Category: بہاولپور

اوچ شریف (نامہ نگار حبیب خان) پرائیس کنٹرول مجسٹریٹ اور فوکل پرسن ہیلتھ انسپکٹر ڈینگی عمران حیدر سیال نے اوچ شریف اور گردونواح کے سکولوں کا دورہ کیا۔ اس دورے کا مقصد طلباء میں ڈینگی بخار کے بارے میں آگاہی پیدا کرنا اور سکولوں میں صفائی ستھرائی کی صورتحال کا جائزہ لینا تھا۔

عمران حیدر سیال نے سکول انتظامیہ کو ہدایت کی کہ وہ اپنے اداروں میں صفائی ستھرائی کے انتظامات کو بہتر بنائیں تاکہ ڈینگی کے پھیلاؤ کو روکا جا سکے۔ انہوں نے سکولوں میں پانی کھڑا نہ ہونے دینے کی تاکید کی، کیونکہ یہ ڈینگی وائرس کے پھیلاؤ کا اہم سبب ہے۔

انہوں نے طلباء کو ڈینگی کی علامات، بچاؤ کے طریقوں اور صحت کی حفاظت کے اہم اقدامات سے آگاہ کیا۔ انہوں نے طلباء اور اساتذہ کو موسمی تبدیلیوں کے ساتھ احتیاطی تدابیر اختیار کرنے کی بھی تلقین کی۔

عمران حیدر سیال نے سکولوں کے صفائی کے معیار کا معائنہ کیا اور انہیں اپنے ارد گرد کے ماحول کو صاف رکھنے کی ہدایت کی۔ انہوں نے کہا کہ حکومت سکولوں میں صفائی کے انتظامات کی نگرانی جاری رکھے گی۔

دورے کے دوران، طلباء نے بھی سوالات کیے اور اساتذہ نے عمران حیدر سیال کی فراہم کردہ معلومات کا خیرمقدم کیا۔ عمران حیدر سیال نے کہا کہ یہ دورے آئندہ بھی جاری رہیں گے اور تمام سکولوں میں صحت اور صفائی کے بارے میں آگاہی فراہم کی جائے گی۔

اوچ شریف (نامہ نگار حبیب خان) انجمن تاجران احمد پور شرقیہ مرکز امن کمیٹی نے 21 رمضان المبارک کو یومِ علی علیہ السلام کے موقع پر شہر میں امن و امان کے قیام، منبر و محراب سے محبت اور اتحاد کے فروغ کے لیے ایک اہم اجلاس منعقد کیا۔ اجلاس کی صدارت ڈپٹی کمشنر ڈاکٹر فرحان فاروق اور ڈی پی او اسد سرفراز خان نے کی۔

اجلاس میں انجمن تاجران کے جنرل سیکرٹری سردار آفتاب احمد خان ڈاھر، مخدوم سید سبطین حیدر بخاری، صدر محمد ارشد راجپوت، مذہبی رہنما مولانا عبدالعزیز فیضی، میر سید عمر سعود اور یوسف کھوکھر نے خصوصی شرکت کی۔

اجلاس میں یومِ علیؓ کے موقع پر سیکیورٹی انتظامات کا جائزہ لیا گیا اور شہر میں امن و امان برقرار رکھنے کے لیے تجاویز پر تبادلہ خیال کیا گیا۔ مقررین نے منبر و محراب سے محبت اور اتحاد کے فروغ کی ضرورت پر زور دیا اور فلسفہ انسانیت کے پیغام کو عام کرنے کا عزم کیا۔

اجلاس کے اختتام پر ملک و قوم کے استحکام کے لیے خصوصی دعائیں مانگی گئیں۔

اوچ شریف (نامہ نگار حبیب خان) ہائر ایجوکیشن ڈیپارٹمنٹ حکومت پنجاب کی ہدایات پر گورنمنٹ صادق عباس گریجویٹ کالج ڈیرہ نواب صاحب احمد پور شرقیہ میں گرین پلانٹیشن پروگرام کے تحت شجرکاری مہم کا آغاز کیا گیا۔ کالج کے پرنسپل پروفیسر شاہد حسین مغل نے پودا لگا کر مہم کا افتتاح کیا۔

اس موقع پر کالج میں سرسبز ماحول اور درختوں کی اہمیت پر ایک شاندار سیمینار کا انعقاد کیا گیا، جس میں مقررین نے درختوں کی افادیت پر روشنی ڈالی۔ سیمینار کے اختتام پر شجرکاری آگاہی ریلی بھی نکالی گئی۔

پرنسپل پروفیسر شاہد حسین مغل نے اپنے خطاب میں کہا کہ درخت لگانا صدقہ جاریہ ہے۔ وائس پرنسپل ڈاکٹر سیف اللہ جامعی نے کہا کہ سرسبز ماحول میں تعلیمی سرگرمیوں سے طلباء کی کارکردگی میں بہتری آتی ہے۔ صدر شعبہ سرائیکی ڈاکٹر محمد الطاف ڈاھر جلالوی نے کہا کہ تازہ ہوا اور خوبصورت ماحول سے طلباء کی ذہنی اور جسمانی صلاحیتوں میں اضافہ ہوتا ہے۔ انہوں نے نوجوان نسل کے لیے زیادہ سے زیادہ درخت لگانے کی ضرورت پر زور دیا۔

اس موقع پر پروفیسر ظفر اقبال، پروفیسر سید رب نواز شاہ بخاری، پروفیسر احمد نواز بھٹو، پروفیسر عمران صارم اور سی ٹی آئیز لیکچررز سمیت طلباء کی کثیر تعداد موجود تھی۔

اوچ شریف (نامہ نگار حبیب خان) اوچ سول سوسائٹی کے صدر عمر خورشید سہمن نے میڈیا سے گفتگو کرتے ہوئے اعلان کیا ہے کہ ان کی تنظیم 6 اپریل 2025 کو العباس میرج ہال، خیر پور ڈاہا روڈ، اوچ شریف میں 50 یتیم اور غریب بچیوں کی اجتماعی شادیوں کا اہتمام کر رہی ہے۔

عمر خورشید سہمن نے کہا کہ یہ فلاحی اقدام ان بچیوں کی زندگیوں میں خوشیاں لانے اور ان کے مستقبل کو روشن کرنے کے لیے کیا جا رہا ہے۔ انہوں نے مزید کہا کہ اوچ سول سوسائٹی معاشرتی طور پر کمزور طبقات کے لیے ایک بہتر ماحول فراہم کرنے کی کوشش کر رہی ہے تاکہ وہ بھی اپنے حقوق اور زندگی کے تمام پہلوؤں سے استفادہ کر سکیں۔

انہوں نے اس تقریب کو ایک اجتماعی کوشش قرار دیتے ہوئے علاقے کے لوگوں سے مدد، تعاون اور دعا کی اپیل کی۔ انہوں نے کہا کہ اس طرح کے فلاحی منصوبوں کے ذریعے نہ صرف ان بچیوں کی زندگی میں خوشیاں لائی جا رہی ہیں بلکہ پورے معاشرے میں محبت، ہمدردی اور بھائی چارے کے پیغامات بھی پھیلائے جا رہے ہیں۔

عمر خورشید سہمن نے اوچ سول سوسائٹی کے دیگر اراکین کی محنت کو سراہتے ہوئے کہا کہ وہ اس کام کے لیے دل و جان سے مصروف ہیں اور تقریب میں شریک ہونے والے ہر فرد کو ایک پروقار اور یادگار تجربہ فراہم کرنے کی کوشش کر رہے ہیں۔

انہوں نے امید ظاہر کی کہ اس فلاحی پروگرام کی کامیابی سے انہیں علاقے میں مزید ایسے اقدامات اٹھانے کا حوصلہ ملے گا، تاکہ معاشرے کے ہر فرد کی زندگی میں خوشیاں لائی جا سکیں۔

اس موقع پر جگر گوشہ غزالی زماں حضرت قبلہ سید حامد سعید شاہ کاظمی آف ملتان شریف کی جانب سے خصوصی دعا کا اہتمام کیا جائے گا، جس کا مقصد اس فلاحی منصوبے کی کامیابی اور ان بچیوں کی زندگیوں میں خوشحالی کا آغاز ہے۔

اوچ شریف، باغی ٹی وی(نامہ نگار ، حبیب خان): اوچ شریف کے نواحی علاقے یونین کونسل بن والا میں جاری سولنگ منصوبے میں کرپشن کے الزامات سامنے آئے ہیں۔ مقامی افراد نے شکایت کی ہے کہ اس ترقیاتی منصوبے میں ناقص میٹریل استعمال کیا جا رہا ہے، جس سے سڑکوں کی پائیداری پر سوالات اٹھ رہے ہیں۔

مقامی شہریوں ے مطابق ٹھیکیداروں اور ضلع کونسل کے افسران کی ملی بھگت سے پرانی سولنگ اکھاڑ کر نیچے اور اوپر ریت ڈالے بغیر ناقص اینٹوں کا استعمال کیا جا رہا ہے۔ اس سے سڑکوں کی حالت بدتر ہو گئی ہے اور عوامی مفادات کو نقصان پہنچا ہے۔

عوامی و سماجی حلقوں نے اس صورتحال پر شدید غم و غصہ کا اظہار کیا ہے۔ ان کا کہنا ہے کہ یہ منصوبہ علاقے کی ترقی کے بجائے مزید مشکلات کا سبب بن رہا ہے۔ انہوں نے انتظامیہ سے فوری اور سخت اقدامات کا مطالبہ کیا ہے، جس میں کرپشن کی تحقیقات اور ملوث افراد کے خلاف قانونی کارروائی شامل ہے۔

اہلیان علاقہ نے ڈپٹی کمشنر بہاولپور ڈاکٹر فرحان فاروق سے اپیل کی ہے کہ وہ اس منصوبے کی مکمل تحقیقات کرائیں اور ملوث افراد کو بے نقاب کریں۔ شہریوں کا کہنا ہے کہ ضلع کونسل کے افسران اور ٹھیکیداروں کی ملی بھگت واضح طور پر نظر آ رہی ہے۔

اوچ شریف (باغی ٹی وی، نامہ نگار حبیب خان) چائے کے شوقین افراد ہوشیار ہو جائیں! "ٹپال تیز دم” چائے کے مالکان نے منافع خوری کا ایک نیا اور مکروہ طریقہ ایجاد کر لیا ہے۔ وہ چائے کی پتی کی مقدار کم کر کے اور انٹرنیٹ پیکیجز کا جھانسہ دے کر عوام کی صحت اور جیب دونوں پر ڈاکہ ڈال رہے ہیں۔

تفصیلات کے مطابق چائے کے بڑے برانڈز نے اپنی مصنوعات کی قیمتوں میں اضافہ تو کیا ہے، لیکن پتی کی مقدار میں واضح کمی کر دی ہے۔ 20 روپے کے پیکٹ میں اب پہلے سے آدھی پتی ہوتی ہے، جس سے صارفین کا پیسہ ضائع ہو رہا ہے اور چائے کا معیار بھی گر رہا ہے۔

دوسری جانب چائے مالکان نے ایک نیا "گیم” شروع کیا ہے۔ وہ 20 روپے کی چائے کی پتی خریدنے پر 100MB مفت انٹرنیٹ دینے کا وعدہ کرتے ہیں۔ یہ محض ایک چال ہے تاکہ لوگ زیادہ چائے خریدیں۔ ماہرین کا کہنا ہے کہ یہ پیکیجز عوام کی جیب اور صحت دونوں کے لیے نقصان دہ ہیں۔ انٹرنیٹ کا جھانسہ دے کر چائے کی زیادہ مقدار خریدنے پر مجبور کیا جا رہا ہے۔

چائے کے زیادہ استعمال سے نیند کی کمی، ذہنی دباؤ اور ہاضمے کے مسائل بڑھ رہے ہیں۔ انٹرنیٹ کی لالچ میں لوگ مزید چائے پی رہے ہیں، جو ان کی صحت کے لیے انتہائی مضر ہے۔ اس کے علاوہ، وہ انٹرنیٹ پیکیجز کے چکر میں زیادہ چائے خرید کر اپنا مالی نقصان بھی کر رہے ہیں۔ پتی کم اور پیسے زیادہ، یہ ہے "ٹپال تیز دم” چائے کا اصل کاروبار۔

ماہرین نے اس مہم پر سخت تشویش کا اظہار کیا ہے اور حکومت سے مطالبہ کیا ہے کہ فوری طور پر اس طرح کے اشتہارات پر پابندی لگائی جائے۔ عوام کی صحت اور مالی حالت کو بچانے کے لیے فوری اقدامات کی ضرورت ہے۔

اوچ شریف ،باغی ٹی وی (نامہ نگارحبیب خان) گورنمنٹ صادق عباس گریجویٹ کالج ڈیرہ نواب صاحب میں وزیراعلیٰ پنجاب مریم نواز شریف کی ہائیر ایجوکیشن کمیشن لیپ ٹاپ اسکیم کے مستحق طلباء کے لیے عملی اقدامات کو سراہا جا رہا ہے۔

اس موقع پر کالج کے پرنسپل پروفیسر شاہد حسین مغل نے کہا کہ کالج آئی ٹی انتظامیہ ٹیم ورک کی شکل میں وائس پرنسپل پروفیسر ڈاکٹر سیف اللہ جامعی، پروفیسر ڈاکٹر محمد الطاف ڈاہر جلالوی، سی ٹی آئی لیکچررز حسن رضا جعفری اور محمد عرفان ہیلپ ڈیسک پر بی ایس پروگرامز کے فرسٹ اور سیکنڈ سمسٹرز اور انٹرنیٹ میڈیٹ میں 65 سے 85 فیصد مارکس لینے والے اہل طلباء و طالبات کی تصدیق روزانہ کی بنیاد پر کر رہے ہیں۔

انہوں نے کہا کہ میرٹ اور شفافیت کے ساتھ اعلیٰ ٹیکنالوجی کی تحقیق و تعلیم و تربیت سماج، ملک و قوم کی حقیقی معنوں میں ترقی اور استحکام پاکستان کی علامت ہے۔ اپنے وطن عزیز کی سلامتی و معاشی خوشحالی کے لیے ہم سب کو ایمانداری اور سخت محنت سے مل کر کام کرنا ہوگا۔

طلباء کی سہولت کے لیے تصدیق کی تاریخ 16 مارچ سے بڑھا کر 18 مارچ کر دی گئی ہے۔

اوچ شریف، باغی ٹی وی(نامہ نگارحبیب خان) اوچ شریف میں ماہ رمضان المبارک کے مقدس ایام میں رشوت کے عوض رمضان آرڈیننس کی کھلے عام خلاف ورزیاں جاری ہیں۔ انتظامیہ خاموش تماشائی بنی ہوئی ہے اور ہوٹل، ریسٹورنٹس اور کھانے کے دیگر پوائنٹس سارا دن کھلے رہتے ہیں، جہاں روزہ خور سرعام اپنی پیٹ پوجا کرتے دکھائی دیتے ہیں۔

شہریوں کا کہنا ہے کہ ماہ رمضان المبارک کا احترام تو غیر مسلم بھی کرتے ہیں لیکن انتہائی افسوس کی بات ہے کہ انتظامیہ اوچ شریف میں فوڈ پوائنٹس مالکان اور روزہ خوروں کو نکیل ڈالنے میں ناکام ہو چکی ہے۔ اوچ شریف شہر کے مختلف علاقوں للو والی پل، مونہ والی پل شہر اور محلے اوچ مغلہ، محلہ بخاری، گیلانی محلہ بلوچوں، جلال پور پیر والا ایکسپریس روڈ، ترنڈا محمد پناہ روڈ، خیرپور ڈھا روڈ، حسینی چوک اور شہر کے کئی ہوٹلوں پر کھلے عام چائے، کھانا اور روٹیاں فروخت کی جا رہی ہیں۔

اوچ شریف میں "رشوت دو، ہوٹل کھولو” کی پالیسی چل رہی ہے۔ رمضان کے ایام میں شہریوں کو چائے اور کھانا پیش کیا جا رہا ہے۔ ہوٹلوں پر کھلے عام کھانا ملنے کی اطلاع پر روزہ خوروں کی بڑی تعداد ہوٹلوں کا رخ کر لیتی ہے۔ ہوٹلوں کے اندر اور باہر رش لگا ہوا نظر آیا۔

اوچ شریف شہر میں کھلے عام رمضان آرڈیننس کی خلاف ورزیوں پر شہریوں نے ڈی سی او بہاولپور اور انتظامیہ کو شدید تنقید کا نشانہ بناتے ہوئے رمضان آرڈیننس پر عمل درآمد کراتے ہوئے رشوت کے عوض اجازت دینے والوں کے خلاف قانونی کارروائی عمل میں لانے کا پرزور مطالبہ کیا ہے اور ملوث افراد کی گرفتاری کا مطالبہ کیا ہے۔

اوچ شریف، باغی ٹی وی(نامہ نگار حبیب خان) اوچ شریف اور گردونواح میں آٹا پسائی چکیوں کی من مانی عروج پر پہنچ چکی ہے۔ شہریوں کا کہنا ہے کہ پسائی چکیاں سولر پینلز پر چلنے کے باوجود اضافی اخراجات کا بہانہ بنا کر من مانی نرخ وصول کر رہی ہیں، جس سے عوام شدید مشکلات کا شکار ہو گئے ہیں۔

مختلف علاقوں میں قائم آٹا پسائی چکیوں پر کوئی حکومتی نگرانی نظر نہیں آتی، جس کی وجہ سے چکی مالکان اپنی مرضی کے مطابق نرخ مقرر کر رہے ہیں۔ عوامی شکایات کے مطابق، بجلی کے بلوں میں کمی کے باوجود پسائی کے نرخ کم نہیں کیے گئے، بلکہ مزید اضافہ دیکھنے میں آ رہا ہے۔

شہریوں کا کہنا ہے کہ چکی مالکان آٹے کے وزن میں کمی اور معیار پر سمجھوتہ بھی کر رہے ہیں، جس سے عوام کو دوہری مشکلات کا سامنا کرنا پڑ رہا ہے۔ دوسری جانب، ضلعی انتظامیہ اور پرائس کنٹرول کمیٹی کی خاموشی نے چکی مالکان کو کھلی چھوٹ دے رکھی ہے، جس سے عوام میں شدید بےچینی پائی جاتی ہے۔

عوامی حلقوں نے ڈپٹی کمشنر بہاولپور اور اسسٹنٹ کمشنر احمد پور شرقیہ سے فوری نوٹس لینے کا مطالبہ کیا ہے تاکہ آٹا پسائی چکیوں کی من مانی کو روکا جا سکے اور عوام کو ریلیف فراہم کیا جا سکے۔