اوچ شریف (باغی ٹی وی نامہ نگار حبیب خان) عید قربان قریب آتے ہی اوچ شریف اور گرد و نواح کے بازاروں میں چھری، چاقو، ٹوکے اور بغدے کی مانگ میں زبردست اضافہ ہو گیا ہے۔ قصائیوں اور عام شہریوں کی طرف سے قربانی کے جانور ذبح کرنے کے لیے اوزاروں کی خریداری زوروں پر ہے، جس سے لوہاروں کی چاندی ہو گئی ہے۔
لوہاروں کی دکانوں پر دن رات کام جاری ہے۔ بھٹیوں کی آگ، ہتھوڑوں کی گونج اور لوہے کی چمک نے دکانوں کو ورکشاپس میں بدل دیا ہے۔ کاریگر پرانے اوزاروں کو تیز بھی کر رہے ہیں اور نئے اوزار بھی تیار ہو رہے ہیں۔
دکانداروں کے مطابق اس سال چاقو، چھری اور ٹوکے کی قیمتوں میں نمایاں اضافہ ہوا ہے۔ جو چھری پچھلے سال 300 روپے میں ملتی تھی، وہ اس سال 1000 روپے سے اوپر جا چکی ہے۔ بغدے اور بڑے ٹوکے 2500 سے 4000 روپے میں فروخت ہو رہے ہیں۔
خریداروں کا کہنا ہے کہ مہنگائی نے قربانی کے اخراجات بڑھا دیے ہیں۔ اوزاروں کے دام سن کر کئی لوگ گھبرا جاتے ہیں لیکن مجبوری یہ ہے کہ قربانی کے لیے اچھے اوزار تو لینے ہی پڑتے ہیں۔ کچھ شہریوں نے شکایت کی کہ چائنا کے بنے ہوئے اوزار صرف خوبصورت دکھتے ہیں، مگر جلد کند ہو جاتے ہیں، اس لیے مقامی لوہاروں کے ہاتھ سے بنے اوزار ہی قابل بھروسہ ہیں۔
دوسری طرف لوہاروں کا کہنا ہے کہ خام مال، کوئلہ، بجلی اور دکانوں کے کرایوں میں بے تحاشہ اضافہ ہو چکا ہے، جس کا اثر اوزاروں کی قیمتوں پر پڑا ہے۔ ان کے مطابق یہ کام صرف عید کے چند دنوں کا ہوتا ہے، باقی سال مشکل سے گزارا ہوتا ہے۔
عید قربان کی تیاریوں میں جہاں جانوروں کی خریداری زوروں پر ہے، وہیں چھری، چاقو، ٹوکا اور بغدہ بنانے والوں کے ہاں بھی خوب رونق ہے۔
