Category: بہاولپور

اوچ شریف (باغی ٹی وی، نامہ نگار حبیب خان) تھانہ دھوڑکوٹ کی حدود میں جلالپور پولیس کی جانب سے موضع بیٹ لنگاہ میں محنت کش خاندانوں کے گھروں پر مبینہ طور پر دھاوا بولنے، چادر و چار دیواری کا تقدس پامال کرنے اور گھریلو سامان اٹھا لے جانے کے سنگین الزامات سامنے آئے ہیں۔ متاثرہ افراد نے لاہور ہائیکورٹ بہاولپور بنچ سے رجوع کرتے ہوئے مؤقف اختیار کیا ہے کہ پولیس کی اس غیر قانونی کارروائی نے ان کی زندگیوں میں خوف و ہراس پھیلا دیا۔

پٹیشن گزار بلال ڈاہڑ، اعظم ڈاہڑ، راجو ڈاہڑ، امیر بخش ڈاہڑ و دیگر کے مطابق درجنوں اہلکار، جن میں بعض وردی اور بعض سادہ لباس میں تھے، پانچ سے چھ پولیس گاڑیوں پر سوار ہو کر بلا اجازت ان کے گھروں میں داخل ہوئے، بغیر سرچ وارنٹ کارروائی کی، قیمتی سامان الٹ پلٹ کر لے گئے اور دیگر اشیاء کو بھی نقصان پہنچایا۔ خواتین و بچوں کے سامنے توڑ پھوڑ کی گئی، نازیبا زبان استعمال کی گئی، جبکہ چیخ و پکار کے باوجود اہلکار باز نہ آئے۔

متاثرہ شہریوں کا کہنا ہے کہ "پولیس نے جس انداز سے گھروں پر دھاوا بولا، ایسا محسوس ہوا جیسے بھارتی فوج نے حملہ کر دیا ہو۔” واقعے کی ویڈیوز میں ٹوٹی چارپائیاں، بکھرا ہوا سامان اور تباہ شدہ اشیاء واضح دیکھی جا سکتی ہیں۔

متاثرین نے عدالت سے استدعا کی ہے کہ نہ صرف پولیس اہلکاروں کے خلاف قانونی کارروائی کی جائے بلکہ سامان کی واپسی، مزید ہراسانی و جھوٹے مقدمات سے تحفظ اور واقعے کی شفاف انکوائری بھی یقینی بنائی جائے۔ واقعے کے بعد علاقے میں شدید بےچینی پائی جاتی ہے، جبکہ سول سوسائٹی اور انسانی حقوق کی تنظیموں نے بھی پولیس کے اس اقدام کی سخت مذمت کی ہے۔ ان کا کہنا ہے کہ اگر قانون کے محافظ خود قانون شکن بن جائیں تو عوام کے لیے عدل و انصاف کا تصور بھی باقی نہیں رہتا۔

اوچ شریف (باغی ٹی وی، نامہ نگار حبیب خان) اوچ شریف کے محلہ بخاری میں گھریلو تنازع پر ایک نوجوان نے مبینہ طور پر زہریلی گولیاں نگل کر اپنی زندگی کا خاتمہ کر لیا۔ متوفی کی شناخت محمد ثاقب ولد امداد حسین کے طور پر ہوئی ہے جو محلہ بخاری اوچ شریف کا رہائشی تھا۔

اہل خانہ کے مطابق، نوجوان گھریلو مسائل کے باعث شدید ذہنی دباؤ میں مبتلا تھا، جس کے باعث اس نے گندم میں رکھی جانے والی زہریلی گولیاں کھا کر خودکشی کر لی۔ واقعہ کی اطلاع پر ریسکیو 1122 کی ٹیم موقع پر پہنچی اور متاثرہ شخص کو فوری ابتدائی طبی امداد فراہم کی گئی، تاہم حالت تشویشناک ہونے کے باعث اُسے رورل ہیلتھ سینٹر (RHC) اوچ شریف منتقل کیا گیا، جہاں وہ جانبر نہ ہو سکا۔

واقعے کے بعد علاقے میں افسوس کی فضا چھا گئی، جبکہ مقامی پولیس نے معاملے کی تفتیش شروع کر دی ہے۔

اوچ شریف (باغی ٹی وی، نامہ نگار حبیب خان) بہاولپور کے نواحی علاقے مسافر خانہ میں ایک اندوہناک قتل کا واقعہ سامنے آیا ہے، جہاں 38 سالہ خاتون رضیہ بانو زوجہ محمد ہاشم کو مبینہ طور پر سر پر تیز دھار آلے کے وار سے بے دردی سے قتل کر دیا گیا۔ اس افسوسناک واقعے کے بعد علاقے میں خوف و ہراس کی فضا قائم ہے جبکہ پولیس اور دیگر متعلقہ ادارے حرکت میں آ چکے ہیں۔

ریسکیو 1122 کو ایک شہری کی جانب سے اطلاع دی گئی کہ ایک خاتون کی ناک سے خون بہہ رہا ہے اور اس کی حالت تشویشناک ہے۔ ریسکیو ٹیم فوری طور پر روانہ ہوئی، مگر اس دوران لواحقین زخمی خاتون کو ایک رکشے پر خود لے کر آ گئے۔ ریسکیو اہلکاروں نے موقع پر ہی طبی معائنہ کیا، جس میں یہ انکشاف ہوا کہ خاتون جانبر نہ ہو سکی تھیں۔ ان کے تمام وائیٹل سائنز ختم ہو چکے تھے اور سر کے اوپری حصے، پیریٹل ریجن، پر تیز دھار آلے سے لگنے والا گہرا زخم موجود تھا، جس سے واضح ہوا کہ یہ ایک پرتشدد حملہ تھا۔

ریسکیو ذرائع کے مطابق خاتون کی موت ایک سے دو گھنٹے قبل واقع ہو چکی تھی۔ جب ریسکیو عملے نے لواحقین سے وقوعے کی تفصیل جاننے کی کوشش کی تو اُنہوں نے لاعلمی کا اظہار کیا اور بتایا کہ وہ سب سوئے ہوئے تھے، اور کسی نامعلوم شخص نے خاتون کو قتل کر کے فرار ہو گیا۔ اُن کا مؤقف تھا کہ وہ صرف یہ معلوم کرنا چاہتے تھے کہ خاتون زندہ ہیں یا نہیں۔

ریسکیو کنٹرول روم نے واقعے کی سنگینی کو مدنظر رکھتے ہوئے پولیس کو فوری طور پر مطلع کیا تاکہ قانونی کارروائی شروع کی جا سکے، مگر اس کے باوجود لواحقین لاش کو کسی کارروائی کے بغیر ہی واپس گھر لے گئے۔ پولیس نے واقعے کی تحقیقات شروع کر دی ہیں اور مختلف پہلوؤں سے معاملے کا جائزہ لیا جا رہا ہے۔

ذرائع کے مطابق پولیس مقتولہ کے شوہر، اہل خانہ اور قریبی افراد سے تفتیش کر رہی ہے اور فرانزک شواہد اکٹھے کیے جا رہے ہیں۔ علاقہ مکینوں کا مطالبہ ہے کہ قاتل کو جلد از جلد گرفتار کر کے کیفرِ کردار تک پہنچایا جائے۔

اوچ شریف (باغی ٹی وی، نامہ نگار حبیب خان) نواحی علاقے بستی مقبول آرائیں میں دن دہاڑے ہونے والی مسلح ڈکیتی کی واردات نے علاقے میں خوف و ہراس کی فضا قائم کر دی۔ واردات اس وقت پیش آئی جب کوک وین کا عملہ معمول کے مطابق مشروبات کی ترسیل میں مصروف تھا۔

دو نامعلوم مسلح افراد، جو نقاب پہنے موٹر سائیکل پر سوار تھے، اچانک موقع پر پہنچے اور اسلحے کے زور پر عملے کو یرغمال بنا کر تقریباً 40 ہزار روپے نقدی اور دو قیمتی موبائل فونز لوٹ کر فرار ہو گئے۔

متاثرہ ڈرائیور محمد ساجد نے میڈیا کو بتایا کہ ملزمان نہایت منظم، تربیت یافتہ اور جدید اسلحے سے لیس تھے، جنہوں نے چند لمحوں میں پوری واردات مکمل کر کے فرار ہونے میں کامیابی حاصل کی۔ ان کے مطابق نقاب کی وجہ سے ڈاکوؤں کی شناخت ممکن نہیں ہو سکی۔

واقعے کی اطلاع ملتے ہی مقامی پولیس موقع پر پہنچی، شواہد اکٹھے کیے اور علاقے کی ناکہ بندی کر کے سرچ آپریشن شروع کر دیا۔ پولیس حکام کا کہنا ہے کہ ملزمان کی تلاش جاری ہے اور جلد گرفتاری کی توقع ہے۔

دوسری جانب شہریوں نے واقعے پر شدید ردعمل ظاہر کرتے ہوئے کہا کہ دن دیہاڑے ہونے والی یہ واردات سیکیورٹی اداروں کی کارکردگی پر سوالیہ نشان ہے۔ مقامی مکینوں نے مطالبہ کیا ہے کہ ملزمان کو فوری گرفتار کر کے نشان عبرت بنایا جائے تاکہ ایسے جرائم کا سدباب ہو سکے۔

اوچ شریف (باغی ٹی وی، نامہ نگار حبیب خان) دریائے ستلج پر واقع تاریخی بیٹ لنگاہ پل شدید خستہ حالی کا شکار ہو چکا ہے، جس کے باعث علاقے کے ہزاروں مکین آمد و رفت کے بنیادی حق سے محروم ہو چکے ہیں۔ عوامی شکایات کے باوجود کئی برسوں سے اس پل کی مرمت یا ازسر نو تعمیر کی جانب کوئی عملی قدم نہیں اٹھایا گیا، جس پر شہریوں اور دیہی علاقوں کے رہائشیوں نے شدید احتجاج اور فوری نوٹس کا مطالبہ کیا ہے۔

پل کے متعدد تختے اور لکڑیاں ٹوٹ پھوٹ چکی ہیں، جبکہ مقامی افراد کے مطابق حالیہ دنوں میں نامعلوم افراد کی جانب سے پل کے بعض حصے چرا لیے گئے، جس سے پیدل چلنے والوں تک کے لیے گزرنا جان جوکھوں کا کام بن گیا ہے۔ نہ صرف موٹر سائیکل، رکشہ یا ٹریکٹر جیسی سواریوں کا گزرنا ممکن نہیں رہا بلکہ اسکول جانے والے بچے، بزرگ، مریض اور خواتین سب شدید متاثر ہو رہے ہیں۔

بیٹ لنگاہ پل، احمدپور شرقیہ کے ساتھ ساتھ قریبی دیہات کو اوچ شریف اور دیگر شہری مراکز سے ملانے والا واحد اور اہم ذریعہ ہے۔ پل کے غیر فعال ہونے کی وجہ سے اب لوگوں کو دریائے ستلج کے پار جانے کے لیے طویل راستے اختیار کرنا پڑتے ہیں، جس سے وقت اور پیسے دونوں کا ضیاع ہو رہا ہے۔

مقامی دیہاتیوں اور شہریوں کا کہنا ہے کہ بیٹ لنگاہ پل صرف لکڑی کے تختوں سے تعمیر کردہ ایک عارضی ڈھانچہ رہ گیا ہے جو کسی بھی وقت بڑے حادثے کا باعث بن سکتا ہے۔ عوامی حلقے حکومتِ پنجاب، محکمہ ہائی وے، محکمہ انہار اور ضلعی انتظامیہ بہاولپور سے اپیل کرتے ہیں کہ وہ فوری طور پر پل کی حالت کا نوٹس لیں اور اس کی فوری مرمت یا ازسرنو تعمیر کا کام شروع کریں۔

شہریوں نے منتخب نمائندوں، بالخصوص ایم این اے، ایم پی اے، اور ڈپٹی کمشنر بہاولپور سے پرزور مطالبہ کیا ہے کہ وہ زمینی حقائق کا خود مشاہدہ کریں اور اس اہم پل کو علاقائی ترقی اور عوامی فلاح کے تناظر میں ترجیحی بنیادوں پر بحال کریں۔ یہ پل صرف ایک گزرگاہ نہیں بلکہ ہزاروں لوگوں کے روزمرہ کے مسائل، تعلیم، صحت اور تجارت سے جڑی معاشی زندگی کا بنیادی سہارا ہے۔

اگر بیٹ لنگاہ پل کی فوری بحالی نہ کی گئی تو عوام شدید احتجاج پر مجبور ہوں گے۔