بہاولنگر (باغی ٹی وی، محمد عرفان)ضلع بہاولنگر میں ایک افسوسناک حادثہ پیش آیا جہاں محمد عثمان ولد عنایت اللہ قوم ارائیں موڑ والا علاقے میں ایک تیز رفتار دودھ والے ٹرک کی زد میں آ کر موقع پر ہی جاں بحق ہو گیا۔ عینی شاہدین کے مطابق حادثہ اس قدر خوفناک تھا کہ عثمان موقع پر دم توڑ گیا جبکہ ٹرک ڈرائیور موقع سے فرار ہو گیا۔
حادثے کی اطلاع ملتے ہی مقامی پولیس اور ریسکیو 1122 کی ٹیمیں موقع پر پہنچ گئیں اور لاش کو ضابطے کی کارروائی کے بعد ورثا کے حوالے کر دیا گیا۔
بہاولنگر (باغی ٹی وی ،نامہ نگار محمد عرفان)بہاولنگر پولیس نے شاندار کارروائی کرتے ہوئے اے کیٹگری کے خطرناک اشتہاری ملزم طاہر عرف طاری کو گرفتار کرلیا۔ گرفتار ملزم ڈکیتی اور راہزنی کی متعدد وارداتوں میں پولیس کو طویل عرصے سے مطلوب تھا۔
ترجمان پولیس کے مطابق طاہر عرف طاری نے اپنے ساتھی کے ساتھ مل کر آفیسر کالونی کے قریب گن پوائنٹ پر تاجر سے نقدی اور قیمتی سامان چھین لیا تھا۔ واقعے کے بعد ملزم فرار ہوگیا تھا، تاہم پولیس تھانہ سٹی اے ڈویژن نے جدید ٹیکنالوجی اور مسلسل کوششوں کے بعد سات ماہ کی محنت سے واردات کو ٹریس کرتے ہوئے اشتہاری ملزم کو گرفتار کرلیا۔
ڈسٹرکٹ پولیس آفیسر کامران اصغر نے کارروائی کرنے والی ٹیم کو شاباش دیتے ہوئے کہا کہ جرائم پیشہ عناصر کسی رعایت کے مستحق نہیں، عوام کی جان و مال کا تحفظ پولیس کی اولین ترجیح ہے۔ انہوں نے مزید کہا کہ ضلع بھر میں ایسے تمام اشتہاری مجرموں کے خلاف گھیرا تنگ کر دیا گیا ہے تاکہ امن و امان برقرار رکھا جا سکے۔
اوچ شریف نامہ نگار (باغی ٹی وی حبیب خان)احمد پور ٹول پلازہ کے قریب افسوسناک ٹریفک حادثے میں موٹر سائیکل سوار جاں بحق ہو گیا۔ عینی شاہدین اور ریسکیو ذرائع کے مطابق موٹر سائیکل سوار چنی گوٹھ سے احمد پور جا رہا تھا کہ یو ٹرن پر اچانک موڑ کاٹنے کے دوران پیچھے سے آنے والی تیز رفتار ہنڈا سوک کار سے ٹکرا گیا۔ ٹکر اتنی شدید تھی کہ موٹر سائیکل سوار کا دایاں پاؤں کٹ کر الگ ہو گیا اور زیادہ خون بہہ جانے کے باعث موقع پر ہی دم توڑ گیا۔
ریسکیو 1122 کے عملے نے موقع پر پہنچ کر سی پی آر کرتے ہوئے لاش کو تحصیل ہیڈکوارٹر ہسپتال احمد پور شرقیہ منتقل کر دیا۔ جاں بحق شخص کی شناخت اللہ دتہ ولد عبد الکریم، عمر تقریباً 65 سال، سکنہ فیروز پمپ کے ایل پی روڈ احمد پورشرقیہ کے نام سے ہوئی ہے۔حادثے کے بعد موٹر وے پولیس نے موقع پر پہنچ کر ضروری کارروائی شروع کر دی۔
بہاولنگر(باغی ٹی وی ،نامہ نگار محمد عرفان)بہاولنگر میں نوسربازی کے ایک بڑے گروہ کا انکشاف ہوا ہے جو جعلی نوکریوں کے ذریعے شہریوں سے لاکھوں روپے ہتھیانے میں مصروف تھا۔ اربن یونٹ کے ڈسٹرکٹ منیجر ہمایوں شان بھٹی کی بروقت اور مؤثر کارروائی کے نتیجے میں مرکزی نوسر باز کو گرفتار کر کے حوالات میں بند کر دیا گیا۔
تفصیلات کے مطابق ڈپٹی کمشنر کمپلیکس کے سامنے جعلی نوکریوں کا دھندہ چلانے والا نوسر باز نظیر احمد مختلف شہریوں کو اربن یونٹ میں بھرتی کا جھانسہ دے کر رقم بٹورتا رہا۔ پنجاب سٹی پریس کلب بہاولنگر میں متاثرین محمد طلحہ، نوشابہ، کشف صبا اور 105 فتح چشتیاں سے تعلق رکھنے والے دیگر افراد نے پریس کانفرنس کرتے ہوئے بتایا کہ ملزم نظیر احمد نے ان سے سپروائزر کی بھرتی کے نام پر فی کس 70 ہزار روپے وصول کیے، جن کی کیش ٹرانزیکشنز کے واضح ثبوت بھی موجود ہیں۔
متاثرین کے مطابق نظیر احمد ایک پرانا اور عادی نوسر باز ہے، جو ماضی میں بھی شہریوں کو کبھی بینظیر انکم سپورٹ اسکیم کے نام پر اور کبھی سرکاری محکموں میں ملازمتوں کے جعلی آرڈرز دکھا کر لوٹتا رہا ہے۔ ان کا کہنا تھا کہ ملزم نے چشتیاں، ڈاہری والا، ہارون آباد، فقیر والی، کھچی والا اور فورٹ عباس سمیت متعدد علاقوں میں شہریوں کو اپنے جال میں پھنسا رکھا تھا۔
ار بن یونٹ کے ڈسٹرکٹ منیجر ہمایوں شان بھٹی نے شکایات موصول ہونے پر فوری ایکشن لیتے ہوئے نوسر باز کو گرفتار کروا دیا۔ متاثرین نے ڈپٹی کمشنر ذوالفقار احمد بھون اور ڈی پی او بہاولنگر سے مطالبہ کیا کہ ملزم اور اس کے ساتھیوں کے خلاف سخت قانونی کارروائی عمل میں لائی جائے اور لوٹی گئی رقم متاثرین کو واپس دلائی جائے۔
شہریوں نے حکومت اور پولیس حکام سے اپیل کی کہ جعلی نوکریوں کے اس دھندے میں ملوث تمام عناصر کے خلاف کریک ڈاؤن کیا جائے تاکہ آئندہ کسی شہری کو ایسے دھوکے کا سامنا نہ کرنا پڑے اور عوام کا اعتماد بحال ہو سکے۔
اوچ شریف(باغی ٹی وی نامہ نگار: حبیب خان) کار میں اچانک آگ بھڑک اٹھی، ریسکیو 1122 کی بروقت کارروائی سے بڑا حادثہ ٹل گیا
تفصیل کے مطابق اوچ شریف روڈ پر گرڈ اسٹیشن کے قریب ایک کار میں اچانک آگ بھڑک اٹھی، تاہم ریسکیو 1122 کی فوری کارروائی نے بڑی تباہی سے بچا لیا۔ تفصیلات کے مطابق ایک کلٹس کار نمبر ANB-271 جو روہی چولستان سے اوچ شریف کی جانب جا رہی تھی، جیسے ہی گرڈ اسٹیشن کے قریب پہنچی تو اچانک گاڑی میں شارٹ سرکٹ کے باعث آگ بھڑک اٹھی۔
واقعہ کی اطلاع ملتے ہی ریسکیو 1122 کی ٹیم موقع پر پہنچ گئی اور پندرہ منٹ کی مسلسل جدوجہد کے بعد آگ پر مکمل قابو پا لیا۔ ریسکیو ذرائع کے مطابق گاڑی میں ایک ہی شخص سوار تھا جو آگ لگنے سے قبل ہی باہر نکل آیا، اس طرح وہ کسی جانی نقصان سے محفوظ رہا۔
عینی شاہدین کے مطابق اگر ریسکیو ٹیم بروقت نہ پہنچتی تو قریبی بجلی کے گرڈ اسٹیشن اور سڑک پر گزرنے والی دیگر گاڑیاں بھی متاثر ہوسکتی تھیں۔ تاہم ریسکیو اہلکاروں کی تیز رفتار کارروائی کے باعث ایک ممکنہ بڑا سانحہ ٹل گیا، البتہ گاڑی کو شدید نقصان پہنچا ہے۔
اوچ شریف (باغی ٹی وی نامہ نگار حبیب خان)احمد پور شرقیہ کے علاقے فردوس سنیما والا پھاٹک پر افسوسناک واقعہ پیش آیا، جہاں ایک نوعمر لڑکا ریلوے لائن عبور کرتے ہوئے تیز رفتار مال گاڑی کی زد میں آ گیا۔ حادثے میں 16 سالہ مجاہد ولد قاسم شدید زخمی ہو گیا۔
ریسکیو ذرائع کے مطابق لڑکے کے سر پر گہری چوٹیں آئیں جبکہ دائیں ٹانگ فریکچر ہو گئی۔ اطلاع ملتے ہی ریسکیو 1122 اہلکار موقع پر پہنچے اور فوری طور پر ابتدائی طبی امداد فراہم کی۔ اہلکاروں نے لڑکے کو سی پی آر (CPR) دیتے ہوئے ٹی ایچ کیو ہسپتال احمد پور شرقیہ منتقل کیا، جہاں ڈاکٹرز نے تصدیق کی کہ بچے کی دل کی دھڑکن بحال ہو چکی تھی۔
ترجمان ریسکیو کے مطابق بروقت کارروائی سے بچے کی جان بچ گئی، تاہم زخموں کی نوعیت سنگین ہونے پر اُسے ضلعی وکٹوریہ ہسپتال بہاول پور ریفر کر دیا گیا۔
عینی شاہدین کا کہنا ہے کہ بچہ پھاٹک بند ہونے سے قبل جلدی میں پٹری پار کرنے کی کوشش کر رہا تھا کہ اچانک ٹرین آ گئی اور حادثہ پیش آیا۔ شہریوں نے ریلوے حکام سے مطالبہ کیا ہے کہ پھاٹک پر حفاظتی اقدامات کو مزید مؤثر بنایا جائے تاکہ آئندہ ایسے دلخراش واقعات سے بچا جا سکے۔
اوچ شریف(نامہ نگار حبیب خان )سیلاب کا پانی تو اتر گیا مگر تباہ شدہ سڑکوں اور راستوں کی وجہ سے اوچ شریف کے متاثرہ علاقوں میں زمینی رابطے ابھی تک بحال نہیں ہو سکے۔ اس صورتحال میں سب سے زیادہ مشکلات کا سامنا متاثرین کو ہے جنہیں نہ تو اپنے گھروں تک رسائی مل پا رہی ہے اور نہ ہی امدادی سامان ان تک پہنچ پا رہا ہے۔
موضع بکھری سرور آباد کے باسیوں نے حکومتی بے حسی اور غفلت کے باوجود ایک شاندار مثال قائم کی۔ انہوں نے اپنی مدد آپ کے تحت کھجور کے تنوں کا استعمال کر کے ایک عارضی پل بنا ڈالا۔ اس پل کی مدد سے نہ صرف درجنوں خاندان اپنے گھروں تک پہنچنے میں کامیاب ہوئے بلکہ مقامی لوگوں نے ضروری سامان کی ترسیل کا راستہ بھی کھول دیا۔
اس موقع پر مقامی افراد نے اپنے جذبات کا اظہار کرتے ہوئے کہا کہ "اگر ہم یہ قدم نہ اٹھاتے تو کئی دنوں تک اپنے گھروں میں محصور رہتے اور بنیادی ضروریات سے بھی محروم رہ جاتے۔” اس واقعے نے علاقے کے عوام میں خود انحصاری اور اتحاد کا ایک نیا جذبہ پیدا کر دیا ہے۔
علاقے کے سماجی و عوامی حلقوں نے ضلعی انتظامیہ اور منتخب نمائندوں سے پرزور مطالبہ کیا ہے کہ تباہ شدہ سڑکوں کی فوری مرمت اور شگافوں کو بھرنے کے لیے فوری طور پر اقدامات کیے جائیں تاکہ متاثرہ دیہات کے باسیوں کو مزید مشکلات سے نجات مل سکے۔ اس مشکل گھڑی میں یہ ضروری ہے کہ حکومتی ادارے عوام کے ساتھ کھڑے ہوں اور ان کی مدد کریں۔
اوچ شریف (باغی ٹی وی نامہ نگار حبیب خان) صوفیائے کرام اور اولیائے عظام کی سرزمین اوچ شریف کے تاریخی مزارات بنیادی سہولیات کی شدید کمی کا شکار ہیں، جس کے باعث زائرین کو شدید مشکلات کا سامنا ہے۔ ان مزارات میں مخدوم سید بدرالدین، مخدوم سید جلال الدین بخاری شرخپوش، مخدوم سید جہانیاں جہاں گشت بخاری، مخدوم سید فضل الدین لاڈلا بخاری، مخدوم سید صدرالدین راجن قتال بخاری، مخدوم سید محبوب سبحانی گیلانی قادری، مخدوم سید صفی الدین حقانی گازرونی اور بی بی جیوندی کے مزارات شامل ہیں، جہاں ہر سال لاکھوں عقیدت مند حاضری دیتے ہیں۔
زائرین کے مطابق مزارات پر پارکنگ کی سہولت نہ ہونے کے باعث وہ اپنی گاڑیاں غیر محفوظ مقامات پر کھڑی کرنے پر مجبور ہیں جس سے چوری یا نقصان کا خطرہ بڑھ جاتا ہے۔ صاف پانی کی سہولت بھی ناکافی ہے، بعض مقامات پر نصب واٹر فلٹریشن پلانٹس عرصے سے غیر فعال ہیں جس کی وجہ سے زائرین غیر معیاری پانی پینے پر مجبور ہیں۔ اسی طرح جدید سیکیورٹی نظام، سی سی ٹی وی کیمرے، واک تھرو گیٹس اور تربیت یافتہ اہلکاروں کی عدم دستیابی سے بھی زائرین عدم تحفظ کا شکار رہتے ہیں۔
زائرین نے شکوہ کیا کہ "ہم یہاں روحانی سکون کے لیے آتے ہیں لیکن سہولیات کی کمی ہمارے سفر کو متاثر کرتی ہے۔” ان کے بقول، مزارات کے اندر رکھے گئے صندوق بکس بھی زائرین پر چندہ دینے کا دباؤ ڈالتے ہیں جو ایک اضافی بوجھ ہے۔
مقامی شہریوں نے محکمہ اوقاف اور ضلعی انتظامیہ سے مطالبہ کیا ہے کہ فوری طور پر پارکنگ زونز، جدید سیکیورٹی آلات اور مستقل بنیادوں پر فلٹریشن پلانٹس کی بحالی کو یقینی بنایا جائے۔ ان کا کہنا تھا کہ یہ مزارات نہ صرف روحانی اہمیت کے حامل ہیں بلکہ مقامی معیشت کے لیے بھی کلیدی کردار ادا کرتے ہیں۔ مقامی تاجروں نے بتایا کہ "اگر سہولیات بہتر ہوں تو زائرین کی تعداد بڑھے گی جس سے کاروبار کو بھی فروغ ملے گا۔”
محکمہ اوقاف کے ایک سینئر افسر نے نام ظاہر نہ کرنے کی شرط پر بتایا کہ مالی وسائل کی کمی اور انتظامی مسائل کے باعث تاخیر ہوئی ہے تاہم زائرین کے مسائل ترجیحی بنیادوں پر حل کرنے کے لیے اقدامات کیے جا رہے ہیں۔ ان کے مطابق جلد ہی فلٹریشن پلانٹس بحال کیے جائیں گے اور سیکورٹی نظام میں بہتری لائی جائے گی۔
زائرین اور شہریوں نے ڈپٹی کمشنر بہاولپور ڈاکٹر فرحان فاروق اور چیئرمین محکمہ اوقاف سے مطالبہ کیا ہے کہ سہولیات کی فراہمی کے لیے فوری اقدامات کیے جائیں تاکہ اوچ شریف کے مزارات پر آنے والے لاکھوں عقیدت مند سہولت اور اطمینان کے ساتھ اپنی روحانی وابستگی ادا کر سکیں۔
بہاولپور (باغی ٹی وی،نامہ نگار حبیب خان) بہاولپور کے علاقے المکہ ٹاؤن میں ایک اندوہناک سانحہ پیش آیا، جہاں گھریلو جھگڑے نے ایک پورے خاندان کو تباہ کر دیا۔ 26 سالہ خاتون شہر بانو نے مبینہ طور پر اپنی ساس سے جھگڑے کے بعد اپنے دو ننھے بچوں کو گلا دبا کر قتل کر دیا اور بعدازاں پھندہ لگا کر اپنی زندگی بھی ختم کر لی۔ یہ دل دہلا دینے والا واقعہ 18 ستمبر 2025 کو پیش آیا۔
عینی شاہدین کے مطابق شہر بانو کا اپنی ساس کے ساتھ معمولی نوعیت کے جھگڑے اکثر ہوتے رہتے تھے، تاہم بدھ کی شام جھگڑا شدت اختیار کر گیا۔ ساس کی ڈانٹ پر طیش میں آکر بہو نے کمرے میں خود کو بند کر لیا اور پہلے اپنی 3 سالہ بیٹی اور 2 سالہ بیٹے کو گلا دبا کر ہلاک کیا، اس کے بعد چھت پر جا کر پھندا لگا کر خودکشی کر لی۔
اطلاع ملتے ہی تھانہ بغداد الجدید پولیس موقع پر پہنچ گئی، علاقے کو گھیرے میں لے کر شواہد اکٹھے کیے اور لاشوں کو وکٹوریہ ہسپتال منتقل کر دیا گیا۔ پولیس حکام کے مطابق ابتدائی تحقیقات سے ظاہر ہوتا ہے کہ گھریلو تنازعات اور ذہنی دباؤ اس المیے کی بنیادی وجہ ہیں۔ ڈی ایس پی بغداد الجدید نے میڈیا کو بتایا کہ پوسٹ مارٹم رپورٹ اور خاندانی پس منظر کی چھان بین جاری ہے۔
پولیس نے مقدمہ درج کر کے شوہر اور ساس سمیت خاندان کے دیگر افراد سے تفتیش شروع کر دی ہے۔ واقعے نے پورے علاقے کو سوگوار کر دیا ہے۔
دوسری طرف مقامی لوگوں کا کہنا ہے کہ گھریلو جھگڑوں کو معمولی نہیں سمجھنا چاہیے، بروقت حل نہ نکلنے پر یہ جھگڑے بڑے سانحے میں بدل سکتے ہیں۔
اوچ شریف(باغی ٹی وی ،نامہ نگارحبیب خان) بہاولپور کے قریب نیشنل ہائی وے پر مسافر خانہ کے مقام پر ایک المناک ٹریفک حادثے میں باپ اور بیٹے کی جان چلی گئی۔ یہ واقعہ اس وقت پیش آیا جب ایک تیز رفتار ٹریلر نے موٹر سائیکل کو پیچھے سے ٹکر مار دی۔
تفصیلات کے مطابق ریسکیو ذرائع نے بتایا ہے کہ عبدالحمید (عمر 70 سال) اور ان کے بیٹے محمد جمشید (عمر 30 سال) موٹر بائیک پر بہاولپور سے احمد پور کی جانب جا رہے تھے۔ اسی دوران پیچھے سے آنے والے ایک تیز رفتار ٹریلر نے انہیں کچل دیا، جس کے نتیجے میں دونوں کی موقع پر ہی موت ہو گئی۔
موٹروے پولیس کے مطابق حادثے کی شدت اتنی زیادہ تھی کہ دونوں لاشیں شدید زخمی حالت میں پائی گئیں۔ ریسکیو اہلکاروں نے فوری طور پر جائے وقوع پر پہنچ کر وائٹل سائنز چیک کیے جو کہ موجود نہیں تھے۔
جاں بحق ہونے والے باپ بیٹے کا تعلق احمد پور شرقیہ کے موضع ٹبی ہوت سے تھا۔ پولیس نے حادثے کی جگہ پر پہنچ کر مزید تفتیش شروع کر دی ہے۔