ علاقے میں مزید تلاشیاں جاری ہیں۔

ڈیرہ اسماعیل خان کے علاقے کوٹ سلطان میں پاک فوج اور ایس ایس جی کمانڈوز نے مشترکہ انٹیلی جنس بیسڈ آپریشن میں ٹی ٹی پی کے شیر علی گروپ کے 16 شدت پسندوں کو ہلاک کر دیا جبکہ دو زخمی دہشت گردوں کو زندہ گرفتار کیا گیا۔ سیکیورٹی ذرائع کے مطابق دہشت گرد کچے کے گھروں میں چھپے ہوئے تھے اور آنے والے حملوں کی منصوبہ بندی کر رہے تھے۔ فورسز نے علاقے سے اسلحہ، گولہ بارود اور مواصلاتی آلات بھی برآمد کر لیے۔ حکام کے مطابق جنوبی خیبر پختونخوا میں دہشت گرد سیلز کے خاتمے کے لیے کارروائیاں تیز کر دی گئی ہیں۔

بنوں میں پولیس حکام اور مماند خیل قبیلے کے بڑوں کے درمیان اہم جرگہ منعقد ہوا، جس میں علاقائی امن و امان برقرار رکھنے اور تعاون کو مضبوط بنانے پر اتفاق کیا گیا۔ عمائدین نے قانون نافذ کرنے والے اداروں کے ساتھ مکمل تعاون کا یقین دلایا۔

صوابی کے تھانہ ٹوپی کی حدود میں پولیس اور دہشت گردوں کے درمیان مقابلے میں دو دہشت گرد ہلاک ہو گئے۔ پولیس کے مطابق مارے گئے افراد یاسر اور سعید الرحمٰن پر چوکی کلا بٹ پر دستی بم حملے میں ملوث ہونے کا الزام تھا، جس میں کانسٹیبل نور کمال شاہ شہید ہوا تھا۔ جائے وقوعہ سے اسلحہ اور موٹر سائیکل برآمد کر لی گئی۔

سندھ کے علاقے کندھکوٹ میں ایک زنگ آلود مارٹر،راکٹ شیل پھٹنے سے چار بچے جاں بحق اور متعدد زخمی ہو گئے۔ بچوں نے لاوارث شیل کو کھلونا سمجھ کر چھیڑا تھا۔ حکام کے مطابق علاقے میں کسی تازہ فائرنگ یا مشق کا کوئی نشان نہیں ملا۔ واقعے کی تحقیقات جاری ہیں۔

کراچی کے علاقے لیاری (سرگواٹ) میں حساس اداروں نے کارروائی کرتے ہوئے ایک رکشہ ڈرائیور کو گرفتار کر لیا جو مبینہ طور پر شدت پسندوں کو نقل و حرکت اور رابطے میں سہولت فراہم کرتا تھا۔ مشتبہ شخص کو مزید تفتیش کے لیے انویسٹی گیشن سیل منتقل کر دیا گیا ہے۔

پنجگور کے پروم علاقے میں خفیہ اطلاع پر کارروائی کرتے ہوئے سیکیورٹی فورسز نے پانچ مشتبہ افراد کو گرفتار کیا، جو مبینہ طور پر کالعدم تنظیموں کو نگرانی، لاجسٹک اور دیگر مقامی مدد فراہم کرتے تھے۔ گرفتار افراد کی تفصیلات کی مزید تصدیق کی جا رہی ہے۔

بلوچ لبریشن آرمی (بی ایل اے) نے دعویٰ کیا ہے کہ اس کے کارندوں نے پردان علاقے میں ایک شخص، جو مبینہ طور پر سیکیورٹی ادارے کا اہلکار تھا، کو گرفتار کر کے بعدازاں قتل کر دیا۔ بی ایل اے کے مطابق اس کے پاس شناختی دستاویزات اور ٹریکنگ چِپ بھی برآمد ہوئی۔ تاہم اس دعوے کی کوئی سرکاری یا آزاد ذرائع سے تصدیق نہیں ہو سکی۔بی ایل اے نے یہ بھی دعویٰ کیا ہے کہ مستونگ کے مارو کنڈ علاقے میں سیکورٹی فورسز کی بم ڈسپوزل ٹیم کو ریموٹ کنٹرول آئی ای ڈی سے نشانہ بنایا گیا۔ کالعدم تنظیم کے اس دعوے کی بھی سرکاری سطح پر تاحال کوئی تصدیق نہیں ہو سکی۔

بلوچستان کے علاقے بولان میں سیکیورٹی فورسز نے جعفر ایکسپریس کو دہشت گردی سے بچا لیا۔ فورسز نے فوری جوابی کارروائی کر کے دہشت گردوں کو پسپا کر دیا۔ واقعے میں کوئی جانی نقصان نہیں ہوا۔ دوسری جانب ڈیرہ مراد جمالی میں ریلوے لائن پر نصب دھماکہ خیز مواد برآمد کر کے بم ڈسپوزل اسکواڈ نے ناکارہ بنا دیا۔ حکام کے مطابق دونوں کارروائیاں اہم تنصیبات کے تحفظ کے سلسلے میں جاری انٹیلی جنس آپریشنز کا حصہ ہیں۔

چیئرمین جوائنٹ چیفس آف اسٹاف کمیٹی جنرل ساحر شمشاد مرزا نے جی ایچ کیو کا الوداعی دورہ کیا اور آرمی چیف فیلڈ مارشل سید عاصم منیر سے الوداعی ملاقات کی۔

ڈی جی آئی ایس پی آر کے مطابق جی ایچ کیو آمد پر جنرل ساحر شمشاد مرزا نے یادگار شہداء پر پھولوں کی چادر چڑھائی۔ پاک فوج کے چاق و چوبند دستے نے انہیں گارڈ آف آنر پیش کیا، فیلڈ مارشل سید عاصم منیر نے جنرل ساحر شمشاد مرزا کی مثالی قیادت، اسٹریٹجک بصیرت اور پاک فوج کے لیے شاندار خدمات کو سراہا اور کہا کہ چیئرمین جوائنٹ چیفس آف اسٹاف کمیٹی نے تینوں مسلح افواج کے درمیان ہم آہنگی کے فروغ میں اہم کردار ادا کیا، انہوں نے مسلح افواج کی مشترکہ آپریشنل تیاری کو مضبوط بنانے میں بھی کردار ادا کیا، جنرل ساحر شمشاد مرزا نے قومی سلامتی کے اسٹریٹجک اہداف کے حصول میں بھی اہم کردار ادا کیا۔

فیلڈ مارشل سید عاصم منیر نے جنرل ساحر شمشاد مرزا کی دوست ممالک کے ساتھ پاکستان کے دفاعی تعاون کو مضبوط بنانے کی کاوشوں اور علاقائی استحکام اور عسکری سفارت کاری کے لیےکاوشوں کو خراج تحسین پیش کیا، جنرل ساحر شمشاد مرزا نے کریئر کے دوران فراہم کی گئی حمایت پر آرمی چیف اور مسلح افواج کا شکریہ ادا کیا۔

افغانستان کی عبوری حکومت نے ایک 3,200 سے زائد ایسے سخت گیر قیدیوں کی سزائیں معاف کر دی ہیں جو عام مجرم نہیں بلکہ دہشتگردی کے نہایت سنگین مقدمات میں سزا یافتہ تھے۔ ان میں خودکش حملہ آوروں کے نیٹ ورکس، بارودی دھماکوں، بھتہ خوری، ٹارگٹ کلنگ اور سرحد پار دہشتگردانہ کارروائیوں میں ملوث عناصر شامل تھے۔

سکیورٹی ذرائع کے مطابق ان قیدیوں کی سزا معافی کے فوراً بعد پاکستان کی جانب منظم اور تیز رفتار نقل و حرکت کا سلسلہ شروع ہو گیا ہے ، رپورٹ کے مطابق 4,300 مزید قیدیوں کی سزا میں نمایاں کمی کی گئی ہے اور یہ گروہ بھی اگلے مرحلے میں افغانستان سے نکل کر کالعدم تحریک طالبان پاکستان میں شمولیت کے لیے "تیار بیچ” کے طور پر دیکھا جا رہا ہے۔ذرائع کا کہنا ہے کہ معافی پانے والوں میں نہ صرف تجربہ کار شدت پسند شامل ہیں بلکہ ایسے افراد بھی ہیں جو پاکستان میں کارروائیاں کرنے کی مکمل صلاحیت رکھتے ہیں۔ ان میں بارودی مواد کے ماہر، خودکش بمبار تیار کرنے والے، اغوا برائے تاوان نیٹ ورک کے سہولت کار اور سرحدی راستوں سے واقف گائیڈز شامل ہیں۔پاکستانی سکیورٹی حکام کو خدشہ ہے کہ یہ عناصر دوبارہ منظم ہو کر ملک میں دہشتگردی کی نئی لہر کا باعث بن سکتے ہیں، خصوصاً ایسے وقت میں جب افغانستان کے اندرونی حالات تیزی سے خراب ہو رہے ہیں اور قوتِ نافذہ کمزور پڑ چکی ہے۔

اطلاعات کے مطابق افغانستان میں حکومتی کنٹرول کمزور ہونے کے باعث شدت پسند گروہ تیزی سے خالی جگہوں کو پُر کر رہے ہیں۔ کئی رہائی پانے والے قیدی داعش خراسان میں شمولیت کے قریب بتائے جا رہے ہیں، جو خطے میں بہت بڑے سکیورٹی چیلنج کی نشاندہی کرتا ہے۔سکیورٹی ماہرین کے مطابق اگر یہ گروہ داعش اور ٹی ٹی پی کے ساتھ مل کر سرگرم ہوتے ہیں تو سرحدی علاقوں میں عدم استحکام، حملوں میں اضافہ اور خطے بھر میں دہشتگردانہ نیٹ ورکس کی مضبوطی کا خطرہ بڑھ جائے گا۔

پاکستانی سکیورٹی ایجنسیوں نے غیرمعمولی اقدام کرتے ہوئے سرحدی علاقوں میں نگرانی، بھاری نفری کی تعیناتی اور انٹیلیجنس نیٹ ورک کو مزید فعال کر دیا ہے۔ افغانستان سے مشکوک آمد و رفت کی کڑی نگرانی جاری ہے جبکہ ممکنہ اہداف پر حفاظتی اقدامات بڑھا دیے گئے ہیں۔پاکستان کے اعلیٰ حکام اور علاقائی سکیورٹی ماہرین نے عالمی برادری، اقوامِ متحدہ اور علاقائی طاقتوں سے مطالبہ کیا ہے کہ وہ افغانستان کے اس فیصلے کے سنگین اثرات کا فوری نوٹس لیں، کیونکہ یہ اقدام نہ صرف پاکستان بلکہ پورے خطے کی امن و سلامتی کے لیے نیا بھاری خطرہ بن کر اُبھرا ہے۔

پاک فوج کے ترجمان لیفٹیننٹ جنرل احمد شریف چوہدری نے کہا کہ پاکستان جب بھی حملہ کرتا ہے تو اعلانیہ کرتا ہے اور کبھی سویلین پر حملہ نہیں کرتا۔

ڈی جی آئی ایس پی آر لیفٹیننٹ جنرل احمد شریف چوہدری نے بریفنگ میں بتایاکہ ہماری نظرمیں کوئی گڈ اور بیڈ طالبان نہیں ہیں، دہشت گردوں میں کوئی تفریق نہیں، پاکستان جب بھی حملہ کرتا ہے تو اعلانیہ کرتا ہے اور کبھی سویلین پر حملہ نہیں کرتا، ہم ریاست ہیں، ریاست کے طور پر ہی ردعمل دیتے ہیں، خون اورتجارت ایک ساتھ نہیں چل سکتے، یہ نہیں ہوسکتا کہ ہم پرحملے بھی ہوں اور ہم تجارت بھی کریں، ہم افغان عوام کے نہیں بلکہ دہشت گردی کے خلاف ہیں، طالبان حکومت ریاست کی طرح فیصلہ کرے، طالبان حکومت نان اسٹیٹ ایکٹرز کی طرح فیصلہ نہ کرے، طالبان حکومت کب تک عبوری رہے گی؟

ڈی جی آئی ایس پی آر نے مطالبہ کیاکہ دہشت گردی کے بہت سے واقعات میں نان کسٹم پیڈ گاڑیاں استعمال ہوئیں لہٰذا نان کسٹم پیڈ گاڑیوں پرفوری پابندی عائد کی جائے، فیض حمید کا ٹرائل قانونی معاملہ ہے اس پر قیاس آرائی نہ کی جائے، جب یہ معاملہ حتمی نتیجے پر پہنچے گا فوری طور پر اعلان کردیا جائے گا۔ سرحد پار سے دہشتگردی کی معاونت سب سے بڑا مسئلہ ہے او پاک ، افغان بارڈر پر اسمگلنگ اور پولیٹیکل کرائم کا گٹھ جوڑ توڑنے کی ضرورت ہے۔ بیرون ممالک سے سوشل میڈیا اکاؤنٹس ریاست کے خلاف بیانیہ بنارہے ہیں، ہمارا مسئلہ افغان عبوری حکومت سے ہے، افغانستان کے لوگوں سے نہیں، دہشتگردی کے خلاف مربوط جنگ لڑنے کیلئے اپنے گھر کو ٹھیک کرنا ہوگا،افغان رجیم دہشتگرد ٹھکانوں کے خلاف قابل تصدیق کارروائی کرے اور دہشتگردوں کے خلاف قابل تصدیق کارروائی تک بات چیت نہیں ہوگی،پاکستان کی عوام اور افواج دہشتگردوں کے خلاف متحد ہیں اور دہشتگردوں کا آخری دم تک پیچھا کیا جائے گا۔