Category: بہاولپور

پاکستان مرکزی مسلم لیگ کی سیلاب متاثرہ علاقوں میں امدادی سرگرمیاں جاری ہیں،لاہور،باجوڑ،بہاولپور کی خیمہ بستی میں مسلم سٹوڈنٹس لیگ نے سکول قائم کر دیئے،مددگار سکولوں میں سینکڑوں بچے زیر تعلیم ہیں ،جلال پور پیر والا،علی پور سمیت دیگر علاقوں میں سیلاب متاثرین کو کشتیوں کے ذریعے ریسکیو کیا جا رہا ہے، متاثرین میں کھانے خشک راشن کی تقسیم کا عمل بھی جاری ہے

مرکزی مسلم لیگ کے صدر خالد مسعود سندھو کی ہدایت پر سیلاب متاثرہ اضلاع میں امدادی سرگرمیاں جاری ہیں،مسلم اسٹوڈنٹس لیگ بھی سیلاب متاثرہ علاقوں میں متحرک ہے، مسلم سٹوڈنٹس لیگ نے سیلاب متاثرین کی خیمہ بستیوں لاہور، باجوڑ،بہاولپور میں مددگار اسکول قائم کر دیئے ہیں،سیلا ب متاثرہ بچوں‌کو سکولوں میں تعلیم دی جا رہی ہے، مسلم سٹوڈنٹس لیگ کی جانب سے سکولوں میں زیر تعلیم بچوں کو سکول بیگ، کتابیں، کاپیاں تحفتا دی گئی ہیں، مسلم سٹوڈنٹس لیگ کی مددگار ٹیم نے لاہور،موہلنوال میں خیمہ بستی میں سکول کے بعد باجوڑ خیبر پختونخواہ میں مددگار سکول قائم کیا جس کی افتتاحی تقریب میں اسسٹنٹ کمشنر خار باجوڑ کلیم جان، صدر مسلم سٹوڈنٹس لیگ انس محصی، جنرل سیکرٹری ایم ایس ایل عمر عباس، صدر مددگار ٹیم حماد عبدالرزاق، کو آڈینیٹر ایم ایس ایل کے پی کے معاویہ اعجاز اور دیگر معزز شخصیات نے خصوصی شرکت کی۔اس موقع پر متاثرہ بچوں میں قرآن مجید کے ساتھ ساتھ ایجوکیشنل گفٹس بھی تقسیم کیے گئے۔بہاولپور میں خیمہ بستی میں مددگار اسکول کے افتتاح کے موقع پر صدر مسلم سٹوڈنٹس لیگ انس محصی اور علاقائی معزز شخصیات نے خصوصی شرکت کی۔اس موقع پر انس محصی کا کہنا تھا کہ سیلاب متاثرہ خاندانوں کی مدد کے لئے مسلم سٹوڈنٹس لیگ کے نوجوان بھی متحرک ہیں، ہم چاہتے ہیں کہ سیلاب متاثرین کے بچوں کی تعلیم کے لئے وقت ضائع نہ ہو اسی لئے خیمہ بستیوں میں ہی سکول بنائے گئے ہیں ،مسلم سٹوڈنٹس لیگ کی جانب سے دیگر خیمہ بستیوں میں بھی مددگار سکول بنائے جائیں گے.

بہاولپور میں سیلاب متاثرین کو محفوظ مقامات تک پہنچانے کے لیے اہم اقدام اٹھاتے ہوئے ڈپٹی کمشنر بہاولپور نے تمام نجی کشتیاں تحویل میں لینے اور انہیں سرکاری ریسکیو آپریشن کا حصہ بنانے کے احکامات جاری کر دیے۔

ڈپٹی کمشنر نے متعلقہ حکام کو ہدایت کی ہے کہ نجی کشتیوں کو ریسکیو 1122 کے آپریشن میں شامل کیا جائے تاکہ زیادہ سے زیادہ متاثرہ افراد کو بروقت نکالا جاسکے۔ انہوں نے کہا کہ سیلاب میں پھنسے لوگوں کی زندگیوں کو بچانے کے لیے ہر ممکن اقدام کرنا ضروری ہے اور اس مقصد کے لیے دستیاب تمام وسائل بروئے کار لائے جائیں۔ریسکیو ذرائع کے مطابق متاثرہ افراد نے شکایت کی تھی کہ نجی کشتی مالکان سیلاب کے دوران کرایوں میں غیر معمولی اضافہ کر کے ان سے زائد رقم وصول کر رہے ہیں۔ اس حوالے سے متاثرین کا کہنا تھا کہ انہیں کشتی کے ذریعے محفوظ مقام تک پہنچانے کے لیے 25 سے 30 ہزار روپے تک مانگے جا رہے ہیں۔

سیلاب متاثرہ ایک شخص نے جیو نیوز کے پروگرام ’’کیپیٹل ٹاک‘‘ میں میزبان حامد میر سے گفتگو کرتے ہوئے روتے ہوئے شکایت کی کہ وہ صبح چھ بجے سے اپنی فیملی کو بچانے کے لیے کشتی کا انتظار کر رہا ہے، اس کے اہل خانہ پانی میں گھرے ہوئے ہیں، بھوکے پیاسے ہیں، لیکن ریسکیو اہلکار اور نجی کشتی مالکان انہیں نکالنے کے لیے بھاری رقوم طلب کر رہے ہیں۔ اس شخص نے دہائی دیتے ہوئے کہا کہ "میں بے بسی کے عالم میں کھڑا ہوں اور چاہتا ہوں کہ کوئی ایک کشتی مل جائے تاکہ اپنی فیملی کو محفوظ مقام پر پہنچا سکوں، لیکن ریسکیو 1122 والے بھی عوام سے 25، 30 ہزار روپے لے رہے ہیں۔”

عوامی شکایات سامنے آنے کے بعد ضلعی انتظامیہ نے فوری ایکشن لیتے ہوئے تمام نجی کشتیوں کو تحویل میں لے کر انہیں سرکاری ریسکیو آپریشن میں شامل کرنے کا فیصلہ کیا ہے، تاکہ متاثرہ افراد کو بغیر کسی مالی دباؤ کے محفوظ مقامات تک پہنچایا جاسکے۔

بہاولپور میں دریائے ستلج کا ریلا بپھرنے سے زمیندارہ بند ٹوٹ گئے اور پانی ملحقہ آبادیوں میں داخل ہونے سے کئی مکانات گر گئے

موضع ساہلاں میں زمیندارہ بند ٹوٹنے سے پانی بستی حسین آباد اور ملحقہ بستیوں میں داخل ہو گیا جس کے باعث کئی مکان گر گئے اور علاقہ مکینوں نے نقل مکانی شروع کر دی،ادھر ہیڈ تریموں سے نکلنے والے نئے ریلے کی آمد کے باعث دوبارہ ریڈ الرٹ جاری کر دیا گیا ہے،ڈی سی ملتان کا کہنا ہے کہ ہیڈ تریموں سے 4 لاکھ 14 ہزار سے زائد کیوسک کا نیا ریلا دو روز میں ملتان کے بندوں سے ٹکرائے گا، لہٰذا دریائی علاقوں کے مکین دوبارہ گھروں کو جانے سے گریز کریں،ڈپٹی کمشنر نے کہا کہ موجودہ ریلےکی ملتان کی دریائی حدود سے نکلنے کی سست رفتار پر تشویش ہے، موجودہ ریلے نے شجاع آباد اور جلالپور پیروالا کے متعدد علاقوں کو نقصان پہنچایا، 36 گھٹنےمیں ڈسچارج کی سست رفتارکے باعث ریلے کی سطح میں متوقع کمی نہیں ہوئی، ملتان: نئے ریلے کی شدت میں زیادہ اضافہ ہوا تو بریچنگ پر دوبارہ غور کریں گے۔

ڈی جی پی ڈی ایم اے پنجاب عرفان علی کاٹھیا نے سیلابی صورتحال پر بریفنگ دیتے ہوئے بتایا کہ گجرات میں بارشوں سے مرکزی نالوں میں بریچنگ ہوئی جو اربن فلڈنگ کی وجہ بنی، گجرات میں نکاسی آب کے لیے مشینری پہنچا دی گئی ہے، اگلے 12 سے 18 گھنٹے میں صورتحال بہتر ہو جائےگی، دریاؤں میں پانی کے بہاؤ کو مسلسل مانیٹر کیا جا رہا ہے اور سیلاب زدہ علاقوں میں امدادی کارروائیاں جاری ہیں،سیلاب سے متاثرہ علاقوں میں 50 قیمتی جانوں کا نقصان ہوا ہے، جاں بحق ہونے والوں کے لواحقین کو 10، 10 لاکھ روپے امداد دی جائے گی۔سیالکوٹ اور گجرات سب سے زیادہ سیلاب سے متاثر ہوئے، گجرات میں ریلیف سرگرمیوں کے لیے تمام تر سہولتیں فراہم کردی گئی ہیں۔

پنجاب کے مختلف شہروں میں حالیہ بارشوں اور دریاؤں میں پانی کی سطح بلند ہونے کے باعث سیلابی صورتحال برقرار ہے جس سے معمولاتِ زندگی بری طرح متاثر ہو رہے ہیں۔

بہاولپور کی تحصیل خیرپور ٹامیوالی کے علاقے بونگہ رمضان میں رابطہ سڑکیں سیلابی پانی میں ڈوب جانے سے آمد و رفت مکمل طور پر معطل ہوگئی۔ اسی وجہ سے ایک جنازہ کشتی کے ذریعے قبرستان منتقل کرنا پڑا۔ اس موقع پر لواحقین کو شدید مشکلات کا سامنا رہا تاہم ریسکیو اہلکاروں نے مدد فراہم کر کے جنازے کو بحفاظت قبرستان پہنچانے میں کردار ادا کیا۔

علاقے کے مکینوں کا کہنا ہے کہ پانی کی بلند سطح نے روزمرہ زندگی کو مفلوج کر دیا ہے، اسکول، دفاتر اور بازار بھی بری طرح متاثر ہو چکے ہیں۔

ادھر جھنگ کے علاقے کھوڑاں باقر میں بھی سیلاب متاثرین نے آمد و رفت کے لیے عارضی اور غیر روایتی ذرائع اپنانا شروع کر دیے ہیں۔ مقامی افراد نے ٹائروں اور ٹیوبز کا سہارا لے کر پانی میں سفر کرنا شروع کر دیا ہے تاکہ بنیادی ضروریات زندگی جیسے خوراک اور ادویات تک رسائی ممکن بنائی جا سکے۔متاثرہ شہریوں نے حکومت سے فوری امدادی اقدامات اور پانی کے اخراج کے لیے ہنگامی بنیادوں پر منصوبہ بندی کا مطالبہ کیا ہے تاکہ مزید جانی و مالی نقصان سے بچا جا سکے۔