Category: اہم خبریں

ڈسٹرکٹ اینڈ سیشن کورٹ اسلام آباد نے پولیس کو 9 مئی سمیت 5 مقدمات میں بانی پی ٹی آئی عمران خان کی گرفتاری سے روک دیا۔

بانی پی ٹی آئی کے خلاف 9 مئی، اقدام قتل، جعلی رسیدوں سمیت دیگر مقدمات درج ہیں جبکہ بشریٰ بی بی کے خلاف مبینہ جعلی رسیدیں جمع کروانے پر مقدمہ درج ہے،بانی پی ٹی آئی اور دیگر کے خلاف 9 مئی سمیت 5 کیسز کی سماعت ڈسٹرکٹ اینڈ سیشن کورٹ اسلام آباد کے جج افضل مجوکہ نے کی،عدالت نے بانی پی ٹی آئی عمران خان اور بشریٰ بی بی کی ضمانت قبل از گرفتاری میں توسیع کرتے ہوئے 25 نومبر تک متعلقہ مقدمات میں دونوں کی گرفتاری روک دی،ڈسٹرکٹ اینڈ سیشن کورٹ اسلام آباد نے اگلی سماعت میں عمران خان کو عدالت میں یا بذریعہ ویڈیو لنک پیش کرنے کی ہدایت کرتے ہوئے ضمانت کی درخواستوں پر سماعت 25 نومبر تک ملتوی کردی۔

پاکستان کے مختلف حصوں میں سیکیورٹی فورسز، پولیس اور مقامی عوام کی بروقت کارروائیوں نے دہشت گردوں کے متعدد منصوبے ناکام بنا دیے، جب کہ بلوچستان اور خیبر پختونخوا کے کئی علاقوں میں حالیہ دنوں میں ہونے والے واقعات نے ایک بار پھر ریاست کے امن دشمن عناصر کے خلاف عزم کو مضبوط کیا ہے۔

سبی کے بھاگ ناری علاقے میں سیکیورٹی فورسز اور پولیس نے مشترکہ کارروائی کرتے ہوئے دہشت گرد تنظیم فتنۂ ہندستان کے پانچ کارندوں کو ہلاک کر دیا۔پولیس کے مطابق دہشت گردوں نے ایک مقامی بینک کو لوٹنے کی کوشش کی تھی لیکن فورسز کی بروقت جوابی کارروائی نے بڑی تباہی سے بچا لیا۔پولیس اور سیکیورٹی اداروں نے علاقے میں سرچ آپریشن شروع کر دیا ہے تاکہ باقی ماندہ عناصر کو بھی گرفتار کیا جا سکے۔ مقامی عوام نے پولیس کے حوصلے اور بہادری کو سراہا ہے۔

کچھی، بلوچستان
کچھی ضلع کے بھاگ ناری تحصیل میں بڑی تعداد میں مسلح افراد نے حملہ کر کے کئی سرکاری عمارتوں پر قبضہ کر لیا۔ حملہ آوروں نے لیویز اور پولیس تھانوں کے ساتھ ساتھ نادرا آفس اور تحصیل کمپلیکس کو آگ لگا دی۔ایس ایچ او لطف علی کھوسہ فائرنگ کے تبادلے میں شہید ہوگئے۔فورسز نے علاقے کا کنٹرول دوبارہ حاصل کرنے کے لیے بھرپور آپریشن شروع کر دیا ہے۔ یونائیٹڈ بلوچ آرمی (UBA) نے واقعے کی ذمہ داری قبول کی ہے تاہم حکام اس کی تصدیق کر رہے ہیں۔

قلات کے علاقے سوراب میں نامعلوم مسلح افراد نے لیویز چیک پوسٹ پر حملہ کر کے تین اہلکاروں کو اغوا کر لیا۔بعد ازاں دو اہلکاروں کو رہا کر دیا گیا جبکہ ایک اہلکار تاحال حملہ آوروں کی قید میں ہے۔ضلعی انتظامیہ اور قانون نافذ کرنے والے اداروں نے علاقے میں سرچ آپریشن شروع کر دیا ہے۔

بلوچستان میں انٹیلی جنس بنیاد پر کارروائی کے دوران سیکیورٹی فورسز نے کالعدم بلوچ لبریشن آرمی (BLA) کے سینئر کمانڈر کمران عرف کاما مسلی کو ہلاک کر دیا۔ذرائع کے مطابق ہلاک دہشت گرد بھارتی سرپرستی میں کام کرنے والی تنظیم فتنۂ الہندستان سے وابستہ تھا اور کئی دہشت گرد کارروائیوں میں ملوث تھا۔آپریشن کے دوران دہشت گردوں کے خفیہ ٹھکانے تباہ کیے گئے اور اسلحہ برآمد کیا گیا۔

تربت میں ڈپٹی کمشنر کیچ میجر (ر) بشیر براچ کے قافلے کو سڑک کنارے نصب آئی ای ڈی دھماکے کا نشانہ بنایا گیا۔ڈپٹی کمشنر بکتر بند گاڑی میں محفوظ رہے، تاہم چار لیویز اہلکار زخمی ہوگئے۔فورسز نے علاقے کو گھیرے میں لے کر سرچ آپریشن شروع کر دیا۔

استنبول میں پاکستان اور افغان طالبان کے درمیان مذاکرات کا تیسرا مرحلہ جاری ہے، تاہم ذرائع کے مطابق بات چیت میں ڈیڈلاک برقرار ہے کیونکہ طالبان تحریری معاہدے پر دستخط سے گریزاں ہیں۔ترک انٹیلی جنس چیف ابراہیم کالن مذاکرات کی میزبانی کر رہے ہیں۔پاکستان نے اپنے حتمی مؤقف میں واضح کیا ہے کہ ٹی ٹی پی کی سرپرستی کسی صورت برداشت نہیں کی جائے گی اور طالبان کو دہشت گرد گروہوں کے خلاف عملی اقدامات کرنے ہوں گے۔

آزاد کشمیر کے لیپہ ویلی سیکٹر میں بھارتی فوج نے بلا اشتعال فائرنگ کر کے جنگ بندی معاہدے کی خلاف ورزی کی۔پاک فوج نے مؤثر جوابی کارروائی کرتے ہوئے دشمن کی گنیں خاموش کرا دیں۔تین گھنٹے تک فائرنگ کا تبادلہ جاری رہا، تاہم پاکستانی جانب سے کسی جانی نقصان کی اطلاع نہیں ملی۔

لکی مروت میں مقامی شہریوں نے دہشت گردوں کی موجودگی کی اطلاع پر فوری کارروائی کی جس سے دہشت گرد فرار ہونے پر مجبور ہوگئے۔علاقے کے عوام نے واضح پیغام دیا ہے کہ وہ دہشت گردی کے خلاف سیکیورٹی فورسز کے شانہ بشانہ ہیں۔

بنوں میں پاک فوج کی سرپرستی میں وزیرستان قبائل کا ایک عظیم الشان جرگہ منعقد ہوا جس میں امن، ترقی اور باہمی تعاون پر تفصیلی بات چیت ہوئی۔جی او سی نے عوام کے کردار کو سراہا جبکہ قبائلی عمائدین نے مکمل تعاون کا یقین دلایا۔

مرکزی کرم میں سیکیورٹی فورسز نے کارروائی کرتے ہوئے ٹی ٹی پی کے مقامی کمانڈر یاسین عرف شاہین کا گھر تباہ کر دیا۔اس آپریشن نے واضح پیغام دیا کہ دہشت گردی کسی صورت برداشت نہیں کی جائے گی۔

جنّی خیل، بنوں میں شادی کی تقریب کے دوران حادثاتی فائرنگ سے ایک شخص اسران جاں بحق اور نجیب اللہ زخمی ہوگئے۔پولیس نے واقعے کی تحقیقات شروع کر دی ہیں۔

باجوڑ کے علاقے عنایت کلی بازار میں نامعلوم حملہ آوروں کی فائرنگ سے ملک حبیب جاں بحق ہوگئے۔
پولیس نے فوری تحقیقات شروع کر دی ہیں۔علاقے کے عوام نے واقعے کی مذمت کرتے ہوئے امن کے قیام کے عزم کا اعادہ کیا ہے۔

ملک بھر میں ہونے والے یہ واقعات واضح کرتے ہیں کہ ریاست پاکستان اپنے شہریوں کے تحفظ اور امن کے قیام کے لیے ہر ممکن اقدامات کر رہی ہے۔ عوام، پولیس اور سیکیورٹی فورسز کا عزم دہشت گردوں کے ناپاک عزائم کے لیے سب سے بڑی رکاوٹ بن چکا ہے۔

اردن کے شاہ عبداللہ دوم نے پاکستان سے دو طرفہ دفاعی تعاون کو مزید فروغ دینے کی خواہش کا اظہار کیا ہے۔

پاک فوج کے شعبہ تعلقات عامہ (آئی ایس پی آر) کے مطابق آرمی چیف فیلڈ مارشل سید عاصم منیر نے اردن کا سرکاری دورہ کیا، آرمی چیف نے اردن کے شاہ عبداللہ دوم سے ملاقات کی جس میں ولی عہد شہزادہ حسین بن عبداللہ بھی موجود تھے، ملاقات میں باہمی دلچسپی کے امور، دفاع اور سکیورٹی کے شعبوں میں دوطرفہ تعاون کے فروغ اور علاقائی امور پر گفتگو کی گئی، آرمی چیف نے پاکستانی عوام، حکومت اور مسلح افواج کی جانب سے شاہ عبداللہ کےلیے نیک خواہشات کا اظہار کیا اور اردن کے ساتھ برادرانہ تعلقات کو مزید مضبوط بنانے کے عزم کا اعادہ کیا، شاہ عبداللہ نے پاکستان آرمی کی پیشہ ورانہ صلاحیتوں اور علاقائی امن و استحکام کے لیے کردار کو سراہا اور دو طرفہ دفاعی تعاون کو مزید فروغ دینے کی خواہش کا اظہار کیا، فیلڈ مارشل نے اردنی مسلح افواج کے چیئرمین جوائنٹ چیفس آف اسٹاف سے بھی ملاقات کی جبکہ فیلڈ مارشل سید عاصم منیر کو جنرل ہیڈکوارٹرز عمان آمد پر گارڈ آف آنر پیش کیا گیا،فریقین نے پاکستان اور اردن کی مسلح افواج کے درمیان دیرینہ اور برادرانہ تعلقات کو سراہا۔

میجر جنرل یوسف احمد الحنیتی نےعلاقائی امن و سلامتی کےلیے پاکستان کی مسلح افواج کےکردار پر خراجِ تحسین پیش کیا۔

چیئرمین جوائنٹ چیفس آف اسٹاف کمیٹی جنرل ساحر شمشاد مرزا نے بنگلا دیش کے چیف ایڈوائرز سمیت عسکری حکام سے ملاقاتیں کیں جس میں دو طرفہ تعاون کو مزید وسعت دینے کے عزم کا اعادہ کیا گیا۔

آئی ایس پی آر کے مطابق چیئرمین جوائنٹ چیفس آف اسٹاف کمیٹی جنرل ساحر شمشاد مرزا نے بنگلا دیش کا سرکاری دورہ کیا جہاں انہوں نے چیف ایڈوائزر محمد یونس، چیف آف نیول اسٹاف، ائیر چیف مارشل حسن محمود خان اور پرنسپل اسٹاف آفیسر، آرمڈ فورسز ڈویژن لیفٹیننٹ جنرل قمرالحسن سے ملاقاتیں کی، ملاقاتوں میں علاقائی و عالمی سلامتی کی صورتحال اور باہمی دفاعی تعاون پر تفصیلی تبادلہ خیال کیا گیا۔

چیئرمین جوائنٹ چیفس آف اسٹاف کمیٹی جنرل ساحر شمشاد مرزا نے پاکستان اور بنگلا دیش کے دیرینہ برادرانہ تعلقات کو سراہا اور کہا دونوں ممالک خود مختاری، مساوات اور باہمی احترام کی بنیاد پر ان تعلقات کومزید مضبوط کریں گے،فریقین نے دفاعی و سلامتی کے شعبوں میں تعاون بڑھانے اور فوجی سطح پر روابط کو وسعت دینے کے عزم کا اعادہ بھی کیا۔

تربت میں فتنہ الہندوستان کے دہشت گردوں کی بزدلانہ کارروائی، تربت میں دہشت گردوں نے ڈپٹی کمشنر کیچ کی گاڑی کو ریموٹ کنٹرول دھماکے سے نشانہ بنایا، 5 اہلکاروں سمیت 8 افراد زخمی ہو گئے۔

گاڑی کے دھماکے میں ڈپٹی کمشنر کیچ بشیر احمد بڑیچ محفوظ رہے جبکہ 5 لیویز اہلکاروں سمیت 8 افرادزخمی ہوئے ہیں،پولیس کے مطابق زخمیوں کو قریبی ہسپتال منتقل کر دیا گیا۔سیکیورٹی فورسز کا بروقت ردعمل، علاقے میں سرچ آپریشن جاری ہے،تربت میں فتنہ الہندوستان کے دہشت گردوں نے سول آبادی پر بزدلانہ حملہ کیا، پولیس نے کہا ہے کہ پیر کی صبح ڈپٹی کمشنر کیچ بشیر احمد بڑیچ کی گاڑی کے قریب ریمورٹ کنٹرول بم دھماکے میں 5 لیویز اہلکار زخمی ہو گئے ہیں۔ بم تربت پریس کلب روڈ پر ایک موٹر سائیکل میں نصب کیا گیا تھا، ڈپٹی کمشنر اس حملے میں محفوظ رہے۔

بلوچستان اور خیبر پختونخوا میں حالیہ دنوں کے دوران مختلف علاقوں میں دہشتگردی کے واقعات اور سیکیورٹی فورسز کی جوابی کارروائیاں رپورٹ ہوئی ہیں، جن میں کئی دہشتگرد ہلاک اور متعدد حملے ناکام بنا دیے گئے۔

نوشکی میں نامعلوم حملہ آوروں نے مقامی پولیس اسٹیشن پر دستی بم سے حملہ کیا۔ پولیس اہلکاروں نے فوری جوابی فائرنگ کی جس کے بعد حملہ آور فرار ہوگئے۔ خوش قسمتی سے واقعے میں کوئی جانی نقصان نہیں ہوا۔ واقعے کے بعد پولیس اور قانون نافذ کرنے والے اداروں نے علاقے کو گھیرے میں لے کر سرچ آپریشن شروع کردیا تاکہ ملزمان کو گرفتار کیا جا سکے۔

قلات میں مبینہ طور پر کالعدم بلوچ لبریشن آرمی (بی ایل اے) نے سیکیورٹی فورسز پر آئی ای ڈی حملے کی ذمہ داری قبول کی ہے۔ مقامی ذرائع کے مطابق ہفتے کے آغاز میں سڑک کنارے دھماکا ہوا تھا تاہم کسی جانی نقصان کی اطلاع نہیں ملی۔ حکام کی جانب سے تاحال واقعے یا دعوے کی باضابطہ تصدیق نہیں کی گئی۔ علاقے میں سیکیورٹی سخت کر دی گئی ہے اور تحقیقات جاری ہیں۔

کیچ میں بھی سوشل میڈیا پر اطلاعات گردش کر رہی ہیں کہ بی ایل اے نے سیکیورٹی فورسز کو نشانہ بنانے والے ایک اور آئی ای ڈی حملے کی ذمہ داری قبول کی ہے۔ حکام نے دعوے کی تصدیق نہیں کی، تاہم علاقے کو گھیرے میں لے کر سرچ آپریشن جاری ہے تاکہ کسی بھی ممکنہ دہشتگردی کو روکا جا سکے۔

پاک فوج کے شعبہ تعلقات عامہ (آئی ایس پی آر) کے مطابق شمالی وزیرستان کے اسپین وام علاقے میں سیکیورٹی فورسز نے انٹیلیجنس کی بنیاد پر کارروائی کرتے ہوئے 15 دہشتگردوں کو ہلاک کر دیا۔ کارروائی کے دوران دہشتگردوں کے متعدد ٹھکانے تباہ کر دیے گئے۔اسی روز کرم کے گھاکی علاقے میں ایک اور آپریشن کے دوران پاک فوج نے سرحد پار سے داخل ہونے کی کوشش ناکام بناتے ہوئے 10 دہشتگرد مار گرائے۔ ہلاک ہونے والوں میں 4 خودکش بمبار بھی شامل تھے۔ کارروائی کے دوران 5 پاکستانی فوجی جوان وطن کے دفاع میں شہید ہوگئے۔ علاقے سے بھاری مقدار میں اسلحہ اور گولہ بارود بھی برآمد ہوا۔

بنوں میں دو علیحدہ واقعات رپورٹ ہوئے۔پہلے واقعے میں مسلح افراد نے مسومآباد–مامندخیل روڈ پر 15 سے 20 کلوگرام وزنی آئی ای ڈی نصب کیا تھا۔ پولیس اور بم ڈسپوزل اسکواڈ کی بروقت کارروائی سے بم ناکارہ بنا دیا گیا اور بڑی تباہی سے بچا لیا گیا۔دوسرے واقعے میں میرین تھانے کی حدود میں زیرِ تعمیر ریسکیو 1122 کی عمارت کو دھماکے سے اڑا دیا گیا۔ پولیس کے مطابق شدت پسندوں نے عمارت کے مختلف حصوں میں بارودی مواد نصب کیا تھا، جس کے پھٹنے سے عمارت کو شدید نقصان پہنچا، تاہم کوئی جانی نقصان نہیں ہوا۔ سیکیورٹی فورسز نے علاقے کو گھیرے میں لے کر سرچ آپریشن شروع کر دیا۔

ہنگو کے بگٹو علاقے میں دہشتگردوں نے پولیس چوکی پر فائرنگ کی، جس سے ایک پولیس اہلکار زخمی ہوگیا۔ پولیس کی جوابی کارروائی میں ایک دہشتگرد مارا گیا جبکہ باقی فرار ہوگئے۔ زخمی اہلکار کو اسپتال منتقل کردیا گیا، جہاں اس کی حالت خطرے سے باہر ہے۔ہنگو پولیس نے دوآبہ کے علاقے میں خفیہ اطلاع پر کارروائی کرتے ہوئے ایک دہشتگرد کو ہلاک کردیا۔ پولیس کے مطابق دہشتگرد دالان پل کے قریب ناکہ بندی کر کے بیٹھے ہوئے تھے۔ فائرنگ کے تبادلے میں ایک دہشتگرد مارا گیا جبکہ دیگر فرار ہوگئے۔ کارروائی کے دوران اسلحہ اور بارودی مواد برآمد کیا گیا، جسے قبضے میں لے لیا گیا۔

شمالی وزیرستان کے اسپین وام علاقے میں ایک اور کارروائی کے دوران سیکیورٹی فورسز نے افغانستان کی سمت سے ہونے والی دراندازی کی کوشش ناکام بنا دی۔ فائرنگ کے تبادلے میں کئی دہشتگرد مارے گئے۔ ان کے قبضے سے افغان شناختی کارڈز اور جدید اسلحہ برآمد ہوا۔حکام کے مطابق شواہد ظاہر کرتے ہیں کہ افغان سرزمین پاکستان کے خلاف دوبارہ استعمال ہو رہی ہے۔ پاک فوج نے سرحدی علاقوں میں نگرانی مزید سخت کر دی ہے۔

نوشہرہ کے کینٹ کورٹ کے قریب انٹیلیجنس بیسڈ آپریشن میں افغان شہری آغا نظام الدین کو گرفتار کیا گیا۔ سیکیورٹی ذرائع کے مطابق ملزم کے قبضے سے موبائل فون، جعلی شناختی دستاویزات اور اہم کاغذات برآمد ہوئے ہیں۔ ابتدائی معلومات کے مطابق وہ ضلعی عدالتوں میں چائے فراہم کرنے کا کام کرتا تھا۔ ملزم کو مزید تفتیش کے لیے نامعلوم مقام پر منتقل کر دیا گیا ہے۔

بلوچستان اور خیبر پختونخوا میں حالیہ دنوں کے دوران سیکیورٹی فورسز کی کارروائیوں نے دہشتگردی کے متعدد منصوبے ناکام بنائے ہیں۔ حکام کے مطابق ملک بھر میں انسدادِ دہشتگردی آپریشنز میں تیزی لائی گئی ہے تاکہ عوام کے جان و مال کا تحفظ یقینی بنایا جا سکے اور ملک میں امن و استحکام برقرار رکھا جائے۔

استنبول میں ہونے والی بات چیت میں پاکستانی وفد نے افغان طالبان کے وفد کو حتمی موقف پیش کر دیا،

پاکستان نے واضح کر دیا ہے کہ افغان طالبان کی طرف سے کی جانے والی دہشت گردوں کی سر پرستی نا منظور ہے، سکیورٹی ذرائع کے مطابق پاکستانی وفد نے یہ بھی واضح کیا ہے کہ اسکے خاتمے کے لئے ٹھوس اور یقینی اقدامات کرنے پڑیں گے، اس کے برعکس طالبان کے دلائل غیر منطقی اور زمینی حقائق سے ہٹ کر ہیں، نظر آ رہا ہے کہ طالبان کسی اور ایجنڈے پر چل رہے ہیں، یہ ایجنڈا افغانستان، پاکستان اور خطے کے استحکام کے مفاد میں نہیں ہے،مذاکرات میں مزید پیشرفت افغان طالبان کے مثبت رویے پر منحصر ہے ، پاکستان نے جو مطالبات پیش کیے ہیں وہ مکمل طور پر واضح، شواہد پر مبنی اور مسلے کا حقیقی حل ہیں۔ افغان طالبان کی ہٹ دھرمی، عدم سنجیدگی اور عدم تعاون دیگر فریقوں خصوصاً میزبان پر بھی واضح ۔ پاکستانی وفد نے واضح کر دیا ہے کہ ہمارے دہشت گردی کے مرکزی مطالبات پر کوئی سمجھوتہ ممکن نہیں ۔میزبان اب بھی پوری کوشش کر رہے ہیں کہ طالبان وفد زمینی حقائق اور شواہد کو سمجھے اور سنجیدگی سے تعاون کرے تاکہ مذاکرات نتیجہ خیز ہو سکیں۔