Category: بہاولپور

اوچ شریف( باغی ٹی وی، نامہ نگار حبیب خان)عیدالاضحیٰ کے موقع پر تھانہ اوچ شریف کے ایس ایچ اوسجاد حسین سندھو اور تھانہ دھوڑکوٹ کےایس ایچ او سجاد حسین لغاری نے مشترکہ پریس بیان میں شہریوں سے پرزور اپیل کی ہے کہ خوشیوں کے اس موقع پر نوجوان ون ویلنگ جیسے خطرناک اور غیر قانونی کھیل سے مکمل گریز کریں۔

پولیس افسران نے خبردار کیا کہ ون ویلنگ نہ صرف خود نوجوانوں کی زندگی کے لیے خطرہ ہے بلکہ سڑکوں پر چلنے والے دیگر راہگیروں کی جانوں کو بھی شدید خطرات لاحق ہو سکتے ہیں۔ انہوں نے والدین سے اپیل کی کہ وہ اپنے بچوں پر نظر رکھیں اور انہیں ایسے جان لیوا مشاغل سے روکیں۔

پریس بیان میں کہا گیا ہے کہ عید کے دوران شہر کے مختلف علاقوں میں پولیس کی جانب سے سخت نگرانی کی جائے گی، اور ون ویلنگ میں ملوث افراد کے خلاف فوری قانونی کارروائی کی جائے گی۔ افسران نے واضح کیا کہ قانون شکنی پر زیرو ٹالرنس کی پالیسی اپنائی گئی ہے۔

آخر میں پولیس نے عوام سے بھرپور تعاون کی اپیل کرتے ہوئے کہا کہ عید خوشی، امن اور بھائی چارے کا پیغام دیتی ہے، لہٰذا قانون کی پاسداری کرتے ہوئے سب کی جان و مال کے تحفظ کو یقینی بنایا جائے۔

اوچ شریف(باغی ٹی وی ،نامہ نگارحبیب خان) شہر میں پانچ ہزار روپے کے جعلی نوٹوں کی یلغار، تاجر پریشان، قانون نافذ کرنے والے ادارے خاموش

اوچ شریف میں عیدالاضحیٰ کی آمد کے ساتھ ہی جعلی کرنسی مافیا سرگرم ہو گیا ہے۔ بازاروں میں پانچ ہزار روپے مالیت کے جعلی نوٹ کھلے عام گردش کر رہے ہیں، جس سے تاجروں، دکانداروں اور شہریوں میں شدید تشویش پھیل چکی ہے۔ مقامی تاجروں کے مطابق یہ جعلی نوٹ اس قدر مہارت سے تیار کیے گئے ہیں کہ اصلی اور نقلی میں فرق کرنا مشکل ہو گیا ہے۔

خریداروں کے رش اور کاروباری مصروفیات کے باعث دکاندار نوٹ چیک کرنے سے قاصر رہتے ہیں، جس کا فائدہ اٹھاتے ہوئے جعل ساز سرگرم عمل ہیں۔ صرف چند روز میں متعدد دکانداروں کو ہزاروں روپے کے نقصان کا سامنا کرنا پڑا ہے۔

مارکیٹ ذرائع کے مطابق، گردش میں موجود جعلی نوٹ نہایت اعلیٰ معیار کے کاغذ اور پرنٹنگ کے ساتھ بنائے گئے ہیں۔ ان میں واٹر مارک، سیکیورٹی تھریڈ اور دیگر حفاظتی علامات کی اس قدر حقیقی نقالی کی گئی ہے کہ عام آنکھ یا حتیٰ کہ نوٹ چیکنگ مشین کے بغیر پہچاننا دشوار ہو گیا ہے۔

شہریوں اور تاجروں نے ڈی پی او بہاولپور اور آر پی او بہاولپور سے فوری نوٹس لینے کا مطالبہ کیا ہے۔ ان کا کہنا ہے کہ اگر بروقت کارروائی عمل میں نہ لائی گئی تو یہ مافیا مزید پھیل جائے گا، جس کے منفی اثرات مقامی معیشت پر بھی مرتب ہوں گے۔ تاجر برادری نے حکومت سے بینکوں میں تربیتی کیمپ اور جعلی نوٹوں کی پہچان سے متعلق عوامی آگاہی مہم شروع کرنے کا مطالبہ بھی کیا ہے۔

اوچ شریف (باغی ٹی وی،نامہ نگارحبیب خان) اڈا 42 ہزار لاشاری پٹرول پمپ پر رشتہ داروں کے درمیان خونی جھگڑا، ایم این اے چوہدری طارق بشیر چیمہ کے بااعتماد ساتھی حاجی ندیم خان لاشاری کا نوجوان بیٹا ڈاکٹر شیراز خان اور بھائی وسیم خان فائرنگ سے جاں بحق، تین افراد شدید زخمی ہو گئے۔

تفصیلات کے مطابق معمولی رنجش پر شروع ہونے والا تنازعہ جان لیوا تصادم میں بدل گیا۔ اڈا 42 ہزار پر واقع لاشاری پٹرول پمپ پر حاجی ندیم خان لاشاری بلوچ کے کزنوں کے بیٹوں نے فائرنگ کر کے ان کے صاحبزادے ڈاکٹر شیراز خان — جو حال ہی میں ڈاکٹری کی تعلیم مکمل کر چکے تھے — اور بھائی وسیم خان کو موقع پر ہی قتل کر دیا۔
فائرنگ کے نتیجے میں حاجی ندیم خان لاشاری کے دوسرے بیٹے شہزاد لاشاری، بھائی اسد لاشاری اور بھانجا سجاد خان لاشاری شدید زخمی ہو گئے، جنہیں تشویشناک حالت میں بہاولپور وکٹوریہ اسپتال ریفر کیا گیا، جہاں ڈاکٹروں کی ٹیم ان کا علاج کر رہی ہے۔

واقعہ کی اطلاع پر احمد پور شرقیہ اور یزمان تھانوں کی بھاری نفری موقع پر پہنچ گئی، جبکہ مقتولین کی لاشوں کو پوسٹ مارٹم کے لیے سول اسپتال احمد پور شرقیہ منتقل کیا گیا۔ پولیس نے حاجی ندیم خان لاشاری کی مدعیت میں مقدمہ درج کر کے قانونی کارروائی شروع کر دی ہے۔

ذرائع کے مطابق واقعہ کی بنیاد گزشتہ روز ہونے والا ایک معمولی جھگڑا تھا، جس نے خونریز رخ اختیار کر لیا۔ پولیس عینی شاہدین اور مقتولین کے لواحقین سے معلومات اکٹھی کر رہی ہے، جبکہ علاقے میں خوف و ہراس پھیل گیا ہے۔

اوچ شریف (باغی ٹی وی،نامہ نگارحبیب خان) احمد پور شرقیہ میں معمولی تلخ کلامی پر جان لیوا جھگڑا خونریزی میں بدل گیا، تھانہ ڈیرہ نواب صاحب کی حدود میں مخالفین کی فائرنگ سے چچا اور بھتیجا موقع پر جاں بحق جبکہ دو افراد زخمی ہو گئے۔ افسوسناک واقعہ اس وقت پیش آیا جب معمولی بات پر دونوں فریقین میں تلخ کلامی شروع ہوئی جو شدت اختیار کر گئی۔ اسی دوران مخالفین نے اسلحہ نکال کر اندھا دھند فائرنگ کر دی، جس کے نتیجے میں چچا اور بھتیجا موقع پر دم توڑ گئے جبکہ دو راہگیر گولی لگنے سے زخمی ہو گئے۔
اطلاع ملنے پر پولیس فوری طور پر موقع پر پہنچ گئی، شواہد اکٹھے کیے اور لاشوں کو پوسٹ مارٹم جبکہ زخمیوں کو علاج کے لیے مقامی ہسپتال منتقل کر دیا گیا۔ پولیس نے مقدمہ درج کر کے ملزمان کی گرفتاری کے لیے مختلف مقامات پر چھاپے مارنے شروع کر دیے ہیں۔ واقعے نے علاقے میں خوف و ہراس پھیلا دیا ہے جبکہ مقتولین کے لواحقین نے انصاف کی فراہمی کا مطالبہ کیا ہے۔

اوچ شریف (باغی ٹی وی، نامہ نگار حبیب خان) اوچ شریف اور گردونواح میں مویشیوں کے سینگ (سنگ) نکلوانے کے لیے غیر تربیت یافتہ کاریگروں کا استعمال خطرناک حد تک بڑھ گیا ہے، جس سے جانوروں کی جان کو شدید خطرات لاحق ہیں۔ لوہے کے گرم راڈ، زنگ آلود چاقو، آری اور ہتھوڑے جیسے غیر معیاری اوزاروں کے استعمال سے جانور شدید زخمی ہو رہے ہیں، بیمار پڑ رہے ہیں، اور کئی تو اپنی جان سے بھی ہاتھ دھو رہے ہیں۔

مقامی ذرائع کے مطابق مویشی پال حضرات سستی اور فوری سہولت کی تلاش میں ایسے اناڑی کاریگروں کی خدمات حاصل کر رہے ہیں جو جانوروں پر ظلم کا بازار گرم کر رہے ہیں۔ اس غیر سائنسی عمل کے نتیجے میں جانوروں کے زخم گل جاتے ہیں، شدید خون بہتا ہے، انفیکشن پھیلتا ہے اور کئی صورتوں میں جانور موت کے منہ میں چلے جاتے ہیں۔

ویٹرنری ڈاکٹر اجمل نے واضح کیا ہے کہ سینگ نکلوانا ایک جراحی عمل ہے، جس میں جانور کو درد سے بچانے کے لیے اینستھیزیا دینا انتہائی ضروری ہے۔ انہوں نے مزید بتایا کہ صفائی ستھرائی کے بغیر زخموں کا کھلنا جانوروں کو جان لیوا انفیکشن میں مبتلا کر سکتا ہے۔

مقامی کسان غلام شبیر نے بتایا کہ غیر تربیت یافتہ کاریگر کے ہاتھوں ان کی گائے زخمی ہو گئی اور اس نے دودھ دینا بند کر دیا۔ اس صورتحال نے انہیں بھاری مالی نقصان سے دوچار کیا ہے۔

افسوسناک بات یہ ہے کہ لائیو اسٹاک ڈیپارٹمنٹ کی جانب سے اب تک نہ تو کوئی آگاہی مہم چلائی گئی ہے اور نہ ہی ایسے غیر تربیت یافتہ کاریگروں کے خلاف کوئی کارروائی کی گئی ہے۔ اس عدم توجہی پر عوامی اور ماہرین دونوں حلقوں میں شدید تشویش پائی جاتی ہے۔

شہری اور ماہرین ڈپٹی کمشنر بہاولپور ڈاکٹر فرحان فاروق سے پرزور مطالبہ کرتے ہیں کہ فوری طور پر ویٹرنری خدمات کو دیہی علاقوں تک پہنچایا جائے، عوام میں شعور بیدار کیا جائے، اور غیر تربیت یافتہ افراد کی جانب سے جانوروں کے سینگ نکالنے پر سخت پابندیاں عائد کی جائیں تاکہ معصوم جانوروں کی فلاح و بہبود کو یقینی بنایا جا سکے۔

اوچ شریف (باغی ٹی وی، نامہ نگار حبیب خان) احمد پور شرقیہ کے علاقے چوک منیر شہید کے قریب ایک نشئی شخص کی لاش برآمد ہوئی۔ ریسکیو 1122 ذرائع کے مطابق متوفی کی شناخت 28 سالہ سلمان ولد محمد سراج کے نام سے ہوئی، جو محلہ اسلام پور، احمد پور شرقیہ کا رہائشی تھا۔

اطلاع ملنے پر ریسکیو ٹیم موقع پر پہنچی، تاہم پہنچنے پر معلوم ہوا کہ مذکورہ شخص پہلے ہی جاں بحق ہو چکا تھا۔ ابتدائی مشاہدے میں لاش پر کسی قسم کے زخم یا پرتشدد کارروائی کے آثار نہیں ملے۔

ریسکیو ذرائع کے مطابق جب لاش کو اسپتال منتقل کرنے کی کوشش کی گئی تو لواحقین نے اسے اسپتال لے جانے سے انکار کر دیا، جس پر تمام قانونی کارروائی مکمل کرنے کے بعد لاش لواحقین کے حوالے کر دی گئی۔

رحیم یارخان،بہاولپور(باغی ٹی وی)غربت کے زخم، عید کے کپڑے نہ ملے، بھوک سے جان گئی، دو شہروں کی دو دردناک داستانیں

رحیم یار خان اور بہاولپور میں غربت اور بھوک نے دو الگ خاندانوں کو نگل لیا، جہاں ایک جانب عید کے کپڑے مانگنے پر مجبور باپ نے تین بچوں سمیت زہریلی گولیاں کھا لیں، وہیں دوسری طرف کئی روز کی فاقہ کشی نے ایک بزرگ خاتون کی جان لے لی۔

رحیم یار خان کی تحصیل رکن پور کے علاقے سردار گڑھ بستی حاجی پیر میں یہ دل دہلا دینے والا واقعہ پیش آیا، جہاں ایک محنت کش باپ نے دو معذور بیٹوں اور ایک بیٹی کو زہریلی گولیاں کھلائیں اور خود بھی زندگی ختم کرلی۔ ترجمان شیخ زید اسپتال کے مطابق دو بیٹے اور باپ موقع پر ہی دم توڑ گئے، جب کہ بیٹی کی حالت اب خطرے سے باہر ہے۔ پولیس کے مطابق باپ ٹریکٹر ٹرالی چلا کر روزی کماتا تھا لیکن کئی دنوں سے بے روزگار اور شدید پریشان تھا۔ اہل علاقہ کے مطابق عید قریب آتے ہی بچوں نے جب کپڑوں کا مطالبہ کیا تو غربت کے ہاتھوں مجبور باپ نے یہ انتہائی قدم اٹھا لیا۔

ادھر بہاولپور کے علاقے لوہار والی گلی میں بھوک کی شکار دو بزرگ بہنیں بے ہوشی کی حالت میں پائی گئیں۔ ریسکیو ذرائع کے مطابق اطلاع ملنے پر موقع پر پہنچے تو ایک خاتون دم توڑ چکی تھیں جبکہ دوسری کو تشویشناک حالت میں اسپتال منتقل کیا گیا۔ بچ جانے والی بہن نے بتایا کہ وہ دونوں کئی دنوں سے فاقہ کشی کا شکار تھیں۔ اہل محلہ کے مطابق دونوں بہنیں غیر شادی شدہ تھیں، گھر میں تنہا رہتی تھیں اور ان کا اکلوتا بھائی بھی کئی سالوں سے لاپتا ہے۔

دونوں واقعات نے یہ سنگین سوال اٹھا دیا ہے کہ مہنگائی، بے روزگاری اور معاشرتی بے حسی کے اس دور میں ہمارا فلاحی نظام کہاں کھڑا ہے؟ عید کے کپڑوں کی خواہش یا روٹی کی طلب کیا واقعی موت کی قیمت پر پوری ہونی چاہیے؟