Category: بہاولپور

اوچ شریف (نامہ نگار حبیب خان) اوچ شریف کے قانونی اور سماجی حلقوں نے ملک کو درپیش چیلنجز اور دہشت گردی کے خطرات کے پیش نظر قوم سے اپیل کی ہے کہ وہ اپنی فوج اور سکیورٹی فورسز کے شانہ بشانہ کھڑی ہو۔

معروف قانون دان ملک طاہر منظور ایڈووکیٹ اور صدر اوچ سول سوسائٹی عمر خورشید سہمن نے اپنے مشترکہ بیان میں کہا کہ قومیں مشکل وقت میں بنتی ہیں، بکھرتی نہیں! اگر دشمن ہم پر حملہ کرے تو بحیثیت قوم ہمیں اپنی سکیورٹی فورسز کی مکمل حمایت کرنی چاہیے، نہ کہ ان پر تنقید کر کے دشمن کے عزائم کو تقویت دی جائے۔

انہوں نے کہا کہ دنیا میں کوئی بھی ملک ایسا نہیں جو اپنی افواج کی حوصلہ شکنی کر کے مضبوط ہوا ہو۔ ترقی یافتہ ممالک میں جب کوئی بحران آتا ہے تو وہاں کی قومیں اور ادارے متحد ہو کر دشمن کے خلاف کھڑے ہو جاتے ہیں۔ اگر ہماری سکیورٹی فورسز دہشت گردوں کے خلاف جنگ نہ لڑیں تو کیا ہم خود جا کر ان سے لڑیں گے؟ مزید انہیں کہنا تھا کہ یہ وقت سیاسی یا نظریاتی اختلافات کا نہیں بلکہ اتحاد کا ہے۔

ملک دشمن عناصر ہر ممکن طریقے سے پاکستان کو کمزور کرنے کی کوشش میں ہیں۔ اگر ہم اپنی ہی سکیورٹی فورسز کو کمزور کریں گے تو دشمن مزید طاقتور ہوگا۔ ہمیں ہر حال میں اپنے ان سپاہیوں اور افسران کو یقین دلانا ہوگا کہ پوری قوم ان کے ساتھ کھڑی ہے۔

انہوں نے مزید کہا کہ یہ جنگ صرف فورسز کی نہیں بلکہ پوری قوم کی ہے۔ ملک میں امن و امان کے قیام کے لیے تمام اداروں اور عوام کو مل کر کام کرنا ہوگا۔ دشمن ہمیشہ کمزور اور منتشر قوموں پر حملہ آور ہوتا ہے لیکن اگر ہم متحد ہو جائیں تو کوئی بھی ہمیں شکست نہیں دے سکتا۔

ملک طاہر منظور ایڈووکیٹ نے عوام سے اپیل کی کہ وہ کسی بھی قسم کی مایوسی یا منفی پروپیگنڈے کا شکار نہ ہوں اور اپنی افواج اور سکیورٹی فورسز کا مکمل ساتھ دی، کیونکہ پاکستان کی سلامتی اور بقا اسی میں ہے کہ ہم سب ایک قوم بن کر آگے بڑھیں۔

اوچ شریف ،باغی ٹی وی (نامہ نگارحبیب خان) عوامی ٹیکس کی لوٹ مار، موضع کندرالہ سیت پور پل کرپشن کی بھینٹ چڑھ گیا،عوامی ٹیکس کا ضیاع، مقامی افراد میں شدید غم و غصہ، تحقیقات کا مطالبہ

تفصیلات کے مطابق دریائے چناب کے لنک پر موضع بختیاری میں سیلاب سے متاثرہ علاقوں کو جوڑنے کے لیے تعمیر کیا جانے والا پل کرپشن کی بدترین مثال بن گیا۔ مقامی افراد نے پل کی تعمیر میں ناقص اینٹوں اور کمزور میٹریل کے استعمال پر شدید تشویش کا اظہار کیا ہے۔

یہ پل موضع کندرالہ سیت پور اور قریبی بستیوں کو اوچ شریف اور دیگر اہم علاقوں سے ملانے کے لیے بنایا جا رہا ہے، جس سے سیلاب کے دوران بھی ان علاقوں تک رسائی ممکن ہو سکے گی۔ تاہم تعمیراتی کام میں استعمال ہونے والے ناقص میٹریل نے اس اہم منصوبے کی پائیداری پر سوالیہ نشان لگا دیا ہے۔

مقامی افراد کا کہنا ہے کہ پل کی تعمیر میں استعمال ہونے والی اینٹیں انتہائی کمزور ہیں اور میٹریل بھی ناقص ہے۔ جس کی وجہ سے یہ پل کسی بھی وقت گر سکتا ہے اور اس سے نہ صرف قیمتی جانوں کا ضیاع ہونے کا خدشہ ہے بلکہ عوامی ٹیکسوں سے اکٹھا ہونے والا سرمایہ بھی ضائع ہو جائے گا۔

اس صورتحال پر مقامی افراد میں شدید غم و غصہ پایا جاتا ہے۔ انہوں نے ڈپٹی کمشنر بہاولپور، کمشنر بہاولپور اور چیف سیکرٹری پنجاب سے فوری ایکشن لینے اور ذمہ داروں کے خلاف سخت قانونی کارروائی کا مطالبہ کیا ہے۔

عوامی شکایات پر منتخب عوامی نمائندے ایم پی اے سید عامر علی شاہ نے بھی پل کی تعمیر میں ناقص میٹریل کے استعمال پر برہمی کا اظہار کیا ہے۔ انہوں نے کہا کہ اس معاملے کی فوری تحقیقات ہونی چاہیے اور ذمہ داروں کو قرار واقعی سزا دی جانی چاہیے۔

مقامی افراد نے خبردار کیا ہے کہ اگر بروقت کارروائی نہ کی گئی تو یہ اہم منصوبہ ناکام ہو جائے گا اور ان کی سفری مشکلات جوں کی توں رہیں گی۔ انہوں نے حکومت سے مطالبہ کیا ہے کہ کرپشن میں ملوث افراد کے خلاف سخت اقدامات کیے جائیں تاکہ پل کی تعمیر کو معیاری اور پائیدار بنایا جا سکے۔

اوچ شریف،باغی ٹی وی( نامہ نگار حبیب خان) یونین کونسل دھوڑ کوٹ کی عمارت شدید خستہ حالی اور ٹوٹ پھوٹ کا شکار ہو چکی ہے، جس کے باعث کسی بھی وقت بڑا حادثہ پیش آنے کا خدشہ ہے۔ عمارت کی دیواروں میں گہرے شگاف پڑ چکے ہیں، چھت کے مختلف حصے کمزور ہو گئے ہیں، جبکہ بوسیدہ کھڑکیاں اور دروازے کسی بھی لمحے گر سکتے ہیں۔

یونین کونسل کا عملہ اور یہاں آنے والے شہری روزانہ خوف کے سائے میں وقت گزارنے پر مجبور ہیں۔ دفاتر کے کئی حصے ناقابل استعمال ہو چکے ہیں، جبکہ باقی ماندہ حصے بھی خطرناک صورت اختیار کر چکے ہیں۔ بارش کے دوران چھتوں سے پانی ٹپکنے لگتا ہے، جس سے عمارت کی حالت مزید خراب ہو رہی ہے۔

حالیہ دنوں میں مریم نواز شریف راشن تقسیم سروے کے لیے آئی ہوئی خواتین کو بھی اسی خستہ حال عمارت کے برآمدے میں بٹھایا گیا، جہاں جگہ جگہ دراڑیں پڑ چکی ہیں اور چھت سے مٹی اور پلستر جھڑنے لگا ہے۔ سروے کے لیے آنے والی خواتین نے بھی اس خطرناک صورتحال پر شدید تشویش کا اظہار کیا اور مطالبہ کیا کہ عوام کو ایسی مخدوش جگہ پر نہ بلایا جائے۔

اہل علاقہ کا کہنا ہے کہ کئی بار متعلقہ حکام اور مقامی نمائندوں کو اس سنگین مسئلے سے آگاہ کیا گیا، مگر تاحال کوئی عملی اقدام نہیں کیا گیا۔ عوام کا مطالبہ ہے کہ یونین کونسل کی عمارت کی از سرِ نو تعمیر یا کم از کم ہنگامی بنیادوں پر اس کی مرمت یقینی بنائی جائے تاکہ کسی بھی ممکنہ سانحے سے بچا جا سکے۔

شہریوں محمد عمران، سید سجاد حسین، جلیل احمد اور دیگر نے منتخب عوامی نمائندوں اور انتظامیہ سے فوری ایکشن لینے کی اپیل کرتے ہوئے کہا کہ شہریوں اور عملے کو محفوظ بنایا جائے۔

اوچ شریف،باغی ٹی وی( نامہ نگار حبیب خان): اوچ شریف کے شہری علاقوں محلہ شمیم آباد، ٹینکی چوک، محلہ جگ پورہ، حسینی چوک، شمس کالونی، محلہ گیلانی، جمال درویش اور دیگر علاقوں میں جانوروں کے بھانے، گندگی اور مچھروں کی افزائش سے بیماریاں پھیلنے لگی ہیں۔ انتظامیہ کی خاموشی سے عوام پریشان ہیں، گنجان آبادیوں میں بدبو، تعفن اور وبائی امراض کے خدشات بڑھ گئے ہیں۔

تفصیلات کے مطابق، پنجاب حکومت کی جانب سے شہری علاقوں اور گنجان آباد محلوں میں جانوروں کے بھانے قائم کرنے پر پابندی عائد ہونے کے باوجود مقامی انتظامیہ کی غفلت کے باعث اس پر عملدرآمد نہیں ہو رہا۔ اوچ شریف کے مختلف رہائشی علاقوں میں شہریوں نے بھینسوں، بکریوں اور دیگر مویشیوں کے بھانے بنا رکھے ہیں، جس کی وجہ سے گندگی اور مچھروں کی افزائش میں خطرناک حد تک اضافہ ہو چکا ہے۔

مقامی شہریوں کا کہنا ہے کہ جانوروں کے فضلے کی وجہ سے گلیوں، محلوں اور کھلی جگہوں پر تعفن پھیل رہا ہے، جس سے سانس کی بیماریاں اور دیگر انفیکشنز عام ہو رہے ہیں۔ گندگی کے باعث مچھروں کی افزائش میں اضافہ ہو چکا ہے، جو ملیریا، ڈینگی اور دیگر وبائی امراض پھیلانے کا باعث بن رہے ہیں۔ خاص طور پر بچے اور بزرگ اس آلودہ ماحول کی وجہ سے شدید متاثر ہو رہے ہیں۔

عوامی و سماجی حلقوں کا کہنا ہے کہ انتظامیہ کو بارہا شکایات درج کروائی گئی ہیں، مگر تاحال کوئی کارروائی نہیں کی گئی۔ متعدد علاقوں میں صفائی کا عملہ بھی گندگی اٹھانے سے قاصر نظر آتا ہے، جس کی وجہ سے مسئلہ مزید گھمبیر ہوتا جا رہا ہے۔ شہریوں نے الزام لگایا کہ بااثر افراد کے دباؤ کی وجہ سے مقامی افسران خاموش تماشائی بنے ہوئے ہیں۔

مقامی شہریوں عبدالرحمن، حفیظ خان، سہیل عباس، نعمان خالد، انس خان اور دیگر نے وزیر اعلیٰ پنجاب مریم نواز شریف، چیف سیکرٹری پنجاب، صوبائی وزیر بلدیات اور کمشنر بہاولپور سے مطالبہ کیا ہے کہ گنجان آبادیوں میں قائم جانوروں کے بھانے فوری طور پر شہر سے باہر منتقل کیے جائیں، ملوث افراد کے خلاف سخت قانونی کارروائی کی جائے اور علاقے میں فوری طور پر صفائی اور اسپرے مہم شروع کی جائے تاکہ مچھروں اور گندگی سے پھیلنے والی بیماریوں پر قابو پایا جا سکے۔

اوچ شریف ،باغی ٹی وی( نامہ نگار حبیب خان): اوچ شریف میں مہنگائی کا طوفان بے قابو ہو چکا ہے، جبکہ اسسٹنٹ کمشنر اور پرائس کنٹرول مجسٹریٹ کی غیر موجودگی کے باعث منافع خوروں کو کھلی چھوٹ مل گئی ہے۔ اشیائے ضروریہ کے نرخوں میں روزانہ اضافہ ہو رہا ہے، اور عوام دو وقت کی روٹی کے لیے بھی سخت مشکلات کا شکار ہیں۔

اوچ شریف میں چکن، بڑا گوشت، چینی، سبزی، پھل، دودھ اور دیگر بنیادی اشیائے خوردونوش کی قیمتیں عام آدمی کی پہنچ سے باہر ہو چکی ہیں۔ شہریوں کا کہنا ہے کہ پرائس کنٹرول مجسٹریٹ اور متعلقہ حکام کی لاپرواہی کے باعث منافع خور کھلم کھلا لوٹ مار کر رہے ہیں، جبکہ سرکاری نرخنامہ محض ایک کاغذی کارروائی بن کر رہ گیا ہے۔

شہر کے مختلف بازاروں میں دکانداروں نے من مانی قیمتیں مقرر کر رکھی ہیں۔ سرکاری نرخنامے کو ردی کی ٹوکری میں ڈال کر اشیائے خورد و نوش دوگنے نرخوں پر فروخت کی جا رہی ہیں۔ سبزی اور پھل فروشوں سے لے کر گوشت اور دودھ بیچنے والوں تک، ہر ایک نے اپنی من مرضی کے ریٹ مقرر کر رکھے ہیں، اور انہیں روکنے والا کوئی نہیں۔

شہریوں شبیر احمد، عثمانی ارشاد احمد، عارف حسین، رجب علی اور محمد یعقوب کا کہنا ہے کہ پرائس کنٹرول کمیٹیاں نام کی حد تک بھی موجود نہیں۔ اگر یہ کمیٹیاں قائم ہیں تو وہ کیا کر رہی ہیں؟ عوامی اور سماجی حلقے اس بات پر سخت برہم ہیں کہ انتظامیہ کے افسران دفاتر میں بیٹھ کر سب اچھا کی رپورٹ دے رہے ہیں، جبکہ بازاروں میں عام شہری مہنگائی کے ہاتھوں بے حال ہو چکے ہیں۔

اوچ شریف کے عوام اور سماجی حلقوں نے مطالبہ کیا ہے کہ تحصیل انتظامیہ اور پرائس کنٹرول کمیٹیوں کو فوری طور پر فعال کیا جائے، بازاروں میں روزانہ کی بنیاد پر چیکنگ کی جائے اور منافع خوروں کے خلاف سخت قانونی کارروائی کی جائے۔