Category: بہاولپور

اوچ شریف (باغی ٹی وی،نامہ نگارحبیب خان)اوچ شریف کے نواحی علاقے موضع بکھری میں دیرینہ دشمنی کے باعث ہونے والی فائرنگ سے 47 سالہ امیر بخش ولد پیر بخش شدید زخمی ہو گیا۔ فائرنگ کے اس واقعے کے بعد علاقے میں خوف و ہراس پھیل گیا ہے جبکہ شہریوں نے قانون نافذ کرنے والے اداروں سے فوری کارروائی کا مطالبہ کیا ہے۔

تفصیلات کے مطابق امیر بخش روزمرہ معمولات میں مصروف تھے کہ موٹر سائیکل پر سوار نامعلوم ملزمان نے دور سے نشانہ بناتے ہوئے پستول سے فائرنگ کر دی۔ ایک گولی امیر بخش کی بائیں ٹانگ، پنڈلی کی ہڈی (Tibia/Fibula) کے بیرونی حصے پر لگی، جس سے وہ شدید زخمی ہو کر گر پڑے۔ اطلاع ملتے ہی مقامی افراد نے فوری طور پر پولیس اور ریسکیو ٹیم کو اطلاع دی، جس پر ریسکیو 1122 نے جائے وقوعہ پر پہنچ کر زخمی کو ابتدائی طبی امداد دینے کے بعد رورل ہیلتھ سینٹر اوچ شریف منتقل کیا۔

ذرائع کے مطابق واقعہ دیرینہ رنجش کا شاخسانہ ہے۔ مقامی افراد نے واقعے پر شدید تشویش کا اظہار کرتے ہوئے مطالبہ کیا ہے کہ فائرنگ میں ملوث عناصر کو فوری طور پر گرفتار کیا جائے تاکہ علاقے میں امن قائم رہے اور آئندہ ایسے واقعات کی روک تھام ممکن ہو سکے۔ پولیس نے مقدمہ درج کر کے تحقیقات کا آغاز کر دیا ہے۔

اوچ شریف (باغی ٹی وی، نامہ نگار حبیب خان)دو المناک ٹریفک حادثات، خواتین و بچے سمیت 5 افراد جاں بحق، 3 زخمی

تفصیل کے مطابق ضلع بہاولپور کی تحصیل احمدپور شرقیہ اور تحصیل حاصلپور میں پیش آنے والے دو ہولناک ٹریفک حادثات نے پانچ قیمتی جانیں نگل لیں، جن میں خواتین، بچے اور نوجوان شامل ہیں، جبکہ تین افراد شدید زخمی ہو گئے۔ ریسکیو حکام کے مطابق حادثات کی بنیادی وجوہات تیز رفتاری، اوورٹیکنگ اور غفلت پر مبنی ڈرائیونگ تھیں۔

پہلا حادثہ احمدپور شرقیہ میں چوک بھٹہ روڈ پر موچیاں والی سولنگ کے قریب دو تیز رفتار موٹر سائیکلوں کے آمنے سامنے تصادم سے ایک نوجوان محمد فیروز ولد اللہ وسایا موقع پر ہی جاں بحق ہو گیا۔ حادثے میں تین افراد شدید زخمی ہوئے جن کی شناخت تنویر ولد منیر، محمد فاروق ولد محمد عزیز اور مبین ولد واحد کے طور پر ہوئی۔ تمام زخمیوں اور جاں بحق نوجوان کو تحصیل ہیڈ کوارٹر ہسپتال احمدپور شرقیہ منتقل کر دیا گیا، جہاں زخمیوں کو طبی امداد دی جا رہی ہے۔

دوسرا حادثہ تحصیل حاصلپور میں چشتیاں روڈ پر کاتاریاں چیک پوسٹ کے قریب بہاولنگر سے بہاولپور جانے والی طاہر کوچ (CIL-5033) نے اوورٹیکنگ کے دوران سامنے سے آنے والی موٹر سائیکل کو ٹکر مار دی۔ نتیجے میں بائیک سوار کوچ کے نیچے آ کر موقع پر ہی جاں بحق ہو گئے۔

جاں بحق افراد کی شناخت نسیم مائی زوجہ ارشاد، 50 سال،انور بی بی زوجہ رزاق، 30 سال،حسین ولد یوسف، 8 سال (کم سن بچہ)،بلال احمد ولد رزاق، 24 سال

تمام لاشوں کو THQ ہسپتال حاصلپور منتقل کر کے ضابطے کی کارروائی مکمل کرنے کے بعد لواحقین کے حوالے کر دیا گیا۔ریسکیو 1122 کی ٹیموں نے دونوں حادثات پر بروقت کارروائی کرتے ہوئے زخمیوں کو ابتدائی طبی امداد کے بعد قریبی ہسپتالوں میں منتقل کیا۔

اوچ شریف (باغی ٹی وی، نامہ نگار حبیب خان) دھوڑ کوٹ پولیس نے پنجاب حکومت کی جانب سے لگائی گئی دفعہ 144 کی خلاف ورزی پر کارروائی کرتے ہوئے ایک نوجوان کو دریا میں نہاتے ہوئے گرفتار کر لیا۔

ملزم کی شناخت محمد جمیل ولد شمس الدین، قوم گمب، ساکن موضع بہاولپور گھلواں کے نام سے ہوئی ہے، جو کشتی کے ذریعے دریا کنارے پہنچا اور نہا رہا تھا۔ حکومت پنجاب نے عوامی مقامات، دریاؤں اور نہروں میں نہانے کے ساتھ ساتھ "ون ویلنگ” پر بھی مکمل پابندی عائد کر رکھی ہے۔ اس پابندی کی خلاف ورزی کرنے پر ملزم کے خلاف تعزیراتِ پاکستان کی دفعہ 188 کے تحت مقدمہ درج کر لیا گیا ہے۔

ایس ایچ او تھانہ دھوڑ کوٹ سجاد حسین لغاری نے اس موقع پر کہا کہ عوام کو بارہا دفعہ 144 کے تحت لگائی گئی پابندیوں کی خلاف ورزی کے نتائج سے آگاہ کیا گیا ہے۔ انہوں نے شہریوں سے اپیل کی کہ وہ قانون کی پاسداری کریں اور اپنی اور دوسروں کی زندگیوں کو محفوظ بنائیں۔

اوچ شریف (باغی ٹی وی،نامہ نگارحبیب خان) احمد پور شرقیہ اور اس کے نواحی علاقوں میں پیش آنے والے تین مختلف حادثات میں ایک شخص جاں بحق جبکہ تین افراد زخمی ہو گئے۔

پہلا واقعہ اڈا فیض واہ کے قریب پیش آیا جہاں موٹر رکشہ اچانک ہینڈل جام ہونے سے بے قابو ہو کر الٹ گیا، جس کے نتیجے میں ڈرائیور مہتاب احمد شدید زخمی ہو گیا۔ اسے پیشانی، ہونٹ، بازو، پیٹ اور پاؤں پر چوٹیں آئیں۔ ابتدائی طبی امداد کے بعد اسے ٹی ایچ کیو ہسپتال احمد پور شرقیہ منتقل کر دیا گیا۔ زخمی کا تعلق امیر عالم کالونی سے ہے۔

دوسرا واقعہ نبی پور، احمد پور روڈ پر پیش آیا، جہاں تیز رفتاری کے باعث موٹر سائیکل موڑ کاٹتے ہوئے سڑک کنارے رکھے لکڑی کے پٹھوں سے ٹکرا گئی۔ حادثے میں فوزیہ بی بی اور ان کے بیٹے عبدالہادی زخمی ہوئے۔ فوزیہ بی بی کو سر پر شدید چوٹ آئی اور وہ نیم بیہوشی کی حالت میں ہیں جبکہ عبدالہادی کی ٹھوڑی پر گہرا زخم آیا۔ دونوں کو ٹی ایچ کیو ہسپتال منتقل کر دیا گیا۔

تیسرا اور افسوسناک واقعہ الحسن ٹاؤن میں گٹر کی صفائی کے دوران پیش آیا، جہاں زہریلی گیس کے باعث مزدور فیاض احمد بے ہوش ہو کر گٹر میں گر گیا۔ ریسکیو 1122 نے بروقت کارروائی کرتے ہوئے اسے نکال کر طبی امداد دی تاہم وہ جانبر نہ ہو سکا۔ متوفی کی عمر 40 سال اور رہائش محلہ فٹانی میں تھی۔

عوامی حلقوں نے حادثات کی روک تھام کے لیے مؤثر اقدامات اور حفاظتی انتظامات پر زور دیا ہے۔

اوچ شریف (باغی ٹی وی، نامہ نگار حبیب خان) بہاولپور کے پوش علاقے ڈی ایچ اے میں تیز رفتاری کا ایک اور المناک واقعہ پیش آیا، جہاں تین موٹر سائیکلوں کے تصادم کے نتیجے میں ایک 17 سالہ نوجوان موقع پر جاں بحق جبکہ تین افراد شدید زخمی ہو گئے۔

ریسکیو ذرائع کے مطابق حادثہ اس وقت پیش آیا جب تین موٹر سائیکلوں پر سوار چار نوجوان خطرناک حد تک تیز رفتاری سے ایک دوسرے کے قریب پہنچے اور بےقابو ہو کر آپس میں ٹکرا گئے۔

حادثے کی اطلاع ملتے ہی ڈی ایچ اے کی ایمبولینس فوری طور پر موقع پر پہنچی اور تین زخمیوں کو قریبی ہسپتال منتقل کر دیا۔ اس دوران ریسکیو 1122 بھی جائے وقوعہ پر پہنچ گئی۔ بدقسمتی سے محمد فیضان ولد محمد اسلم جو محلہ 08/BC، پٹھانوں والی بہاولپور کا رہائشی تھا، شدید دماغی چوٹ کے باعث موقع پر ہی دم توڑ گیا۔ متوفی کی عمر 17 سال تھی۔

پولیس کی موجودگی میں ریسکیو عملے نے جائے وقوعہ پر قانونی کارروائی مکمل کی، جس کے بعد نوجوان کی لاش ورثاء کے حوالے کر دی گئی۔ حادثے نے علاقے میں افسوس اور سوگ کی فضا پیدا کر دی ہے

اوچ شریف(باغی ٹی وی ،نامہ نگارحبیب‌خان)بہاولپور اور اوچ شریف میں تیز رفتاری اور لاپروائی کے باعث پیش آنے والے تین الگ الگ ٹریفک حادثات میں ایک 13 سالہ بچہ جاں بحق اور چار افراد زخمی ہو گئے۔ ان واقعات نے علاقے میں ٹریفک قوانین پر عمل درآمد کی ضرورت کو ایک بار پھر اجاگر کر دیا ہے۔

پہلا افسوسناک واقعہ بہاولپور کے حاصل پور روڈ، 7-بی سی کے قریب پیش آیا، جہاں ایک تیز رفتار ہنڈا سٹی کار نے 13 سالہ محمد رضوان ولد فیض احمد کو ٹکر مار دی۔ محمد رضوان، جو 7-بی سی چک کا رہائشی تھا، برف لینے کے بعد سڑک پار کر رہا تھا کہ ڈیرہ بکھا سے بہاولپور کی طرف آنے والی کار کی زد میں آ گیا۔ شدید سر کی چوٹ کے باعث وہ موقع پر ہی جاں بحق ہو گیا۔ ریسکیو ٹیم نے فوری طور پر موقع پر پہنچ کر کارروائی مکمل کی اور بچے کی لاش کو لواحقین کے حوالے کر دیا۔

دوسرا حادثہ اوچ شریف میں سمیع گیلانی کی رہائش گاہ کے قریب پیش آیا، جہاں تیز رفتار موٹر سائیکل بے قابو ہو کر فٹ پاتھ سے جا ٹکرائی۔ اس حادثے میں دو نوجوان، 19 سالہ سلمان ولد عبد الحمید اور 18 سالہ اظہر ولد کرم حسین، شدید زخمی ہو گئے۔ دونوں لاری اڈا احمد پور شرقیہ کے رہائشی ہیں۔ سلمان کو سر پر گہری چوٹیں آئیں اور وہ مسلسل متلی کی شکایت میں مبتلا رہا، جبکہ اظہر کے اوپری اور نچلے ہونٹوں پر گہرے زخم آئے۔ ریسکیو ٹیم نے بروقت کارروائی کرتے ہوئے دونوں زخمیوں کو ابتدائی طبی امداد فراہم کی اور انہیں تشویشناک حالت میں رورل ہیلتھ سینٹر (RHC) اوچ شریف منتقل کر دیا۔ عینی شاہدین نے بتایا کہ موٹر سائیکل کی انتہائی تیز رفتاری اور لاپروائی اس حادثے کی بنیادی وجہ تھی۔

تیسرا حادثہ اوچ شریف کے علی پور روڈ پر للو والی پل کے قریب پیش آیا، جہاں دو موٹر سائیکلیں تیز رفتاری کے باعث آپس میں ٹکرا گئیں۔ اس واقعے میں 35 سالہ محمد فیاض ولد محمد امین اور ان کا 12 سالہ بیٹا محمد معاذ زخمی ہو گئے۔ محمد فیاض، جو اکبر ٹاؤن اوچ شریف کے رہائشی ہیں، کی بائیں ہاتھ کی انگلی میں فریکچر ہوا، جبکہ محمد معاذ کے دائیں گھٹنے پر گہرا زخم آیا۔ ریسکیو ٹیم نے فوری طور پر موقع پر پہنچ کر دونوں کو ابتدائی طبی امداد دی اور بعد میں انہیں RHC اوچ شریف منتقل کیا۔ عینی شاہدین نے اس حادثے کی وجہ بھی موٹر سائیکل سواروں کی غیر محتاط ڈرائیونگ اور تیز رفتاری کو قرار دیا۔

ریسکیو ذرائع نے تمام واقعات میں فوری اور موثر کارروائی کرتے ہوئے زخمیوں کو طبی امداد فراہم کی اور جاں بحق بچے کی لاش کو لواحقین کے حوالے کیا۔ ان حادثات نے علاقے میں ٹریفک قوانین پر سختی سے عمل درآمد کی ضرورت کو واضح کر دیا ہے۔ مقامی لوگوں اور عینی شاہدین نے حکام سے مطالبہ کیا ہے کہ تیز رفتاری اور لاپروائی سے بچنے کے لیے سڑکوں پر ٹریفک قوانین پر عمل درآمد کو یقینی بنایا جائے اور ڈرائیوروں میں شعور اجاگر کیا جائے تاکہ مستقبل میں ایسے المناک واقعات سے بچا جا سکے۔

اوچ شریف (باغی ٹی وی، نامہ نگار حبیب خان) اوچ شریف اور اس کے نواحی علاقے آج دو دل دہلا دینے والے واقعات کی لپیٹ میں رہے جنہوں نے مقامی آبادی کو سوگوار کر دیا۔ ایک جانب تین سالہ معصوم بچی اقرا عباسیہ لنک کینال میں ڈوب کر جاں بحق ہو گئی، تو دوسری طرف موٹروے انٹرچینج کے قریب کار حادثے میں ایک مرد اور بچہ زخمی ہو گئے۔

پہلا واقعہ اوچ شریف روڈ پر واقع عباسیہ لنک (ابو ظہبی) کینال کے کنارے پیش آیا، جہاں تین سالہ بچی اقرا کھیلتے ہوئے نہر میں جا گری۔ نہر کی گہرائی 16 فٹ جبکہ چوڑائی 200 فٹ بتائی گئی ہےاور حادثہ بچی کے گھر سے محض 50 میٹر کے فاصلے پر پیش آیا۔ ریسکیو 1122 کو صبح 5 بج کر 10 منٹ پر اطلاع دی گئی، جس پر واٹر ریسکیو وین، اسکیوبا ڈائیورز اور سات ریسکیورز پر مشتمل ٹیم 16 منٹ کے اندر موقع پر پہنچ گئی۔ کئی گھنٹوں کے ریسکیو آپریشن کے بعد بچی کی لاش قاسم والا بنگلہ (لیاقت پور) کے مقام سے نکال کر لواحقین کے حوالے کی گئی۔ واقعے کے بعد علاقے میں کہرام مچ گیا اور فضا سوگوار ہو گئی۔

دوسرا واقعہ موٹروے ایم فائیو انٹرچینج کے قریب پیش آیا، جہاں لاہور سے رحیم یار خان جانے والی فیملی کی الٹو کار کو ایک تیز رفتار نامعلوم ٹرالر نے ٹکر مار دی۔ حادثے میں کار سوار ایک مرد کے سر پر شدید چوٹ آئی جبکہ ایک بچہ معمولی زخمی ہوا۔ ٹرالر ٹکر مارنے کے بعد موقع سے فرار ہو گیا۔ ریسکیو 1122 کی ٹیم نے موقع پر پہنچ کر ابتدائی طبی امداد دی اور زخمیوں کو تحصیل ہیڈکوارٹر اسپتال احمد پور شرقیہ منتقل کر دیا گیا۔ پولیس نے قانونی کارروائی شروع کر دی ہے اور مفرور ٹرالر ڈرائیور کی تلاش جاری ہے۔

ریسکیو 1122 کی جانب سے دونوں واقعات میں بروقت کارروائی کی گئی، تاہم معصوم اقرا کی جان نہ بچائی جا سکی، جس پر ہر آنکھ اشکبار ہے۔

اوچ شریف (باغی ٹی وی نامہ نگار حبیب خان) اوچ شریف موٹروے روڈ پر بنگلہ مستوئی کے قریب ایک مزدا گاڑی (منی ٹرک نمبر KE-5263) الٹنے کا حادثہ پیش آیا جس میں 7 افراد زخمی ہو گئے۔ حادثہ اس وقت پیش آیا جب گاڑی جانوروں کو لاہور چھوڑ کر واپس رحیم یار خان جا رہی تھی اور ڈرائیور کو نیند آنے کے باعث گاڑی بے قابو ہو گئی۔ گاڑی میں کل 20 افراد سوار تھے۔

ریسکیو 1122 کی ٹیمیں فوری طور پر موقع پر پہنچیں اور زخمیوں کو ابتدائی طبی امداد فراہم کی۔ تین زخمیوں کو موقع پر فرسٹ ایڈ دی گئی جبکہ 4 کو مزید علاج کے لیے آر ایچ سی اوچ شریف منتقل کر دیا گیا۔ خوش قسمتی سے کسی قسم کا جانی نقصان نہیں ہوا اور زخمیوں کی حالت خطرے سے باہر بتائی جا رہی ہے۔

زخمیوں میں ظہور احمد، صادق حسین، ملازم حسین اور فرمان حسین شامل ہیں جو اسپتال منتقل کیے گئے، جبکہ عبد الستار، اکبر اور محمد آصف کو موقع پر طبی امداد دی گئی۔ عینی شاہدین کے مطابق حادثے کی وجہ ڈرائیور کی نیند اور غفلت تھی۔ حادثے کے بعد علاقے میں خوف و ہراس پھیل گیا لیکن ریسکیو ٹیموں کی بروقت کارروائی سے حالات قابو میں آ گئے۔

اوچ شریف (باغی ٹی وی،نامہ نگار حبیب خان) تحصیل یزمان کے نواحی علاقے اڈا 42 ہزار پر لشاری برادری کے دو گروپوں کے درمیان پرانی دشمنی ایک بار پھر خونریز تصادم کی صورت اختیار کر گئی، جس میں ایم بی بی ایس ڈاکٹر شیراز ندیم اور محمد وسیم اجمل فائرنگ سے موقع پر ہی جاں بحق ہو گئے، جبکہ دو دیگر افراد زخمی ہو گئے۔

جاں بحق افراد کی نماز جنازہ ان کے آبائی گاؤں چک 43/DNB میں ادا کی گئی، جس میں رکن قومی اسمبلی چوہدری طارق بشیر چیمہ، رکن صوبائی اسمبلی حسن عسکری شیخ، متعدد سیاسی و سماجی شخصیات، معززین علاقہ اور ہزاروں کی تعداد میں سوگواروں نے شرکت کی۔ واقعے نے سیاسی، سماجی اور طبی حلقوں میں گہرے دکھ اور افسوس کی لہر دوڑا دی ہے۔

مقتول ڈاکٹر شیراز کے والد اور مدعی مقدمہ محمد ندیم خان لشاری — جو خود ایک معروف سیاسی شخصیت ہیں — نے باغی ٹی وی سے گفتگو کرتے ہوئے الزام عائد کیا کہ ان کے قریبی رشتہ دار کلیم اللہ، انعام اللہ، اختر ثانی، محمد احمد سلامت اور عطا اللہ نے پرانی دشمنی کی بنیاد پر گھات لگا کر مسلح حملہ کیا۔ انہوں نے بتایا کہ فائرنگ کے نتیجے میں ان کے بیٹے ڈاکٹر شیراز ندیم اور وسیم اجمل موقع پر دم توڑ گئے جبکہ اسد اجمل کو سینے میں دو گولیاں لگیں اور شہزاد لشاری بھی زخمی ہوا۔

پولیس تھانہ ڈیرہ نواب صاحب اطلاع ملنے پر فوری موقع پر پہنچی اور لاشوں و زخمیوں کو سول ہسپتال احمد پور منتقل کیا۔ مدعی کی درخواست پر مقدمہ نمبر 261/25 بجرم 302، 324 درج کر لیا گیا ہے۔ پولیس کا کہنا ہے کہ ملزمان کی گرفتاری کے لیے مختلف مقامات پر چھاپے مارے جا رہے ہیں تاہم تاحال کوئی گرفتاری عمل میں نہیں آ سکی۔

واقعے کے بعد علاقے میں شدید خوف و ہراس پھیل گیا ہے جبکہ مقتولین کے اہل خانہ اور قریبی عزیز غم اور انصاف کے حصول کی جدوجہد میں مبتلا ہیں۔ سیاسی و سماجی حلقوں نے حکومت سے مطالبہ کیا ہے کہ قاتلوں کو فوری گرفتار کر کے قرار واقعی سزا دی جائے تاکہ آئندہ ایسے اندوہناک واقعات سے بچا جا سکے۔

اوچ شریف (باغی ٹی وی،نامہ نگار حبیب خان) احمد پور شرقیہ کے نواحی علاقے موضع کوٹلہ سلطان احمد کے 85 سالہ بزرگ شہری میر خاں نے میڈیا سے گفتگو میں سنگین الزامات عائد کرتے ہوئے کہا ہے کہ بعض بااثر افراد ان پر جھوٹے الزامات لگا رہے ہیں اور جائیداد کے تنازع پر انہیں قتل کی دھمکیاں دے رہے ہیں۔ انہوں نے وزیر اعلیٰ پنجاب مریم نواز، آئی جی پنجاب اور دیگر اعلیٰ حکام سے اپیل کی ہے کہ انہیں اور ان کے اہل خانہ کو فوری تحفظ فراہم کیا جائے۔

میر خاں نے اپنی فریاد میں کہا کہ ان کی بہن زینب الہیٰ کی شادی 1952 میں نہال خان سے ہوئی تھی، جنہوں نے اپنی زندگی میں انہیں طلاق نہیں دی۔ تاہم، اب مخالفین اسلم، اکرم، بشیر، اللہ بچایا اور دیگر افراد جعلی طلاق نامہ تیار کر کے میر خاں کی بہن کی ملکیت پر قبضہ جمانا چاہتے ہیں۔ انہوں نے بتایا کہ 30 جون 2007 کو انہوں نے یونین کونسل کوٹلہ موسیٰ خان سے باقاعدہ تحریری طور پر استفسار کیا تھا کہ کیا زینب الہیٰ کے متعلق کوئی طلاق نامہ جمع ہے؟ جواب میں یونین کونسل نے تصدیق کی کہ ایسی کوئی دستاویز ریکارڈ میں موجود نہیں۔

میر خاں نے مزید بتایا کہ ان کے بہنوئی نہال خان 2005 میں اور بہن زینب الہیٰ 2014 میں انتقال کر گئیں۔ نہال خان نے اپنی زندگی میں زینب الہیٰ کو شرعی حصہ یعنی سولہواں (1/16) حصہ دیا تھا۔ بعدازاں، زینب الہیٰ نے چار کنال چھ مرلے کا رقبہ اپنی مرضی سے میر خاں کو فروخت کیا۔

ان کا کہنا تھا کہ اب اس جائیداد کو بنیاد بنا کر انہیں جان سے مارنے کی دھمکیاں دی جا رہی ہیں، جس پر وہ شدید خوف اور عدم تحفظ کا شکار ہیں۔ میر خاں نے اپیل کی کہ انہیں انصاف دیا جائے، جعلسازی کی تحقیقات کرائی جائیں اور جانی تحفظ فراہم کیا جائے تاکہ وہ اپنی باقی زندگی سکون سے گزار سکیں۔