Category: بہاولپور

اوچ شریف (باغی ٹی وی، نامہ نگار حبیب خان) اوچ شریف کے نواحی گاؤں محمود ماتم بستی چوہدری ہدایت علی میں افسوسناک واقعہ پیش آیا جہاں دو معصوم بھائی عباسیہ لنک کینال میں ڈوب کر جاں بحق ہو گئے۔ جاں بحق بچوں کی شناخت 6 سالہ محمد جنید عثمان اور 4 سالہ محمد جمشید عثمان کے طور پر ہوئی ہے، جو چوہدری ارشد علی سندھو کے بھتیجے اور ڈاکٹر محمد عثمان کے جگر گوشے تھے۔

دونوں بھائی نہر کے کنارے کھیلتے ہوئے اچانک پانی میں جا گرے، جس کے بعد علاقے میں کہرام مچ گیا۔ اہل علاقہ نے فوری طور پر اپنی مدد آپ کے تحت تلاش شروع کی، جو کئی گھنٹوں تک جاری رہی۔ بالآخر جاگیر والی پل کے قریب دونوں بچوں کی لاشیں برآمد کی گئیں۔ لاشوں کی برآمدگی کے وقت ہر آنکھ اشکبار اور فضا سوگوار ہو گئی۔

نماز جنازہ میں علاقے بھر سے لوگوں کی بڑی تعداد نے شرکت کی۔ جنازے کے دوران سسکیاں گونجتی رہیں اور ہر شخص غم سے نڈھال دکھائی دیا۔ پورا گاؤں اس المیے پر گہرے سوگ میں ڈوبا ہوا ہے۔ دو پھول جیسے بچوں کا یوں اچانک مرجھا جانا نہ صرف اہل خانہ بلکہ پورے علاقے کے لیے ناقابلِ برداشت صدمہ ہے۔

یہ المناک سانحہ ایک لمحہ فکریہ ہے جو اس بات کا تقاضا کرتا ہے کہ نہروں، نالوں اور خطرناک مقامات کے قریب حفاظتی اقدامات کو یقینی بنایا جائے تاکہ آئندہ ایسے دل دہلا دینے والے واقعات سے بچا جا سکے۔

اوچ شریف (باغی ٹی وی، نامہ نگار: حبیب خان)ڈائریکٹر جنرل پنجاب فوڈ اتھارٹی محمد عاصم جاوید کی خصوصی ہدایت پر احمدپور شرقیہ کے علاقے محراب والا میں خوراک کے معیار پر بڑی کارروائی عمل میں لائی گئی، جس کے دوران فوڈ سیفٹی ٹیم نے ایک بیورجز پلانٹ پر چھاپہ مار کر سینکڑوں لیٹر غیر معیاری اور مضر صحت مشروبات برآمد کر لیے۔

کارروائی کے دوران پلانٹ پر تیار کیے جانے والے مشروبات کے نمونے حاصل کیے گئے جنہیں لیبارٹری تجزیے کے لیے بھجوایا گیا۔ رپورٹ کے مطابق مشروبات کے سیمپل مقررہ فوڈ سیفٹی معیار پر پورا نہیں اترے، جب کہ ان کی برکس ویلیو (یعنی مٹھاس و مواد کی مقدار) بھی طے شدہ حد سے کم تھی جو انسانی صحت کے لیے خطرناک قرار دی گئی۔

پنجاب فوڈ اتھارٹی نے قوانین کی سنگین خلاف ورزی پر نہ صرف پلانٹ کو سیل کر دیا بلکہ پلانٹ مالک کے خلاف مقدمہ درج کر کے قانونی کارروائی شروع کر دی ہے۔

اس موقع پر ڈی جی پنجاب فوڈ اتھارٹی محمد عاصم جاوید نے میڈیا سے گفتگو کرتے ہوئے کہا کہ شدید گرمی کے پیش نظر مشروبات کی تیاری، پیکنگ اور ترسیل کے تمام مراحل پر سخت نگرانی کی جا رہی ہے۔ انہوں نے کہا کہ پنجاب فوڈ اتھارٹی خوراک میں ملاوٹ، جعلسازی اور غیر معیاری اشیاء کے خلاف زیرو ٹالرنس پالیسی پر عمل پیرا ہے تاکہ عوام کو صحت بخش خوراک فراہم کی جا سکے۔

ڈی جی فوڈ اتھارٹی نے شہریوں سے اپیل کی کہ اگر کہیں بھی غیر معیاری خوراک یا ملاوٹ کے شواہد دیکھیں تو فوری طور پر پنجاب فوڈ اتھارٹی کو اطلاع دیں، تاکہ عوام کی صحت کے دشمن عناصر کے خلاف بروقت اور مؤثر کارروائی کی جا سکے۔

اوچ شریف (باغی ٹی وی، نامہ نگار حبیب خان) سب تحصیل اوچ شریف کا واحد ڈاک خانہ بدانتظامی، بدعنوانی اور بنیادی سہولیات کے فقدان کا شکار ہو کر ایک بھوت بنگلے میں تبدیل ہو چکا ہے۔ نصف صدی پرانی شکستہ عمارت رات کے اوقات میں منشیات کے عادی افراد کی پناہ گاہ بن چکی ہے جبکہ دن میں یہاں ڈاک کی ترسیل کا نظام مکمل درہم برہم نظر آتا ہے۔ ایک لاکھ سے زائد آبادی پر مشتمل اس تحصیل میں صرف ایک پوسٹ مین تعینات ہے، جو ازخود شہریوں کو فون کر کے ڈاک خانہ آ کر اپنی ڈاک وصول کرنے کا کہتا ہے، جس سے نہ صرف عوام کو شدید زحمت کا سامنا ہے بلکہ اہم خطوط و دستاویزات کی بروقت ترسیل بھی متاثر ہو رہی ہے۔

ذرائع کے مطابق ماضی میں جب آبادی چند ہزار تھی تو چار ڈاکیے خدمات انجام دے رہے تھے، مگر اب آبادی میں کئی گنا اضافے کے باوجود ڈاکیے کی تعداد کم کر کے ایک کر دی گئی ہے۔ عملے کی جانب سے عوامی رقوم، منی آرڈرز اور پارسلز میں بدعنوانی اور دھوکہ دہی کے کئی واقعات بھی منظرعام پر آ چکے ہیں، جن میں ایک سابق پوسٹ ماسٹر اور حالیہ پوسٹ مین کا نام شامل ہے۔

پوسٹ ماسٹر کی غفلت اور عدم دلچسپی کے باعث نہ صرف دفتری امور متاثر ہو رہے ہیں بلکہ پوسٹ آفس اور اس سے ملحقہ رہائشی کوارٹرز گندگی کے ڈھیر میں تبدیل ہو چکے ہیں۔ یہی وجہ ہے کہ شہریوں نے اب سرکاری ڈاک سروس پر عدم اعتماد کرتے ہوئے نجی کوریئر کمپنیوں کو ترجیح دینا شروع کر دی ہے۔

عوامی حلقوں نے وفاقی وزیر مواصلات، ڈی جی پاکستان پوسٹ اور متعلقہ حکام سے فوری نوٹس لینے اور ڈاک خانہ اوچ شریف کی بحالی، عملے میں اضافہ اور کرپٹ عناصر کے خلاف سخت کارروائی کا مطالبہ کیا ہے۔

اوچ شریف (باغی ٹی وی، نامہ نگار حبیب خان) اُوچ شریف میں دربار حضرت محبوب سبحانیؒ کے شہزادہ نشین، ممتاز روحانی و قومی رہنما مخدوم سید افتخار حسن گیلانی نے پاک فوج کی حالیہ کامیابیوں پر اظہارِ مسرت کرتے ہوئے چیف آف آرمی اسٹاف جنرل عاصم منیر کو زبردست الفاظ میں مبارکباد پیش کی ہے۔ اُنہوں نے آپریشن "بنیان مرصوص” کی شاندار فتح کو پاکستان کی دفاعی تاریخ کا سنہرا باب قرار دیتے ہوئے کہا کہ دشمن پر کاری ضرب لگا کر اُسے عبرتناک شکست سے دوچار کرنا ایک عظیم کارنامہ ہے۔

مخدوم افتخار حسن گیلانی نے کہا کہ پاکستان ہمیشہ امن کا خواہاں رہا ہے لیکن دشمن کو ہر بار واضح پیغام دیا گیا کہ ہماری امن پسندی کو کمزوری نہ سمجھا جائے۔ پاک فوج نے بھارتی بالادستی کے خواب کو نہ صرف چکنا چور کیا بلکہ خطے میں امن و استحکام کے لیے اپنی صلاحیتوں، پیشہ ورانہ مہارت اور ایمانی جذبے سے ناقابلِ فراموش کردار ادا کیا۔

انہوں نے کہا کہ آپریشن "بنیان مرصوص” کی کامیابی پاک فوج کی قومی یکجہتی، قربانی اور قرب الٰہی کی دلیل ہے۔ اس تاریخی کامیابی کے پیچھے پوری قوم کی متحدہ دعائیں اور افواج پاکستان کی جرأت و شجاعت کارفرما رہی۔ عوام نے ہر محاذ پر اپنی افواج کے شانہ بشانہ کھڑے ہو کر یکجہتی کا غیر متزلزل مظاہرہ کیا، جو قوموں کی اصل طاقت ہوتا ہے۔

مخدوم افتخار گیلانی نے مزید کہا کہ "ہم افواجِ پاکستان کو اس عظیم الشان فتح پر خراجِ تحسین پیش کرتے ہیں۔ وطنِ عزیز کے دفاع پر جب بھی ضرورت پڑی، ہم ہر اول دستے کی طرح پاک فوج کے ساتھ کھڑے ہوں گے۔ پوری قوم آج افواجِ پاکستان کے گرد سیسہ پلائی دیوار بن چکی ہے، جس کا ثمر اللہ رب العزت نے ہمیں تاریخی کامیابی کی صورت میں عطا کیا ہے۔”

انہوں نے حکومت پاکستان سے مطالبہ کیا کہ اس عسکری کامیابی کے ثمرات کو دیرپا بنانے کے لیے معاشی، سفارتی اور قومی سلامتی کے محاذ پر ٹھوس اور دور رس حکمت عملی اپنائی جائے، تاکہ ہر میدان میں دشمن کو منہ توڑ جواب دیا جا سکے اور پاکستان مزید مضبوط و مستحکم ہو۔

اوچ شریف (باغی ٹی وی، نامہ نگار حبیب خان) اوچ شریف میں معروف دینی و روحانی شخصیت مولانا پیر سید شاہ جرار کی قیادت میں پاک فوج سے اظہارِ یکجہتی اور آپریشن "بنیان مرصوص” کی عظیم کامیابی کے جشن میں ایک شاندار ریلی کا انعقاد کیا گیا۔ اس تاریخی ریلی کا آغاز جامعہ قاسمیہ بھٹہ ککس سے ہوا، جو قومی شاہراہ سے ہوتی ہوئی الشمس چوک میں ایک بھرپور اجتماع میں تبدیل ہو گئی۔

ریلی میں شریک افراد نے قومی پرچموں، پاک فوج سے محبت کے بینرز اور پُرعزم نعروں سے فضا کو گونجا دیا۔ "پاک فوج زندہ باد”، "شہداء کو سلام”، اور "پاکستان پائندہ باد” کے نعرے ریلی کی فضا کو گرما رہے تھے۔ ریلی میں مذہبی جوش و ولولہ اور قومی یکجہتی کا بے مثال منظر دیکھنے کو ملا۔

ریلی سے خطاب کرنے والوں میں ممتاز علماء اور مشائخ شامل تھے، جن میں مولانا پیر سید محمد شاہ جرار، مفتی محمد قاسم، مولانا اسداللہ مدنی، مولانا جلیل احمد عباسی، مولانا راشد فاروقی، مولانا بابر علی صدیقی، مولانا شاکر قاسمی، مولانا ریاض احمد، مولانا عتیق الرحمن ککر، قاری سعد مدنی، مہرغلام ربانی کاٹھیہ، شیخ محمد اکمل، عمر خورشید سہمن اور چوہدری محمد طارق نمایاں رہے۔

مقررین نے اپنے جذباتی خطابات میں کہا کہ آپریشن "بنیان مرصوص” پاکستان کی بقاء، سالمیت اور خودمختاری کے لیے ایک فیصلہ کن معرکہ تھا، جس میں ہمارے بہادر سپاہیوں نے دشمنوں کو ان کی کمین گاہوں میں جا کر عبرتناک انجام دیا۔ انہوں نے کہا کہ قوم اپنے شہداء کو سلام پیش کرتی ہے، اور ان کے خون کے صدقے آج وطن محفوظ ہے۔

ریلی میں اوچ شریف کے علاوہ بیٹ احمد، کوٹلہ شیخاں، زندہ لعل، جھانگڑہ غربی اور دیگر قریبی علاقوں سے عوامی قافلے شریک ہوئے۔ شرکاء کی بڑی تعداد اور قومی جذبہ اس بات کا غماز تھا کہ پاکستانی قوم اپنے محافظوں کے ساتھ کھڑی ہے۔

ریلی کا مقصد واضح تھا — دشمنوں کو پیغام دینا کہ پاکستانی قوم اور اس کی افواج ایک جسم کی مانند ہیں، اور وطن عزیز کے خلاف کسی بھی سازش کو وہ متحد ہو کر کچلنے کی صلاحیت رکھتی ہے۔