Category: بہاولپور

اوچ شریف(باغی ٹی وی،نامہ نگارحبیب خان)قومی شاہراہ پر واقع پنجند پل کی خستہ حالی نے مقامی شہریوں اور مسافروں کو شدید خوف میں مبتلا کر دیا ہے، لیکن متعلقہ حکام تاحال خاموش تماشائی بنے ہوئے ہیں۔

یہ پل ضلع مظفرگڑھ اور ضلع بہاولپور کو ملانے والا واحد ذریعہ ہے، جہاں روزانہ ہزاروں گاڑیاں گزرتی ہیں۔ مسلسل غفلت اور عدم توجہی کے باعث پل کی ساخت بری طرح کمزور ہو چکی ہے۔ اس کے فرش سے میٹریل اُکھڑ چکا ہے، آہنی سریے نمایاں ہو چکے ہیں، ستونوں میں دراڑیں پڑ چکی ہیں اور پانی کے بہاؤ نے بنیادوں کو بھی کمزور کر دیا ہے۔

اطراف کی حفاظتی دیواریں بھی ٹوٹ پھوٹ کا شکار ہیں، جو کسی بھی وقت گر کر بڑے جانی و مالی نقصان کا سبب بن سکتی ہیں۔ مقامی شہریوں کا کہنا ہے کہ یہ پل کسی بھی وقت حادثے کا شکار ہو سکتا ہے، لیکن حکام خوابِ غفلت میں ہیں۔

اہلِ علاقہ اور روزانہ سفر کرنے والے شہریوں نے اعلیٰ حکام سے مطالبہ کیا ہے کہ پنجند پل کی فوری مرمت کی جائے تاکہ کسی بڑے سانحے سے قبل عوام کو محفوظ بنایا جا سکے۔

اوچ شریف (باغی ٹی وی، نامہ نگار حبیب خان) اوچ شریف میں ڈینگی وائرس کے ممکنہ پھیلاؤ کے پیش نظر سویٹ کارخانوں میں صفائی کی سنگین خلاف ورزیاں سامنے آئیں، جس پر قانونی نوٹس جاری کر دیے گئے۔

پرائس کنٹرول مجسٹریٹ اور فوکل پرسن ہیلتھ ڈینگی انسپکٹر عمران حیدر سیال نے الشمس چوک میں زم زم سویٹ کارخانوں کا ہنگامی دورہ کیا، جہاں صفائی کی ناقص صورتحال دیکھ کر سخت برہمی کا اظہار کیا۔ واٹر کولرز زنگ آلود، ٹینکیاں گندگی سے بھری ہوئی اور مجموعی صفائی کے انتظامات ناقابل قبول پائے گئے، جس سے ڈینگی کے پھیلاؤ کے شدید خدشات پیدا ہو گئے۔

انسپکٹر نے فوری ایکشن لیتے ہوئے کارخانہ مالکان محمد عمران، محمد خالد اور محمد اقبال کو ڈینگی ایکٹ کی دفعہ 5 کے تحت قانونی نوٹس جاری کر دیے اور سختی سے ہدایت کی کہ صفائی ستھرائی کے معیار کو فوری بہتر بنایا جائے۔ انہوں نے خبردار کیا کہ مچھر کی افزائش روکنے کے لیے تمام ممکنہ اقدامات نہ کیے گئے تو سخت قانونی کارروائی عمل میں لائی جائے گی۔

عمران حیدر سیال نے واضح کیا کہ شہریوں کی صحت پر کسی قسم کا سمجھوتہ نہیں کیا جائے گا اور صفائی کی خلاف ورزیوں کے خلاف بلاامتیاز کارروائیاں جاری رہیں گی۔ انہوں نے مزید کہا کہ اوچ شریف کے عوام کو ڈینگی سمیت دیگر وبائی امراض سے محفوظ رکھنے کے لیے کارخانوں کی مسلسل نگرانی اور چیکنگ کا سلسلہ جاری رکھا جائے گا۔

اوچ شریف(نامہ نگارحبیب خان) محکمہ زراعت کی ایک خستہ حال عمارت گدھوں اور جرائم پیشہ افراد کا مسکن بن گئی ہے۔ یہ عمارت، جو کبھی زراعت کے فروغ کے لیے استعمال ہوتی تھی، اب حکومتی غفلت کا شکار ہے۔ مقامی شہریوں نے حکام سے فوری کارروائی کا مطالبہ کیا ہے تاکہ اس عمارت کو جرائم پیشہ افراد اور گدھوں سے پاک کیا جا سکے۔

یہ عمارت، جو نصف صدی سے زیادہ پرانی ہے، مکمل طور پر بوسیدہ ہو چکی ہے۔ اس کی دیواریں اور چھتیں ٹوٹ پھوٹ کا شکار ہیں، اور اس کی تزئین و آرائش میں کوئی بہتری نہیں کی گئی۔ نتیجتاً، یہ عمارت کھنڈرات میں تبدیل ہو چکی ہے اور دفتر میں آنے والے افراد کے لیے ایک مستقل خطرہ بن چکی ہے۔

اس عمارت میں کام کرنے والے ملازمین اور روزانہ آنے والے کسانوں کو شدید مشکلات کا سامنا کرنا پڑتا ہے۔ عمارت کی بدبو اور گندگی نے یہاں کی فضا کو ناقابل برداشت بنا دیا ہے۔ مزید برآں، یہ عمارت نشہ کرنے والوں اور جرائم پیشہ افراد کے لیے پناہ گاہ بن چکی ہے۔

شہریوں نے حکام سے فوری کارروائی کی درخواست کی ہے۔ ان کا کہنا ہے کہ اس عمارت کی مرمت اور صفائی کے لیے فوری اقدامات کیے جائیں تاکہ نہ صرف اس کی حالت کو بہتر بنایا جا سکے بلکہ یہاں آنے والے افراد کی جان و مال کی حفاظت بھی یقینی بنائی جا سکے۔

اوچ شریف(نامہ نگارحبیب خان ) فیملی پارک گدھوں کی چراگاہ بن گیا،انتظامیہ کی آنکھیں بند

اوچ شریف کے فیملی پارک کی حالت زار پر ایک نظر ڈالی جائے تو یہ پارک اب تفریح گاہ کے بجائے گدھوں کی چراگاہ بن چکا ہے۔ مقامی انتظامیہ کی غفلت اور لاپرواہی کی وجہ سے پارک میں صفائی کا نظام درہم برہم ہو چکا ہے، جس کے باعث پارک میں گندگی کے ڈھیر اور بدبو پھیل رہی ہے۔

شہریوں کی شکایات کے مطابق، پارک کے گراسی گراؤنڈ میں قریبی مکینوں نے گدھوں کو باندھ دیا ہے، جو کھلے عام وہاں چرتے نظر آتے ہیں۔ اس کے علاوہ پارک میں گندے پانی کے جوہڑ اور کچرے کے ڈھیر بھی موجود ہیں، جس سے پارک کا ماحول انتہائی غیر صحت بخش ہو چکا ہے۔

پارک میں فوارے بھی برسوں سے غیر فعال ہیں اور آوارہ کتوں کی تعداد میں بھی اضافہ ہو چکا ہے، جس سے شہریوں میں خوف و ہراس پایا جاتا ہے۔ مقامی افراد نے میونسپل کمیٹی کی کارکردگی پر سوال اٹھاتے ہوئے کہا ہے کہ پارک کی صفائی اور دیکھ بھال کے لیے کوئی خاطر خواہ اقدامات نہیں کیے جا رہے ہیں۔

شہریوں نے ڈپٹی کمشنر بہاولپور سے اپیل کی ہے کہ وہ فیملی پارک کی حالت زار کا فوری نوٹس لیں اور اس کی صفائی اور بحالی کے لیے اقدامات کریں۔ ان کا کہنا ہے کہ پارک کی بحالی سے نہ صرف شہریوں کو تفریح کا موقع ملے گا بلکہ علاقے کی خوبصورتی میں بھی اضافہ ہوگا۔

اوچ شریف (نامہ نگار باغی ٹی وی، حبیب خان): اوچ شریف کے نواحی علاقے رسول پور میں واقع "ننگا پل” کی خستہ حالی نے مقامی عوام کی زندگیوں کو شدید خطرات میں مبتلا کر دیا ہے۔ مقامی افراد نے اس پل کو "ننگا پل” کا لقب دے دیا ہے کیونکہ اس کی تباہی نے شہریوں کو نہ صرف روزانہ کی آمد و رفت میں مشکلات کا شکار کر دیا ہے، بلکہ اس کی بدتر حالت نے ایک بڑے حادثے کا خدشہ بھی بڑھا دیا ہے۔

یہ پل کئی دیہاتوں کو قومی شاہراہِ کے ایل پی روڈ اور سی پیک سے جوڑنے کا اہم ذریعہ ہے، جس پر روزانہ ہزاروں افراد کا گزر ہوتا ہے۔ تاہم، پل کے پشتے کمزور ہو چکے ہیں اور حفاظتی جنگلے ٹوٹ پھوٹ کا شکار ہیں، جس کی وجہ سے یہاں اکثر حادثات پیش آ رہے ہیں۔ اس پل کو استعمال کرنے والے کسان، طلباء اور عام شہری ہر وقت خطرے میں مبتلا رہتے ہیں۔ سکول کے اوقات میں بچوں کا گزرنا اور خواتین کا اس پل سے گزرنا مزید خطرناک ہو چکا ہے۔

مقامی کسانوں کا کہنا ہے کہ یہ پل ان کے زرعی اجناس کی منڈیوں تک پہنچنے کا واحد ذریعہ ہے، اور اس کی خراب حالت نے ان کے کاروبار کو بری طرح متاثر کیا ہے۔ وہ اپنی اجناس بروقت منڈیوں تک پہنچانے میں ناکام ہو رہے ہیں، جس سے انہیں مالی نقصان اٹھانا پڑ رہا ہے۔

اس پل کی ناقص حالت کے باعث روزانہ کی کاروباری سرگرمیاں بھی متاثر ہو رہی ہیں۔ عوام نے حکام سے مطالبہ کیا ہے کہ فوری طور پر اس پل کی مرمت کی جائے اور اس کی حفاظت کے لیے ضروری انتظامات کیے جائیں تاکہ کسی بڑے حادثے سے بچا جا سکے۔ ان کا کہنا ہے کہ اگر اس پل کی مرمت اور توسیع نہ کی گئی تو یہ "ننگا پل” ایک سانحے کا سبب بن سکتا ہے۔

مقامی عوام نے کمشنر بہاول پور، ڈپٹی کمشنر بہاول، وزیر اعلیٰ پنجاب مریم نواز شریف اور دیگر اعلیٰ حکام سے فوری طور پر ہنگامی اقدامات اٹھانے کی اپیل کی ہے تاکہ اس پل کی حالت بہتر ہو سکے اور عوام کی زندگی کو محفوظ بنایا جا سکے۔

اوچ شریف،باغی ٹی وی (نامہ نگارحبیب خان) پولیس کی مبینہ ملی بھگت سے اغوا کا معمہ الجھ گیا، 19 سالہ شادی شدہ لڑکی سات دن بعد بھی بازیاب نہ ہو سکی۔ تھانہ چنی گوٹھ کی حدود میں پیش آنے والے اس واقعہ نے پولیس کی کارکردگی پر سنگین سوالات کھڑے کر دیے ہیں۔

تفصیلات کے مطابق تھانہ چنی گوٹھ کی حدود میں 19 سالہ شادی شدہ لڑکی کے اغوا کا معمہ سات دن گزرنے کے بعد بھی حل نہ ہو سکا۔ پولیس نے محمد یونس نامی ملزم کو تو گرفتار کر لیا ہے، لیکن نہ تو لڑکی کو بازیاب کروا سکی ہے اور نہ ہی دیگر ملزمان کو گرفتار کر پائی ہے۔

مغویہ کی والدہ رخسانہ بی بی نے الزام لگایا ہے کہ پولیس رشوت لے کر ملزمان کی پشت پناہی کر رہی ہے۔ ان کے مطابق ان کی 19 سالہ بیٹی ‘م’ کی شادی موضع طاہر والی میں ملک منور سے ہوئی تھی۔ ملک منور نے اپنی بیوی کے نام اڑھائی ایکڑ زمین منتقل کی جس پر اس کے بڑے بھائی ملک شبیر نے ناراضگی کا اظہار کیا۔ ملک شبیر نے میاں بیوی پر دباؤ ڈالنا شروع کر دیا کہ وہ زمین واپس اس کے نام کر دیں۔ انکار پر ملک شبیر نے لڑکی کے والدین کو سنگین نتائج کی دھمکیاں دیں۔

9 مارچ کو جب ‘م’ اپنے والدین سے مل کر واپس سسرال جا رہی تھی تو ملک شبیر نے اپنے بیٹے اعظم، بھائی یونس اور دو نامعلوم افراد کی مدد سے اسے اغوا کر لیا۔ لڑکی کی والدہ رخسانہ بی بی نے تھانہ چنی گوٹھ میں مقدمہ درج کرانے کی کوشش کی، لیکن چار دن تک پولیس نے ٹال مٹول سے کام لیا۔ بالآخر مقدمہ تو درج ہو گیا لیکن پولیس ابھی تک نہ تو لڑکی کو بازیاب کروا سکی ہے اور نہ ہی تمام ملزمان کو گرفتار کر سکی ہے۔

متاثرہ خاندان نے ڈی پی او بہاولپور، آئی جی پنجاب اور وزیر اعلیٰ پنجاب سے اپیل کی ہے کہ تفتیشی سب انسپکٹر عبدالرزاق کو تبدیل کر کے کسی ایماندار افسر کو تفتیش سونپی جائے اور ان کی بیٹی کو بازیاب کروایا جائے۔