Category: بہاولپور

اوچ شریف،باغی ٹی وی (نامہ نگارحبیب خان )بہاولپور میں صحرائے چولستان کے علاقے ٹوبہ قاسم والا میں ایک اندوہناک واقعہ پیش آیا ہےجہاں جھگیوں میں اچانک آگ بھڑک اٹھی، جس کے نتیجے میں ایک ماں اور اس کے چار معصوم بچے زندگی کی بازی ہار گئے۔

پولیس کے مطابق حادثہ اس وقت پیش آیا جب مذکورہ خاتون چائے بنانے میں مصروف تھی کہ چولہے سے اٹھنے والی چنگاری جھگی میں جاگری۔ جھگیوں کی تعمیر میں گنے کی فصل کی خشک باقیات استعمال کی گئی تھیں، جس کی وجہ سے آگ تیزی سے پھیل گئی اور دیکھتے ہی دیکھتے جھونپڑیاں شعلوں کی لپیٹ میں آگئیں۔

پولیس حکام کا کہنا ہے کہ جاں بحق ہونے والے بچوں کی عمریں ایک سے چار سال کے درمیان تھیں، جو حادثے کے وقت اپنی ماں کے ساتھ جھگی میں موجود تھے۔ آگ نے انہیں سنبھلنے کا موقع تک نہ دیا اور وہ شدید جھلسنے کے باعث موقع پر ہی دم توڑ گئے۔

واقعے کی اطلاع ملتے ہی امدادی ٹیمیں جائے وقوعہ پر پہنچ گئیں اور لاشوں کو ہسپتال منتقل کیا۔ پولیس کا کہنا ہے کہ حادثے کی وجوہات کی مزید تحقیقات کی جا رہی ہیں تاکہ کسی ممکنہ غفلت یا مجرمانہ غفلت کے پہلو کو بھی مدنظر رکھا جا سکے۔

چولستان کے صحرائی علاقے میں بسنے والے غریب خاندان انتہائی کسمپرسی میں زندگی گزارنے پر مجبور ہیں، جہاں بنیادی سہولیات کی کمی ان کے لیے جان لیوا ثابت ہو رہی ہے۔

اوچ شریف (نامہ نگار حبیب خان) اوچ شریف کے نواحی علاقے مامون آباد میں زمین کے تنازع نے خونی رنگ اختیار کر لیا۔ سگے بھائیوں کے درمیان جائیداد کی تقسیم پر ہونے والے جھگڑے میں فائرنگ سے 25 سالہ نوجوان محمد اظہر جان کی بازی ہار گیا۔

تفصیلات کے مطابق منظور عالم، ایاز عالم اور محبوب عالم پر الزام ہے کہ انہوں نے بیرونی افراد کی مدد سے فائرنگ کروا کر اپنے بھتیجے محمد اظہر کو موت کے گھاٹ اتار دیا۔ فائرنگ کے نتیجے میں مقتول شدید زخمی ہوا اور موقع پر ہی دم توڑ گیا۔

واقعے کے بعد علاقے میں شدید خوف و ہراس پھیل گیا جبکہ مقتول کے اہل خانہ غم اور غصے کی حالت میں ہیں۔ پولیس نے فوری طور پر جائے وقوعہ پر پہنچ کر شواہد اکٹھے کر لیے اور مقدمہ درج کر کے قانونی کارروائی کا آغاز کر دیا ہے۔ ملزمان کی گرفتاری کے لیے چھاپے مارے جا رہے ہیں۔

اوچ شریف (نامہ نگار حبیب خان): اوچ شریف اور گردونواح میں ملاوٹ شدہ اور غیر معیاری اشیائے خورونوش کی فروخت عروج پر پہنچ گئی ہے، جس کے باعث شہریوں کی صحت داؤ پر لگ چکی ہے۔ مقامی بیکریوں، مٹھائی کی دکانوں، دودھ دہی فروشوں اور دیگر کھانے پینے کے مراکز میں ملاوٹ شدہ اشیاء کا کھلے عام استعمال جاری ہے۔

ذرائع کے مطابق اوچ شریف میں فروخت ہونے والے دودھ، دہی، بیکری آئٹمز، مٹھائی اور دیگر اشیائے خورونوش میں غیر معیاری کوکنگ آئل، ناقص گھی، مصنوعی مٹھاس، کارن سیرپ اور دیگر مضرِ صحت کیمیکلز کا بے دریغ استعمال کیا جا رہا ہے۔ بیکریوں میں گندے انڈوں سے کیک، بسکٹ اور دیگر اشیاء تیار کی جا رہی ہیں، جس کے باعث شہری مختلف بیماریوں میں مبتلا ہو رہے ہیں۔ معدے کے امراض، فوڈ پوائزننگ، ہیپاٹائٹس اور دیگر صحت کے مسائل عام ہو گئے ہیں، مگر انتظامیہ کی جانب سے اس خطرناک صورتحال پر کوئی کارروائی دیکھنے میں نہیں آ رہی۔

شہریوں محمد عاقل، رسول بخش، صفدر حسین، طلحہ زبیر خان، انس خان اور دیگر نے شکایت کی ہے کہ اوچ شریف کے مختلف علاقوں چوک، الشمس، خیرپور ڈاہا روڈ، بورڈنگ اسکول موڑ، ٹینکی چوک اور حسینی چوک میں موجود بیکری ورکشاپس میں صفائی ستھرائی کا انتہائی ناقص انتظام ہے۔ ان ورکشاپس سے بدبو اور تعفن اٹھنے کے باعث عوام کا جینا محال ہو گیا ہے، جبکہ بیکری اور مٹھائی کی دکانوں پر ناقص اشیاء کی فروخت جاری ہے۔

باوثوق ذرائع کے مطابق بعض مقامی بیکری مالکان اور مٹھائی فروش اپنی ناقص مصنوعات پر معروف ملٹی نیشنل کمپنیوں کے جعلی لیبل لگا کر فروخت کر رہے ہیں۔ اس فراڈ کے باعث نہ صرف صارفین کو دھوکہ دیا جا رہا ہے بلکہ انہیں مضرِ صحت اشیاء کھانے پر مجبور کیا جا رہا ہے۔

اوچ شریف کے عوامی و سماجی حلقوں نے ڈپٹی کمشنر بہاولپور اور متعلقہ حکام سے اپیل کی ہے کہ وہ فوری طور پر ان صحت دشمن عناصر کے خلاف سخت کارروائی کریں۔ شہریوں کا کہنا ہے کہ ملاوٹ مافیا کی روک تھام اور معیاری خوراک کی فراہمی کو یقینی بنانے کے لیے فوڈ اتھارٹی اور دیگر متعلقہ اداروں کو متحرک کیا جائے، تاکہ عوام کی صحت محفوظ رہ سکے۔

اوچ شریف (نامہ نگار حبیب خان) وزیر اعلیٰ پنجاب مریم نواز کے ویژن اور ڈپٹی کمشنر بہاولپور ڈاکٹر فرحان فاروق کی ہدایت پر رمضان المبارک میں گراں فروشی کے خلاف کریک ڈاؤن جاری ہے۔ اسپیشل پرائس کنٹرول مجسٹریٹ عمران حیدر سیال نے اوچ شریف اور احمد پور شرقیہ کے مختلف بازاروں میں چھاپے مارے۔

اس دوران انہوں نے پھل، سبزی، کریانہ اور دیگر اشیائے خوردونوش کی دکانوں کا معائنہ کیا اور نرخ ناموں اور اشیاء کی کوالٹی کا جائزہ لیا۔ انہوں نے صارفین سے بھی گفتگو کی اور اشیاء کی مقررہ نرخ پر فروخت کے بارے میں دریافت کیا۔

اسپیشل پرائس کنٹرول مجسٹریٹ نے دکانداروں کو ہدایت کی کہ اشیائے ضروریہ مقررہ نرخ پر فروخت کی جائیں۔ خلاف ورزی کرنے والوں کے خلاف قانونی کارروائی کی جائے گی۔ انہوں نے صارفین سے کہا کہ اگر کوئی دکاندار ریٹ لسٹ سے زیادہ نرخ پر اشیاء فروخت کرتا ہے تو وہ فوری طور پر شکایت درج کرائیں۔

انہوں نے پل جھانگرہ غربی، اوچ شریف شہر چوک بختیاری، شمس چوک، خرم پور سمیت مختلف علاقوں میں سبزی، فروٹ اور دودھ دہی فروشوں کا معائنہ کیا۔ سرکاری ریٹ لسٹ آویزاں نہ کرنے، گراں فروشی اور زائد المعیاد اشیاء کی فروخت پر متعدد دکانداروں کو بھاری جرمانے کیے گئے۔

اوچ شریف، باغی ٹی وی(نامہ نگار حبیب خان) اوچ شریف اور گردونواح میں رمضان المبارک کے مقدس مہینے میں بھی مضر صحت، لاغر اور مردہ جانوروں کے گوشت کی فروخت کا سلسلہ جاری ہے۔ قصائی مافیا انسانی صحت سے کھیلنے میں مصروف ہے، جبکہ متعلقہ ادارے خاموش تماشائی بنے ہوئے ہیں۔ ناقص اور زہریلے گوشت کے استعمال سے شہری مختلف بیماریوں میں مبتلا ہو رہے ہیں، مگر انتظامیہ کی چشم پوشی کے باعث یہ مکروہ دھندہ کھلے عام جاری ہے۔

ذرائع کے مطابق مختلف علاقوں میں غیر قانونی طور پر بیمار اور مردہ جانوروں کا گوشت فروخت کیا جا رہا ہے۔ قصائی مافیا دیہی علاقوں سے لاغر اور بیمار جانور انتہائی کم قیمت پر خرید کر ان کے گوشت کو مختلف کیمیکلز کے ذریعے مصنوعی طور پر تازہ بناتے ہیں اور پھر یہ گوشت شہر کی مختلف مارکیٹوں، ہوٹلوں، بیکریوں میں سپلائی کیا جاتا ہے۔

رمضان المبارک میں شہری سحر و افطار میں زیادہ تر گوشت سے بنی اشیاء استعمال کرتے ہیں، لیکن ناقص گوشت کی فروخت کے باعث فوڈ پوائزننگ، معدے کی بیماریاں، یرقان اور دیگر سنگین مسائل میں اضافہ ہو رہا ہے۔ طبی ماہرین کے مطابق غیر معیاری گوشت کا استعمال بچوں اور بوڑھوں کے لیے زیادہ خطرناک ثابت ہو رہا ہے۔

عوامی وسماجی حلقے متعلقہ اداروں کی خاموشی پر شدید غم و غصے کا اظہار کر رہے ہیں۔ لائیو اسٹاک، فوڈ اتھارٹی اور دیگر ذمہ دار ادارے اس غیر قانونی دھندے سے باخبر ہونے کے باوجود کوئی عملی اقدام نہیں کر رہے۔ رمضان المبارک کے دوران بھی مضر صحت گوشت کی فروخت کھلے عام جاری ہے، مگر انتظامیہ بے بس نظر آ رہی ہے۔

اوچ شریف شہر کے مکینوں نے وزیراعلیٰ پنجاب، چیف سیکرٹری، ڈی سی بہاولپور اور دیگر متعلقہ حکام سے اپیل کی ہے کہ وہ فوری طور پر مضر صحت گوشت فروخت کرنے والے عناصر کو سخت سزائیں دی جائیں، ان کے خلاف مقدمات درج کیے جائیں اور غیر معیاری گوشت فروخت کرنے والی دکانوں کو فوری طور پر سیل کیا جائے۔