Category: بہاولپور

اوچ شریف باغی ٹی وی (نامہ نگار حبیب خان ) تاریخی و قدیمی شہر اوچ شریف میں رمضان المبارک کے دوران مختلف علاقوں سے سینکڑوں زائرین اور شہری نماز تراویح، شب بیداری اور دیگر عبادات کے لیے مزارات کا رخ کرتے ہیں، مگر سیکیورٹی کے ناقص انتظامات نے عقیدت مندوں کو شدید پریشانی میں مبتلا کر دیا ہے۔ شہر میں نصب واک تھرو گیٹس مکمل طور پر غیر فعال ہو چکے ہیں، جس سے کسی بھی ناخوشگوار واقعے کا خطرہ بڑھ گیا ہے۔

رمضان کے مقدس مہینے میں زائرین کی تعداد میں نمایاں اضافہ ہو جاتا ہے، اور لوگ دور دراز علاقوں سے اوچ شریف آ کر روحانی فیوض و برکات حاصل کرتے ہیں۔ تاہم، مزارات پر سیکیورٹی کے موثر انتظامات نہ ہونے کی وجہ سے عوام میں مایوسی پائی جاتی ہے۔ خاص طور پر نمازِ تراویح اور سحری کے اوقات میں لوگوں کی بڑی تعداد موجود ہوتی ہے، مگر واک تھرو گیٹس کی خرابی اور مناسب چیکنگ کا نہ ہونا کسی بڑے سانحے کا سبب بن سکتا ہے۔

عوامی اور سماجی حلقوں نے حکومت اور ضلعی انتظامیہ سے مطالبہ کیا ہے کہ رمضان المبارک کے دوران مزارات پر فوری طور پر جدید واک تھرو گیٹس نصب کیے جائیں، سی سی ٹی وی کیمرے فعال کیے جائیں اور پولیس نفری میں اضافہ کیا جائے تاکہ زائرین اور مقامی شہری خود کو محفوظ محسوس کریں۔

شہریوں کا کہنا ہے کہ رمضان عبادات اور روحانی سکون کا مہینہ ہے، اور حکومت کو اس معاملے پر سنجیدگی کا مظاہرہ کرتے ہوئے فوری اقدامات کرنے چاہئیں تاکہ زائرین بلا خوف و خطر اپنی عبادات جاری رکھ سکیں۔

اوچ شریف،باغی ٹی وی (نامہ نگارحبیب خان) اوچ شریف کا نواحی علاقہ خرم پور بنیادی سہولیات سے محروم ہے۔ علاقے کا واحد کچا راستہ مکینوں کے لیے عذاب بن گیا ہے۔ بارش کے دوران راستہ کیچڑ اور دلدل میں تبدیل ہو جاتا ہے جس سے اسکول کے بچے، مزدور اور بیمار افراد بری طرح متاثر ہوتے ہیں۔

تفصیلات کے مطابق، اوچ شریف کے نواحی علاقے خرم پور کی بستی جھوک بلوچاں کے مکینوں کی مشکلات کم ہونے کا نام نہیں لے رہی ہیں۔ بنیادی سہولیات کی عدم دستیابی نے عوام کی زندگی اجیرن کر دی ہے۔ اہلیانِ علاقہ نے نو منتخب ایم این اے مخدوم سید سمیع الحسن گیلانی سے اپیل کی ہے کہ وہ فوری طور پر سولنگ تعمیر کرائیں تاکہ مقامی آبادی کو اس دیرینہ مسئلے سے نجات مل سکے۔

علاقہ مکینوں کا کہنا ہے کہ ان کے علاقے کا واحد راستہ مکمل طور پر کچا ہے جس کی وجہ سے معمولاتِ زندگی بری طرح متاثر ہو رہے ہیں۔ بارش کے دوران یہ راستہ دلدل اور کیچڑ میں بدل جاتا ہے جس سے نہ صرف آمد و رفت مشکل ہو جاتی ہے بلکہ اسپتال جانے والے مریضوں کو بھی سخت دشواری کا سامنا کرنا پڑتا ہے۔

مکینوں نے بتایا کہ بستی جھوک بلوچاں کے لوگ برسوں سے بنیادی سہولتوں سے محروم ہیں جبکہ دیگر علاقوں میں ترقیاتی منصوبے مکمل کیے جا رہے ہیں۔ انہوں نے کہا کہ اگر بستی میں سولنگ تعمیر کر دی جائے تو عوام کی مشکلات کا ازالہ ممکن ہے۔

اہلیانِ علاقہ کا کہنا ہے کہ ہر الیکشن کے موقع پر سیاستدان سہولیات فراہم کرنے کے دعوے کرتے ہیں مگر کامیابی کے بعد عوامی مسائل کو نظر انداز کر دیا جاتا ہے۔ انہوں نے کہا کہ بستی جھوک بلوچاں کے عوام نے ہمیشہ حکومتی دعوے سنے مگر عملی طور پر انہیں کچھ نہیں ملا۔

علاقہ مکینوں کا کہنا ہے کہ ترقیاتی منصوبے کسی ایک جماعت یا فرد کی جاگیر نہیں بلکہ عوام کا بنیادی حق ہیں۔ حکومت کو چاہیے کہ وہ تمام علاقوں میں مساوی ترقیاتی کام کروائے اور پس ماندہ بستیوں کو نظر انداز نہ کرے۔

اہلیانِ علاقہ نے مطالبہ کیا کہ ان کی مشکلات کو سنجیدگی سے لیا جائے اور جلد از جلد سولنگ تعمیر کر کے انہیں بنیادی سہولت فراہم کی جائے۔ بصورت دیگر وہ سخت احتجاج پر مجبور ہوں گے۔

اوچ شریف،باغی ٹی وی (نامہ نگارحبیب خان) اوچ شریف میں ڈینگی کے ممکنہ خطرات کے پیشِ نظر پرائس کنٹرول مجسٹریٹ اور فوکل پرسن ڈینگی، ہیلتھ آفیسر عمران حیدر سیال نے انسدادِ ڈینگی مہم کے تحت مختلف مقامات کا معائنہ کیا۔

تفصیلات کے مطابق، عمران حیدر سیال نے اوچ شریف اربن میں المدنیہ اور فیصل ٹائر شاپ کا دورہ کیا اور وہاں موجود افراد کو ڈینگی سے بچاؤ کے حوالے سے آگاہ کیا۔ انہوں نے ٹائر شاپس پر کھلے عام رکھے گئے پانی کے برتنوں اور دیگر ایسی جگہوں کا معائنہ کیا جہاں ڈینگی مچھر کی افزائش ہو سکتی ہے۔

دکانداروں کو ہدایت کی گئی کہ وہ اپنی دکانوں اور اردگرد کے ماحول کو صاف ستھرا رکھیں اور کہیں بھی پانی کھڑا نہ ہونے دیں۔ انہوں نے مزید کہا کہ حکومتِ پنجاب کی ہدایات کے مطابق ڈینگی کے خلاف سخت اقدامات کیے جا رہے ہیں اور کسی بھی قسم کی غفلت برداشت نہیں کی جائے گی۔

اس موقع پر موجود دکانداروں اور شہریوں کو ڈینگی سے بچاؤ کی احتیاطی تدابیر اپنانے پر زور دیا گیا، جن میں صفائی کا خاص خیال رکھنا، پانی کو کھڑا ہونے سے روکنا اور مچھر مار ادویات کا استعمال شامل ہے۔

ہیلتھ آفیسر نے شہریوں سے اپیل کی کہ وہ محکمہ صحت کی جانب سے جاری کردہ احتیاطی تدابیر پر مکمل عمل کریں تاکہ ڈینگی کے خطرے کو کم سے کم کیا جا سکے۔

عمران حیدر سیال نے عوامی مقامات اور دکانوں پر خصوصی نگرانی رکھنے کا اعلان کرتے ہوئے کہا کہ اگر کسی بھی جگہ ڈینگی لاروا پایا گیا تو سخت قانونی کارروائی عمل میں لائی جائے گی۔ انہوں نے کہا کہ حکومت عوامی صحت کے تحفظ کے لیے ہر ممکن اقدامات کر رہی ہے اور شہریوں کو بھی اس مہم میں بھرپور تعاون کرنا چاہیے۔

اوچ شریف،باغی ٹی وی (نامہ نگارحبیب خان) پاکستان کے تاریخی اور روحانی ورثے کا حامل اوچ شریف کا 700 سالہ قدیم قبرستان حکومتی عدم توجہی اور بلدیاتی اداروں کی مجرمانہ غفلت کی بدترین مثال بن چکا ہے۔ مخدوم جہانیاں جہاں گشت رحمہ اللہ علیہ کے مقبرے کے قریب واقع اس قبرستان میں جگہ جگہ کچرے کے ڈھیر، آوارہ جانوروں کی بھرمار اور بدبو و تعفن نے مقدس مقام کی حرمت کو پامال کر رکھا ہے۔ مقامی افراد اور زائرین کی بارہا شکایات کے باوجود حکام نے کوئی اقدامات نہیں کیے، قبروں کی بے حرمتی، بدبو اور گندگی سے زائرین پریشان، قبروں کی بے حرمتی پر شہری سراپا احتجاج

تفصیلات کے مطابق تاریخی قبرستان میں دفن اولیائے کرام، بزرگانِ دین اور کئی صدیوں سے یہاں مدفون افراد کی قبریں گندگی اور کوڑے کے ڈھیروں میں دب چکی ہیں۔ کچھ قبروں کے کتبے اور تعویذ کچرے کے اندر غائب ہو چکے ہیں، جبکہ ٹوٹی ہوئی دیواروں کی وجہ سے قبرستان میں آوارہ جانور دندناتے پھر رہے ہیں۔ شہریوں نے صورتحال کو انتہائی افسوسناک اور قابلِ مذمت قرار دیتے ہوئے کہا کہ یہ صرف ایک قبرستان نہیں، بلکہ ہمارے آبا و اجداد اور روحانی شخصیات کی آخری آرام گاہ ہے، جس کی بے حرمتی ناقابلِ برداشت ہے۔

شہریوں کا کہنا ہے کہ پنجاب حکومت کی جانب سے "صاف ستھرا پنجاب” مہم کے دعوے کیے جا رہے ہیں، مگر اوچ شریف کا تاریخی قبرستان ان بلند و بانگ دعوؤں کی قلعی کھول رہا ہے۔ شہریوں کا کہنا ہے کہ وزیر اعلیٰ پنجاب مریم نواز شریف کے وعدے صرف کاغذی ثابت ہو رہے ہیں، جبکہ حقیقت میں عوام بنیادی سہولیات سے بھی محروم ہیں۔

معروف سماجی و مذہبی شخصیت مخدوم سید شان بخاری نے شدید غم و غصے کا اظہار کرتے ہوئے کہا کہ "ہم نے بارہا متعلقہ اداروں کو درخواست دی کہ قبرستان کی صفائی کو یقینی بنایا جائے، مگر ہمیں ہر بار نظر انداز کر دیا گیا۔ یہ 700 سال پرانی جگہ ہماری تاریخ اور روحانی ورثہ ہے، اس کی بے حرمتی کو کسی صورت برداشت نہیں کیا جائے گا۔ اگر حکومت نے فوری اقدامات نہ کیے تو ہم بھرپور عوامی احتجاج کریں گے۔”

اہلیانِ اوچ شریف نے ڈپٹی کمشنر بہاولپور، اسسٹنٹ کمشنر احمد پور شرقیہ اور میونسپل کمیٹی کے اعلیٰ حکام سے فوری نوٹس لینے کا مطالبہ کیا ہے۔ شہریوں کا کہنا ہے کہ اگر قبرستان کی صفائی اور بحالی کے لیے فوری اقدامات نہ کیے گئے تو عدالت سے رجوع کیا جائے گا اور بھرپور عوامی احتجاج کیا جائے گا۔

انہوں نے کہا کہ یہ قبرستان محض ایک عام قبرستان نہیں بلکہ تاریخی، مذہبی اور قومی ورثہ ہے، جس کی حفاظت حکومت اور متعلقہ اداروں کی اولین ذمہ داری ہے۔ اگر اس مسئلے کو حل نہ کیا گیا تو یہ صرف اوچ شریف ہی نہیں بلکہ پوری قوم کے لیے شرمندگی کا باعث بن سکتا ہے۔