Category: بہاولپور

اوچ شریف،باغی ٹی وی (نامہ نگارحبیب خان)اوچ شریف شہر میں پابندی کے باوجود پتنگ بازی کا سلسلہ جاری، گلی محلوں میں دیدہ دلیری کے ساتھ پتنگیں اور ڈوریں بھی فروخت ہو رہی ہیں، پولیس اور انتظامیہ خاموش، پتنگ بازی سے حادثات رونما ہونے کے خدشات بڑھ گئے۔عوامی سماجی حلقوں میں شدید تشویش ، ارباب اختیار سے فوری نوٹس اور اصلاح احوال کا مطالبہ

اوچ شریف شہر اور گردونواح میں پتنگ بازی اور پتنگوں کی فروخت کا سلسلہ دھڑلے سے جاری ہے۔ حکومت پنجاب کی طرف سے پتنگ بازی اور پتنگ فروخت کرنے پر پابندی عائد ہے لیکن پولیس اور انتظامیہ نے اس حوالے سے خاموشی اختیار کر رکھی ہے جس کے باعث پتنگ بازی اور پتنگوں کی فروخت کا سلسلہ جاری ہے۔

خونی شوق ثابت ہونے والی پتنگ بازی عروج پر ہے جہاں سرشام آسمان رنگ برنگی پتنگوں سے رنگین ہو جاتا ہے جس میں دھاتی ڈور کا استعمال کیا جاتا ہے جو جان لیوا ہے جس سے ملک بھر میں کئی ایسے واقعات رونما ہو چکے ہیں جن میں گلے پر دھاتی ڈور پھرنے سے قیمتی انسانی جانوں کا ضیاع ہو چکا ہے جس کے باعث پتنگ بازی پر پابندی عائد ہے تاہم انتظامیہ کی خاموشی کی وجہ سے یہ خونی کھیل جاری ہے

یاد رہے کہ گزشتہ برس بھی اوچشریف کے نواحی علاقے پتی کھیارہ کا مقامی صحافی شہزاد اعوان دھاتی ڈور پھرنے سے زخمی ہو گیا تھا جس کی وجہ سے عوامی سماجی حلقوں میں شدید تشویش پائی جاتی ہے اور انہوں نے ارباب اختیار سے فوری نوٹس لے کر اس خونی کھیل کی مستقل بنیادوں پر روک تھام کے اقدامات کو یقینی بناتے ہوئے اس کاروبار میں ملوث افراد کے خلاف کارروائی عمل میں لاتے ہوئے اصلاح احوال کا مطالبہ کیا ہے

اوچ شریف،باغی ٹی وی(نامہ نگارحبیب خان) مسلم لیگ ن یوتھ ونگ کا نائب صدر بکری چوری کرتے رنگے ہاتھوں پکڑا گیا ،ساتھی فرار،اہل علاقہ نے درگت بنا کر پولیس بلا لی،ملزم گرفتار، مقدمہ درج،

تفصیل کے مطابق موضع بیٹ احمد بستی کالڑہ کے رہائشی محمد سلیم نے میڈیاکو بتایا کہ وہ اپنے گھر میں سویا ہوا تھا آہٹ کی آواز سن کر جاگ گیا اور دیکھا کہ ایک کس ان کی قیمتی بکری چوری کر کے لے جا رہا تھا جسے گواہان کی مدد سے بکری سمیت قابو کر لیا جبکہ اس کے دیگر دو نامعلوم ساتھی موٹر سائیکل چھوڑ کر فرار ہوگئے

اہل علاقہ نے ہاتھ آئے چور کی خوب چھترول کی اور پولیس کو اطلاع کر دی، پولیس نے چور کو گرفتار کر لیا ،جس کا نام ظفر اقبال رامے ولد عبد الرشید سکنہ مامون آباد معلوم ہوا سمیت دو نامعلوم افراد کے خلاف بکری چوری سمیت برآمدگی کا مقدمہ درج کر لیا

واضح رہے کہ گرفتار ملزم ظفر اقبال رامے مسلم لیگ ن یوتھ ونگ کا نائب صدر بھی ہے

جبکہ دوسری طرف ذرائع نے یہ بھی انکشاف کیا ہے کہ معاملہ کسی خاتون کے ساتھ مبینہ ناجائز تعلقات کا ہے جسکو مبینہ سیاسی دباؤ کے باعث بکری چوری کا بنا دیا گیا ہے،

رات گئے تھانے میں مذکورہ ملزم کو چھڑوانے کے لیے سفارشیوں کا تانتا بندھا رہا اور ایک مقامی سیاسی شخصیت نے بھی پورا زور لگایا، مگر مقامی پولیس نے ایف آئی آر دیکر ملزم کو پابند سلاسل کردیا،

آخری اطلاعات آنے تک پولیس دیگر دو ساتھیوں کی گرفتاری کے لیے چھاپے ماررہی ہے اور اس واقعہ بارے سوشل میڈیا پر واویلا مچا ہوا ہے۔

اوچ شریف،باغی ٹی وی (نامہ نگار حبیب خان ) پنجند کینال کے کناروں سے سرکاری درختوں کاصفایا ہونے لگا،محکمہ جنگلات و انہار اور ہیڈ پنجند ایکسئین کے ملازمین اور ٹمبر مافیا کی ملی بھگت سے انتہائی قیمتی اور گھنے جنگل چٹیل میدان بننے لگے

بہاولپور کی سب تحصیل اوچ شریف میں واقع پنجند کینال آرائیں والی پل تا بیاسی ہزار پل تک قبضہ وٹمبر مافیا کا راج، سرسبز درختوں کی کٹائی جاری، ٹمبر مافیا کے سر غنو ں کی نگرانی میں کھلے عام جنگلات کاٹے جا رہے ہیں ، محکمہ ایریگیشن کی زرعی زمینوں پر قبضہ مافیا کا راج سبز اور قیمتی درختوں کی بے در یغ کٹائی عروج پر پہنچ گئی

ذرائع کے مطابق اوچ شریف نہروں پر درختوں کی بے دریغ کٹائی سمگلنگ کا سلسلہ تھمنے کا نام نہیں لے رہا ،محکمہ جنگلات محکمہ ایریگیشن اور ہیڈورکس کے ملازمین اور ٹمبر مافیا کی ملی بھگت اور رشوت سے انتہائی قیمتی اور گھنے درخت چٹیل میدان بنتے جارہے ہیں،

قبضہ مافیا کی جانب سے سرکاری اراضی پر قبضہ کر کے کاشتکاری کا سلسلہ جاری و ساری ہے ۔ٹمبر مافیا کے سر غنو ں کی نگرانی میں دن بھر نہر کناروں پر آرا مشین اور کٹر کی مدد سے درخت کاٹے جا رہے ہیں اور خر یدو فروخت کا سلسلہ جاری ہے ۔

بارہا حکام بالا کو باور کرانے کے باوجود کوئی نوٹس نہیں لیا گیا ،ٹمبر مافیا اور محکمہ جنگلات کے ملازمین کی ملی بھگت سے درختوں کی تباہی میں مصروف عمل ہیں ،عوامی شکایات کے باوجود محکمہ کے افسران بالا خواب غفلت میں مدہوش ہیں، ٹمبر مافیا کے خلاف کسی بھی قسم کی کارروائی سے گریزاں ہیں اورسرسبزپاکستان کے دعوے کھوکھلے اور ہوائی ثابت ہو رہے ہیں،

عوامی وا ویلا کے باوجود ابھی تک کسی ملزم کیخلاف کوئی کارروائی عمل میں نہیں لائی گئی جبکہ درختوں کا قتل عام حکومت اور متعلقہ محکمہ کی کارکردگی پر سوالیہ نشان ہے ۔

جنگلات کی غیر قانونی کٹائی سے ایک طرف قومی خزانے کو کروڑوں کا نقصان ہو رہا ہے اور دوسری طرف ماحولیاتی آلودگی کی وجہ سے کئی سنگین مسائل جنم لے رہے ہیں

شہریوں نے ڈی سی بہاول پور اورڈی سی مظفرگڑھ سے مطالبہ کیا ہے کہ وہ محکمہ جنگلات ،محکمہ انہار کی ملی بھگت سے درختوں کی بڑی تعداد میں کٹائی کا فوری نوٹس لیں اور محکمہ کی جانب سے چوروں کے خلاف فرضی کاروائیوں کی رپورٹس اور سب اچھا کی رپورٹس پر ہر گز یقین نہ کریں بلکہ اس گھناؤنے کاروبارمیں ملوث افراد کے خلاف سخت کاروائی کریں

ضلعی انتظامیہ بہاول پور اور مظفرگڑھ سے مؤقف کیلئے رابطہ کیا گیا تو دونوں ضلعی انتظامیہ ایک دوسرے پر ملبہ ڈالنے لگے ،ضلعی انتظامیہ مظفرگڑھ سے موقف لیا تو انہوں نے اپنے موقف میں کہا کہ یہ ضلع بہاولپور میں آتا ہے جبکہ ضلع بہاولپور والے اپنے موقف میں کہا کہ ضلع مظفرگڑھ کی حدود ہے.

اوچ شریف،باغی ٹی وی (نامہ نگارحبیب خان )قصور سے سیہون جانے والی بس نہرمیں گرگئی،ایک جاں بحق 10زخمی،تیز رفتاری کے باعث بس موڑ کاٹتے ہوئے نہر میں جاگری

ریسیو 1122 ترجمان کے مطابق ریسکیو کنٹرول روم کو کال موصول ہوئی کالر نے بتایا کہ ایک تیز رفتار بس موڑ کاٹتے ہوئے نہر میں گر گئی ہے۔ حادثہ 11موڑشاہی والا ہیڈراجکان کے قریب تحصیل یزمان کی حدود میں پیش آیا،

ریسکیو سٹاف نے آ ن لوکیشن ہو کر بتایا کہ ایک پرائیویٹ( نان اے سی) بس جو کہ قصور سے سیہون شریف جا رہی تھی چھوٹی نہر میں گر ی ہے نہر میں تقریبا چار سے پانچ فٹ پانی ہے۔

ریسکیو سٹاف نے لوگوں کو باہر نکالا اور زخمیوں کو فرسٹ ایڈ دی اور جو زیادہ سیریس تھے انہیں ہسپتال منتقل کیا۔
تفصیل درج ذیل ہے۔
بس میں کل 76مسافرسوار تھے ،جن میں 10 مسافرزخمی ہوگئے ،ان میں2زخمیوں اسلم خان بس ڈرائیوراورعبداللہ دونوں ہی لاہورکے رہائشی ہیں کو تحصیل ہیڈکوارٹرہسپتال احمدپورشرقیہ شفٹ کیا گیاجبکہ جو موقع پر جاں بحق ہوگیا جس کی شناخت شہزاد ولدیعقوب عمر37سال فورٹ عباس کارہائشی تھاکی لاش کو آرایچ سی ہیڈراجکاں منتقل کیا گیا

دیگرزخمیوں کو موقع پر ابتدائی طبی امداد دی گئی

اوچ شریف،باغی ٹی وی( نامہ نگارحبیب خان )اوچ شریف کے نواحی علاقوں حسینی چوک، محلہ بلوچاں، شمیم آباد ،محلہ لنگاہ ،بستی ہمشیرہ، ماجھی والامیں سماجی برائیوں کا راج ، شہر میں جوئے و شراب کے اڈے قائم اور آکڑا پرچی کا کاروبار دھڑلے سے جاری، شہر کے گلی کوچے بااثرافراد ، بھتہ مافیا اور جواریوں کے نرغے میں ، روزانہ شہر میں ہزاروں روپوں کا جوا ہونے لگا، سماجی برائیوں کے بلا روک ٹوک کاروبار کے سبب نوجوان اور بچے برائیوں میں مبتلا ہونے لگے ، انتظامیہ خاموش تماشائی بن گئی ۔

تفصیلات کے مطابق اوچ شریف اور اس کے گردونواح میں سماجی برائیوں کا راج ہو گیا ہے ۔ شہر کے مختلف علاقوں میں جوئے کے اڈے، شراب کے اڈے قائم ہو گئے ہیں اور آکڑا پرچی کا کاروبار دھڑلے سے جاری ہے ۔شہر کی ہر گلی اور ہر کوچے میں بااثر افراد اور بھتہ مافیا کی نگرانی میں تمام سماجی برائیوں کا کاروبار عروج پر پہنچ گیا ہے ۔شہر کی ہر گلی اور ہر محلے میں جگہ جگہ جوئے کے اڈے اور جوا پرچی کی دوکانیں کھلی ہوئی ہیں صبح شام ڈرا ہوتی ہے۔

شہر میں روزانہ ہزاروں روپے کا جوا کھیلا جاتا ہے ۔ جواری اس جوئے کو مٹکا پرچی کے نام سے پکارتے ہیں۔ اس میں پانچ روپے سے لیکر ہزاروں روپے تک کا جوا کھیلا جاتا ہے۔ اپنی قسمت بدلنے اور انعام کے لالچ میں غریب طبقہ اپنی دن بھر کی کمائی اس جوئے کی نذر کر رہے ہیں ۔ شہر میں جگہ جگہ یہ کاروبار کھلنے سے چھوٹے بچے اپنی جیب خرچی سے پانچ روپے اور دس روپے والا یہ جوا کھیل رہے ہیں ۔

معصوم بچے اس انعام کی لالچ میں اپنی جیب خرچی سے اس جوا میں مبتلا ہو گئے ہیں اس کے علاوہ شہر کے گردونواح میں تاش کے پتوں پر جوئے کے اڈے بھی چل رہے ہیں اور یہ تما م جوئے کے اڈے، شراب کے اڈے اور آکڑا پرچی کا کاروبار مبینہ طور پر انتظامیہ کی سرپرستی میں چل رہے ہیں۔مقامی پولیس اس جانب سے مکمل چشم پوشی اختیار کئے ہوئے ہے۔

انتہائی باخبر ذرائع کے مطابق ان اڈوں سے روزانہ لاکھوں رپے بھتہ وصول کیا جاتا ہے ۔شہرکے سیاسی ، سماجی ، دینی ، تجارتی حلقوں نے ڈپٹی کمشنر بہاول پور سے مطالبہ کیا ہے کہ اوچ شریف شہر سے ان تمام سماجی برائیوں کا خاتمہ کیا جائے اور نوجوان نسل کو تباہ ہونے سے بچایا جائے.