Category: بہاولپور

اوچ شریف ،باغی ٹی وی (نامہ نگارحبیب خان)بھارت کی آبی جارحیت اور معروف پاکستانی صحافی مبشر لقمان کا یوٹیوب چینل بھارت میں بند کیے جانے کے خلاف اوچ شریف میں ایک ولولہ انگیز اور تاریخ ساز احتجاجی ریلی نکالی گئی، جس نے دشمن کو دوٹوک اور واضح پیغام دے دیا کہ پاکستانی قوم اپنی خودمختاری، صحافتی آزادی اور قدرتی وسائل کے تحفظ پر کسی قسم کی سودے بازی قبول نہیں کرے گی۔

یہ عظیم الشان احتجاجی ریلی سوشل سول سوسائٹی اوچ شریف کے زیر اہتمام منعقد ہوئی، جس کی قیادت رکن صوبائی اسمبلی مخدوم سید عامر علی شاہ نے کی۔ ریلی میں ہزاروں افراد نے شرکت کی اور میونسپل کمیٹی سے الشمس چوک تک مارچ کیا۔ شرکاء کے ہاتھوں میں قومی پرچم، پلے کارڈز اور بینرز تھے جن پر بھارت کی آبی دہشت گردی اور آزادی صحافت پر حملوں کے خلاف نعرے درج تھے۔ الشمس چوک "انڈیا مردہ باد” اور "پاکستان زندہ باد” کے فلک شگاف نعروں سے گونج اٹھا۔

ریلی کے اختتام پر ایم پی اے مخدوم عامر علی شاہ نے بھارتی پرچم نذر آتش کرتے ہوئے کہا کہ پاکستان دشمن کی کسی بھی آبی جارحیت یا معلوماتی جنگ کا بھرپور جواب دے گا۔ انہوں نے کہا: "ہم اپنی سرزمین، اپنے پانی اور اپنے میڈیا کی آزادی پر کوئی سمجھوتہ نہیں کریں گے۔ اگر دشمن نے جارحیت کی، تو ایسا منہ توڑ جواب دیں گے جو تاریخ یاد رکھے گی۔”

اس موقع پر شرکاء نے اس بات پر بھی شدید غم و غصے کا اظہار کیا کہ بھارتی حکومت نے سینئر صحافی مبشر لقمان کا یوٹیوب چینل بھارت میں بلاک کر دیا ہے، صرف اس لیے کہ انہوں نے اپنے پروگرام "کھرا سچ” میں بھارت کے زیرِ اثر پہلگام واقعے کو "ڈرامہ” قرار دیا تھا اور مودی سرکار پر تنقید کی تھی۔

صحافیوں، سیاسی و مذہبی رہنماؤں، سول سوسائٹی اور تاجر برادری نے اپنے مشترکہ بیان میں بھارتی حکومت کے اس اقدام کی سخت مذمت کرتے ہوئے کہا کہ سچ کو دبانے کی یہ کوشش آزادی اظہار رائے پر حملہ ہے، جسے پاکستان کا ہر شہری مسترد کرتا ہے۔ مقررین میں سید عادل شاہ، جام آصف جھبیل، راؤ فاروق، اکمل کاکھی، غلام یاسین سومرو، بابر علی صدیقی، حبیب خان، اظہر دانش، ذیشان مستوی اور دیگر نے خطاب کیا۔

یاد رہے کہ سینئر صحافی مبشر لقمان نے اپنے ردعمل میں کہا کہ "اگر سچ بولنے کی سزا چینل بند کرنا ہے تو یہ ہمیں قبول ہے، ہم پاکستان کے دفاع اور وقار کے لیے ہر قربانی دینے کو تیار ہیں۔” انہوں نے مزید کہا کہ مودی سرکار کے جھوٹ اور ڈرامے دنیا کے سامنے بے نقاب ہو چکے ہیں اور بھارت، کشمیر میں ظلم و ستم سے نظریں ہٹا کر پاکستان پر الزام تراشی کر رہا ہے۔

ریلی کے آخر میں وطن عزیز کی سلامتی، افواج پاکستان کی کامیابی اور دشمن کی بربادی کے لیے اجتماعی دعا کی گئی۔ عوام نے اتحاد، نظم اور حب الوطنی سے ثابت کیا کہ پاکستانی قوم آج بھی دشمن کے ہر محاذ پر متحد، بیدار اور پرعزم کھڑی ہے۔

اوچ شریف (باغی ٹی وی، نامہ نگار حبیب خان) پیٹرولنگ پولیس خیرپور ڈاہا نے سب انسپکٹر وحید کی قیادت میں کامیاب کارروائی کرتے ہوئے ایک مشکوک شخص کو گرفتار کر لیا، جس کے قبضے سے ناجائز اسلحہ، گولیاں، نقدی اور موبائل فون برآمد ہوا۔ گرفتار ملزم جنید محمود ولد جندوڈہ، سکنہ بکھری، کو اس وقت حراست میں لیا گیا جب وہ مشتبہ حرکات کر رہا تھا۔

تفصیلات کے مطابق سب انسپکٹر وحید بمعہ پولیس ٹیم معمول کے گشت پر تھا کہ دورانِ نگرانی ایک شخص کو مشکوک انداز میں گھومتے پایا گیا۔ مشتبہ شخص کو روک کر تلاشی لی گئی تو اس کے قبضے سے 30 بور پستول، پانچ زندہ گولیاں، ایک موبائل فون اور نقدی برآمد ہوئی۔ ملزم اسلحے کا کوئی قانونی لائسنس پیش نہ کر سکا، جس پر اسے موقع پر گرفتار کر کے تھانہ دھوڑکوٹ منتقل کر دیا گیا۔

ملزم کے خلاف آرمز ایکٹ کے تحت مقدمہ درج کر لیا گیا ہے، جبکہ مزید تفتیش جاری ہے۔ علاقے کے عوام نے پیٹرولنگ پولیس کی مستعدی اور بروقت کارروائی کو سراہا اور اسے علاقے میں امن و امان کے قیام کی جانب مثبت قدم قرار دیا۔

اوچ شریف،باغی ٹی وی (نامہ نگارحبیب خان) تھانہ اوچ شریف کے علاقے میں غیر قانونی اور مضر صحت گوشت کی فروخت کے خلاف ایک بڑی کارروائی عمل میں لائی گئی ہے۔ حکام نے فوری ایکشن لیتے ہوئے ملوث ملزمان کے خلاف مقدمہ درج کر لیا ہے۔

تفصیلات کے مطابق گزشتہ روز سکھر انٹرچینج کے قریب موضع محمد اور اوچ شریف میں پرائس کنٹرول مجسٹریٹ عمران حیدر سیال نے بروقت کارروائی کرتے ہوئے ایک لوڈر رکشہ کو روکا جس میں تقریباً 700 کلوگرام غیر تصدیق شدہ اور انسانی صحت کے لیے مضر گوشت لادا گیا تھا۔ مجسٹریٹ نے موقع پر ہی گوشت اور رکشہ کو اپنی تحویل میں لے لیا جبکہ ملزم محمد نوید قریشی کو گرفتار کر لیا گیا۔ تاہم دوسرا ملزم عمران قریشی موقع سے فرار ہونے میں کامیاب ہو گیا۔

ویٹرنری آفیسر ڈاکٹر محمد اعجاز نے ضبط شدہ گوشت کا معائنہ کرنے کے بعد اسے نہ صرف غیر قانونی قرار دیا بلکہ اسے شہریوں کی صحت کے لیے بھی انتہائی خطرناک قرار دیا۔ ان کی رپورٹ کے مطابق یہ گوشت کسی مجاز مذبح خانے سے حاصل نہیں کیا گیا تھا اور اس میں بیماریوں کے جراثیم موجود ہو سکتے تھے۔

تھانہ اوچ شریف کی پولیس ٹیم نے فوری طور پر حرکت میں آتے ہوئے سلاٹر کنٹرول ایکٹ 1963 (ترمیمی 2016) کے تحت ملزمان کے خلاف باضابطہ ایف آئی آر درج کر لی ہے۔ ڈاکٹر محمد اعجاز نے بھی قانونی کارروائی کی تصدیق کرتے ہوئے کہا کہ اس غیر قانونی گوشت کی فروخت سنگین جرم ہے جس سے شہریوں کی زندگیوں کو خطرہ لاحق ہو سکتا تھا۔

اس کامیاب کارروائی کے نتیجے میں اوچ شریف میں غیر قانونی اور مضر صحت گوشت کی فروخت کی ایک بڑی کوشش ناکام بنا دی گئی ہے۔ حکام نے اس عزم کا اظہار کیا ہے کہ مستقبل میں بھی اس طرح کے غیر قانونی کاروبار کے خلاف سخت کارروائیاں جاری رکھی جائیں گی تاکہ شہریوں کو محفوظ اور صحت مند غذا کی فراہمی یقینی بنائی جا سکے۔

اوچ شریف،باغی ٹی وی( نامہ نگار حبیب خان)اسسٹنٹ کمشنر نوحید حیدر کی زیر صدارت تحصیل ایمرجنسی رسپانس کمیٹی کا اہم اجلاس تحصیل احمد پور شرقیہ میں منعقد ہوا، جس میں ڈینگی وائرس سے بچاؤ کے لیے ہنگامی اقدامات کا فیصلہ کیا گیا اور تمام متعلقہ محکموں کو الرٹ جاری کر دیا گیا۔

اجلاس میں ڈینگی وائرس کی روک تھام، عوامی آگاہی، مانیٹرنگ اور انسداد کے حوالے سے جامع لائحہ عمل تیار کیا گیا۔ اس اہم اجلاس میں محکمہ صحت، تعلیم، میونسپل کمیٹی، سماجی بہبود، پبلک ہیلتھ، آبپاشی، ماحولیات، واپڈا اور دیگر متعلقہ اداروں کے افسران نے بھرپور شرکت کی۔ اجلاس کا بنیادی مقصد تحصیل بھر میں ڈینگی کے ممکنہ پھیلاؤ کو مؤثر حکمت عملی کے تحت روکنا اور فوری عملی اقدامات کو یقینی بنانا تھا۔

اسسٹنٹ کمشنر نوحید حیدر نے اجلاس سے خطاب کرتے ہوئے کہا کہ ڈینگی کے مکمل خاتمے کے لیے تمام اداروں کو ایک مشترکہ اور مربوط حکمت عملی کے تحت متحرک کردار ادا کرنا ہوگا۔ انہوں نے واضح ہدایات جاری کرتے ہوئے کہا کہ انڈور اور آؤٹ ڈور سرویلنس کے نظام کو مزید مؤثر بنایا جائے اور تحصیل کے تمام تعلیمی اداروں، اسپتالوں، سرکاری دفاتر، قبرستانوں اور زیر تعمیر عمارتوں کی باقاعدگی سے کڑی نگرانی کی جائے۔ انہوں نے اس بات پر زور دیا کہ کسی بھی جگہ پانی جمع نہ ہونے دیا جائے تاکہ ڈینگی مچھر کی افزائش کو روکا جا سکے۔

اسسٹنٹ کمشنر نوحید حیدر نے عوامی آگاہی مہم کو تیز کرنے کی ہدایت بھی کی تاکہ شہری احتیاطی تدابیر پر عمل پیرا ہو کر اس خطرناک وائرس سے محفوظ رہ سکیں۔ انہوں نے تمام متعلقہ افسران کو روزانہ کی بنیاد پر پیش رفت رپورٹ پیش کرنے، فیلڈ وزٹ کو یقینی بنانے اور کسی بھی قسم کی غفلت برتنے پر سخت قانونی کارروائی کرنے کی واضح ہدایات جاری کیں۔

اجلاس میں شریک تمام محکموں کے افسران نے اسسٹنٹ کمشنر کو مکمل تعاون کی یقین دہانی کرائی اور اس عزم کا اظہار کیا کہ تحصیل احمد پور شرقیہ کو ڈینگی فری بنانے کے لیے تمام دستیاب وسائل کو بھرپور طریقے سے استعمال میں لایا جائے گا۔

اوچ شریف،باغی ٹی وی (نامہ نگار حبیب خان) نوے کی دہائی میں پیٹ بھرنے کے لیے کرائے پر سائیکل رکشے چلا کر گزر بسر کرنے والے غریب محنت کش، 35 سال گزر جانے کے باوجود میاں نواز شریف حکومت کی جانب سے کیے گئے وعدے کی تکمیل کے منتظر ہیں۔ ان میں سے کئی اب قبروں میں جا سوئے ہیں اور جو زندہ بچے ہیں وہ اپنے بڑھاپے میں آسودگی کے خواہشمند ہیں۔ اب ان کی نظریں وزیر اعلیٰ پنجاب مریم نواز شریف پر ہیں کہ وہ اپنے والد کے کیے گئے وعدے کو پورا کرنے کا اعلان کریں۔

انجمن تاجران علی پور کے رہنما اور سابق جنرل کونسلر شیخ لیاقت علی صدیقی نے میڈیا کو تفصیلات بتاتے ہوئے کہا کہ 35 سال قبل جنوبی پنجاب کے علاقوں علی پور، احمد پور شرقیہ اور اوچ شریف سمیت دیگر جگہوں پر سخت معاشی مشکلات کا سامنا کرنے والے غریب محنت کش، روزانہ 20 روپے کرائے پر سائیکل رکشے لے کر لوگوں اور سامان کو ایک جگہ سے دوسری جگہ پہنچا کر اپنے خاندانوں کا پیٹ پالتے تھے۔ اس وقت کے وزیر اعظم میاں نواز شریف نے 1992 میں سائیکل رکشہ چلانے والوں کے لیے ایک سکیم کا اعلان کیا جس کے تحت تمام سائیکل رکشے حکومت نے اپنی تحویل میں لے لیے اور ان کے بدلے متبادل روزگار کے طور پر آٹو رکشہ، ٹیکسی، کار یا دیگر چھوٹی ٹرانسپورٹ دینے کا وعدہ کیا گیا۔ یہ بھی اعلان کیا گیا کہ جب تک ان کے لیے متبادل روزگار کا انتظام نہیں ہوتا، ہر فرد کو ماہانہ پندرہ سو روپے پولٹری الاؤنس ادا کیا جائے گا، جس سے غریب محنت کشوں میں خوشی کی لہر دوڑ گئی۔

شیخ لیاقت صدیقی نے بتایا کہ اس اعلان کے بعد اسسٹنٹ کمشنر احمد پور شرقیہ علی پور پہنچے اور انہوں نے ان سمیت دیگر 20 سائیکل رکشے جمع کیے اور ان کی قیمت کے طور پر موقع پر ہی نیشنل بینک آف پاکستان احمد پور شرقیہ برانچ کے 20 چیک عبدالشکور، محمد افضل، کالو خان، غلام اکبر، مشتاق احمد، ظفر حسین، ذوالفقار، قاسم علی، وزیر احمد، حق نواز، محمد اصغر، غلام عباس، قمر علی، مشیر احمد، محمد خلیل، محمد اجمل، بشیر احمد، غلام عباس ولد شملہ خان، رسول بخش ولد واحد بخش اور عظیم بخش کے نام پر فی چیک پانچ ہزار روپے کے حساب سے کل ایک لاکھ روپے مالیت کے جاری کیے گئے۔ شیخ لیاقت صدیقی نے افسوس کا اظہار کرتے ہوئے بتایا کہ 33 سال گزرنے کے باوجود وہ چیک آج بھی کیش ہونے کے منتظر ہیں۔ انہوں نے نیشنل بینک احمد پور شرقیہ برانچ کے کئی چکر لگائے جس پر کرائے کی مد میں اصل رقم سے بھی زیادہ خرچ ہو چکا ہے۔

انہوں نے بتایا کہ افسوسناک بات یہ ہے کہ حکومت نے آج تک غریب سائیکل رکشہ والوں کو وعدے کے مطابق متبادل روزگار کے طور پر آٹو رکشہ وغیرہ مہیا کیا اور نہ ہی پولٹری الاؤنس کی مد میں ایک دھیلہ دیا۔ الٹا سائیکل رکشے سرکاری تحویل میں لیتے ہوئے ان کی قیمت کی مد میں جاری کیے گئے سرکاری چیک بھی دھوکہ اور فریب نکلے۔ انہوں نے کہا کہ میاں نواز شریف کی حکومت نے سہانے خواب دکھا کر انہیں زندہ درگور کر دیا۔ سائیکل رکشہ چلانا ذلت کا کام سہی لیکن وہ اپنے بچوں کو رزق حلال کما کر کھلا رہے تھے اور ان سے ان کا روزگار چھین لیا گیا۔

انہوں نے موجودہ وزیر اعلیٰ پنجاب مریم نواز شریف سے پرزور اپیل کی ہے کہ وہ اپنے والد کے وعدے کو پایہ تکمیل تک پہنچانے کے لیے اپنا کردار ادا کریں اور جو لوگ زندہ ہیں انہیں متبادل روزگار کے سلسلے میں چھوٹی ٹرانسپورٹ آٹو رکشہ وغیرہ مہیا کرنے کا حکم دیں۔