Category: بہاولپور

اوچ شریف (باغی ٹی وی، نامہ نگار حبیب خان)اوچ شریف سول سوسائٹی کے صدر عمر خورشید سہمن نے مقامی مارکیٹ میں جنرل اسٹورز پر اسرائیلی مصنوعات کی موجودگی پر سخت ردعمل کا اظہار کیا ہے اور ان مصنوعات کے فوری بائیکاٹ کا مطالبہ کیا ہے۔

انہوں نے کہا کہ جو مصنوعات اسرائیل میں تیار ہوتی ہیں یا اسرائیلی کمپنیوں سے منسلک ہیں، ان کی خرید و فروخت دراصل فلسطینی مسلمانوں کے قاتلوں اور ظالموں کی مالی مدد کے مترادف ہے۔ انہوں نے اسٹور مالکان کو سختی سے خبردار کیا کہ وہ اپنی دکانوں سے اسرائیلی مصنوعات یا ان کمپنیوں سے تعلق رکھنے والے برانڈز فوری طور پر ہٹا دیں۔

عمر خورشید سہمن نے کہا کہ فلسطین میں معصوم بچوں، عورتوں اور بزرگوں پر بم برسائے جا رہے ہیں، ان کے گھروں کو ملبے کا ڈھیر بنایا جا رہا ہے اور ایسے حالات میں اگر ہم اسرائیلی مصنوعات خریدتے ہیں تو یہ نہ صرف ہمارے ایمان اور ضمیر کے خلاف ہے بلکہ انسانیت کے بھی خلاف ہے۔

انہوں نے کہا کہ صرف سوشل میڈیا پر فلسطین کے حق میں نعرے لگانے یا پوسٹس کرنے سے کوئی فرق نہیں پڑے گا، اصل جدوجہد اور حقیقی حمایت تب ہی ممکن ہے جب ہم عملی طور پر اسرائیلی مصنوعات کا بائیکاٹ کریں اور اپنی روزمرہ زندگی میں مقامی یا مسلم ممالک کی مصنوعات کو ترجیح دیں۔

عمر خورشید سہمن نے تاجر برادری سے مطالبہ کیا کہ وہ اپنی اخلاقی اور انسانی ذمہ داری کو سمجھیں اور اسرائیلی مصنوعات کی فروخت بند کرکے فلسطینی عوام کے ساتھ یکجہتی کا عملی مظاہرہ کریں۔ انہوں نے شہریوں سے اپیل کی کہ وہ اپنے گھروں، دفاتر اور کاروبار میں ایسی مصنوعات کے استعمال سے مکمل گریز کریں تاکہ دشمن کی معیشت کو نقصان پہنچایا جا سکے۔

اوچ شریف،باغی ٹی وی ( نامہ نگار حبیب خان): اوچ شریف میں ممتاز روحانی پیشوا پیر سید محمد شاہ جرار کی قیادت میں فلسطینی عوام سے اظہارِ یکجہتی کے لیے ایک عظیم الشان اور پُرامن احتجاجی ریلی منعقد ہوئی۔ یہ ریلی جامعہ قاسمیہ بھٹہ ککس سے شروع ہوئی اور شہر کے مرکزی مقام الشمس چوک پر اختتام پذیر ہوئی۔ ریلی میں علمائے کرام، وکلا، صحافیوں، تاجروں، طلبہ اور عام شہریوں سمیت ہزاروں افراد نے پرجوش شرکت کی۔

شرکاء میں مولانا اسداللہ مدنی، مولانا جلیل احمد عباسی، مفتی شبیر الحق، مولانا شاکر قاسمی، مولانا راشد فاروقی، مولانا اعجاز الحق، مولانا عبداللہ مستوئی، قاری سعد مدنی، میاں محمد عامر صدیقی (صدر پریس کلب اوچ شریف)، خواجہ سہیل عباس، عمر خورشید سہمن، شفیق شہزاد، عادل بخاری، راؤ فاروق، قاضی عمران بھٹہ اور دیگر معروف شخصیات شامل تھیں۔ شرکاء نے ہاتھوں میں فلسطین کے پرچم، بینرز اور پلے کارڈز اٹھا رکھے تھے، جن پر فلسطینیوں کی آزادی کے حق میں اور اسرائیلی مظالم کے خلاف نعرے درج تھے۔ ریلی کے دوران فلک شگاف نعروں سے فضا گونج اٹھی۔

احتجاج کے دوران شرکاء نے اسرائیلی جارحیت کے خلاف شدید غم و غصے کا اظہار کیا اور علامتی طور پر اسرائیلی پرچم نذرِ آتش کیا۔ اس کے ساتھ ہی فلسطین کی جلد آزادی اور شہداء کے درجات کی بلندی کے لیے خصوصی دعائیں مانگی گئیں۔ ریلی کا ماحول مکمل طور پر پرامن اور منظم رہا، جبکہ شرکاء کا جذبہ قابلِ دید تھا۔

الشمس چوک پر شرکاء سے خطاب کرتے ہوئے علمائے کرام نے کہا کہ "فلسطین کا مسئلہ عالمِ اسلام کا مشترکہ درد ہے اور اس کا پُرامن حل عالمی امن کے لیے ناگزیر ہے۔” انہوں نے امریکہ اور برطانیہ سمیت عالمی طاقتوں پر کڑی تنقید کی اور الزام لگایا کہ یہ ممالک اسرائیلی ظلم و ستم کی سرپرستی کر رہے ہیں۔ ان کا مزید کہنا تھا کہ "فلسطینی عوام نے آزادی کی خاطر لازوال قربانیاں دی ہیں اور ان کا حوصلہ آج بھی ناقابلِ شکست ہے۔”

اوچ شریف سول سوسائٹی کے صدر عمر خورشید سہمن نے خطاب میں کہا کہ "اسرائیل نے معاہدوں کی پامالی اور بدعہدی کی تاریخی روایت کو برقرار رکھا ہے۔” انہوں نے 57 اسلامی ممالک کے سربراہان سے اپیل کی کہ وہ خاموش تماشائی نہ بنیں، بلکہ اتحاد اور عملی اقدامات کے ذریعے فلسطینیوں کی حمایت کریں تاکہ اسرائیل کو مظلوم فلسطینی سرزمین سے بے دخل کیا جا سکے۔

ریلی کے اختتام پر شرکاء نے عزم کیا کہ وہ فلسطینی عوام کے ساتھ ہر ممکن یکجہتی جاری رکھیں گے۔ یہ اجتماع نہ صرف ایک احتجاج بلکہ فلسطین کے حق میں اوچ شریف کے عوام کے غیر متزلزل عزم کا واضح ثبوت تھا۔

اوچ شریف (نامہ نگار،حبیب خان) اوچ شریف نے انسانیت کی ایک شاندار مثال پیش کرتے ہوئے اس وقت سب کی توجہ اپنی جانب مبذول کرالی جب مقامی سول سوسائٹی نے بیک وقت 50 یتیم اور غریب بچیوں کی اجتماعی شادیوں کا کامیاب انعقاد کیا۔ اس قابل تحسین اقدام پر اوچ شریف پریس کلب کے صدر میاں محمد عامر صدیقی اور دیگر عہدیداران نے سول سوسائٹی کے صدر عمر خورشید سہمن اور ان کی ٹیم کو زبردست خراج تحسین پیش کیا۔

اوچ شریف سول سوسائٹی کے زیر اہتمام منعقدہ اس اجتماعی شادیوں کی تقریب میں علاقے کی مختلف فلاحی تنظیموں اور مخیر حضرات نے دل کھول کر حصہ لیا۔ اس انسانیت دوست اقدام کا بنیادی مقصد معاشرے کے ان پسے ہوئے طبقات کی مدد کرنا تھا جو معاشی مشکلات کے باعث اپنی بیٹیوں کے فرض سے سبکدوش ہونے میں دشواری محسوس کرتے ہیں۔

اوچ شریف پریس کلب کے صدر میاں محمد عامر صدیقی نے اس موقع پر اپنے خیالات کا اظہار کرتے ہوئے کہا کہ یہ ایک "بے مثال اور انتہائی نیک عمل” ہے جس نے نہ صرف ان 50 بچیوں کی زندگیوں میں خوشیاں بھر دیں بلکہ پورے معاشرے کو خدمت انسانیت کا ایک مثبت پیغام بھی دیا۔ انہوں نے عمر خورشید سہمن اور ان کی ٹیم کی انتھک محنت اور جذبے کو سراہتے ہوئے اسے "واقعی قابل ستائش” قرار دیا۔

پریس کلب کے جنرل سیکرٹری حبیب اللہ خان نے اس کامیاب پروگرام کی تعریف کرتے ہوئے کہا کہ ایسے اقدامات معاشرے میں اپنی ذمہ داریوں کا احساس دلاتے ہیں اور باہمی تعاون کے ذریعے معاشرتی ہم آہنگی اور بھائی چارے کو فروغ دیتے ہیں۔ چیئرمین خواجہ غلام شبیر نے ان اجتماعی شادیوں کو ایک "روشن مثال” قرار دیا کہ اگر سب مل کر کام کریں تو بڑے سے بڑے معاشرتی مسائل بھی حل کیے جا سکتے ہیں۔ ایکشن کمیٹی کے چیئرمین محمد ساجد خان نے اس اقدام کو اوچ شریف کے عوام کے لیے ایک "نیا شعور” قرار دیتے ہوئے ایسی فلاحی سرگرمیوں کو معاشرتی مسائل کے حل کی جانب ایک "اہم قدم” قرار دیا۔

اوچ شریف سول سوسائٹی کے صدر عمر خورشید سہمن نے پریس کلب کے عہدیداران کو انٹرویو دیتے ہوئے بتایا کہ ان کا مقصد صرف شادیوں کا اہتمام کرنا نہیں تھا بلکہ ان بچیوں کو عزت و وقار کے ساتھ ایک نئی زندگی شروع کرنے کا موقع فراہم کرنا تھا۔ انہوں نے اس کامیاب پروگرام کی تکمیل پر اپنی خوشی کا اظہار کیا اور بتایا کہ اس میں شادی کے تمام ضروری سامان، لباس اور دیگر تقریبات کا مکمل انتظام کیا گیا تھا، جس سے نہ صرف بچیوں بلکہ ان کے خاندانوں کو بھی اطمینان نصیب ہوا۔

مقامی کمیونٹی نے اس شاندار اقدام پر عمر خورشید سہمن اور ان کی ٹیم کو دل کی گہرائیوں سے خراج تحسین پیش کیا ہے۔ اوچ شریف کی سول سوسائٹی کی یہ فلاحی سرگرمیاں نہ صرف ان بچیوں کی زندگی میں خوشیاں لانے کا ذریعہ بنیں بلکہ پورے علاقے میں خدمت انسانیت کا ایک نیا معیار بھی قائم کر گئیں۔ یہ ایک واضح پیغام ہے کہ اگر معاشرے کا ہر فرد دوسروں کی مدد کے لیے آگے بڑھے تو کسی بھی مشکل کا سامنا کیا جا سکتا ہے۔

اوچ شریف،باغی ٹی وی(نامہ نگار حبیب خان)اوچ شریف جو کہ اولیائے کرام کے مزارات کی زیارت کے لیے مشہور ہے صفائی کی بدترین حالت کا شکار ہے۔ شہر کے اہم مذہبی مقامات جیسے حضرت جلال الدین سرخ پوش اور حضرت صفی الدین حقانی کے درگاہوں کے قریب سڑکوں پر گندگی کے ڈھیر لگے ہوئے ہیں، جس سے نہ صرف ان مقدس مقامات کی اہمیت متاثر ہو رہی ہے بلکہ شہر میں آنے والے سیاحوں اور گورنمنٹ گرلز ہائر سیکنڈری سکول کی طالبات کو روزانہ مشکلات کا سامنا ہے۔

میونسپل کمیٹی کی غفلت اور صفائی کی ناقص صورتحال نے شہریوں کی زندگیوں کو متاثر کر دیا ہے۔ حالیہ دنوں میں گندگی کے ڈھیر پھینکنے کی تصاویر میڈیا میں آئیں جو انتظامیہ کی ناکامی کی نشاندہی کرتی ہیں۔ شہر کے مرکزی علاقوں میں صفائی نہ ہونے سے نہ صرف شہریوں کی عزت نفس مجروح ہو رہی ہے بلکہ صحت کے مسائل بھی بڑھ گئے ہیں۔

اس صورتحال نے حکومت پنجاب کے "صاف ستھرا پنجاب” کے دعووں کو بھی سوالیہ نشان بنا دیا ہے۔ شہریوں اور سیاحوں کا کہنا ہے کہ اوچ شریف جیسے مقدس شہر میں آنے والے افراد کو صاف ستھرا ماحول فراہم کیا جانا چاہیے تھا مگر گندگی کے ڈھیر کی وجہ سے پریشانی سے دوچار ہونا پڑا۔ ایک طالبہ نے کہا "ہمیں روزانہ سکول جانے کے لیے ان راستوں سے گزرنا پڑتا ہے، جہاں گندگی کی وجہ سے نہ صرف بدبو پھیلی ہوئی ہے بلکہ ہمیں پڑھائی میں بھی دقت سامنا کرنا پڑرہا ہے۔

شہریوں نے انتظامیہ سے فوری صفائی کے اقدامات کی اپیل کی ہے تاکہ نہ صرف شہر کا تقدس بحال ہو بلکہ زائرین اور طالبات کو پریشانی سے بچایا جا سکے۔ مقامی افراد نے حکومت سے درخواست کی ہے کہ وہ اوچ شریف کی صفائی ستھرائی کے حوالے سے فوری اقدامات کرے تاکہ یہ شہر اپنے حقیقی مقام پر واپس آ سکے۔

اوچ شریف،باغی ٹی وی( نامہ نگار،حبیب خان) حبیب بینک لمیٹڈ (ایچ بی ایل) کی اوچ شریف برانچ بند کرکے اسے احمد پور شرقیہ منتقل کرنے کے فیصلے نے علاقے میں شدید بے چینی پیدا کر دی ہے۔ مقامی تاجروں، سرکاری ملازمین، آن لائن کاروبار کرنے والے افراد اور دیہاتیوں نے بینک انتظامیہ کے اس اقدام پر شدید تحفظات کا اظہار کرتے ہوئے اسے علاقے کی معیشت پر کاری ضرب قرار دیا ہے۔

علاقہ مکینوں کا کہنا ہے کہ اوچ شریف اور مضافاتی دیہات کے سینکڑوں افراد روزمرہ لین دین، تنخواہوں، پنشن، کاروباری امور اور آن لائن بینکنگ کے لیے اسی برانچ پر انحصار کرتے تھے۔ اب احمد پور شرقیہ جانے سے نہ صرف اضافی خرچ برداشت کرنا پڑے گا بلکہ خواتین، بزرگ شہری اور دور دراز سے آنے والے دیہاتی شدید مشکلات سے دوچار ہو جائیں گے۔

مقامی کاروباری طبقہ اور عوام نے چیئرمین حبیب بینک سے مطالبہ کیا ہے کہ وہ عوامی مشکلات اور علاقائی معاشی حالات کو دیکھتے ہوئے اوچ شریف برانچ بند کرنے کا فیصلہ فوری طور پر واپس لیں۔ ان کا کہنا ہے کہ اگر یہ فیصلہ واپس نہ لیا گیا تو احتجاج کا دائرہ مزید وسیع کیا جائے گا۔ عوامی نمائندوں نے بھی بینک انتظامیہ سے اپیل کی ہے کہ عوامی ریلیف کو مقدم رکھتے ہوئے اس فیصلے پر نظرثانی کی جائے۔

اوچ شریف ( نامہ نگارحبیب خان)صدر ہانیہ ویلفیئر ٹرسٹ اوچ شریف محمد مدثر نے ایک اہم پریس کانفرنس سے خطاب کرتے ہوئے غزہ میں اسرائیلی ظلم و بربریت کی شدید الفاظ میں مذمت کی اور عالمی برادری کو سخت الفاظ میں پیغام دیا کہ وہ خاموش تماشائی بننے کے بجائے فوری اور عملی اقدامات اٹھائے تاکہ نہتے فلسطینی عوام کو انصاف اور امن مل سکے۔

محمد مدثر نے کہا کہ غزہ میں جاری ظلم انسانیت کے چہرے پر سیاہ دھبہ ہے۔ معصوم بچوں، عورتوں اور بوڑھوں کا بے رحمانہ قتل ناقابل برداشت اور قابل مذمت ہے۔ دنیا کا ہر باشعور انسان اس ظلم کے خلاف آواز اٹھائے، یہی وقت کی سب سے بڑی ضرورت ہے۔

محمد مدثر نے کہا کہ ہانیہ ویلفیئر ٹرسٹ ہر سطح پر فلسطینی عوام کے ساتھ اظہار یکجہتی کرتا ہے اور ہم نے فیصلہ کیا ہے کہ غزہ کے مظلوم عوام کے لیے ہر ممکن مدد، آواز بلند کرنے اور آگاہی پھیلانے کے لیے تمام فورمز استعمال کیے جائیں گے۔

انہوں نے کہا کہ ہمارا مقصد نہ صرف مظلوم فلسطینیوں کے زخموں پر مرہم رکھنا ہے بلکہ دنیا بھر کے ضمیر کو جھنجھوڑنا ہے تاکہ عالمی طاقتیں اس انسانیت سوز عمل کے خلاف کھل کر میدان میں آئیں۔

محمد مدثر کا کہنا تھاکہ اقوام متحدہ، او آئی سی، انسانی حقوق کی تنظیموں اور دنیا بھر کے تمام اسلامی ممالک سے مطالبہ کیا کہ وہ غزہ میں جاری قتل و غارت بند کرانے کے لیے فوری کردار ادا کریں۔

انہوں نے کہا کہ دنیا کی خاموشی مظلوموں پر ظلم کو مزید بڑھا رہی ہے، اس لیے اب وقت آ گیا ہے کہ عملی اقدامات کیے جائیں تاکہ فلسطینی عوام کو انصاف مل سکےانہوں نے اس عزم کا اظہار کیا کہ ہانیہ ویلفیئر ٹرسٹ غزہ کے متاثرین کے لیے ممکنہ امداد فراہم کرنے کو تیار ہے اور بہت جلد اس حوالے سے عملی اقدامات بھی اٹھائے جائیں گے۔ہم نہ صرف مالی امداد بلکہ دعاؤں اور آواز کے ذریعے بھی فلسطینی بھائیوں کے ساتھ کھڑے ہیں۔