Category: بہاولپور

اوچ شریف (باغی ٹی وی ،نامہ نگارحبیب خان)احمد پور شرقیہ میں کالج میں آپریشن "بنیان مرصوص” کی فتح پر ریلی، پاک فوج کو زبردست خراج تحسین

گورنمنٹ صادق عباس گریجویٹ کالج ڈیرہ نواب صاحب میں آپریشن بنیان مرصوص کی شاندار کامیابی اور دشمن بھارت کی شکست فاش پر ایک عظیم الشان ریلی کا انعقاد کیا گیا۔ ریلی کی قیادت پرنسپل پروفیسر شاہد حسین مغل نے کی، جس میں کالج کے اساتذہ، طلباء و طالبات نے بھرپور شرکت کی اور اپنے وطن عزیز پاکستان کی سلامتی، استحکام اور پاک فوج کی عظیم قربانیوں کو بھرپور انداز میں خراجِ تحسین پیش کیا۔

ریلی کے شرکاء نے "نعرہ تکبیر” اور "پاکستان زندہ باد” کے فلک شگاف نعروں کی گونج میں فوجی قافلے کا پرتپاک استقبال کیا، پھولوں کے ہار اور گلدستے پیش کیے، جبکہ فوجی گاڑیوں پر گل پاشی بھی کی گئی۔ طلباء و طالبات نے پاک آرمی کے افسروں اور جوانوں کو آپریشن بنیان مرصوص کی فتح پر دلی مبارکباد پیش کی اور ان کی شجاعت، پیشہ ورانہ مہارت اور قربانیوں کو سراہا۔

اس موقع پر پرنسپل پروفیسر شاہد حسین مغل اور انچارج سکیورٹی آفیسر پروفیسر ڈاکٹر محمد الطاف ڈاھر جلالوی سمیت معزز اساتذہ کرام اور طلباء نے کہا کہ پاک فوج نے دشمن کو منہ توڑ جواب دے کر قوم کا سر فخر سے بلند کر دیا ہے۔ وطن سے محبت کا والہانہ اظہار کرتے ہوئے شرکاء کا جوش و جذبہ قابل دید تھا، جس سے ثابت ہوتا ہے کہ پاکستانی قوم اپنی افواج کے ساتھ سیسہ پلائی دیوار کی طرح کھڑی ہے۔

اوچ شریف (باغی ٹی وی، نامہ نگار حبیب خان)روایتی سگریٹ نوشی ایک پرانا صحت دشمن مسئلہ رہا ہے، تاہم اب جدید دور کی ایک نئی خطرناک لت "ویپ” (الیکٹرانک سگریٹ) نوجوان نسل کو تیزی سے اپنی لپیٹ میں لے رہی ہے۔ رورل ہیلتھ سینٹر اوچ شریف کے انچارج سینئر میڈیکل آفیسر ڈاکٹر محمد ارشد رانا نے اس صورتحال پر شدید تشویش کا اظہار کرتے ہوئے کہا ہے کہ ویپ عام سگریٹ کے مقابلے میں کہیں زیادہ خطرناک اور نوجوانوں کے لیے "خاموش قاتل” ثابت ہو رہا ہے۔

ڈاکٹر ارشد رانا کے مطابق ان کے پاس روزانہ ایسے نوجوان مریض آ رہے ہیں جو شدید سانس کی تکلیف، پھیپھڑوں کی خرابی اور سینے کی دیگر بیماریوں میں مبتلا ہیں۔ ان میں سے اکثریت ویپ کے استعمال کی عادی ہے، جو ابتدا میں فیشن یا تفریح کے طور پر شروع کیا جاتا ہے لیکن جلد ہی ایک تباہ کن نشہ بن کر جسم و دماغ کو متاثر کرتا ہے۔

انہوں نے افسوس کا اظہار کرتے ہوئے کہا کہ ویپ اب صرف ایک انفرادی مسئلہ نہیں بلکہ ایک اجتماعی سماجی المیہ بنتا جا رہا ہے۔ اسکولوں اور کالجوں کے طلبہ سوشل میڈیا پلیٹ فارمز جیسے TikTok اور Facebook پر مشہور ہونے کے شوق میں ویپ کا استعمال کرتے ہیں، جو ان کی صحت اور مستقبل دونوں کے لیے زہر قاتل ہے۔

ڈاکٹر ارشد رانا نے والدین کو متنبہ کیا کہ وہ اپنی اولاد کی سرگرمیوں، دوستوں اور معمولات پر گہری نظر رکھیں تاکہ بروقت رہنمائی کے ذریعے انہیں اس مہلک لت سے بچایا جا سکے۔ ان کے بقول "نوجوانی میں پھیپھڑوں کی تباہی محض ایک طبی مسئلہ نہیں، بلکہ یہ پوری قوم کے مستقبل پر حملہ ہے۔”

انہوں نے دکانداروں کی غیر ذمہ داری پر شدید برہمی کا اظہار کرتے ہوئے کہا کہ اکثر مقامی دکان دار کم عمر بچوں کو ویپ اور سگریٹ بلا خوف فروخت کر رہے ہیں، حتیٰ کہ تعلیمی اداروں کے باہر بھی یہ زہریلا سامان کھلے عام دستیاب ہے، جب کہ قانون نافذ کرنے والے ادارے خاموش تماشائی بنے بیٹھے ہیں۔

ڈاکٹر ارشد رانا نے حکومت پاکستان سے پرزور مطالبہ کیا کہ ویپ اور دیگر تمباکو مصنوعات کی فروخت کو فوری طور پر سختی سے کنٹرول کیا جائے، خاص طور پر تعلیمی اداروں کے گرد ان کے کاروبار پر مکمل پابندی عائد کی جائے اور کم عمر بچوں کو نشہ آور اشیاء فروخت کرنے والوں کے خلاف سخت قانونی کارروائی عمل میں لائی جائے۔

اوچ شریف (باغی ٹی وی: نامہ نگار حبیب خان)اوچ شریف کا صدیوں پرانا تاریخی و روحانی قبرستان "زندہ لال”، جو کبھی عقیدت و احترام کا مرکز سمجھا جاتا تھا، آج بدانتظامی، غفلت اور بے حسی کی المناک تصویر پیش کر رہا ہے۔ یہ مقدس مقام اب قبروں کی بے حرمتی، گندگی، منشیات کے عادی افراد اور چرنے والے جانوروں کے رحم و کرم پر ہے۔

علاقہ مکینوں کے مطابق قبرستان میں گدھے، بکریاں اور دیگر مویشی کھلے عام گھومتے ہیں، جن کے فضلے سے تعفن اور بدبو نے قبرستان کے تقدس کو پامال کر دیا ہے۔ متعدد قبریں مسمار ہو چکی ہیں، کتبے غائب ہو گئے ہیں اور بعض مقامات پر قبریں مٹی کے ڈھیر میں تبدیل ہو چکی ہیں۔

رات کے وقت قبرستان میں منشیات فروشوں اور جرائم پیشہ عناصر کا راج ہوتا ہے، جو نہ صرف ماحول کو غیر محفوظ بناتے ہیں بلکہ قبرستان کے روحانی وقار کو بھی شدید نقصان پہنچا رہے ہیں۔

شہریوں نے اس صورتحال پر شدید غم و غصے کا اظہار کرتے ہوئے ضلعی انتظامیہ کو کڑی تنقید کا نشانہ بنایا ہے۔ انہوں نے ڈپٹی کمشنر بہاولپور، چیئرمین بلدیہ اوچ شریف اور دیگر متعلقہ حکام سے فوری نوٹس لینے کا مطالبہ کیا ہے۔

اہل علاقہ کا کہنا ہے کہ "یہ صرف قبریں نہیں بلکہ ہمارا روحانی ورثہ، ہماری تاریخ اور عقیدت کا عکس ہیں، جن کی بے حرمتی کسی صورت برداشت نہیں کی جا سکتی۔”

شہریوں نے قبرستان کی فوری صفائی، چار دیواری کی تعمیر، روشنی کے انتظامات اور مستقل سیکیورٹی کی فراہمی کو ناگزیر قرار دیتے ہوئے خبردار کیا کہ اگر فوری اقدامات نہ کیے گئے تو یہ قیمتی ورثہ مکمل طور پر مٹ جائے گا۔

اوچ شریف (باغی ٹی وی: نامہ نگار حبیب خان)دینی مدرسے کی ریلی، پاک فوج سے یکجہتی، شہداء کو خراجِ عقیدت

اولیائے کرام کی سرزمین اوچ شریف میں قائم معروف دینی درسگاہ مدرسہ عربیہ امیر المدارس کی جانب سے افواجِ پاکستان کے ساتھ یکجہتی اور شہداء کو خراجِ عقیدت پیش کرنے کے لیے ایک عظیم الشان ریلی کا انعقاد کیا گیا۔ ریلی کی قیادت مدرسہ کے مہتمم قاری محمد صادق اور صدر مدرس مولانا قاری محمد رمضان عثمانی نے کی۔

اس روح پرور ریلی میں شہر بھر کے علما کرام، اساتذہ، طلبہ اور مختلف طبقات سے تعلق رکھنے والے عقیدت مندوں نے بڑی تعداد میں شرکت کی۔ شرکاء ہاتھوں میں قومی پرچم تھامے ہوئے تھے اور "پاک فوج زندہ باد”، "شہداء کو سلام” اور "پاکستان کا مطلب کیا؟ لا الٰہ الا اللہ” کے نعروں سے فضا گونج اٹھی۔

ریلی سے خطاب کرتے ہوئے مقررین نے افواجِ پاکستان کی جرات، قربانی اور جذبۂ شہادت کو خراجِ تحسین پیش کرتے ہوئے کہا کہ پاک فوج صرف ایک عسکری ادارہ نہیں بلکہ قوم کے اتحاد، حوصلے اور بقاء کی علامت ہے۔ انہوں نے کہا کہ شہداء نے اپنی جانوں کا نذرانہ دے کر پاکستان کے کل کو محفوظ بنایا اور ان کی عظیم قربانیوں کو تاریخ میں ہمیشہ سنہرے الفاظ میں یاد رکھا جائے گا۔

مقررین نے مزید کہا کہ شہداء کا جذبۂ قربانی آنے والی نسلوں کے لیے مشعلِ راہ ہے اور ہمیں بھی اپنے اندر وہی استقلال، ایثار اور وطن سے محبت پیدا کرنی چاہیے۔

ریلی کے اختتام پر ملک و ملت کی سلامتی، افواجِ پاکستان کی کامیابی اور شہداء کے درجات کی بلندی کے لیے ایک پُراثر اجتماعی دعا کی گئی، جس میں تمام شرکاء نے بھرپور شرکت کی۔

بعد ازاں جاری ہونے والے مشترکہ اعلامیہ میں کہا گیا کہ دشمن کے ناپاک عزائم اور بزدلانہ کارروائیوں کا جس حکمت، صبر اور جرأت سے پاک فوج نے مقابلہ کیا، وہ پوری قوم کے لیے باعثِ فخر ہے۔ اعلامیہ میں کہا گیا کہ قوم آج پہلے سے زیادہ متحد ہے اور اپنی افواج کے ساتھ چٹان کی مانند کھڑی ہے۔

شرکاء نے افواجِ پاکستان کو کامیاب آپریشنز پر دلی مبارکباد پیش کی اور اس عزم کا اعادہ کیا کہ پاکستان کی سالمیت، آزادی اور خودمختاری کے تحفظ کے لیے ہر ممکن قربانی دی جائے گی۔ دشمن کے ناپاک ارادوں کو ہمیشہ کے لیے خاک میں ملا دیا جائے گا۔

اوچ شریف (باغی ٹی وی، نامہ نگار حبیب خان)امیر بہاولپور اور ولی عہد کی بھارتی جارحیت کی شدید مذمت، پاک فوج سے مکمل یکجہتی کا اظہاربھارتی فوج نے رات کی تاریکی میں معصوم شہریوں کو نشانہ بنایا، انسانیت سوز کارروائیاں عالمی قوانین کی خلاف ورزی قرار

امیر بہاولپور نواب صلاح الدین عباسی اور ولی عہد پرنس بہاول عباس عباسی نے بھارت کی حالیہ فوجی جارحیت کی شدید الفاظ میں مذمت کرتے ہوئے کہا ہے کہ بھارتی افواج نے رات کی تاریکی میں بزدلانہ حملے کر کے معصوم اور نہتے شہریوں کو نشانہ بنایا، جس کے نتیجے میں درجنوں قیمتی جانیں ضائع ہوئیں۔

انہوں نے اپنے مشترکہ اخباری بیان میں کہا کہ بھارتی اقدامات نہ صرف انسانیت سوز ہیں بلکہ بین الاقوامی قوانین کی صریح خلاف ورزی بھی ہیں، جن کی جتنی مذمت کی جائے کم ہے۔ امیر اور ولی عہد نے کہا کہ بھارت کا بڑھتا ہوا جنگی جنون جنوبی ایشیا کے امن کے لیے سنگین خطرہ بن چکا ہے اور عالمی برادری کو اس کا فوری نوٹس لینا چاہیے۔

سات مئی کے حملے میں شہید ہونے والے افراد کے لیے دعا کرتے ہوئے انہوں نے ان کے درجات کی بلندی اور لواحقین کے لیے صبر جمیل کی دعا کی۔ اس موقع پر امیر بہاولپور اور ولی عہد نے پاک فوج سے مکمل یکجہتی کا اظہار کرتے ہوئے کہا کہ پوری قوم اپنی بہادر افواج کے ساتھ کھڑی ہے اور ہر بھارتی جارحیت کا منہ توڑ جواب دینے کے لیے پرعزم ہے۔