Category: بہاولپور

اوچ شریف (باغی ٹی وی نامہ نگار حبیب خان)اوچ شریف کے نواحی گاؤں بیٹ احمد کے رہائشی 16 سالہ محمد عرفان بلوچ کی کراچی میں مبینہ پولیس تشدد سے ہلاکت نے پورے علاقے کو غم و غصے میں مبتلا کر دیا۔ ذرائع کے مطابق کمسن عرفان سیر و تفریح کے لیے کراچی گیا تھا، جہاں سی آئی اے پولیس نے اسے عائشہ منزل کے قریب مشتبہ قرار دے کر حراست میں لے لیا۔ دورانِ حراست اہلکاروں نے عرفان بلوچ پر شدید تشدد کیا جس کے باعث وہ موقع پر ہی دم توڑ گیا۔

افسوسناک واقعے کے بعد پولیس نے خود ورثا کو فون کر کے لاش حوالے کی، جس پر اہل خانہ اور مقامی افراد نے شدید احتجاج کیا۔ سوشل میڈیا پر معاملہ وائرل ہونے کے بعد پولیس حکام حرکت میں آ گئے اور تین ایس آئیز سمیت سات اہلکاروں کو فوری طور پر معطل کر دیا گیا۔

پوسٹ مارٹم کے بعد ورثا نے ایدھی سینٹر کے باہر احتجاج شروع کر دیا اور مطالبہ کیا کہ جب تک ذمہ دار اہلکاروں کے خلاف قتل کا مقدمہ درج نہیں ہوتا اور گرفتاریاں عمل میں نہیں آتیں، وہ عرفان بلوچ کی میت وصول نہیں کریں گے۔

علاقہ مکینوں اور کراچی کے شہریوں نے کمسن عرفان کی ہلاکت کو پولیس گردی کی بدترین مثال قرار دیتے ہوئے وزیراعلیٰ سندھ، آئی جی پولیس اور انسانی حقوق کمیشن سے مطالبہ کیا ہے کہ اس اندوہناک واقعے کی غیرجانبدارانہ تحقیقات کرائی جائیں اور ملوث اہلکاروں کو نشانِ عبرت بنایا جائے تاکہ آئندہ کوئی شہری پولیس کے ہاتھوں یوں نہ مارا جائے۔

بہاولنگر (باغی ٹی وی،نامہ نگارمحمدعرفان) پنجاب فوڈ اتھارٹی نے ڈائریکٹر آپریشنز ساؤتھ شہزاد خان مگسی کی سربراہی میں بڑی کارروائی کرتے ہوئے جعلی کیچپ تیار کرنے والے یونٹ اور غیر قانونی سلاٹر ہاؤس پر چھاپہ مارا۔

رحمان نگر میں کیچپ یونٹ سے 1700 کلو گرام ناقص کیچپ برآمد کر کے تلف کر دیا گیا جبکہ یونٹ کو اصلاح تک بند کر دیا گیا۔

ماڑی شوق الہی میں واقع غیر قانونی سلاٹر ہاؤس سے 150 کلو مضر صحت گوشت پکڑا گیا، مالک کے خلاف پنجاب فوڈ اتھارٹی ایکٹ 2011 کے تحت مقدمہ درج کر لیا گیا۔

ڈی جی پنجاب فوڈ اتھارٹی محمد عاصم جاوید نے کہا ہے کہ عوام کی صحت سے کھیلنے والوں کے خلاف سخت کارروائیاں جاری رہیں گی، خوراک کے ہر شعبے میں معیار کی جانچ یقینی بنائی جا رہی ہے۔

بہاولنگر (باغی ٹی وی، نامہ نگار محمد عرفان) پنجاب فوڈ اتھارٹی نے بہاولنگر میں غیر قانونی سلاٹر ہاؤس پر بڑی کارروائی کرتے ہوئے 350 کلو بدبودار اور مضر صحت گوشت تلف کر دیا۔ کارروائی کے دوران فریزر سمیت بھاری مقدار میں سامان بھی ضبط کر لیا گیا۔

یہ چھاپہ ہارون آباد روڈ پر واقع ایک نجی سلاٹر ہاؤس پر مارا گیا جہاں بیمار جانوروں کا گوشت فریزر میں ذخیرہ کیا گیا تھا۔ ڈی جی فوڈ اتھارٹی کے مطابق یہ ناقص گوشت مختلف ہوٹلوں کو سپلائی کیا جانا تھا، جو شہریوں کی صحت کے لیے خطرناک ثابت ہو سکتا تھا۔

فوڈ اتھارٹی نے سلاٹر ہاؤس کے مالک کے خلاف مقدمہ درج کر لیا ہے۔ ڈی جی فوڈ اتھارٹی نے واضح کیا کہ صحت دشمن عناصر کے خلاف کارروائیاں مزید سخت کی جا رہی ہیں اور ان کے گرد گھیرا تنگ کیا جا رہا ہے۔ انہوں نے شہریوں سے اپیل کی کہ ایسے غیر قانونی کاروبار کی فوری نشاندہی کریں اور 1223 پر اطلاع دیں تاکہ بروقت کارروائی ممکن ہو سکے۔

پنجاب فوڈ اتھارٹی کی یہ کارروائی عوام کو مضر صحت گوشت سے بچانے کی ایک اہم کوشش ہے، جس سے شہریوں کی صحت کے تحفظ کو یقینی بنایا جا رہا ہے۔

بہاولنگر (باغی ٹی وی، نامہ نگار محمد عرفان) تھانہ صدر بہاولنگر پولیس نے کامیاب کارروائی کرتے ہوئے 3 منشیات فروشوں سمیت 4 ملزمان کو گرفتار کر لیا۔

ترجمان پولیس کے مطابق ملزمان کے قبضے سے لاکھوں روپے مالیت کی ہیروئن، شراب اور ناجائز اسلحہ برآمد کیا گیا۔

پولیس نے گرفتار ملزمان کے خلاف مقدمات درج کر کے قانونی کارروائی کا آغاز کر دیا ہے۔

ڈی پی او کامران اصغر نے کہا ہے کہ جرائم پیشہ عناصر کے خلاف کارروائیاں بلاامتیاز جاری رہیں گی، عوام کی جان و مال کا تحفظ پولیس کی اولین ترجیح ہے۔

بہاولنگر (باغی ٹی وی، محمد عرفان)ضلع بہاولنگر میں ایک افسوسناک حادثہ پیش آیا جہاں محمد عثمان ولد عنایت اللہ قوم ارائیں موڑ والا علاقے میں ایک تیز رفتار دودھ والے ٹرک کی زد میں آ کر موقع پر ہی جاں بحق ہو گیا۔ عینی شاہدین کے مطابق حادثہ اس قدر خوفناک تھا کہ عثمان موقع پر دم توڑ گیا جبکہ ٹرک ڈرائیور موقع سے فرار ہو گیا۔

حادثے کی اطلاع ملتے ہی مقامی پولیس اور ریسکیو 1122 کی ٹیمیں موقع پر پہنچ گئیں اور لاش کو ضابطے کی کارروائی کے بعد ورثا کے حوالے کر دیا گیا۔

بہاولنگر (باغی ٹی وی ،نامہ نگار محمد عرفان)بہاولنگر پولیس نے شاندار کارروائی کرتے ہوئے اے کیٹگری کے خطرناک اشتہاری ملزم طاہر عرف طاری کو گرفتار کرلیا۔ گرفتار ملزم ڈکیتی اور راہزنی کی متعدد وارداتوں میں پولیس کو طویل عرصے سے مطلوب تھا۔

ترجمان پولیس کے مطابق طاہر عرف طاری نے اپنے ساتھی کے ساتھ مل کر آفیسر کالونی کے قریب گن پوائنٹ پر تاجر سے نقدی اور قیمتی سامان چھین لیا تھا۔ واقعے کے بعد ملزم فرار ہوگیا تھا، تاہم پولیس تھانہ سٹی اے ڈویژن نے جدید ٹیکنالوجی اور مسلسل کوششوں کے بعد سات ماہ کی محنت سے واردات کو ٹریس کرتے ہوئے اشتہاری ملزم کو گرفتار کرلیا۔

ڈسٹرکٹ پولیس آفیسر کامران اصغر نے کارروائی کرنے والی ٹیم کو شاباش دیتے ہوئے کہا کہ جرائم پیشہ عناصر کسی رعایت کے مستحق نہیں، عوام کی جان و مال کا تحفظ پولیس کی اولین ترجیح ہے۔ انہوں نے مزید کہا کہ ضلع بھر میں ایسے تمام اشتہاری مجرموں کے خلاف گھیرا تنگ کر دیا گیا ہے تاکہ امن و امان برقرار رکھا جا سکے۔

اوچ شریف نامہ نگار (باغی ٹی وی حبیب خان)احمد پور ٹول پلازہ کے قریب افسوسناک ٹریفک حادثے میں موٹر سائیکل سوار جاں بحق ہو گیا۔ عینی شاہدین اور ریسکیو ذرائع کے مطابق موٹر سائیکل سوار چنی گوٹھ سے احمد پور جا رہا تھا کہ یو ٹرن پر اچانک موڑ کاٹنے کے دوران پیچھے سے آنے والی تیز رفتار ہنڈا سوک کار سے ٹکرا گیا۔ ٹکر اتنی شدید تھی کہ موٹر سائیکل سوار کا دایاں پاؤں کٹ کر الگ ہو گیا اور زیادہ خون بہہ جانے کے باعث موقع پر ہی دم توڑ گیا۔

ریسکیو 1122 کے عملے نے موقع پر پہنچ کر سی پی آر کرتے ہوئے لاش کو تحصیل ہیڈکوارٹر ہسپتال احمد پور شرقیہ منتقل کر دیا۔ جاں بحق شخص کی شناخت اللہ دتہ ولد عبد الکریم، عمر تقریباً 65 سال، سکنہ فیروز پمپ کے ایل پی روڈ احمد پورشرقیہ کے نام سے ہوئی ہے۔حادثے کے بعد موٹر وے پولیس نے موقع پر پہنچ کر ضروری کارروائی شروع کر دی۔

بہاولنگر(باغی ٹی وی ،نامہ نگار محمد عرفان)بہاولنگر میں نوسربازی کے ایک بڑے گروہ کا انکشاف ہوا ہے جو جعلی نوکریوں کے ذریعے شہریوں سے لاکھوں روپے ہتھیانے میں مصروف تھا۔ اربن یونٹ کے ڈسٹرکٹ منیجر ہمایوں شان بھٹی کی بروقت اور مؤثر کارروائی کے نتیجے میں مرکزی نوسر باز کو گرفتار کر کے حوالات میں بند کر دیا گیا۔

تفصیلات کے مطابق ڈپٹی کمشنر کمپلیکس کے سامنے جعلی نوکریوں کا دھندہ چلانے والا نوسر باز نظیر احمد مختلف شہریوں کو اربن یونٹ میں بھرتی کا جھانسہ دے کر رقم بٹورتا رہا۔ پنجاب سٹی پریس کلب بہاولنگر میں متاثرین محمد طلحہ، نوشابہ، کشف صبا اور 105 فتح چشتیاں سے تعلق رکھنے والے دیگر افراد نے پریس کانفرنس کرتے ہوئے بتایا کہ ملزم نظیر احمد نے ان سے سپروائزر کی بھرتی کے نام پر فی کس 70 ہزار روپے وصول کیے، جن کی کیش ٹرانزیکشنز کے واضح ثبوت بھی موجود ہیں۔

متاثرین کے مطابق نظیر احمد ایک پرانا اور عادی نوسر باز ہے، جو ماضی میں بھی شہریوں کو کبھی بینظیر انکم سپورٹ اسکیم کے نام پر اور کبھی سرکاری محکموں میں ملازمتوں کے جعلی آرڈرز دکھا کر لوٹتا رہا ہے۔ ان کا کہنا تھا کہ ملزم نے چشتیاں، ڈاہری والا، ہارون آباد، فقیر والی، کھچی والا اور فورٹ عباس سمیت متعدد علاقوں میں شہریوں کو اپنے جال میں پھنسا رکھا تھا۔

ار بن یونٹ کے ڈسٹرکٹ منیجر ہمایوں شان بھٹی نے شکایات موصول ہونے پر فوری ایکشن لیتے ہوئے نوسر باز کو گرفتار کروا دیا۔ متاثرین نے ڈپٹی کمشنر ذوالفقار احمد بھون اور ڈی پی او بہاولنگر سے مطالبہ کیا کہ ملزم اور اس کے ساتھیوں کے خلاف سخت قانونی کارروائی عمل میں لائی جائے اور لوٹی گئی رقم متاثرین کو واپس دلائی جائے۔

شہریوں نے حکومت اور پولیس حکام سے اپیل کی کہ جعلی نوکریوں کے اس دھندے میں ملوث تمام عناصر کے خلاف کریک ڈاؤن کیا جائے تاکہ آئندہ کسی شہری کو ایسے دھوکے کا سامنا نہ کرنا پڑے اور عوام کا اعتماد بحال ہو سکے۔