Category: بہاولپور

اوچ شریف :ہسپتال کا ڈرائیور ڈاکٹر کا چٹی دلال ،ایم ایل سی کے نام پر شہری سے 3 لاکھ ٹھگ لئے،چک نمبر97/DNB کے رہائشی امام بخش کھمبڑا کی ڈی ایچ او بہاولپور کو درخواست ،رقم واپس دلانے کامطالبہ

تفصیل کے مطابق چک نمبر97/DNB کے رہائشی امام بخش کھمبڑا کی ڈی ایچ او بہاولپور کو درخواست گذاری ہے جس میں اس نے مؤقف اختیارکیا ہے کہ ان کی رشتہ داروں کے ساتھ لڑائی ہوئی جس تھانہ پر پرچہ مضروبی جاری کرا بی ایچ یو کتھڑی گئے اور وہاں پر تعینات ڈرائیور عبدالغفار سے ملے

وہ ہمیں ویکسنیٹرکے پاس لے گیا اس نے مجھے چیک کیا اور 10ہزار روپے ڈرائیور کو دینے کا کہا اور ڈاکٹر سے بات کرنے کا کہا

پھر انہوں نے 3لاکھ کا مطالبہ کیا تو ہم نے روبرو گواہان گھر سے رقم لے کر اس کے حوالے کی اور دوسرے دن ایم ایل سی کے جانے کا کہا لیکن تاحال نہ ایم ایل سی ملا ہے نہ ہی رقم واپس ملی ہے بلکہ سنگین نتائج کی دھمکیاں دینا شروع کردی ہے

ڈرخواست میں ڈی ایچ او ہیلتھ بہاولپورسے نوٹس لے کران کے خلاف قانونی کارروائی کرنے اور رقم واپس کرانے کامطالبہ کیا ہے

اوچ شریف باغی ٹی وی (نامہ نگار حبیب خان) تجاوزات مافیا کے باعث تاریخی شہر کا حسن گہنا گیا، مین بازار کا آدھے سے زیادہ حصہ تجاوزات کی زد میں، گاڑیوں اور پیدل چلنے والوں کو شدید مشکلات کا سامنا، میونسپل کمیٹی اور انتظامیہ کی کارکردگی صفر،پیدل شہری سڑکوں پر خواری کے باعث تکرار معمول،شہریوں کا ڈپٹی کمشنر بہاولپور اور ایڈمنسٹریٹر میونسپل کمیٹی سے نوٹس لینے کا مطالبہ،

تفصیلات کے مطابق اوچ شریف شہر کے بازاروں کی گزرگاہوں اورسڑکوں پر تجاوزات کی بھر مار ہے، دکانداروں نے سڑکوں کے بیشتر حصوں پر ناجائز قبضہ کر رکھا ہے، شہر کے بازاروں اور فٹ پاتھوں پر دکانداروں نے اپنی اشیاء سجا رکھی ہیں جبکہ فٹ پاتھوں پر تجاوزات قائم ہونے کے باعث راہگیروں کو گزرنے میں سخت اذیت کا سامنا کرنا پڑتا ہے،

میونسپل کمیٹی کے شعبہ انسداد تجاوزات کی مبینہ ملی بھگت کی وجہ سے تجاوزات بڑھ چکی ہیں، شہر کی مین سڑکوں پر قبضہ مافیا کی اجارہ داری پائی جاتی ہے شہریوں نے الزام عائد کیا ہے کہ میونسپل کمیٹی کا شعبہ انسداد تجاوزات کا عملہ منتھلیاں کھری کرنے میں مصروف ہے، جس کی وجہ سے غوث الاعظم چوک، الشمس چوک، سبزی منڈی کے ایریا میں ریڑھی بانوں سمیت دیگر مافیا نے سڑکوں ، فٹ پاتھوں پر تجاوزات کے قبضے جما رکھے ہیں۔ اور ماہانہ بھتہ وصولی کی جارہی ہے جس میں دکانداروں کے علاوہ میونسپل کمیٹی ملازمین کے بھی شراکت داری بارے انکشاف ہوا ہے،

دکانوں کے مالکان مبینہ طور پر دکانوں کے آگے کچھ حصہ خالی رکھتے ہیں تاکہ گاہکوں کو آنے اور ان سے ڈیلنگ میں آسانی لیکن پھر یہ سلسلہ اتنا آگے بڑھتا ہےکہ آدھی سڑک پر دکانداروں کا قبضہ ہوجاتا ہے۔ بازار میں تجاوزات میں اہم کردار دکان دار حضرات اپنی دکانوں کے آگے خود ٹھیلے یا پتھارے لگوا دیتے ہیں اور کسی کو کرایہ پر چڑھا دیتے ہیں، دکاندار اپنے اس فعل کی دلیل پیش کرتے ہیں کہ انہی پتھاروں کی بدولت انکی دکان کے اخراجات کرایہ وغیرہ پورے کرنے میں مدد ملتی ہے۔

دوسری جانب ان تجاوزات کا فائدہ ریڑھی بان اور تھڑوں پر بیٹھنے والے خوانچہ فروش بھی اٹھاتے ہیں، اس بدترین مہنگائی اور بے روزگاری کی وجہ سے سڑکوں فٹ پاتھوں پر ٹھیلے لگانے کے رحجان میں اضافہ ہورہا ہے۔ اور یہ رحجان جہاں ٹریفک کی روانی کو برقرار رکھنے کیلئے رکاوٹ ہے وہیں عوام کیلئے بھی تکلیف کا سبب بن رہے ہیں، شہریوں نے ڈپٹی کمشنر بہاولپور سے فوری نوٹس لینے کا مطالبہ کیا ہے

اوچ شریف ،باغی ٹی وی(نامہ نگارحبیب خان) چمک کا کمال یا سیاسی پریشر،محکمہ انہار اور ریلوے کی مبینہ سرکاری اراضی بارے تحصیل و مقامی انتظامیہ کا آپریشن فلاپ فلم ثابت ہوگیا، نہر عباسیہ لنک کینال کے کنارے پر من پسند، سفارشی اور راشی قابضین تاحال موجود، چھپڑے، پھٹے، اور خیمہ زن غریب دیہاڑی دار طبقہ کو اکھاڑ پھینکا گیا، خالی ہونے والی جگہ پر قبضہ مافیا ایک بار پھر متحرک، راتوں رات کروڑوں مالیتی سرکاری اراضی پر پنجے گاڑنا شروع، پولیس و ذمہ دار ادارے مبینہ مال لیکر خاموش تماشائی،سرکاری اراضی پرقبضہ اور اس پر حکومتی اداروں کی مجرمانہ خاموشی بارے وزیرِ اعلیٰ پنجاب اور کمشنر بہاولپور فوری نوٹس لیں، شہری

مبینہ بااثر اور سیاسی آشیرباد کے حامل قبضہ مافیا نے محکمہ ریلوے اور محکہ انہار کی اراضی سمیت دیگر اہم سرکاری محکموں کی اراضی پر قبضہ کرکے عوام کے بنیادی حقوق سلب کر رکھے ہیں، اس مافیا میں زیادہ تر جرائم پیشہ افراد شامل ہونے کی اطلاعات ہیں، جنہیں بااثر اور سیاسی شخصیات کی پشت پناہی حاصل ہے، جس کی وجہ سے ان کے خلاف کارروائیوں سے گریز کیا جاتا ہے متعلقہ حکام اول تو قبضہ مافیا کی سرگرمیوں کی طرف سے چشم پوشی اختیار کرلیتے ہیں جب کہ عوامی دباؤ پر محض خانہ پوری یا کاغذی کارروائی کے طور پر بڑے آفیسرز کو رپورٹس میں سب اچھا پیش کردیا جاتا ہے،

قبضہ مافیا کے بعض گروپوں کو با اثر سیاسی جماعتوں کے کارندوں اور سیاست دانوں کے چمچوں کی سر پرستی بھی حاصل ہے، کیوں کہ اس مافیا کے کارندے سیاسی جماعتوں کی ریلیوں جلسے اور جلوسوں میں ان کے پرچم اٹھائے شریک ہوتے ہیں اور ان جماعتوں کو مبینہ طور پر فنڈز بھی مہیا کرتے ہیں ان کی سیاسی خدمات کے عوض سیاسی شخصیات اور انکے چیلے قبضہ گروپوں کو مکمل طور سے مدد فراہم کرنے بارے انکشاف ہوا ہے،

ذرائع نے یہ بھی انکشاف کیا ہے کہ بھتہ خور مافیا بھی باقاعدگی سے منتھلی لیتے ہیں اور قبضہ مافیا نے بجلی چوری کروانے کے ساتھ ساتھ سرکاری زمین پر تعمیرات کرنے والوں کو بھی خفیہ سپورٹ کررکھی ہے، خاص طور بیورو کریسی بھی ان کے معاملات سے چشم پوشی اختیار کرنے پر مجبور بتائی جاتی ہے،

اس بابت جب متعلقہ تحصیلدار منور شاہ سے رابطہ کیا گیا تو انہوں نے کہا کہ سرکاری املاک پر سے تمام قبضے ختم کروانے کے لیے تیار ہیں لیکن اس کے لیے ان محکموں کو سامنے آنا ہوگا کہ جن کی اراضی پر قبضہ ہوچکا ہے انہوں نے کہا کہ اگر محکمے انہیں آگاہی فراہم کریں کہ ان کی مجموعی طور پر کتنی اراضی ہے اور کتنی اراضی پر قبضہ ہے تو پھر انتظامیہ کے لیے آسانی ہوسکتی ہے

اوچ شریف ،باغی ٹی وی (نامہ نگار حبیب خان)میونسپل کمیٹی کی مجرمانہ نااہلی ، معصوم بچی کھلے مین ہول میں جاگری ،ہمارےہمسایہ ممالک چاند پر جا پہنچے ،ہمارے ملک میں مین ہول کے ڈھکن پورے نہ ہوسکے – شہری

اوچ شریف شہر کے مختلف علاقوں میں مین ہول اور گٹروں کے ڈھکن غائب ہوگئے، کھلے ہوئے مین ہول شہریوں کیلئے ڈیتھ ہول بن گئے۔ آج بھی میونسپل کمیٹی کی مجرمانہ غفلت کے باعث محلہ بخاری کی رہائشی معصوم بچی کھلے مین ہول میں جاگری، انتظامیہ کی روایتی بے حسی، شہریوں کا کہنا ہے کہ ہماراازلی دشمن اور ہمسایہ ملک بھارت چاند کے اس حصے پر جاپہنچا جہاں دنیا کاکوئی دوسراترقی یافتہ ملک ابھی تک نہیں پہنچ پایا ،شہریوں کاکہنا تھا کہ افسوس کے ساتھ کہنا پڑتا ہے ہم سے تو ہمارے مین ہولز کے ڈھکن نہ سنبھالے جا سکے ،یہ کرپشن اور بے حسی کی انتہا ہے کہ کئی بار نشاندہی کے باوجود د گٹروں پر ڈھکن لگانے کا بندوبست نہیں کیاجاسکا ۔

اسسٹنٹ کمشنر احمد پور اور میونسپل کمیٹی اوچ شریف کی مجرمانہ غفلت و لاپرواہی کانتیجہ ہے کہ معصوم بچی کھلے مین ہول میں گرگئی اس سے قبل بھی کئی موٹرسائیکل سوار ان کھلے مین ہولز کی وجہ سے حادثات کا شکار ہوچکے ہیں ،

شہریوں نے تنبیہ کرتے ہوئے کہا کہ اب اگر ان کھلے مین ہولز کی وجہ سے کوئی حادثہ یا جانی نقصان ہواتو ہم میونسپل کمیٹی اور اسسٹنٹ کمشنر احمدپورشرقیہ و دیگرافسران کے خلاف عدالت سے رجوع کریں گے اوران پر مقدمات درج کرائے جائیں گے اوراب شہری مزید خاموش رہ کر ظلم برداشت نہیں کریں گے

انہوں نے باغی ٹی وی کو بتایا کہ اوچ شریف شہر کی مرکزی سڑکوں کے علاوہ اندرونی گلیوں شمیم آباد، اختر کالونی، محلہ امیر آباد سمیت دیگر کئی علاقوں میں گٹروں کے مین ہول کھلے پڑے ہیں،جن کے ڈھکن غائب ہیں، جس سے کسی بھی وقت کوئی اورناخوشگوار واقعہ پیش آسکتا ہے اور اسکول کے بچے ان مین ہولز میں گرسکتے ہیں،

اوچ شریف کے مکینوں نے کمشنر بہاول پور سے مطالبہ کیا ہے کھلے ہوئے گٹروں پر فی الفور ڈھکن لگائے جائیں تاکہ کسی بڑے حادثہ سے شہری محفوظ رہیں

اوچ شریف،باغی ٹی وی (نامہ نگار حبیب خان )وزیر اعلیٰ پنجاب مریم نواز شریف کے احکامات پر اوچ شریف تھانہ کے انچارج سجاد خان لغاری نے موٹرسائیکل سواروں کو پتنگ بازی سے بچانے کی آگاہی مہم شروع کر دی

تفصیلات کے مطابق وزیر اعلیٰ پنجاب مریم نواز شریف کے احکامات پر عملدرآمد کرتے ہوئے موٹر سائیکل سواروں کو پتنگ بازی کے خطرات سے بچانے کے لیے پنجاب پولیس تھانہ اوچ شریف کے انچارج سجاد لغاری نے بھی آگاہی مہم اور اقدامات شروع کر دیئے ،یہ اقدام فوری طور پر موثر ہے اور اس کا مقصد پتنگ کی ڈور کی وجہ سے ہونے والے حادثات کو ختم کرنا ہے ۔

حفاظتی راڈز آسان اور سستے آلات ہیں جو موٹر سائیکل کے ہینڈل بار سے جڑے ہوتے ہیں۔ یہ روک کے طور پر کام کرتے ہیں،دھاتی ڈور کو موڑتے ہیں اور الجھنے کے خطرے کو کم کرتے ہیں۔

سجاد لغاری نے تمام موٹر سائیکل سواروں سے زور دے کر کہا کہ وہ بغیر تاخیر کے اپنی گاڑیوں پر حفاظتی راڈز لگائیں۔ انچارج تھانہ اوچ شریف سجاد لغاری نے کہا ہمارے شہریوں کی حفاظت ہماری اولین ترجیح ہے ۔ ہم ان قابلِ روک تھام حادثوں کو روکنے اور اپنے موٹر سائیکل سواروں کی حفاظت کو یقینی بنانے کے لیے ایک فعال قدم اٹھا رہے ہیں