Category: اسلام

خلیل اللّٰہ کی یاد…!!!
[تحریر:جویریہ بتول]۔
ذو الحجہ کا چاند طلوع ہونے والا ہے اور یہ وہ حرمت والا مہینہ ہے کہ جس کی عظمت فضیلت اور اس میں بجا لائے گئے اعمال کی اہمیت بہت ارفع ہے…
استغفار و انابت…
تسبیح و تہلیل اور تحمید…
مالی قربانی…
اللّٰہ کی رضا کے لیئے سب کچھ قربان کرنے کے عہد…
حج بیت اللّٰہ…
اور یومِ عرفہ کا روزہ…
جس کے بارے میں رسول اللہ صلی اللّٰہ علیہ وسلم نے فرمایا:
یکفر السنۃ الماضیۃ والباقیۃ…(صحیح مسلم)۔
یعنی” گزشتہ اور آئندہ سال کے گناہوں کا کفارہ ہے…!!!”
لیکن یہ مہینہ اور اس کےان دس ایام میں بجا لائی جانے والی عبادات اللّٰہ تعالٰی کے نزدیک کسی بھی دن میں کیئے گئے عمل سے اس قدر محبوب اور افضل ہیں کہ اللّٰہ کی راہ میں لڑنے والا بھی اس فضیلت کو نہیں پا سکتا،لیکن رسول اللہ صلی اللّٰہ علیہ وسلم نے فرمایا:
جو اپنے مال و جان کے ساتھ نکلا اور لوٹ کر نہ آیا تو وہ لاریب بہت فضیلتوں کا مستحق ہے۔
کیونکہ یہ وہ فضیلت بھرے ایام ہیں جن میں تمام عبادات نماز،روزہ،حج،مالی قربانی،تسبیحات و تکبیرات جمع ہو جاتی ہیں…!!!!
یہ مہینہ ہمیں خواہشاتِ نفس کی قربانی،اللّٰہ کی رضا کی خاطر سب کچھ قربان کر دینے کا عہد کرنے والے ابراہیم علیہ السلام کی یاد بھی دلاتا ہے…
وہ ابراہیم علیہ السلام جن کے بارے میں اللّٰہ تعالٰی نے فرمایا:
ولقد اتینا ابراھیم رشدہ من قبل…
[الانبیآء]۔
"اور یقینًا ہم نے ابراہیم علیہ السلام کو اس سے پہلے ہی سوجھ بوجھ عطا کی تھی…”
وہ لڑکپن میں ہی غور و فکر کے عادی…
رب کی وحدانیت کا پرچار کرنے والے…
جو اپنے باپ اور قوم سے سوال کرتے کہ یہ مورتیاں جنہیں تم پوجتے ہو…تمہارے نفع و نقصان کی مالک ہیں؟
وہ جواب دیتے کہ ہم نے اپنے آباؤ اجداد کو اسی طریقہ پر پایا ہے،
تب ابراھیم علیہ السلام پکار اٹھتے کہ تم اور تمہارے آباء سبھی گمراہ ہو…!!!
اللّٰہ تعالٰی کو اپنے ابراھیم کی یہ ادائیں اس قدر پسند آئیں کہ ابراہیم علیہ السلام کو آزماتا چلا گیا…
اور رب کا موحد بندہ اور پیغمبر ان تمام آزمائشوں پر پورا اترتا چلا جاتا ہے تاوقتیکہ امام الناس اور خلیل اللّٰہ کے منصب پر فائز دکھائی دیتا ہے…!!!
وہ جوانی میں قوم کے تراشیدہ بتوں کو کلہاڑے کی ضرب سے پاش پاش کرنے والا بت شکن ان سے سوال کرتا کہ تمہیں کیا ہو گیا ہے کہ کھاتے نہیں ہو؟
تمہیں کیا ہے کہ بولتے بھی نہیں؟
تب ابراہیم اپنی انہی اداؤں سے قوم کو لاجواب کر دیتا ہے،اور وہ آنکھیں جھکائے یہ سوچنے پر مجبور ہو جاتے ہیں کہ بات تو اس کی واقعی ٹھیک ہے لیکن اس کو مان لینا اَنا پر گہری ضرب تھی…!!!
وہ ابراہیم جو انتہائی بڑھاپے میں اولاد کی نعمت سے سرفراز کیئے جانے کے بعد امتحانات کے ایک تسلسل سے گزرتے ہیں…
یہاں تک کہ اپنے لاڈلے بیٹے اسماعیل علیہ السلام کو ذبح کرنے کا خواب آتا ہے…
وہ ابراہیم جن کے امتحانات کا تذکرہ اللّٰہ تعالٰی نے خود یوں فرمایا کہ:
"جب ابراہیم علیہ السلام کو ان کے رب نے کئی کئی باتوں میں آزمایا اور انہوں نے سب کو پورا کر دیا تو اللّٰہ نے فرمایا میں تمہیں لوگوں کا امام بناؤں گا…”
(البقرۃ)۔
وہ نو مولود کو اپنے سے دور تنہا بے آب و گیاہ وادی میں بیوی سمیت چھوڑنے سے لے کر اب اسماعیل علیہ السلام کو ذبح کرنے تک کا سفر ابراہیم علیہ السلام نے، نہایت صبر،کمال استقامت اور حوصلے سے کاٹا تھا…
اب اس آزمائش پر بھی پورا اترنے کے بعد اللّٰہ تعالٰی نے اس بہت بڑی آزمائش قرار دے کر اس پر پورا اترنے پر ابراہیم علیہ السلام کو سرخرو فرمایا اور اسماعیل علیہ السلام کے فدیہ میں مینڈھا نازل فرما دیا…!!!
ذرا سوچو کہ وہ بیتِ عتیق،نور و رحمت کے گھر کی طرف دیوانہ وار لپکتے لوگوں کا رش بھلا کس کی دعا کا ثمر ہے؟
وہ کعبہ کی بنیادوں کو بلند کرنے والے ابراہیم اور اس کی آبادی کے لیئے اللّٰہ کے حضور دعائیں مانگنے والے ابراھیم کی یاد کے مناظر…
واذ یرفع القواعد من البیت…
"اورجب وہ اس گھر کی بنیادیں بلند کر رہے تھے…
واتخذو من مقام ابراھیم مُصَلًّی…
"اور تم مقامِ ابراہیم کو جائے نماز مقرر کر لو…(البقرۃ)۔
وہ صفا و مروہ کے چکر کس عظیم گھرانہ کی یاد سے وابستہ ہیں…؟
ان الصفا والمروۃ من شعائر اللّٰہ…
بھلا یہ جانوروں کی قربانی کس کا فدیہ قرار پائی تھی؟
آہ…!!!
وہ جو سارے کا سارا گھرانہ صبر و ثبات ،عزم و حوصلہ،برداشت و استقامت اور ایمان و عمل کی واضح نشانی تھا…
رب کی وحدانیت اور رضا پر سب کچھ لٹا دینے کا عہد کیئے جانبِ منزل رواں دواں رہا کہ امر ہو گیا…
وہ ابراہیم جس نے قوم کو شروع میں ہی کھرا کھرا جواب دے دیا تھا کہ:
انی ذاھبٌ الی ربی سیھدین¤
"میں تو ہجرت کر کے اپنے رب کی طرف جانے والا ہوں،وہ ضرور میری رہنمائی کرے گا…(الصفّٰت)۔
اور پھر تا قیامت رہبری اور امامت کا تاج سج گیا…
ملتِ ابراہیم کے حقیقی پیروکار رب کے محبوب کہلائے…
آگ کے گلزار بننے سے ابد تک سلامتیاں ہی سلامتیاں ابراہیم علیہ السلام کا خاصہ کہلائیں:
"ابراہیم علیہ السلام پر سلام ہو،
ہم نیکو کاروں کو اسی طرح بدلہ دیتے ہیں،بے شک وہ ہمارے ایمان دار بندوں میں سے تھے…”
(الصفّٰت)۔
اللّٰہ تعالٰی ہمیں بھی ان ایام میں بہترین طریقے سے عبادات بجال لانے اور ابراہیم علیہ السلام سےوابستہ خصوصی یادوں کو اپنا ایمان و عمل بنانے کی توفیق نصیب فرمائے کہ خواہشات کے حصار نے ہمیں اپنے جالوں میں پھنسا رکھا ہے…
آج ہم منزل سے بہت دور بھٹکتے مسافر اور مقصدِ حیات سے کوسوں دور دکھائی دیتے ہیں…
امامت کے منصب پر فائز ہونے کے لئی کن راستوں پر سے ہو کر گزرنا ہوتا ہے؟سیرتِ ابراہیم اس کی بہتر راہ نما ہے…!!!
یہ دَور اپنے براہیم کی تلاش میں ہے…
صنم کدہ ہے جہاں،لا الہ الا اللّٰہ…
یہ مال و دولت،دنیا یہ رشتۂ پیوند…
بتانِ وہم و گماں،لا الہ الا اللّٰہ…!!!
=============================
[جویریات ادبیات]۔
¤¤¤¤¤¤¤¤¤¤¤¤¤¤¤¤¤¤¤¤¤¤¤

منہال زاہد سخی

زندگی میں کامیابی کے کچھ اصول ہوتے ہیں ۔ جن کے تحت زندگی گزار کر انسان اپنی منزل پر قدم رکھتا ہے ۔ ویسے تو کئی کتابیں لکھی جا چکی ہیں ایسے موضوعات پر ۔ اس کے برعکس قرآن کریم ایسے واقعات کا مجموعہ ہے ۔ جو ہمیں ہر زندگی کے ہر موڑ پر ہر مشکل وقت میں ہر رنج و الم کے موقع پر اس کائنات کا سب سے بہترین رہنما ثابت ہوتا ہے ۔ اگر شوق و ذوق اور غور و فکر سے اس کو ترجمہ بمع تفسیر پڑھا جائے تو ہمیں اپنی ہر مشکل کا حل مل جائے ۔ قرآن مجید میں 30 سپارے 114 سورتیں ہیں ۔ اور ان ہی سپاروں اور سورتوں میں کئی ایک واقعات ہیں ہماری رہنمائی کیلئے ۔ جن میں سے ایک سورت کہف ہے جس کی فضیلت بہت زیادہ ہے ۔ اس سورت کو جمعہ مبارک کے دن خصوصاً پڑھا جاتا ہے ۔ اس کو ہر جمعہ پڑھنے سے دنیا کے سب سے بڑے فتنے دجال سے محفوظ ہوا جاتا ہے ۔ اس سورت میں چار واقعات ہیں ۔ جن میں سے حضرت موسیٰ اور حضرت خضر کا واقعہ بھی ہے ۔ اس واقعہ میں چند ایک کامیابی کے بڑے اصول ہیں ۔

حضرت موسیٰ اور حضرت خضر جب آپس میں ملے تو حضرت خضر نے ایک بات کہی میرے ساتھ صبر سے رہنا ہوگا ۔ دونوں ایک کشتی میں سوار ہوئے ۔ منزل پر پہچنے پر حضرت خضر نے کشتی کے تختے توڑ دئے ۔ جس پر حضرت موسٰی کا صبر جواب دے گیا اور پوچھا یہ کہ کشتی کے تختے کیوں توڑے ۔ حضرت خضر نے جواب دیا ۔ میں نے کہا تھا تم نہیں رہ پاؤ گے ۔ حضرت موسیٰ نے کہا اب آپ مجھے صبر کرنے والوں میں سے پائیں گے ۔ دونوں نبی پھر اکٹھے سفر کرنے لگے ۔ ایک جگہ ایک لڑکے کو حضرت خضر نے قتل کردیا ۔ حضرت موسیٰ نے پھر پوچھا یہ کیوں قتل کیا ۔ حضرت خضر نے کہا میں نے کہا تھا میرے ساتھ نہیں رہ پاؤ گے ۔ حضرت موسیٰ نے کہا انشاللہ اب مجھے صبر کرنے والوں سے پائیں گے ۔پھر سفر شروع ہوا آگے جاکر ایک بستی میں رکے تو بستی والوں نے مہمان نوازی سے انکار کردیا ۔ اسی بستی میں ایک دیوار تھی جو گرنا ہی چاہتی تھی ۔ حضرت خضر نے اس دیوار کی مرمت کرکے اس کو درست کردیا ۔ اس پر حضرت موسیٰ نے کہا ایک تو بستی والوں نے مہمان نوازی نہیں کی اور دیوار مرمت کردی ۔ آپ یہ اجرت پر بھی کر سکتے تھے ۔ اس پر حضرت خضر نے کہا اب سے ہمارے راہیں جدا ہیں ۔ آخر میں تمہیں بتا دیتا ہوں یہ سب کچھ کیوں کیا ۔ میں نے کشتی کے تختے اس لئے توڑے وہاں کا بادشاہ ظالم تھا جو صحیح کشتیوں پر قبضہ کرلیتا تھا ۔ اور وہ کشتی پانی میں کام کرنے والے کچھ نیک لوگوں کی تھی ۔ جس لڑکے کو قتل کیا اسکے والدین نیک تھے ۔ اور وہ بڑا ہوکر نافرمان بنتا اس لئے قتل کیا اور اللّٰہ انھیں پاکیزہ اولاد دے گا ۔ اور جو دیوار مرمت کی اسکے نیچے دو یتیم بچوں کا مال تھا ۔ اللّٰہ کی چاہت تھی کہ جب وہ بڑے ہوجائیں تو اپنا خزانہ نکال لیں ۔ اس کے بعد دونوں کے راستے جدا ہوگئے ۔ آئیے دیکھتے ہیں اس واقعہ میں ہمارے لئے کیا سبق ہے ۔

1 سبق : اللہ رب العزت کے ہر فیصلہ میں حکمت ہوتی ہے ۔

2 سبق : اللّٰہ رب العزت تقسیم پر خوش رہنا چاہیے کسی کو کم دے کر آزماتا ہے کسی کو زیادہ دے کر آزماتا ہے ۔ پھر چاہے وہ دولت ہو عزت ہو یاں پھر علم و دانائی ہو ہمیں اس پر شکر ادا کرنا چاہیے جتنا بھی ہمارے پاس ہو ۔

3 سبق : اللّٰہ رب العزت ہر بندے کو اس کے مطابق عطا کرتا ہے ۔

4 : اللّٰہ نیک اولاد کی خود حفاظت کرتا ہے ۔ جس طرح ان کے خزانے کی حفاظت فرمائی ۔

5 سبق : سب سے اہم سبق صبر جب آپ زندگی کے ایسے موڑ پر آگئے ہیں کہ اب کچھ نہیں ہوسکتا میں ہر طرف سے مشکلات ہی مشکلات ہیں ۔ تو ایسے حالات سے آپ کو صرف ایک چیز باہر کرسکتی ہے ۔ اور وہ ہے صبر آپ اتنا صبر کریں کہ ان مشکلات میں خود کو ڈھال دیں یاں پھر ان مشکلات کی زنجیر کو توڑ دیں ۔ اگر حضرت موسیٰ صبر کرتے تو حضرت سے خضر کے ساتھ رہ کر بہت کچھ حاصل کرسکتے تھے ۔

6 سبق : اللّٰہ ہر انسان کو رہنما عطا کرتا ہے اس کی زندگی میں اب وہ اس پر ہے کہ اس کو پہچان کر اس کا فائدہ اٹھائے یاں اس کو نظر انداز کرکے خود کو کامل سمجھنے لگے ۔

7 سبق : اللّٰہ اپنے نیک بندوں کا کبھی برا نہیں چاہتا ۔

8 سبق : اللہ اپنے بندوں کی خود حفاظت فرماتا ہے ۔ ان کے مال کی ان کی ہر چیز کی ۔

9 سبق : ہم ایسا بہت کچھ نہیں جانتے جو ہمارا رب جانتا ہے ۔ دنیا میں ایسے بہت سے واقعات ہیں ۔ جو ہمیں الٹ نظر آتے ہوں لیکن ہوسکتا ہے اللّٰہ ان واقعات میں اپنے نیک بندوں کی حفاظت اور ان سے کام لے رہا ہو ۔

10 سبق : اللّٰہ ہر برے کے بدلے اچھا عطا کرتا ہے

(نوٹ : مجھے اتنا تو دین کا علم نہیں اگر کوئی غلطی ہو تو اصلاح فرمائیں نہ کہ فتویٰ جاری کریں ۔ شکریہ 🥰 )

#قلم_سخی
#اسلامی_پاکستان
#افضل_اسلام
#SAKHI
#Pakistani🇵🇰
#القرآن