Category: بہاولپور

اوچ شریف باغی ٹی وی (نامہ نگار حبیب خان) جمعیت علماء اسلام پی پی 250 اوچ شریف نے 27 اپریل کو مینار پاکستان لاہور میں ہونے والی عظیم الشان "یکجہتی فلسطین کانفرنس” میں بھرپور انداز میں قافلے کی صورت میں شرکت کا اعلان کیا ہے۔ یہ اعلان جمعیت علماء اسلام پی پی 250 کے سیکرٹری جنرل مولانا محمد بابر علی صدیقی نے اپنے ایک بیان میں کیا۔

مولانا محمد بابر علی صدیقی نے کہا کہ یہ کانفرنس جمعیت علماء اسلام پنجاب کے زیرِ اہتمام منعقد کی جا رہی ہے، جس میں صوبہ بھر سے لاکھوں افراد شرکت کریں گے۔ اس موقع پر قائد جمعیت، امیر مرکزیہ جمعیت علماء اسلام پاکستان مولانا فضل الرحمٰن خصوصی خطاب کریں گے جبکہ دیگر مرکزی و صوبائی قائدین بھی شریک ہوں گے۔

مولانا بابر علی صدیقی نے فلسطینی عوام پر جاری مظالم کی شدید مذمت کرتے ہوئے مسلم حکمرانوں کی خاموشی کو امت مسلمہ کے لیے لمحہ فکریہ قرار دیا۔ انہوں نے ان سیاسی عناصر پر سخت تنقید کی جو ماضی میں اپنی قیادت کی حمایت میں ملک اور افواج کے خلاف نکلنے کو جہاد اکبر کہتے تھے لیکن آج فلسطین کے مظلوم مسلمانوں کے حق میں آواز بلند کرنے سے گریزاں ہیں۔ ان کا کہنا تھا کہ ان کا یہ طرزِ عمل ان کے اسرائیل سے تعلقات کو ظاہر کرتا ہے۔

مولانا صدیقی نے مزید کہا کہ علماء کرام نے اسرائیل کے خلاف فتویٰ جہاد جاری کر رکھا ہے، لیکن بعض لوگ اپنے وقتی مفادات کی خاطر اسے نظر انداز کر رہے ہیں۔ انہوں نے یقین ظاہر کیا کہ فتح بالآخر مظلوم فلسطینیوں کی ہی ہوگی اور دنیا دیکھے گی کہ حق کی آواز کو دبایا نہیں جا سکتا۔

مولانا بابر علی صدیقی نے تمام اہل ایمان سے اپیل کی کہ وہ 27 اپریل کو مینار پاکستان لاہور میں ہونے والی اس اہم کانفرنس میں بھرپور شرکت کر کے اپنے مظلوم فلسطینی بھائیوں سے یکجہتی کا اظہار کریں اور دنیا کو یہ پیغام دیں کہ امت مسلمہ آج بھی ایک جسم کی مانند متحد ہے۔

اوچ شریف باغی ٹی وی (نامہ نگار حبیب خان): ضلع بھر میں ڈینگی کے پھیلاؤ کو روکنے کے لیے حکومتی سطح پر اقدامات تیز کر دیے گئے ہیں۔ ڈپٹی کمشنر ڈاکٹر فرحان فاروق کی زیر صدارت ڈسٹرکٹ ایمرجنسی ریسپانس کمیٹی (DERC) کے ایک اہم اجلاس میں انسدادِ ڈینگی کے لیے مختلف محکموں کی کارکردگی کا تفصیلی جائزہ لیا گیا۔

اجلاس میں محکمہ صحت، تعلیم، لوکل گورنمنٹ، واسا اور دیگر متعلقہ اداروں کے افسران نے شرکت کی۔ ڈپٹی کمشنر ڈاکٹر فرحان فاروق نے واضح طور پر کہا کہ ڈینگی ایک سنگین عوامی صحت کا مسئلہ ہے اور اس سے مؤثر طریقے سے نمٹنے کے لیے تمام محکموں کو فعال کردار ادا کرنا ہوگا۔

ڈاکٹر فرحان فاروق نے انسدادِ ڈینگی مہم میں کسی بھی قسم کی کوتاہی پر سخت انتباہ جاری کرتے ہوئے کہا کہ غفلت برتنے والے افسران اور اہلکاروں کے خلاف سخت قانونی کارروائی عمل میں لائی جائے گی۔ انہوں نے تمام ٹیموں کو ہدایت کی کہ وہ فیلڈ میں زیادہ فعال اور منظم انداز میں اپنی سرگرمیاں جاری رکھیں، خاص طور پر انڈور اور آؤٹ ڈور سرویلنس، صفائی اور اسپرے کے عمل کو مسلسل جاری رکھا جائے۔ ڈپٹی کمشنر نے ضلع کے تمام ڈینگی ہاٹ اسپاٹس کی مسلسل نگرانی کرنے کی ہدایت کی اور کہا کہ ان مقامات پر فوری طور پر صفائی، اسپرے اور لاروا کنٹرول کے اقدامات کو یقینی بنایا جائے۔

ڈاکٹر فرحان فاروق نے PEF، PIEAMA اور ہوٹلوں سمیت نجی تعلیمی اداروں کی کارکردگی پر عدم اطمینان کا اظہار کرتے ہوئے کہا کہ تمام تعلیمی ادارے اپنے انسدادِ ڈینگی اقدامات کی تفصیلی رپورٹ متعلقہ اینڈرائیڈ ایپ پر فوری طور پر اپ لوڈ کریں، بصورت دیگر سخت کارروائی کرتے ہوئے رپورٹ نہ دینے والے اداروں کو سیل کر دیا جائے گا۔

انہوں نے زور دیتے ہوئے کہا کہ انسدادِ ڈینگی کی ذمہ داری صرف سرکاری اداروں پر عائد نہیں ہوتی بلکہ ہر شہری کو اس میں اپنا حصہ ڈالنا ہوگا۔ انہوں نے عوام سے اپیل کی کہ وہ اپنے گھروں اور اردگرد کے ماحول کو صاف ستھرا رکھیں، کسی بھی جگہ پانی جمع نہ ہونے دیں اور ڈینگی کی علامات ظاہر ہونے پر فوری طور پر قریبی اسپتال سے رجوع کریں۔ ڈپٹی کمشنر نے تمام متعلقہ محکموں کو روزانہ کی بنیاد پر رپورٹنگ اور مؤثر مانیٹرنگ کا نظام اپنانے کی ہدایت کی تاکہ کسی بھی کوتاہی یا لاپرواہی کا بروقت تدارک کیا جا سکے۔

اوچ شریف باغی ٹی وی (نامہ نگار حبیب خان) اوچ شریف اور گردونواح کے علاقوں میں گندم کی کٹائی کے سیزن کے دوران مبینہ طور پر بعض پولیس رضا کاروں کی جانب سے لوٹ مار کی شکایات سامنے آئی ہیں، جس سے دیہی کسانوں کا جینا محال ہو گیا ہے اور انہوں نے ضلعی انتظامیہ سے فوری کارروائی کا مطالبہ کیا ہے۔

تفصیلات کے مطابق، اوچ شریف اور اس کے ملحقہ دیہات میں گندم کی فصل کی کٹائی شروع ہوتے ہی کچھ پولیس رضا کار مبینہ طور پر غیر قانونی وصولیوں میں ملوث ہو گئے ہیں۔ مقامی ذرائع کا کہنا ہے کہ یہ رضا کار خود کو قانون نافذ کرنے والے اہلکار ظاہر کر کے کسانوں پر دباؤ ڈال رہے ہیں اور ان سے جبراً گندم کی بوریاں، نقدی یا فصل کا حصہ وصول کر رہے ہیں۔

عینی شاہدین کے مطابق یہ افراد کھیتوں میں آ کر کسانوں کو ہراساں کرتے ہیں اور گندم کی کٹائی یا نقل و حمل کے وقت غیر قانونی طور پر اپنا حصہ مانگتے ہیں۔ انکار کرنے پر انہیں سنگین نتائج کی دھمکیاں دی جاتی ہیں، جس کے باعث بہت سے متاثرہ کسان خوف کے مارے خاموشی اختیار کیے ہوئے ہیں کیونکہ انہیں کسی قسم کی کارروائی نہ ہونے کا خدشہ ہے۔

کسانوں کا کہنا ہے کہ گندم ان کی پورے سال کی محنت کا نتیجہ ہے اور اس پر ناجائز قبضہ ان کے معاشی قتل کے مترادف ہے۔ بعض مقامی افراد نے یہ بھی الزام عائد کیا ہے کہ ان رضا کاروں کو بااثر شخصیات کی پشت پناہی حاصل ہے، جس کی وجہ سے وہ سرعام ایسی کارروائیاں کر رہے ہیں اور قانون کی گرفت سے محفوظ ہیں۔

عوامی اور سماجی حلقوں نے ڈپٹی کمشنر بہاولپور اور ڈی پی او بہاولپور سے پرزور مطالبہ کیا ہے کہ وہ اس سنگین صورتحال کا فوری نوٹس لیں اور ملوث رضا کاروں کے خلاف سخت کارروائی عمل میں لائیں۔ ان کا کہنا ہے کہ بدعنوان عناصر کے خلاف سخت اقدامات اٹھائے جائیں اور دیہی علاقوں میں کسانوں کو تحفظ فراہم کیا جائے تاکہ گندم کا سیزن امن و امان اور شفاف طریقے سے مکمل ہو سکے

اوچ شریف (نامہ نگار حبیب خان) پاکستان جرنلسٹ ایسوسی ایشن بہاولپور ڈویژن کا ایک اہم اجلاس مقامی دفتر میں منعقد ہوا، جس میں صحافیوں کو درپیش مسائل، پیشہ ورانہ تربیت اور تنظیمی استحکام پر تفصیلی گفتگو کی گئی۔

اجلاس کی صدارت ایسوسی ایشن کے نائب صدر جنوبی پنجاب ڈاکٹر سید کاشف بخاری نے کی جبکہ انفارمیشن سیکریٹری ملک جمشید عطا، سینئر صحافیوں اور مختلف شہروں کے نمائندگان نے کثیر تعداد میں شرکت کی۔

اجلاس میں متفقہ طور پر صحافیوں کے حقوق کے تحفظ اور ان کے پیشہ ورانہ وقار میں اضافے کے لیے جلد ہی کارڈز کی تقسیم اور نوٹیفیکیشن کی ایک پروقار تقریب منعقد کرنے کا فیصلہ کیا گیا۔ اس کے علاوہ، تنظیمی نظم و ضبط کو بہتر بنانے اور اندرونی معاملات کو مزید مؤثر بنانے کے لیے مختلف کمیٹیوں کی تشکیل پر بھی غور کیا گیا۔

صدر بہاولپور ڈویژن چوہدری عثمان نے اپنے خطاب میں کہا کہ صحافت ایک مقدس پیشہ ہے اور اس کے وقار کو برقرار رکھنا سب کی مشترکہ ذمہ داری ہے۔ انہوں نے یقین دلایا کہ پاکستان جرنلسٹ ایسوسی ایشن اپنے ممبران کی فلاح و بہبود اور آزادی صحافت کے تحفظ کے لیے ہر ممکن کوششیں جاری رکھے گی۔

اجلاس کے اختتام پر شرکاء کا شکریہ ادا کیا گیا اور مستقبل کے لائحہ عمل پر تبادلہ خیال کے بعد اجلاس ختم ہوا۔

اوچ شریف (نامہ نگار حبیب خان) اوچ شریف کے نواحی علاقے دھوڑکوٹ میں عظیم روحانی پیشوا پیر سید شیر شاہ حقانی کی قیادت میں فلسطینی بھائیوں سے اظہارِ یکجہتی کے لیے ایک عظیم الشان احتجاجی ریلی نکالی گئی۔ ریلی میں سینکڑوں افراد نے شرکت کی جن میں معزز علماء کرام، مقامی دکاندار، نوجوان، بزرگ اور طلبہ شامل تھے۔

تفصیلات کے مطابق اوچ شریف کے نواحی علاقے دھوڑکوٹ میں معروف روحانی شخصیت پیر سید شیر شاہ حقانی کی قیادت میں فلسطینی مظلوموں سے اظہارِ یکجہتی کے لیے ایک تاریخی احتجاجی ریلی نکالی گئی، جس نے علاقے کی فضاؤں کو لبیک یا اقصیٰ اور مردہ باد اسرائیل کے نعروں سے گونجا دیا۔ ریلی میں مقامی علماء کرام مولانا طاہر زمان، استاد ریاض، جام اشرف سمیت سیاسی، سماجی و مذہبی حلقوں کی بڑی تعداد شریک ہوئی۔ عوام کا جذبہ دیدنی تھا، نوجوانوں نے فلسطینی پرچم اٹھا رکھے تھے۔

ریلی کا ایک اہم اور تاریخی لمحہ اس وقت دیکھنے میں آیا جب مقامی دکانداروں نے پیر سید شیر شاہ حقانی کی موجودگی میں احتجاجاً اسرائیلی ساختہ مشروبات کو سڑک پر لا کر توڑ دیا۔ بوتلوں کے ٹکڑے سڑک پر بکھر گئے اور عوام نے نعرے بلند کرتے ہوئے ان مصنوعات کے مکمل بائیکاٹ کا اعلان کیا۔ اس موقع پر شرکاء کی آنکھوں میں فلسطینی مظلوموں کے لیے درد اور غصہ نمایاں تھا۔

علماء کرام نے اپنے خطابات میں کہا کہ اسرائیلی مظالم دنیا کی تاریخ کا سیاہ باب ہیں، اور مسلم امہ کی خاموشی مزید المیے کو جنم دے رہی ہے۔ انہوں نے عالم اسلام سے مطالبہ کیا کہ وہ متحد ہو کر قبلۂ اول اور مظلوم فلسطینیوں کے تحفظ کے لیے مضبوط حکمت عملی اختیار کریں۔

پیر سید شیر شاہ حقانی نے ریلی کے شرکاء سے خطاب کرتے ہوئے کہا: "یہ وقت خوابِ غفلت سے جاگنے کا ہے۔ جو قومیں مظلوموں کا ساتھ نہیں دیتیں، تاریخ اُنہیں معاف نہیں کرتی۔ آج ہم نے نہ صرف آواز بلند کی ہے بلکہ عملی طور پر اسرائیلی مصنوعات کا بائیکاٹ کر کے دشمن کو پیغام دیا ہے کہ مسلمان جاگ چکا ہے۔”

ریلی کے اختتام پر پیر سید شیر شاہ حقانی نے انتہائی رقت آمیز دعا کرائی، جس میں فلسطینی شہداء کے درجات کی بلندی، زخمیوں کی شفا، اور امتِ مسلمہ کی بیداری کے لیے دعائیں کی گئیں۔ عوام کی آنکھیں اشکبار تھیں اور دلوں میں ایک نئی بیداری کی چنگاری سلگ رہی تھی۔