Category: بہاولپور

اوچ شریف (باغی ٹی وی، نامہ نگار حبیب خان) اوچ شریف کے نواحی علاقے جلالپور روڈ نزد چوک بھٹہ روڈ پر تیز رفتاری ایک بڑے حادثے کا سبب بن گئی، جہاں سامنے سے آنے والے ٹرالر سے کار ٹکرا گئی، حادثے میں ایک مرد، ایک خاتون اور ایک کمسن بچی زخمی ہو گئی۔

حادثہ اُس وقت پیش آیا جب مبارک پور کے رہائشی خضر حیات اپنی بہن اقصیٰ بی بی اور تین سالہ ذائشہ بی بی کے ہمراہ علی پور میں واقع اپنے دوسرے گھر جا رہے تھے۔ خاتون مریضہ کے مطابق اوچ شریف چوک بھٹہ روڈ کے سامنے جلالپور روڈ پر چھڑتے ہوئے ان کی کار سامنے سے آنے والے ٹرک سے ٹکرا گئی۔

ریسکیو ذرائع کے مطابق، زخمیوں میں:
* خضر حیات ولد شبیر خان(عمر 26 سال) شامل ہیں، جنہیں سر پر چوٹ اور نچلے ہونٹ پر گہرا زخم آیا، وہ بے ہوش پائے گئے؛
*اقصیٰ بی بی دختر شبیر خان (عمر 28 سال) کے سر پر چوٹ لگی تاہم وہ ہوش میں تھیں؛
* جبکہ ذائشہ بی بی دختر محمد واجد (عمر 3 سال) کو معمولی خراشیں آئیں۔

ریسکیو ٹیم نے موقع پر ابتدائی طبی امداد فراہم کرنے کے بعد تمام زخمیوں کو ٹی ایچ کیو ہسپتال احمد پور شرقیہ منتقل کر دیا۔ خوش قسمتی سے تینوں زخمیوں کی حالت خطرے سے باہر بتائی گئی ہے۔

علاقہ مکینوں اور حادثے کے عینی شاہدین نے مطالبہ کیا ہے کہ جلالپور روڈ پر حد رفتار کی پابندی یقینی بنانے کے لیے مؤثر اقدامات کیے جائیں تاکہ ایسے جان لیوا حادثات سے بچا جا سکے۔

اوچ شریف (باغی ٹی وی نامہ نگار حبیب خان): اوچ شریف روڈ پر ایک ہولناک حادثہ پیش آیا جہاں تیز رفتار موٹرسائیکل اور آلٹو کار کے درمیان ہونے والے تصادم میں 55 سالہ محمد اقبال ولد پیرن دتہ شدید زخمی ہو گئے۔

عینی شاہدین کے مطابق یہ حادثہ اس وقت پیش آیا جب موٹرسائیکل (نمبر BRQ-8810) سوار محمد اقبال روڈ کراس کر رہے تھے۔ اسی دوران اوچ شریف سے جلال پور کی جانب جانے والی آلٹو کار (نمبر ALR-458) نے انہیں ٹکر مار دی۔

تصادم کے نتیجے میں محمد اقبال کو شدید چوٹیں آئیں۔ ان کی ناک کی ہڈی فریکچر ہو گئی، جسم پر گہری خراشیں آئیں، اور دائیں پاؤں کی دو درمیانی انگلیاں بھی ضائع ہو گئیں۔ ریسکیو ٹیم نے فوری طور پر جائے حادثہ پر پہنچ کر محمد اقبال کو ابتدائی طبی امداد فراہم کی اور انہیں تشویشناک حالت میں ٹی ایچ کیو ہسپتال احمد پور شرقیہ منتقل کر دیا۔

اوچ شریف (باغی ٹی وی نامہ نگار حبیب خان): اوچ شریف میں صوفی بزرگ حضرت مخدوم سید محبوب سبحانیؒ کے مقدس مزار پر جعلی خلیفوں کے ایک منظم گروہ نے دہشت گردی کی بدترین مثال قائم کرتے ہوئے مزار کے تقدس کو پامال کیا اور معصوم زائرین کو تشدد کا نشانہ بنایا۔ اس شرمناک واقعے نے اوچ شریف کے روحانی ماحول کو داغدار کر دیا ہے اور مقامی انتظامیہ کی غفلت پر سنگین سوالات اٹھا دیے ہیں۔

سندھ کے شہر گھوٹکی سے آئے ہوئے عقیدت مندوں پر خود ساختہ خلیفوں نے وحشیانہ تشدد کیا، زبردستی چندہ مانگا اور انکار کرنے والوں کو بدترین بدسلوکی اور مارپیٹ کا نشانہ بنایا۔ عینی شاہدین کے مطابق، یہ جعلی خلیفے مسلح گروہ کی صورت میں مزار پر قابض ہیں اور زائرین کو لوٹنے کے لیے منظم جرائم کا سلسلہ جاری رکھے ہوئے ہیں۔ انہوں نے زائرین پر دباؤ ڈالا کہ وہ مزار کے چندہ بکس میں زبردستی "چراغی” ڈالیں اور انکار کرنے والوں پر حملہ کیا۔ اس حملے میں متعدد زائرین شدید زخمی ہوئے، جبکہ خواتین اور بچوں سمیت دیگر عقیدت مندوں میں شدید خوف و ہراس پھیل گیا۔

زخمی زائرین نے بتایا کہ یہ جعلی خلیفے نہ صرف مزار کے تقدس کو نقصان پہنچا رہے ہیں بلکہ باقاعدہ طور پر لوٹ مار اور دہشت گردی میں ملوث ہیں، جس کی وجہ سے مزار پر آنے والے عقیدت مندوں کی تعداد میں واضح کمی آ رہی ہے۔

مقامی شہریوں اور زائرین نے انتظامیہ کی مجرمانہ غفلت پر سخت تنقید کرتے ہوئے کہا کہ محکمہ اوقاف اور مقامی پولیس اس منظم جرائم کے گروہ کے خلاف کوئی مؤثر کارروائی کرنے میں مکمل طور پر ناکام رہی ہے۔ انہوں نے الزام عائد کیا کہ انتظامیہ کی خاموشی جعلی خلیفوں کی حوصلہ افزائی کر رہی ہے، جو مزارات کے تقدس کو نقصان پہنچانے کے ساتھ ساتھ سیاحتی اور مذہبی سرگرمیوں کو بھی تباہ کر رہے ہیں۔

زائرین نے صوبائی حکومت، محکمہ اوقاف اور ضلعی انتظامیہ سے مطالبہ کیا ہے کہ فوری طور پر جعلی خلیفوں کے خلاف سخت قانونی کارروائی کی جائے، ان کے گروہوں کو گرفتار کیا جائے اور مزارات پر سیکیورٹی کے سخت انتظامات کیے جائیں تاکہ عقیدت مند بلا خوف و خطر اپنی عقیدت کا حق ادا کر سکیں۔

اوچ شریف کے شہریوں نے حکومت پاکستان اور ڈپٹی کمشنر بہاولپور ڈاکٹر فرحان فاروق سے فوری ایکشن کا مطالبہ کرتے ہوئے متنبہ کیا کہ اگر مقدس مقامات کی بے حرمتی کرنے والوں کو کیفر کردار تک نہ پہنچایا گیا تو زائرین اور مقامی لوگ اپنے تحفظ کے لیے خود اقدامات اٹھانے پر مجبور ہوں گے۔ شہریوں نے اس واقعے کو نہ صرف اوچ شریف بلکہ پورے ملک کے لیے شرمناک قرار دیا، کیونکہ مقدس مقامات پر اس قسم کی غنڈہ گردی اور دہشت گردی ناقابل برداشت ہے۔

زائرین نے وزیر اعلیٰ پنجاب اور وفاقی وزیر داخلہ سے بھی اپیل کی کہ مزارات کے تحفظ کے لیے قومی سطح پر ایک جامع پالیسی بنائی جائے اور جعلی خلیفوں کے اس منظم نیٹ ورک کے خاتمے کے لیے خصوصی ٹاسک فورس تشکیل دی جائے۔ اس واقعے نے نہ صرف اوچ شریف کے روحانی تشخص کو دھچکا پہنچایا ہے بلکہ حکومتی اداروں کی کارکردگی پر بھی سوالیہ نشان اٹھا دیا ہے۔ اگر فوری اقدامات نہ کیے گئے تو یہ خطرہ ہے کہ دیگر مزارات بھی اسی طرح کی یلغار کا شکار ہو سکتے ہیں۔

اوچ شریف (باغی ٹی وی، نامہ نگار حبیب خان)ضلعی انتظامیہ نے اوچ شریف میں عباسیہ لنک کینال کے اطراف قائم غیر قانونی تجاوزات کے خلاف بھرپور کریک ڈاؤن شروع کر دیا ہے۔ آپریشن کے دوران نہر کے کنارے قائم گھروں، دکانوں، چھپروں اور پختہ تعمیرات کو مکمل طور پر مسمار کر دیا گیا۔

اس کارروائی میں پولیس، واٹر مینجمنٹ ڈیپارٹمنٹ اور دیگر متعلقہ محکموں کی ٹیموں نے حصہ لیا۔ ضلعی انتظامیہ کے مطابق، اس آپریشن کا مقصد سرکاری اراضی کو واگزار کرانا اور نہر کے بہاؤ میں رکاوٹ پیدا کرنے والی تجاوزات کا خاتمہ کرنا ہے۔

اسسٹنٹ کمشنر احمد پور شرقیہ کا کہنا ہے کہ "ہم نے تجاوزات کے خلاف زیرو ٹالرنس پالیسی اختیار کی ہے، اور یہ آپریشن آئندہ بھی تسلسل کے ساتھ جاری رہے گا۔”

ذرائع کے مطابق، آپریشن کے نتیجے میں کئی کنال قیمتی سرکاری زمین واگزار کرائی گئی ہے جس کی مالیت کروڑوں روپے میں بتائی جاتی ہے۔ تجاوزات کے خلاف کارروائی سے قبل متاثرہ افراد کو نوٹس جاری کیے گئے تھے، تاہم بعض شہریوں نے اس کارروائی پر اپنے تحفظات کا اظہار بھی کیا ہے۔

انتظامیہ کا کہنا ہے کہ تجاوزات کی وجہ سے نہری نظام، صفائی، ماحولیاتی توازن اور شہری سہولیات متاثر ہو رہی تھیں، جنہیں اب بہتر بنانے کے لیے اقدامات کیے جا رہے ہیں۔ انتظامیہ نے اس عزم کا اظہار کیا ہے کہ شہر کے دیگر علاقوں میں بھی ایسے آپریشنز جاری رہیں گے تاکہ اوچ شریف کو تجاوزات سے مکمل طور پر پاک کیا جا سکے۔

آخر میں شہریوں سے اپیل کی گئی ہے کہ وہ سرکاری زمینوں پر غیر قانونی تعمیرات سے باز رہیں، اور کسی بھی شکایت کی صورت میں دفتر اسسٹنٹ کمشنر سے فوری رابطہ کریں، جہاں ان کی درخواست پر فوری کارروائی کی جائے گی۔

اوچ شریف (باغی ٹی وی/نامہ نگار حبیب خان)اوچ شریف کے نواحی علاقے مانک نوشہرہ کی بستی لکھویرا میں ایک خطرناک حد تک جھکا ہوا بجلی کا پول علاقہ مکینوں کے لیے موت کا سایہ بن گیا ہے۔ اس پول پر نصب ہائی وولٹیج مین سپلائی کی تاریں اور بجلی کے میٹر نہ صرف قریبی گھروں کو مسلسل خطرے میں ڈال رہے ہیں بلکہ کسی بھی وقت ایک بڑے سانحے کا پیش خیمہ ثابت ہو سکتے ہیں۔

عینی شاہدین کے مطابق پول کی بنیادیں مکمل طور پر کھوکھلی ہو چکی ہیں، سریے زنگ آلود ہو کر باہر نکل چکے ہیں اور یہ کسی بھی لمحے زمین بوس ہو کر درجنوں جانیں نگل سکتا ہے۔ مکینوں کا کہنا ہے کہ وہ کئی بار واپڈا حکام کو اس صورتحال سے آگاہ کر چکے ہیں، مگر افسوسناک حد تک کسی قسم کا کوئی عملی قدم نہیں اٹھایا گیا۔

اہل علاقہ نے شدید غم و غصے کا اظہار کرتے ہوئے واپڈا پر مجرمانہ غفلت کا الزام عائد کیا ہے۔ ان کا کہنا ہے کہ واپڈا حکام کو انسانی جانوں کی کوئی پروا نہیں۔ شہریوں نے میڈیا کے سامنے چیخ چیخ کر سوال اٹھایا کہ کیا متعلقہ ادارے صرف اس وقت جاگیں گے جب کوئی خونریز حادثہ پیش آ جائے گا؟

بستی لکھویرا میں اس صورتحال کے باعث شدید خوف و ہراس پھیل چکا ہے۔ بچے اسکول جانے سے ہچکچا رہے ہیں، بزرگ گھروں سے نکلنے سے گریزاں ہیں جبکہ خواتین ہر وقت کسی بھی ممکنہ حادثے کے ڈر سے سہمے ہوئے ہیں۔

مکینوں نے اعلیٰ حکام سے فوری نوٹس لینے اور خطرناک پول کی فوری مرمت یا تبدیلی کا مطالبہ کیا ہے۔ ان کا کہنا ہے کہ اگر اس جان لیوا خطرے کو فوری طور پر ختم نہ کیا گیا تو آئندہ پیش آنے والا کوئی بھی سانحہ مکمل طور پر واپڈا کی مجرمانہ غفلت اور نااہلی کا نتیجہ ہوگا، جس کی تمام تر ذمہ داری متعلقہ اداروں پر عائد ہوگی۔

اوچ شریف (باغی ٹی وی، نامہ نگار حبیب خان)جھانگڑہ پل کے قریب دریائے ستلج میں متعدد افراد کی جانب سے خطرناک طریقے سے نہانے کے واقعات سامنے آئے ہیں، جو ڈپٹی کمشنر بہاولپور ڈاکٹر فرحان فاروق کے جاری کردہ حفاظتی احکامات کی کھلی خلاف ورزی ہے۔ ضلعی انتظامیہ نے حالیہ دنوں میں دریاؤں اور نہروں میں نہانے پر سخت پابندی عائد کی تھی، اور خبردار کیا تھا کہ ایسی لاپرواہی سنگین حادثات اور قیمتی انسانی جانوں کے ضیاع کا باعث بن سکتی ہے۔

عینی شاہدین کے مطابق متعدد نوجوانوں کو نہ صرف نہاتے دیکھا گیا بلکہ وہ گہرے پانی میں خطرناک انداز میں تیراکی کرتے بھی نظر آئے، جس سے کسی بڑے حادثے کا خطرہ بڑھ گیا ہے۔ مقامی لوگوں نے انتظامیہ کی خاموشی پر شدید تنقید کرتے ہوئے کہا کہ حفاظتی اقدامات پر عملدرآمد نہ ہونے سے شہریوں کی زندگیاں خطرے میں ہیں۔

شہریوں نے ضلعی انتظامیہ سے فوری ایکشن لینے اور نگرانی بڑھانے کا مطالبہ کیا ہے تاکہ ایسی غیر ذمہ دارانہ سرگرمیوں کو روکا جا سکے۔ حکام سے مطالبہ کیا گیا ہے کہ پابندی کی خلاف ورزی کرنے والوں کے خلاف سخت قانونی کارروائی کی جائے اور نہر و دریا کے کناروں پر پولیس یا رینجرز تعینات کیے جائیں تاکہ کسی ممکنہ سانحے سے بچا جا سکے۔

تاہم، ضلعی انتظامیہ کی جانب سے تاحال اس واقعے کی باضابطہ تصدیق یا کوئی ردعمل سامنے نہیں آیا ہے، جس سے شہریوں میں اضطراب بڑھ رہا ہے۔ یہ صورتحال شہری تحفظ کے حوالے سے انتظامیہ کی کارکردگی پر سوالات اٹھا رہی ہے۔

بہاولپور (نامہ نگار حبیب خان): بہاولپور کے علاقے سمہ سٹہ ٹانگہ اڈہ میں فوڈ پوائزننگ کا ایک انتہائی افسوسناک واقعہ پیش آیا ہے، جہاں رات کے کھانے میں آلو گوبھی کھانے سے ایک 6 سالہ بچے کی جان چلی گئی، جبکہ تین دیگر بچوں کو تشویشناک حالت میں بہاول وکٹوریہ ہسپتال (بی وی ایچ) منتقل کیا گیا ہے۔ ہسپتال ذرائع کے مطابق، خوش قسمتی سے ان تینوں بچوں کی حالت اب خطرے سے باہر بتائی جاتی ہے۔

ریسکیو ٹیم اور ہسپتال کے ابتدائی ذرائع کے مطابق، بستی بدھا نیئر آر ایچ سی خانقاہ کے رہائشی چار بچوں نے رات کو آلو گوبھی کھائی تھی، جس کے بعد اچانک ان کی طبیعت بگڑ گئی۔ ابتدائی تحقیقات میں یہ شبہ ظاہر کیا جا رہا ہے کہ کھانے میں کوئی زہریلا مواد شامل تھا جس کی وجہ سے یہ فوڈ پوائزننگ ہوئی۔
جاں بحق اور متاثرہ بچوں کی تفصیلات:محمد سلمان ولد محمد کورا (عمر: 6 سال، بستی بدھا نیئر آر ایچ سی خانقاہ): بدقسمتی سے محمد سلمان موقع پر ہی دم توڑ گئے اور انہیں ہسپتال منتقل نہیں کیا جا سکا۔محمد عثمان ولد الطاف (عمر: 4 سال، بستی بدھا نیئر آر ایچ سی خانقاہ)شمشیر ولد الطاف (عمر: 3 سال، بستی بدھا نیئر آر ایچ سی خانقاہ)لقمان ولد منیر احمد (عمر: 3 سال، بستی بدھا نیئر آر ایچ سی خانقاہ)

بہاول وکٹوریہ ہسپتال کے میڈیکل سپرنٹنڈنٹ ڈاکٹر عامر محمود بخاری نے تصدیق کی ہے کہ تینوں بچوں کو ایمرجنسی وارڈ میں داخل کیا گیا ہے اور ڈاکٹروں کی ایک ٹیم ان کے علاج میں مصروف ہے۔

مقامی پولیس نے اس دلخراش واقعے کی تحقیقات کا آغاز کر دیا ہے۔ پولیس حکام کا کہنا ہے کہ فوڈ پوائزننگ کی اصل وجہ جاننے کے لیے کھانے کے نمونے حاصل کر کے ٹیسٹنگ کے لیے لیبارٹری بھیجے جائیں گے تاکہ زہریلے مادے کی موجودگی کی تصدیق کی جا سکے۔

اوچ شریف (باغی ٹی وی، نامہ نگار حبیب خان)اوچ شریف میں کرایہ داری ایکٹ کی خلاف ورزی نے شہریوں کی زندگی اجیرن بنا دی ہے، جبکہ قانون نافذ کرنے والے اداروں کی مجرمانہ غفلت نے صورتحال کو مزید سنگین کر دیا ہے۔ شہر کے مختلف گنجان آباد علاقوں بشمول اوچ بخاری، اوچ گیلانی، شمس کالونی، امیر آباد، اکبر ٹاؤن، اختر کالونی، ناصر ٹاؤن، سمیع ٹاؤن، عمر ٹاؤن، اقبال آباد، شمیم آباد اور حسینی چوک میں مکان مالکان کی جانب سے کرایہ داروں کے کوائف پولیس کو جمع نہ کروانے کا سلسلہ عام ہو چکا ہے۔

اس قانونی غفلت کی آڑ میں جرائم پیشہ اور مشکوک افراد نے ان رہائشی علاقوں میں اپنے ڈیرے جما لیے ہیں، جس سے چوری، ڈکیتی اور دیگر جرائم میں اضافہ دیکھنے میں آ رہا ہے۔ شہریوں کا کہنا ہے کہ رات کے وقت چوری کی وارداتیں معمول بنتی جا رہی ہیں اور انجان چہروں کی آمدورفت نے خوف کی فضا قائم کر دی ہے۔

مقامی رہائشیوں نے باغی ٹی وی سے گفتگو میں حالیہ وارداتوں پر شدید تشویش کا اظہار کرتے ہوئے کہا کہ پولیس اور ضلعی انتظامیہ کی خاموشی جرائم پیشہ عناصر کی پشت پناہی کے مترادف ہے۔ انہوں نے مطالبہ کیا کہ کرایہ داری ایکٹ پر سختی سے عملدرآمد کرایا جائے اور تمام مکان مالکان کو پابند کیا جائے کہ وہ اپنے کرایہ داروں کی تفصیلات متعلقہ تھانوں میں لازمی جمع کرائیں۔

شہریوں نے خبردار کیا کہ اگر بروقت اقدامات نہ کیے گئے تو جرائم کی شرح میں مزید اضافہ ہو گا جو شہر کے امن و امان کو شدید خطرے میں ڈال دے گا۔ مقامی پولیس سے رابطے کی کوشش کے باوجود کوئی مؤثر یا تسلی بخش مؤقف سامنے نہ آ سکا، جس نے شہریوں کے تحفظات کو مزید گہرا کر دیا ہے۔

شہریوں نے وزیراعلیٰ پنجاب، آئی جی پنجاب، اور ڈپٹی کمشنر بہاولپور سے مطالبہ کیا ہے کہ وہ فوری نوٹس لیتے ہوئے اوچ شریف میں قانون کی بالادستی قائم کریں تاکہ عوام کو تحفظ کا احساس دلایا جا سکے اور مجرموں کا قلع قمع کیا جا سکے۔

اوچ شریف (باغی ٹی وی، نامہ نگار حبیب خان)اوچ شریف اور گردونواح میں غیر مسلم جعلی پیروں، نجومیوں اور تعویذ گنڈے کے نام پر کام کرنے والے جرائم پیشہ گروہوں کے خلاف عوامی ردعمل شدت اختیار کر گیا ہے۔ شہریوں نے ان گروہوں کو سادہ لوح عوام کے لیے خطرہ قرار دیتے ہوئے فوری کارروائی کا مطالبہ کیا ہے۔ ان گروہوں پر الزام ہے کہ وہ کالا جادو، جھوٹی کرامات اور تعویذات کے ذریعے نہ صرف مالی لوٹ مار کر رہے ہیں بلکہ خواتین کی عزتوں کو بھی پامال کر رہے ہیں۔

مقامی افراد کے مطابق عباسیہ لنک کینال، محمود ماتم، بگو رام، جانی رام، پیپو رام سمیت متعدد علاقوں میں غیر مسلم افراد کی آڑ میں یہ جعلی روحانی معالج اپنا دھندہ کھلے عام جاری رکھے ہوئے ہیں۔ متاثرہ شہریوں محمد قاسم خان، عبدالرشید، محمد عامر، یونس عمر، محمود الحسن، اکبر علی اور دیگر نے میڈیا کو بتایا کہ یہ افراد جھوٹے خواب، پیش گوئیاں اور نقلی عملیات کے نام پر لاکھوں روپے بٹور رہے ہیں۔

شہریوں نے انکشاف کیا کہ ان گروہوں کے خفیہ اڈوں پر خواتین کو بند کمروں میں بلایا جاتا ہے جہاں ان کے ساتھ جنسی زیادتی جیسے جرائم سرزد ہو رہے ہیں۔ ان جعلی پیروں کے نیٹ ورک میں ایسے ایجنٹ بھی شامل ہیں جو جھوٹی کہانیاں گھڑ کر سادہ لوح افراد کو ورغلاتے ہیں اور انہیں اپنے جال میں پھنساتے ہیں۔

شہریوں کا کہنا ہے کہ یہ تمام حرکات اسلامی تعلیمات اور قرآن مجید کے احکامات کے صریح خلاف ہیں۔ عوام نے ضلعی انتظامیہ اور پولیس پر خاموش تماشائی بنے رہنے کا الزام عائد کرتے ہوئے کہا ہے کہ ان اداروں کی عدم کارروائی ان جرائم پیشہ عناصر کی پشت پناہی کے مترادف ہے۔

شہریوں نے وزیراعلیٰ پنجاب مریم نواز، چیف سیکرٹری پنجاب، آئی جی پنجاب اور ڈپٹی کمشنر بہاولپور سے اپیل کی ہے کہ ان جعلی پیروں اور نجومیوں کے خلاف فوری کریک ڈاؤن کیا جائے، ان کے خفیہ اڈے مسمار کیے جائیں، عوام کو شعور دینے کے لیے آگاہی مہم شروع کی جائے اور قانون نافذ کرنے والے ادارے ان پر آہنی ہاتھ ڈالیں۔

مقامی آبادی نے خبردار کیا ہے کہ اگر انتظامیہ نے فوری اور موثر کارروائی نہ کی تو وہ سڑکوں پر نکل کر احتجاجی دھرنوں کا آغاز کریں گے۔ شہریوں کا کہنا ہے کہ معاشرے کو اس ناسور سے نجات دلانے کے لیے حکومت کو فوری اور سخت اقدامات کرنا ہوں گے۔