Category: بہاولپور

اوچ شریف (باغی ٹی وی، نامہ نگار حبیب خان)روحانی، تاریخی اور ثقافتی اعتبار سے پاکستان کے اہم ترین شہروں میں شمار ہونے والا اوچ شریف اس وقت سنگین صفائی کے بحران سے دوچار ہے۔ حضرت محبوب سبحانی شیخ عبدالقادر جیلانیؒ، مخدوم جہانیاں جہاں گشتؒ، اور مخدوم جلال الدین سرخ پوشؒ سمیت دیگر بزرگانِ دین کے مزارات کے اردگرد گندگی کے ڈھیر، ابلتی نالیاں، بدبو اور مچھروں کی بہتات نے زائرین کو پریشان کر دیا ہے۔

ملک بھر سے عقیدت کے جذبے سے سرشار ہو کر اوچ شریف پہنچنے والے زائرین اس صورتحال پر سخت نالاں دکھائی دیتے ہیں۔ رحیم یار خان سے آنے والے زائر محمد رمضان نے مایوسی کا اظہار کرتے ہوئے کہا کہ "ہم یہاں روحانی سکون کی تلاش میں آئے تھے، مگر گندگی اور بدبو نے سارا تاثر برباد کر دیا۔”

دیگر زائرین نے بھی شکایت کی کہ نہ تو پینے کا صاف پانی میسر ہے، نہ بیت الخلاء کا مناسب بندوبست، اور نہ ہی مچھروں سے بچاؤ کے لیے کوئی اقدام کیا گیا ہے۔ مزارات کے خادمین اور متولیان کے مطابق ضلعی انتظامیہ اور بہاولپور ویسٹ مینجمنٹ کمپنی (بی ڈبلیو ایم سی) کو بارہا تحریری اور زبانی شکایات کی گئیں، لیکن کوئی عملی پیش رفت نہیں ہوئی۔

نالیوں کی صفائی نہ ہونے کے باعث گندا پانی سڑکوں پر بہہ رہا ہے، جبکہ گندگی کے ڈھیر روز بروز بڑھتے جا رہے ہیں۔ مچھر مار سپرے اور فوگنگ جیسی بنیادی سہولیات کا مکمل فقدان ہے، جس سے نہ صرف شہر کی روحانی عظمت متاثر ہو رہی ہے بلکہ زائرین کی صحت کو بھی خطرات لاحق ہیں۔

شہریوں اور زائرین نے ڈپٹی کمشنر بہاولپور ڈاکٹر فرحان فاروق سے فوری نوٹس لینے کا مطالبہ کیا ہے اور درج ذیل اقدامات پر زور دیا ہے:

* تمام مزارات کے اطراف روزانہ کی بنیاد پر صفائی یقینی بنائی جائے۔
* بی ڈبلیو ایم سی مچھر مار اسپرے اور فوگنگ مہم فوری شروع کرے۔
* زائرین کے لیے صاف پانی، بیت الخلاء، اور سایہ دار بیٹھنے کی جگہیں مہیا کی جائیں۔
* مزارات کی بے حرمتی پر ذمہ داران کے خلاف سخت تادیبی کارروائی کی جائے۔

زائرین نے خبردار کیا ہے کہ اگر متعلقہ اداروں نے فوری اقدامات نہ کیے تو مقدس مقامات کی زیارت سے محروم ہونا پڑے گا۔ "یہ مزارات ہمارے ایمان اور عقیدت کا مرکز ہیں، لیکن انتظامیہ کی مجرمانہ خاموشی ہمیں یہاں آنے سے روک رہی ہے،” ایک زائر نے شدید افسوس کا اظہار کرتے ہوئے کہا۔

اب دیکھنا یہ ہے کہ ضلعی انتظامیہ اور محکمہ اوقاف کب تک خاموش تماشائی بنے رہتے ہیں یا زائرین کی اس آواز پر کوئی عملی قدم اٹھاتے ہیں۔

اوچ شریف (نامہ نگار) اوچ شریف کے سینئر صحافی اور پریس کلب کے جنرل سیکرٹری حبیب خان کی ہونہار بیٹی خدیجہ حبیب نے میٹرک کے سالانہ امتحانات 2025ء میں شاندار کامیابی حاصل کرتے ہوئے 1200 میں سے 1122 نمبر حاصل کر کے اپنے خاندان، اساتذہ اور ادارے کا نام روشن کر دیا۔

خدیجہ راشد منہاس گرلز ہائر سیکنڈری اسکول کی طالبہ ہیں، جن کی غیر معمولی کامیابی نے نہ صرف ان کے والدین بلکہ پورے اوچ شریف کے لیے فخر کا باعث بن گئی ہے۔ خدیجہ کی محنت، والدین کی دعائیں اور اساتذہ کی بہترین رہنمائی اس کامیابی کی بنیاد بنی۔

اس موقع پر ان کے والد حبیب خان نے کہا کہ "خدیجہ کی یہ کامیابی صرف ہمارے گھر کی نہیں بلکہ پورے شہر کی خوشی ہے۔ یہ اللہ کا فضل، بچی کی محنت اور اساتذہ کی توجہ کا ثمر ہے۔”

خدیجہ کی اس کامیابی پر اسکول پرنسپل، اساتذہ، رشتہ داروں اور اہل علاقہ نے دل کی گہرائیوں سے مبارکباد دی ہے اور ان کے روشن مستقبل کے لیے نیک خواہشات کا اظہار کیا ہے۔ تعلیمی حلقوں کا کہنا ہے کہ خدیجہ نے یہ ثابت کر دیا ہے کہ لگن، استقامت اور رہنمائی سے کامیابی کی ہر منزل حاصل کی جا سکتی ہے۔

اوچ شریف کے عوام نے اس کامیابی کو پورے شہر کے لیے باعث فخر قرار دیتے ہوئے خدیجہ کے لیے دعا اور تحسین کا اظہار کیا ہے۔

بہاولپور (باغی ٹی وی، نامہ نگار حبیب خان)بورڈ آف انٹرمیڈیٹ اینڈ سیکنڈری ایجوکیشن بہاولپور کے تحت میٹرک سالانہ امتحانات 2025 کے نتائج کا اعلان کر دیا گیا، جس میں چشتیاں کی طالبہ طیبہ امین نے 1185 نمبرز حاصل کر کے پہلی پوزیشن حاصل کی اور علاقائی سطح پر اپنی ذہانت کا لوہا منوایا۔ ہارون آباد کے عبداللہ رشید نے 1182 نمبرز کے ساتھ دوسری جبکہ چشتیاں کی ہی علیزے لیاقت نے 1181 نمبرز کے ساتھ تیسری پوزیشن حاصل کی۔

اس سال مجموعی طور پر 91,643 طلبہ و طالبات نے امتحان میں شرکت کی، جن میں 80,491 سائنس گروپ اور 11,152 آرٹس گروپ سے تعلق رکھتے تھے۔ نتائج سے واضح ہوا کہ بہاول نگر خصوصاً چشتیاں کے طلبہ نے شاندار کارکردگی دکھا کر اعلیٰ پوزیشنز اپنے نام کیں۔

دوسری جانب، بہاولپور اور رحیم یار خان کی طالبات اس سال کی پوزیشن لسٹ میں جگہ نہ بنا سکیں، جس پر تعلیمی ماہرین نے تشویش کا اظہار کیا ہے۔ ماہرین کا کہنا ہے کہ ان علاقوں میں تعلیمی اداروں کی خستہ حالی، اساتذہ کی کمی، سہولیات کا فقدان اور سماجی مسائل طالبات کی کارکردگی کو متاثر کر رہے ہیں۔

ایک مقامی استاد نے صورتحال کی وضاحت کرتے ہوئے کہا، "کئی اسکولوں میں بنیادی سہولیات نہ ہونے کے برابر ہیں، جیسے بجلی، پینے کا صاف پانی، اور مناسب تعلیمی ماحول، جو کہ خاص طور پر طالبات کے لیے ترقی کی راہ میں بڑی رکاوٹ ہے۔” ماہرین تعلیم کا ماننا ہے کہ اگر فوری طور پر تعلیمی انفراسٹرکچر میں بہتری، اساتذہ کی تربیت اور سہولیات فراہم نہ کی گئیں تو آئندہ سالوں میں بھی طالبات کی کارکردگی متاثر ہو سکتی ہے۔

چیئرمین بہاولپور بورڈ محمد عدنان خان نے اس موقع پر کہا کہ "ہماری کوشش ہے کہ بورڈ کے تحت ہر طالب علم کو یکساں مواقع فراہم کیے جائیں، اور ہم تعلیمی معیار بلند کرنے کے لیے مزید اقدامات کر رہے ہیں۔”

جہاں چشتیاں اور ہارون آباد کے طلبہ نے اس سال تعلیمی میدان میں مقام بنایا، وہیں بہاولپور اور رحیم یار خان کے لیے یہ نتائج ایک لمحہ فکریہ ہیں، جو فوری اصلاحات کا تقاضا کرتے ہیں تاکہ ہر طالب علم اپنی صلاحیتوں کے مطابق کامیابی حاصل کر سکے۔

اوچ شریف (باغی ٹی وی، نامہ نگار حبیب خان)ڈپٹی کمشنر بہاولپور ڈاکٹر فرحان فاروق نے تحصیل احمد پور شرقیہ کا ہنگامی دورہ کیا تاکہ ممکنہ سیلابی خطرات کے پیش نظر حفاظتی اقدامات، ریسکیو انتظامات اور انتظامی تیاریوں کا جائزہ لیا جا سکے۔ ان کے ہمراہ اسسٹنٹ کمشنر نوید حیدر بھی موجود تھے۔

ڈاکٹر فرحان فاروق نے ریسکیو 1122 کو ہائی الرٹ کر دیا ہے اور ہدایت کی کہ تمام ریسکیو ٹیمیں کشتیوں، لائف جیکٹس، رسیوں اور دیگر حفاظتی سازوسامان کے ساتھ ہنگامی صورتحال سے نمٹنے کے لیے مکمل تیار رہیں۔

انہوں نے عوام سے اپیل کی کہ کسی بھی ایمرجنسی میں فوراً ریسکیو 1122 یا ضلعی انتظامیہ سے رابطہ کریں، افواہوں سے گریز کریں اور صرف سرکاری ذرائع پر اعتماد رکھیں۔

ضلعی انتظامیہ نے یقین دلایا ہے کہ شہریوں کی جان و مال کے تحفظ کے لیے تمام وسائل بروئے کار لائے جا رہے ہیں اور حالات پر مسلسل نظر رکھی جا رہی ہے تاکہ کسی بھی ممکنہ سیلابی صورتحال سے بروقت نمٹا جا سکے۔

اوچ شریف (باغی ٹی وی، نامہ نگار حبیب خان)اوچ شریف کے نواحی علاقے اوچ بخاری میں گورنمنٹ مڈل سکول کے گرد و نواح انسانی رہائش کے قابل نہیں رہے۔ علاقے میں سیوریج نظام مکمل طور پر ناکام ہو چکا ہے، کھلے مین ہولز، گلیوں میں گندا پانی، جھکے ہوئے بجلی کے کھمبے، اور شکستہ گلیاں علاقے کے مکینوں کی زندگی کو جہنم بنا چکی ہیں۔

علاقہ مکینوں کے مطابق بدترین بدانتظامی، سرکاری غفلت اور بااثر وڈیروں کے دباؤ نے اس بستی کو موت کے منہ میں دھکیل دیا ہے۔ گندا پانی، تعفن، مچھر، ڈینگی، ہیضہ اور دیگر وبائی امراض سر اٹھا چکے ہیں، جبکہ کئی بچے اور بزرگ کھلے گٹروں میں گر کر زخمی ہو چکے ہیں۔

بجلی کے جھکے کھمبے سکول اور گھروں پر گرنے کے خطرے سے دوچار ہیں۔ گلیوں کی حالت اتنی خراب ہو چکی ہے کہ آمدورفت ممکن نہیں رہی۔ گورنمنٹ مڈل سکول اوچ بخاری، جو کبھی علم کا مرکز تھا، اب متروک ہو چکا ہے، جہاں تعلیمی سرگرمیاں معدوم ہو چکی ہیں۔ والدین بچوں کو سکول بھیجنے سے گریزاں ہیں، جس سے تعلیمی بحران مزید سنگین ہو گیا ہے۔

علاقہ مکینوں نے بتایا کہ گزشتہ پانچ سالوں سے درخواستیں، احتجاج اور گزارشات کرتے چلے آ رہے ہیں، لیکن منتخب نمائندے اور سرکاری ادارے صرف تسلیاں دے رہے ہیں۔ خوف، جھوٹے مقدمات اور وڈیروں کی دھمکیوں نے ان کی آواز دبائی رکھی ہے۔

مکینوں نے وزیر اعلیٰ پنجاب مریم نواز شریف، چیف سیکریٹری پنجاب، سیکریٹری بلدیات، اور واسا حکام سے پرزور مطالبہ کیا ہے کہ فوری طور پر سیوریج سسٹم کی بحالی کی جائے،جھکے بجلی کے کھمبے درست کیے جائیں،گلیوں کی ازسر نو تعمیر کی جائے،مڈل سکول اوچ بخاری کی عمارت کو قابل استعمال بنایا جائے

مقامی رہنماؤں کا کہنا ہے کہ اگر فوری نوٹس نہ لیا گیا تو اوچ بخاری کسی بڑے انسانی المیے کا شکار ہو سکتا ہے۔ عوام اب خاموش نہیں بیٹھیں گے، ان کا صبر جواب دے چکا ہے۔