Category: بہاولپور

اوچ شریف (باغی ٹی وی، نامہ نگار حبیب خان)اوچ شریف میں فلسطینی عوام سے اظہارِ یکجہتی اور اسرائیلی بربریت کے خلاف ایک عظیم الشان احتجاجی ریلی کا انعقاد کیا گیا۔ ریلی کی قیادت انجمن تاجران کے صدر عمر خورشید سہمن اور سول سوسائٹی کے نمائندوں نے کی۔

یہ ریلی گیلانی امام بارگاہ سے شروع ہو کر الشمس چوک تک پہنچی، جس میں مختلف سیاسی، سماجی اور مذہبی جماعتوں کے قائدین اور شہریوں کی بڑی تعداد نے بھرپور شرکت کی۔ شرکاء نے فلسطینی عوام کے حق میں نعرے لگائے اور اسرائیلی جارحیت کے خلاف شدید احتجاج کیا۔

اس موقع پر خطاب کرتے ہوئے عمر خورشید سہمن نے کہا کہ پاکستان ہر دور میں فلسطینی عوام کے ساتھ کھڑا رہا ہے اور اب بھی ہمارا فرض ہے کہ ان کی حمایت میں ہر ممکن طریقے سے آواز بلند کریں۔ انہوں نے عالمی برادری سے مطالبہ کیا کہ فلسطینیوں پر جاری مظالم بند کروانے کے لیے فوری اور مؤثر اقدامات کیے جائیں۔

مقررین مولانا محمد شاہ جرار اور مولانا عبدالرؤف نے اپنے خطابات میں کہا کہ فلسطین پر اسرائیلی ظلم ناقابلِ برداشت ہے، اور وقت آ گیا ہے کہ تمام مسلم ممالک متحد ہو کر مظلوم فلسطینیوں کے حق میں عملی اقدامات کریں۔

ریلی میں شہر کی نمایاں سماجی اور سیاسی شخصیات نے بھی شرکت کی جن میں حاجی غلام یٰسین سومرو، چوہدری طارق، حافظ جمیل احمد لنگاہ، میاں محمد عامر صدیقی، شفیق شہزاد، شفیق انجم، اظہر اقبال مغل، چوہدری محمد فیاض، چوہدری عمران طارق بھٹو، چوہدری عرفان اصغر، وسیم شہزاد مدنی اور اکرم شامل تھے۔

ریلی کے شرکاء نے ہاتھوں میں پلے کارڈز اور بینرز اٹھا رکھے تھے جن پر "فلسطین کا حقِ آزادی”، "اسرائیل کی جارحیت بند کرو” اور "فلسطینیوں کا ساتھ دو” جیسے نعرے درج تھے۔

اختتامی تقریب میں عمر خورشید سہمن نے کہا کہ آج کی ریلی نے ثابت کر دیا کہ اوچ شریف کے عوام عالمی مظالم کے خلاف بیدار ہیں اور ظلم و جبر کے ہر مظہر کے خلاف آواز بلند کرنے کے لیے ہمہ وقت تیار ہیں۔ ریلی کے شرکاء نے اس عزم کا اظہار کیا کہ وہ فلسطین کی آزادی تک اپنی حمایت جاری رکھیں گے۔

اوچ شریف،باغی ٹی وی(نامہ نگار حبیب خان)پرائس کنٹرول مجسٹریٹ اور فوکل پرسن ہیلتھ برائے ڈینگی سرویلنس، عمران حیدر سیال نے احمد پور شرقیہ میں غلام مرتضیٰ کے فاسٹ فوڈ پوائنٹ پر اچانک دورہ کیا۔دورے کا مقصد ڈینگی وائرس کی روک تھام کے حوالے سے کیے جانے والے حفاظتی اقدامات کا جائزہ لینا تھا۔

معائنے کے دوران فاسٹ فوڈ پوائنٹ پر تازہ پانی جمع پایا گیا، جو ڈینگی وائرس پھیلانے والے مچھروں کی افزائش کا باعث بن سکتا تھا۔ اس غفلت پر موقع پر ہی متعلقہ مالکان کو قانونی نوٹس جاری کر دیا گیا۔

اس موقع پر عمران حیدر سیال نے ہدایت جاری کرتے ہوئے کہا کہ تمام تجارتی مقامات پر صفائی کا خاص خیال رکھا جائے اور کسی بھی قسم کی لاپرواہی کو ہرگز برداشت نہیں کیا جائے گا۔
انہوں نے کہا کہ ڈینگی جیسے خطرناک مرض سے بچاؤ کے لیے حکومتی سطح پر بھرپور اقدامات جاری ہیں، لیکن عوام اور تاجر برادری کا مکمل تعاون بھی ضروری ہے تاکہ بیماری پر مؤثر قابو پایا جا سکے۔

عمران حیدر سیال نے مزید کہا کہ فاسٹ فوڈز سمیت دیگر عوامی مقامات پر ڈینگی سرویلنس کا عمل مسلسل جاری رہے گا اور آئندہ بھی کسی قسم کی غفلت پر سخت قانونی کارروائی کی جائے گی۔

اوچ شریف (باغی ٹی وی، نامہ نگار حبیب خان)اوچ شریف اور ملحقہ دیہی علاقوں میں گل گھوٹو اور منہ کھر کی مہلک وباؤں نے قیمتی مویشیوں کو لپیٹ میں لے لیا ہے۔ محکمہ لائیو اسٹاک کی مجرمانہ غفلت، غیر سنجیدگی اور ناکافی سہولیات کے باعث کسانوں کو شدید مالی نقصان اٹھانا پڑ رہا ہے۔ رتہڑ نہڑانوالی، رتہڑ لعل خان، دھوڑ کوٹ، سرور آباد، کوٹلہ رحمت شاہ اور اوچ موغلہ سمیت متعدد دیہات میں گائے، بیل اور بھینسیں اس مرض کا شکار ہو رہی ہیں، جبکہ روزانہ جانور ہلاک ہو رہے ہیں۔

مقامی مویشی پال محمد صفدر، قاری مجیب الرحمن اور محمد اصغر نے بتایا کہ رورل ویٹرنری ہسپتال اوچ شریف میں نہ ویکسین موجود ہے نہ ضروری ادویات۔ ہسپتال عملہ متاثرہ علاقوں کا دورہ کرنے سے گریز کرتا ہے اور کسانوں کو بازار سے مہنگی ادویات خریدنے کا مشورہ دیتا ہے۔ غریب کسان نہ تو یہ اخراجات برداشت کر سکتے ہیں نہ ہی بروقت علاج کروا سکتے ہیں، جس سے ان کے قیمتی جانور مر رہے ہیں۔ محمد صفدر کا لاکھوں روپے کا بچھڑا گزشتہ روز ہلاک ہو گیا، جو ان کے گھر کا واحد ذریعہ معاش تھا۔

کسانوں نے وزیراعلیٰ پنجاب مریم نواز سے فوری مداخلت، شفاف تحقیقات اور متعلقہ افسران کے خلاف کارروائی کا مطالبہ کیا ہے۔ انہوں نے ویٹرنری ہسپتالوں کو فعال کرنے، ویکسین و ادویات کی فراہمی اور مالی امداد کی اپیل کی ہے۔ عوامی حلقوں نے خدشہ ظاہر کیا کہ اگر بروقت اقدامات نہ کیے گئے تو وبا پھیل کر دیہی معیشت کو تباہ کر سکتی ہے۔

اوچ شریف،باغی ٹی وی( نامہ نگار حبیب خان) خیرپور ڈاہا میں جمعیت علماء اسلام کے زیرِ اہتمام فلسطینی عوام سے اظہارِ یکجہتی اور اسرائیلی مظالم کے خلاف ایک پرامن احتجاجی ریلی نکالی گئی۔

ریلی کی قیادت مولانا نذیر احمد وارن اور مولانا حفیظ الرحمن ساقی نے کی۔ کاظمی چوک سے شروع ہونے والی ریلی خالد بن ولید چوک پر اختتام پذیر ہوئی۔ شرکاء نے بینرز اور پلے کارڈز اٹھا رکھے تھے، جن پر فلسطینیوں کی حمایت میں نعرے درج تھے۔ انہوں نے "فلسطین زندہ باد”، "اسرائیل مردہ باد”، اور "ہم سب فلسطینی ہیں” کے نعرے لگائے۔

علما، تاجر، طلبہ، بزرگ، خواتین سمیت ہر طبقے سے بڑی تعداد میں لوگوں نے شرکت کی، جو فلسطینیوں کے ساتھ یکجہتی کا واضح پیغام تھا۔ اختتام پر قائدین نے عالمی برادری، اقوامِ متحدہ، اسلامی ممالک، اور انسانی حقوق کی تنظیموں سے اسرائیلی جارحیت کا نوٹس لینے اور فلسطینیوں کو ان کا حق دلانے کا مطالبہ کیا۔ انہوں نے امت مسلمہ سے متحد ہو کر آواز اٹھانے کی اپیل کی۔

ریلی پرامن طور پر ختم ہوئی، اور شرکاء نے فلسطین کی آزادی تک حمایت جاری رکھنے کا عزم کیا۔

اوچ شریف ،باغی ٹی وی(نامہ نگارحبیب خان) چولستان میں زندگی ایک المناک رقص پیش کر رہی ہے جہاں گزشتہ چھ ماہ سے نہروں میں پانی بند ہونے کے باعث مقامی روہیلے باشندے اپنی بقا کی جنگ لڑ رہے ہیں۔ پیاس سے بلکتے چولستانی عوام کی آہ و بکا کسی ایوان اقتدار تک نہیں پہنچ رہی اور ان کی فریاد صدا بہ صحرا ثابت ہو رہی ہے۔

چولستان کے مقامی باشندوں نے اپنی درد بھری کہانی بیان کرتے ہوئے کہا کہ گزشتہ چھ ماہ سے نہریں بند ہیں اور ان کی پینے کے پانی کی التجا کسی نے نہیں سنی۔ انہوں نے چیخ چیخ کر کہا کہ ان کے بچے اور جانور پیاس سے مر رہے ہیں اور انہیں زندگی بچانے کے لیے نقل مکانی پر مجبور کیا جا رہا ہے۔

اس سنگین صورتحال پر اپنے غم و غصے کا اظہار کرتے ہوئے مقامی باشندوں نے کہا کہ سابق ریاست بہاولپور نے اسلام اور پاکستان کے نام پر پاکستان میں شمولیت اختیار کی تھی، اور وہ (چولستانی) بھی پاکستانی ہیں۔ لیکن انہیں اس ملک کا حصہ ہونے کا یہ صلہ دیا جا رہا ہے کہ انہیں پیاسا مارا جا رہا ہے۔ ان کے پانی کے حقوق غصب کیے جا رہے ہیں۔

مقامی باشندوں نے بتایا کہ چولستان کی اہم ترین نہریں جن میں کھٹڑی نہر، ڈراور نہر، سالاری نہر، سیون آر نہر، فرید ون ایل نہر اور ون آر نہر شامل ہیں، گزشتہ چھ ماہ سے جان بوجھ کر بند کر دی گئی ہیں۔ دوسری جانب عباسیہ لنک کینال میں پانی کی فراوانی ہے لیکن اس نہر سے نکلنے والی چولستانیوں کی زندگی کی رگوں کو تختے لگا کر بند کر دیا گیا ہے۔ انہوں نے سوال اٹھایا کہ یہ کیسا انصاف ہے کہ ان کی صدیوں پرانی نہروں کو بند کر کے آباد کاری کے لیے چولستان کینال کے نام پر ایک نیا نہری منصوبہ بنایا جا رہا ہے۔

مقامی افراد نے پرزور مطالبہ کیا کہ زندہ انسانوں اور بے زبان جانوروں کی پیاس بجھانے کے لیے فوری طور پر بند کی گئی نہروں کو کھولا جائے۔ انہوں نے کہا کہ چولستان میں شدید گرمی کی لہر جاری ہے اور ان کے درد اور کرب کو محسوس کیا جائے۔

اوچ شریف،باغی ٹی وی(نامہ نگارحبیب خان)ضلع بہاولپور کی تحصیل احمد پور شرقیہ کی سب تحصیل اوچ شریف کے سرکاری سکولوں میں تعلیمی سال 2025 کا آغاز کتابوں کے بغیر ہو رہا ہے۔ پنجاب حکومت کی جانب سے فراہم کی جانے والی مفت نصابی کتب کی عدم دستیابی نے تدریسی عمل کو مفلوج کر کے رکھ دیا ہے، جس کے باعث اساتذہ، طلباء اور ان کے والدین شدید ذہنی دباؤ کا شکار ہیں۔

ذرائع کے مطابق گورنمنٹ سکولوں میں نویں اور دسویں جماعتوں کے مکمل نصاب کی کتابیں دستیاب نہیں ہیں جبکہ دیگر جماعتوں میں بھی ریاضی، انگریزی اور سائنس جیسے اہم مضامین کی کتابیں ناپید ہیں۔ حیران کن طور پر نئے تعلیمی پالیسی کے تحت نصاب میں تبدیلی کے باوجود سکولوں کو پرانی کتابوں سے پڑھانے کے احکامات جاری کیے گئے ہیں جو نہ صرف غیر مؤثر تدریس کا سبب بن رہا ہے بلکہ طلباء کے لیے ذہنی الجھن کا باعث بھی بن رہا ہے۔

اساتذہ کا کہنا ہے کہ محکمہ تعلیم کی جانب سے قائم کردہ بک ڈپو ویران پڑے ہیں اور طلباء روزانہ کتابیں حاصل کرنے کی امید میں سکولوں کے چکر لگا رہے ہیں۔ انہیں نامکمل اور غیر مطابقت پذیر کورسز کی بنیاد پر تعلیم دی جا رہی ہے، جس سے ان کے تعلیمی معیار پر سنگین اثرات مرتب ہو رہے ہیں۔ اس مایوس کن صورتحال میں والدین اپنی جیبوں سے بھاری رقم خرچ کر کے بازار سے مہنگی کتابیں خریدنے پر مجبور ہیں جو حکومت کی "مفت تعلیم” کی پالیسی پر ایک بڑا سوالیہ نشان ہے۔

اساتذہ، والدین اور سماجی حلقے اس بات پر متفق ہیں کہ اگر اس مسئلے کا فوری حل نہ نکالا گیا تو طلباء کا قیمتی تعلیمی وقت ضائع ہو جائے گا اور آئندہ بورڈ امتحانات کے نتائج بھی بری طرح متاثر ہوں گے خاص طور پر جب گرمیوں کی چھٹیاں بھی قریب ہیں۔

عوامی اور سماجی حلقوں نے وزیر تعلیم پنجاب رانا سکندر حیات، سیکرٹری ایجوکیشن لاہور اور ڈپٹی کمشنر بہاولپور سے پرزور مطالبہ کیا ہے کہ وہ اس سنگین مسئلے کا فوری نوٹس لیں اور ضلع بہاولپور سمیت پورے صوبے کے سرکاری سکولوں میں نصابی کتابوں کی مکمل اور بروقت فراہمی کو یقینی بنائیں تاکہ طلباء کا تعلیمی سال ضائع ہونے سے بچایا جا سکے۔

اوچ شریف،باغی ٹی وی(نامہ نگارحبیب خان) اوچ شریف کے نواحی علاقے اوچ گیلانی میں بلدیہ ورکس (بی ڈبلیو بہاولپور) کی ہدایت پر صفائی ستھرائی کا کام انتہائی تیزی سے جاری ہے۔ اس مہم کا بنیادی مقصد شہر کو صاف ستھرا بنانا، بیماریوں سے پاک ماحول فراہم کرنا اور شہریوں کو صحت مند زندگی کی سہولیات میسر کرنا ہے۔

بی ڈبلیو کے احکامات پر اوچ گیلانی کے 59 سپروائزری یونٹ میں صفائی کا کام سپروائزر بنیامین اور نائب سپروائزر کامران خان گشکوری کی زیرِ نگرانی تیزی سے پیش رفت کر رہا ہے۔ صفائی کے دوران علاقے کی تمام گلیوں، نالیوں اور نکاسی آب کے نظام کو مکمل طور پر صاف کیا جا رہا ہے۔ اس کے ساتھ ساتھ، مچھروں اور دیگر موذی بیماریوں سے بچاؤ کے لیے مؤثر جراثیم کش ادویات کا بھی باقاعدگی سے چھڑکاؤ کیا جا رہا ہے۔

سپروائزر بنیامین نے اس موقع پر بات کرتے ہوئے کہا کہ بلدیہ ورکس کی واضح ہدایات کی روشنی میں صفائی مہم کو ایک منظم انداز میں آگے بڑھایا جا رہا ہے اور تمام ٹیمیں پورے جوش و خروش کے ساتھ عوام کی خدمت میں مصروف ہیں۔ نائب سپروائزر کامران خان گشکوری نے مزید کہا کہ اوچ شریف شہر کی فلاح و بہبود بلدیہ ورکس کی اولین ترجیحات میں شامل ہے اور صفائی کا یہ سلسلہ روزانہ کی بنیاد پر بلاناغہ جاری رہے گا۔

شہریوں نے بلدیہ ورکس (بی ڈبلیو بہاولپور) کی ان شاندار کوششوں کو دل کی گہرائیوں سے سراہا اور انہیں خراجِ تحسین پیش کیا۔ انہوں نے پرزور مطالبہ کیا کہ صفائی کا یہ عمل مستقل بنیادوں پر جاری رہنا چاہیے تاکہ اوچ شریف کو ایک صاف ستھرا، خوبصورت اور بیماریوں سے محفوظ شہر بنایا جا سکے۔ شہریوں کا کہنا ہے کہ اس طرح کی مسلسل کاوشوں سے ہی ایک صحت مند معاشرہ تشکیل پایا جا سکتا ہے۔