Category: بہاولپور

اوچ شریف (باغی ٹی وی نامہ نگار حبیب خان) اسسٹنٹ کمشنر احمد پور شرقیہ محمد نوید حیدر نے وزیر اعلیٰ پنجاب کی گورننس بہتری انیشی ایٹوز (KPI) کے تحت تجاوزات کے خاتمے اور ستھرا پنجاب مہم کی مانیٹرنگ جاری رکھنے کی ہدایت کی ہے۔

یہ بات انہوں نے میونسپل کمیٹی اوچ شریف میں منعقدہ جائزہ اجلاس کی صدارت کرتے ہوئے کہی۔ اجلاس میں چیف آفیسر قاضی محمد نعیم، سینئر سب انجینئر عمران حسین گشکوری، انفورسمنٹ انسپکٹر جام سجاد، سینٹری انسپکٹر محمد شاہد ریاض، اور دیگر اہلکار شریک ہوئے۔

اسسٹنٹ کمشنر نے ستھرا پنجاب پروگرام کے تحت صفائی ستھرائی، سیوریج لائنوں کی صفائی، آوارہ کتوں کی تلفی، عملے کی حاضری، اور واٹر فلٹریشن پلانٹس کی فعالیت کو یقینی بنانے کے لیے موثر اقدامات کی ہدایت دی۔ انہوں نے کہا کہ سرکاری ادارے عوامی اعتماد بحال کریں اور دفتر میں آنے والے سائلین کے ساتھ خوش اخلاقی سے پیش آئیں۔

اس موقع پر چیف آفیسر قاضی محمد نعیم نے میونسپل کمیٹی کی کارکردگی پر بریفنگ دی، جبکہ اسسٹنٹ کمشنر نے خیر پور ڈاہا روڈ پر قائم ماڈل ریڑھی بازار کا بھی دورہ کیا۔ انہوں نے کہا کہ عوامی خدمت کا جذبہ نہ صرف عوامی پذیرائی لاتا ہے بلکہ اللہ کی خوشنودی کا ذریعہ بھی ہے۔

اوچ شریف (باغی ٹی وی نامہ نگار حبیب خان) برصغیر پاک و ہند کے عظیم صوفی بزرگ حضرت شیر شاہ سید جلال الدین سرخپوش بخاری کا 755 واں تین روزہ عرس مبارک عقیدت و احترام کے ساتھ جاری ہے۔ عرس کی تقریب میں سجادہ نشین مخدوم سید زمرد حسین بخاری اور ولی عہدمخدومزادہ سید حسن زمرد بخاری نے مزارِ اقدس کو عرق گلاب سے غسل دے کر چادر چڑھائی۔ اس موقع پر سینکڑوں مریدین کی موجودگی میں دعائیہ تقریب بھی منعقد کی گئی جس میں شرکاء نے حضرت شیر شاہ سید جلال الدین سرخپوش بخاری کے روحانی فیوض و برکات کے لئے دعا کی۔

تفصیلات کے مطابق حضرت شیر شاہ سید جلال الدین سرخپوش بخاری کا عرس ہر سال کی طرح اس بار بھی بڑی عقیدت سے منایا جا رہا ہے۔ عرس کے تین دنوں کے دوران ملک بھر سے مریدین، زائرین اور معتقدین کی بڑی تعداد نے شرکت کی۔ عرس کی مناسبت سے ولی عہد مخدومزادہ سید حسن زمرد بخاری نے زائرین کے لیے خصوصی انتظامات کیے ہیں، جن میں قیام و طعام کے ساتھ ساتھ دیگر سہولتیں بھی فراہم کی گئی ہیں تاکہ زائرین کو کسی قسم کی تکلیف نہ ہو۔

اس موقع پر مقامی پولیس انتظامیہ نے عرس کی سیکیورٹی کے لیے اضافی نفری تعینات کی ہے تاکہ شرکاء کی حفاظت کو یقینی بنایا جا سکے۔ پولیس کی جانب سے کیے گئے انتظامات میں دربار کے اطراف میں چیک پوسٹ قائم کرنا اور عرس کے دوران کسی بھی ناخوشگوار واقعے سے بچنے کے لیے نظر رکھنے کی کوششیں کی گئیں۔

حضرت شیر شاہ سید جلال الدین سرخپوش بخاری برصغیر کے ایک عظیم صوفی بزرگ تھے جنہوں نے اپنی زندگی کو اللہ کی رضا میں گزارا اور لوگوں کی روحانیت کی ترقی کے لئے کام کیا۔ ان کی تعلیمات آج بھی لوگوں کے دلوں میں زندہ ہیں اور ان کے آستانہ پر آنے والے لوگ روحانیت کی سکونت کا احساس کرتے ہیں۔ ان کی سادگی، اخلاص اور محبت بھری تعلیمات کی بدولت ان کے مریدین اور پیروکار ان کے مشن کو آگے بڑھانے میں مشغول ہیں۔

اوچ شریف (باغی ٹی وی نامہ نگار حبیب خان) آر ایچ سی اوچ شریف میں 20 تا 22 نومبر 2024 تک مفت صحت کیمپ کا انعقاد، ڈاکٹر رانا ارشد ایم ایس کا شہریوں کو صحت کی سہولتوں سے فائدہ اٹھانے کی دعوت

تفصیلات کے مطابق آر ایچ سی ہسپتال اوچ شریف میں تین روزہ مفت صحت کیمپ کا آغاز کیا گیا ہے جس میں مریضوں کو مفت طبی معائنہ، ہیپاٹائٹس اور شوگر کی تشخیص سمیت دیگر ضروری ٹیسٹ فراہم کئے جا رہے ہیں۔

اس کے علاوہ حاملہ خواتین اور بچوں کے لیے ویکسینیشن کی سہولت بھی موجود ہے۔ ایم ایس ڈاکٹر رانا ارشد نے میڈیا سے بات کرتے ہوئے بتایا کہ کیمپ کے پہلے روز 259 اور دوسرے روز 325 مریضوں کا چیک اپ کیا گیا، جن میں 2 مریضوں میں ہیپاٹائٹس بی، 43 مریضوں میں ہیپاٹائٹس سی اور 12 مریضوں میں ملیریا کی علامات پائی گئیں۔

انہوں نے شہریوں سے اپیل کی کہ وہ اس سہولت سے فائدہ اٹھائیں اور اپنی صحت کا مفت معائنہ کروائیں۔

اوچ شریف (باغی ٹی وی، نامہ نگار حبیب خان) حکومت پنجاب کی جانب سے صحت کے فروغ کے لیے آر ایچ سی ہسپتال اوچ شریف میں 20 سے 22 نومبر تک سہ روزہ مفت صحت کیمپ کا انعقاد کیا جا رہا ہے۔ کیمپ کے تحت شہریوں کو مفت طبی معائنہ، تشخیصی ٹیسٹ، اور ویکسینیشن کی سہولیات فراہم کی جا رہی ہیں۔

مریضوں کے لیے مفت ہیپاٹائٹس، شوگر، اور ملیریا کی اسکریننگ۔حاملہ خواتین اور بچوں کی مفت ویکسینیشن۔چھوٹے بچوں، خواتین، اور بڑوں کا مفت طبی معائنہ۔

ایم ایس آر ایچ سی ڈاکٹر رانا ارشد کے مطابق، کیمپ کے پہلے روز 259 مریضوں کا معائنہ کیا گیا۔ اسکریننگ کے دوران 3 مریض ہیپاٹائٹس بی، 22 ہیپاٹائٹس سی، اور 13 ملیریا کے کیسز مثبت پائے گئے، جب کہ 13 مریضوں کے پی سی آر سیمپل مزید تشخیص کے لیے بھجوائے گئے ہیں۔

ڈاکٹر رانا ارشد نے عوام سے اپیل کی کہ وہ کیمپ میں بروقت شرکت کر کے اپنی صحت کا معائنہ کروائیں۔ انہوں نے بتایا کہ کیمپ میں تمام طبی عملہ صبح 8 بجے سے شام 4 بجے تک موجود رہے گا تاکہ شہری ان سہولیات سے بھرپور فائدہ اٹھا سکیں۔

وزیراعلیٰ پنجاب محترمہ مریم نواز کی ہدایات پر تحصیل ہیڈ کوارٹر ہسپتال احمد پور شرقیہ میں 22 نومبر تک جاری رہنے والا مفت صحت کیمپ عوامی فلاح و بہبود کے لیے قائم کیا گیا ہے۔ اس انقلابی اقدام کا مقصد بیماریوں کی بروقت تشخیص اور عوام کو بہترین طبی سہولیات کی فراہمی ہے۔

میڈیکل سپریڈنٹ ڈاکٹر عارف غوری نے شہریوں کو مخاطب کرتے ہوئے کہا کہ یہ کیمپ غریب اور متوسط طبقے کے لیے ایک نادر موقع ہے۔ انہوں نے عوام سے اپیل کی کہ وہ اس کیمپ میں آ کر اپنے اور اپنے خاندان کے افراد کا مفت معائنہ کروائیں تاکہ بہتر صحت کی سہولیات سے استفادہ کر سکیں

اوچ شریف(باغی ٹی وی ،نامہ نگار حبیب خان)قدرت کا نایاب شاہکار، بکری کے 2منہ اور چار آنکھوں والے بچے کی پیدائش

تفصیل کے مطابق اوچ شریف کے نواحی علاقے نوشہرہ جدید میں کسان جام حنیف کے گھر اللہ کی قدرت کا ایک منفرد کرشمہ سامنے آیا۔ ان کی بکری نے ایک بکرے کو جنم دیا جس کے دو منہ، دو زبانیں اور چار آنکھیں ہیں، جبکہ اس کا دھڑ ایک ہے۔ یہ عجیب و غریب منظر دیکھ کر اہلِ علاقہ حیرت میں مبتلا ہو گئے اور اللہ کی قدرت پر عش عش کر اٹھے۔

یہ واقعہ پورے علاقے میں چرچا کا موضوع بنا ہوا ہے اور لوگ اسے اللہ تعالیٰ کی قدرت کا ایک عظیم شاہکار قرار دے رہے ہیں۔ علاقہ کے لوگ بڑی تعداد میں کسان جام حنیف کے گھر جمع ہو رہے ہیں اور اس نایاب مخلوق کو دیکھنے کے لیے آ رہے ہیں۔