Category: بہاولپور

اوچ شریف(نامہ نگار حبیب خان )سیلاب کا پانی تو اتر گیا مگر تباہ شدہ سڑکوں اور راستوں کی وجہ سے اوچ شریف کے متاثرہ علاقوں میں زمینی رابطے ابھی تک بحال نہیں ہو سکے۔ اس صورتحال میں سب سے زیادہ مشکلات کا سامنا متاثرین کو ہے جنہیں نہ تو اپنے گھروں تک رسائی مل پا رہی ہے اور نہ ہی امدادی سامان ان تک پہنچ پا رہا ہے۔

موضع بکھری سرور آباد کے باسیوں نے حکومتی بے حسی اور غفلت کے باوجود ایک شاندار مثال قائم کی۔ انہوں نے اپنی مدد آپ کے تحت کھجور کے تنوں کا استعمال کر کے ایک عارضی پل بنا ڈالا۔ اس پل کی مدد سے نہ صرف درجنوں خاندان اپنے گھروں تک پہنچنے میں کامیاب ہوئے بلکہ مقامی لوگوں نے ضروری سامان کی ترسیل کا راستہ بھی کھول دیا۔

اس موقع پر مقامی افراد نے اپنے جذبات کا اظہار کرتے ہوئے کہا کہ "اگر ہم یہ قدم نہ اٹھاتے تو کئی دنوں تک اپنے گھروں میں محصور رہتے اور بنیادی ضروریات سے بھی محروم رہ جاتے۔” اس واقعے نے علاقے کے عوام میں خود انحصاری اور اتحاد کا ایک نیا جذبہ پیدا کر دیا ہے۔

علاقے کے سماجی و عوامی حلقوں نے ضلعی انتظامیہ اور منتخب نمائندوں سے پرزور مطالبہ کیا ہے کہ تباہ شدہ سڑکوں کی فوری مرمت اور شگافوں کو بھرنے کے لیے فوری طور پر اقدامات کیے جائیں تاکہ متاثرہ دیہات کے باسیوں کو مزید مشکلات سے نجات مل سکے۔ اس مشکل گھڑی میں یہ ضروری ہے کہ حکومتی ادارے عوام کے ساتھ کھڑے ہوں اور ان کی مدد کریں۔

اوچ شریف (باغی ٹی وی نامہ نگار حبیب خان) صوفیائے کرام اور اولیائے عظام کی سرزمین اوچ شریف کے تاریخی مزارات بنیادی سہولیات کی شدید کمی کا شکار ہیں، جس کے باعث زائرین کو شدید مشکلات کا سامنا ہے۔ ان مزارات میں مخدوم سید بدرالدین، مخدوم سید جلال الدین بخاری شرخپوش، مخدوم سید جہانیاں جہاں گشت بخاری، مخدوم سید فضل الدین لاڈلا بخاری، مخدوم سید صدرالدین راجن قتال بخاری، مخدوم سید محبوب سبحانی گیلانی قادری، مخدوم سید صفی الدین حقانی گازرونی اور بی بی جیوندی کے مزارات شامل ہیں، جہاں ہر سال لاکھوں عقیدت مند حاضری دیتے ہیں۔

زائرین کے مطابق مزارات پر پارکنگ کی سہولت نہ ہونے کے باعث وہ اپنی گاڑیاں غیر محفوظ مقامات پر کھڑی کرنے پر مجبور ہیں جس سے چوری یا نقصان کا خطرہ بڑھ جاتا ہے۔ صاف پانی کی سہولت بھی ناکافی ہے، بعض مقامات پر نصب واٹر فلٹریشن پلانٹس عرصے سے غیر فعال ہیں جس کی وجہ سے زائرین غیر معیاری پانی پینے پر مجبور ہیں۔ اسی طرح جدید سیکیورٹی نظام، سی سی ٹی وی کیمرے، واک تھرو گیٹس اور تربیت یافتہ اہلکاروں کی عدم دستیابی سے بھی زائرین عدم تحفظ کا شکار رہتے ہیں۔

زائرین نے شکوہ کیا کہ "ہم یہاں روحانی سکون کے لیے آتے ہیں لیکن سہولیات کی کمی ہمارے سفر کو متاثر کرتی ہے۔” ان کے بقول، مزارات کے اندر رکھے گئے صندوق بکس بھی زائرین پر چندہ دینے کا دباؤ ڈالتے ہیں جو ایک اضافی بوجھ ہے۔

مقامی شہریوں نے محکمہ اوقاف اور ضلعی انتظامیہ سے مطالبہ کیا ہے کہ فوری طور پر پارکنگ زونز، جدید سیکیورٹی آلات اور مستقل بنیادوں پر فلٹریشن پلانٹس کی بحالی کو یقینی بنایا جائے۔ ان کا کہنا تھا کہ یہ مزارات نہ صرف روحانی اہمیت کے حامل ہیں بلکہ مقامی معیشت کے لیے بھی کلیدی کردار ادا کرتے ہیں۔ مقامی تاجروں نے بتایا کہ "اگر سہولیات بہتر ہوں تو زائرین کی تعداد بڑھے گی جس سے کاروبار کو بھی فروغ ملے گا۔”

محکمہ اوقاف کے ایک سینئر افسر نے نام ظاہر نہ کرنے کی شرط پر بتایا کہ مالی وسائل کی کمی اور انتظامی مسائل کے باعث تاخیر ہوئی ہے تاہم زائرین کے مسائل ترجیحی بنیادوں پر حل کرنے کے لیے اقدامات کیے جا رہے ہیں۔ ان کے مطابق جلد ہی فلٹریشن پلانٹس بحال کیے جائیں گے اور سیکورٹی نظام میں بہتری لائی جائے گی۔

زائرین اور شہریوں نے ڈپٹی کمشنر بہاولپور ڈاکٹر فرحان فاروق اور چیئرمین محکمہ اوقاف سے مطالبہ کیا ہے کہ سہولیات کی فراہمی کے لیے فوری اقدامات کیے جائیں تاکہ اوچ شریف کے مزارات پر آنے والے لاکھوں عقیدت مند سہولت اور اطمینان کے ساتھ اپنی روحانی وابستگی ادا کر سکیں۔

اوچ شریف(باغی ٹی وی،نامہ نگار حبیب خان) وزیراعلیٰ پنجاب مریم نواز شریف نے سیلاب سے متاثرہ اوچ شریف کا ہنگامی دورہ کیا اور متاثرین کے لیے ایک جامع امدادی پیکج کا اعلان کیا، تاہم علاقے کو "آفت زدہ” قرار نہ دینے پر مقامی عوام میں گہری مایوسی پائی جاتی ہے۔

تفصیلات کے مطابق وزیراعلیٰ نے اوچ شریف کے نواحی علاقے بلہ جھلن میں قائم فلڈ ریلیف کیمپ کا تفصیلی جائزہ لیا۔ اس موقع پر ان کے ہمراہ رکن صوبائی اسمبلی مخدوم سید عامر علی شاہ، ایم پی اے ملک خالد محمود وارن اور ڈپٹی کمشنر بہاولپور ڈاکٹر فرحان فاروق سمیت دیگر اعلیٰ حکام بھی موجود تھے۔ ڈپٹی کمشنر نے وزیراعلیٰ کو سیلاب کی تباہ کاریوں اور متاثرہ خاندانوں کو درپیش مشکلات سے آگاہ کیا۔

مریم نواز نے متاثرین سے براہ راست ملاقاتیں کیں، ان کے مسائل سنے اور فوری امداد کی یقین دہانی کرائی۔ انہوں نے جاں بحق ہونے والے افراد کے اہل خانہ سے تعزیت کا اظہار کیا اور ان کے لیے خصوصی مالی امداد کا بھی اعلان کیا۔ اس دوران ایک موقع پر انہوں نے کیمپ میں موجود ایک بچے کو گود میں اٹھا کر متاثرین کے دل جیت لیے۔

دورے کے دوران وزیراعلیٰ نے سرکاری منچن بند کا معائنہ کیا اور مستقبل میں سیلابی خطرات سے بچاؤ کے لیے اسے مزید مضبوط بنانے کی ہدایت جاری کیں۔ انہوں نے متاثرین کی بحالی کے لیے ایک جامع امدادی پیکج کا اعلان کیا جس میں مالی امداد، رہائشی سہولیات کی فراہمی، زراعت کی بحالی اور انفراسٹرکچر کی تعمیر نو شامل ہے۔

مقامی عوام اور سماجی رہنماؤں نے وزیراعلیٰ کے بروقت دورے اور امدادی پیکج کا خیرمقدم کیا، لیکن علاقے کو باضابطہ طور پر آفت زدہ قرار نہ دیے جانے پر شدید مایوسی کا اظہار کیا۔ متاثرین کا کہنا ہے کہ سیلاب نے ان کے گھر، کھیت اور روزگار مکمل طور پر تباہ کر دیے ہیں اور آفت زدہ علاقہ قرار نہ دینا ان کے زخموں پر نمک چھڑکنے کے مترادف ہے۔ انہوں نے مطالبہ کیا کہ اوچ شریف اور گردونواح کو فوری طور پر آفت زدہ علاقہ قرار دے کر خصوصی فنڈز جاری کیے جائیں تاکہ متاثرین کی مکمل بحالی ممکن ہو سکے۔

اوچ شریف (باغی ٹی وی نامہ نگار حبیب خان) دریائے ستلج اور چناب کے حالیہ سیلاب سے تباہ حال اوچ شریف کے عوام کی آواز پنجاب اسمبلی کے ایوان میں گونج اٹھی۔ عوامی رہنما و رکن صوبائی اسمبلی مخدوم سید عامر علی شاہ نے اپنے حلقے کے متاثرین کی کسمپرسی اور دلخراش حالات کو جذباتی انداز میں پیش کرتے ہوئے کہا کہ درجنوں دیہات پانی میں ڈوب گئے، ہزاروں گھر منہدم ہو گئے، کھڑی فصلیں تباہ ہوئیں جبکہ بچے، خواتین اور بزرگ بھوک اور بیماری کا شکار ہیں۔

انہوں نے حکومت سے مطالبہ کیا کہ متاثرہ علاقوں کو فوری طور پر آفت زدہ قرار دے کر راشن، خیمے، صاف پانی اور طبی سہولیات فراہم کی جائیں۔

انہوں نے ضلعی انتظامیہ کی غفلت پر سخت تنقید کرتے ہوئے کہا کہ “اعلانات اور وعدوں سے عوام کا پیٹ نہیں بھرتا، عملی اقدامات ہی سہارا ہیں، بصورت دیگر عوام سڑکوں پر نکل آئیں گے۔

” مقامی عوام نے اپنے نمائندے کی جرات مندانہ وکالت پر خوشی اور اعتماد کا اظہار کرتے ہوئے حکومت سے مطالبہ کیا کہ نقصانات کا فوری تخمینہ لگایا جائے اور معاوضے کے ساتھ بحالی کے منصوبے بنائے جائیں۔

اوچ شریف (باغی ٹی وی نامہ نگار حبیب خان) ناصر ٹاؤن اس وقت بدترین صورتحال کا شکار ہے جہاں سیوریج کے کھلے ہولز اور گندا پانی گلیوں کو دلدل میں بدل چکا ہے۔ کھلے ہولز دہکتے تندور کی مانند موت کے دہانے بنے ہوئے ہیں، جس کے باعث کسی بھی وقت بڑے حادثے کا خدشہ ہے۔

علاقہ مکینوں کا کہنا ہے کہ متعدد شکایات کے باوجود میونسپل کمیٹی نے نہ تو نکاسیٔ آب کا انتظام کیا اور نہ ہی خطرناک ہولز کو ڈھانپنے کی زحمت کی۔ مرد، خواتین اور بچے گھروں سے نکلنے سے خوفزدہ ہیں جبکہ بزرگ اور مریض شدید اذیت میں مبتلا ہیں۔

شہریوں نے ڈپٹی کمشنر بہاولپور اور اعلیٰ حکام سے فوری نوٹس لینے کا مطالبہ کرتے ہوئے خبردار کیا ہے کہ اگر ہولز فوری طور پر نہ بھرے گئے تو میونسپل کمیٹی کے خلاف احتجاجی تحریک شروع کی جائے گی۔

مکینوں نے سوال اٹھایا کہ کیا اوچ شریف کے قلب میں واقع ناصر ٹاؤن کے لوگ دوسرے درجے کے شہری ہیں جنہیں بنیادی سہولتوں سے محروم رکھا جا رہا ہے؟

اوچ شریف (باغی ٹی وی نامہ نگار حبیب خان) اوچ شریف کے نواحی گاؤں موضع چک مانک کے رہائشی تین برس سے بدعنوانی اور انتظامی غفلت کا شکار ہیں۔ مقامی مکینوں کے مطابق ٹھیکیدار نے میٹل روڈ کی تعمیر کے نام پر فنڈز ہڑپ کر لیے اور پہلے سے موجود سولنگ اکھاڑ کر اینٹیں فروخت کر دیں، جس کے بعد منصوبہ مکمل طور پر تعطل کا شکار ہو گیا۔

اہلِ علاقہ کا کہنا ہے کہ ٹوٹ پھوٹ، کیچڑ اور گردوغبار نے گاؤں کو اذیت کدہ بنا دیا ہے۔ بارش میں راستے دلدل کی شکل اختیار کر لیتے ہیں جبکہ خشک موسم میں اڑتی دھول سے صحت کے مسائل بڑھ رہے ہیں۔

اہم تعلیمی ادارے، جن میں دو سرکاری سکول اور دینی مدرسہ "حیدر کرار” شامل ہیں، براہِ راست متاثر ہو رہے ہیں اور طلبہ و طالبات کی حاضری میں نمایاں کمی دیکھنے میں آئی ہے۔ خواتین، بچے اور بزرگ روزمرہ آمدورفت میں شدید مشکلات سے دوچار ہیں جبکہ مریضوں کو اسپتال پہنچانا بھی مشکل ہو چکا ہے۔

نمبر دار ملک حسنین سمیت عمائدین اور رہائشیوں نے الزام لگایا کہ یہ تین سالہ تعطل انتظامیہ کی مجرمانہ غفلت ہے اور عوام کے ساتھ کھلا دھوکہ ہے۔ انہوں نے ڈپٹی کمشنر بہاولپور ڈاکٹر فرحان فاروق سے فوری نوٹس لینے، کرپٹ ٹھیکیدار کے خلاف کارروائی کرنے اور بیچی گئی اینٹوں سمیت مکمل حساب کتاب لینے کا مطالبہ کیا ہے۔