Category: چکوال

چکوال : 9 سالہ آسٹریلوی شہری ہانیہ احمد کی ہلاکت کے واقعے کی تحقیقات میں پنجاب کے کرائم کنٹرول ڈپارٹمنٹ (سی سی ڈی) کے ایک کانسٹیبل کو ذمہ دار قرار دے دیا گیا ہے۔ تحقیقاتی رپورٹ کے مطابق کانسٹیبل نے اعلیٰ افسران کی اجازت کے بغیر ایک گاڑی پر سرکاری ایس ایم جی سے فائرنگ کی، جس کے نتیجے میں کمسن بچی ہانیہ احمد جاں بحق جبکہ اس کے والد عدیل احمد اور بھائی عفان زخمی ہوئے۔

یہ افسوسناک واقعہ 10 اور 11 جون کی درمیانی شب چکوال میں سی سی ڈی تھانے کے باہر پیش آیا تھا۔ آسٹریلوی شہری عدیل احمد اپنی اہلیہ اور دو کمسن بچوں کے ہمراہ گاڑی میں سفر کررہے تھے کہ دو مسلح افراد نے انہیں روک کر لوٹنے کی کوشش کی۔ اسی دوران قریب موجود سی سی ڈی کانسٹیبل نے فائرنگ کی، جس کی زد میں آکر 9 سالہ ہانیہ احمد جان کی بازی ہار گئی، جبکہ عدیل احمد اور ان کا بیٹا عفان زخمی ہوگئے۔

واقعے کے ایک ہفتے بعد 18 جون کو سی سی ڈی کے سربراہ ایڈیشنل آئی جی سہیل ظفر چٹھہ اور پنجاب پولیس کے آئی جی عبد الکریم نے لاہور میں مشترکہ پریس کانفرنس کرتے ہوئے تحقیقات ایک ہفتے میں مکمل کرنے کا اعلان کیا تھا، تاہم تحقیقات مکمل ہونے کے بعد 200 صفحات پر مشتمل رپورٹ 28 جولائی کو چالان کی صورت میں پراسیکیوٹر کے دفتر میں جمع کرائی گئی۔

تحقیقاتی رپورٹ کے مطابق کیس کی تفتیش سی سی ڈی چکوال کے سب انسپکٹر محمد عرفان نے کی۔ رپورٹ میں 34 گواہوں کے بیانات شامل کیے گئے ہیں، جبکہ واقعے سے متعلق مختلف شواہد اور اہلکاروں کے بیانات کا بھی تفصیلی جائزہ لیا گیا۔

رپورٹ کے مطابق ملزم کانسٹیبل نے اپنے بیان میں مؤقف اختیار کیا کہ وہ سی سی ڈی تھانے کے مرکزی دروازے کے قریب موجود تھا کہ اسے باہر سے شور سنائی دیا۔ اس نے دیکھا کہ دو مسلح افراد تھانے کے قریب ایک سفید گاڑی کو لوٹنے کی کوشش کررہے تھے۔ کانسٹیبل کے مطابق ایک مسلح شخص نے اسے دیکھ کر پستول سے فائر کیا، جس کے جواب میں اس نے بھی ڈاکوؤں پر فائرنگ کی۔

کانسٹیبل نے تفتیش کے دوران یہ بھی بتایا کہ فائرنگ کے دوران گاڑی اسلامیہ چوک کی جانب تیزی سے روانہ ہوگئی، جس کا تعاقب کرنے کے لیے اس نے ایک نجی موٹر سائیکل پر لفٹ لی، تاہم وہ گاڑی تک پہنچنے میں کامیاب نہیں ہوسکا۔

تاہم رپورٹ کے مطابق ڈیوٹی افسر انسپکٹر جہانزیب خان نے کانسٹیبل کے مؤقف کو مسترد کردیا۔ انسپکٹر نے تفتیش کاروں کو بتایا کہ کانسٹیبل نے ان کی یا کسی بھی سینئر افسر کی اجازت کے بغیر سرکاری ایس ایم جی سے فائرنگ کی اور اس کے بعد بھی بغیر اجازت نجی موٹر سائیکل پر گاڑی کا تعاقب کیا۔

اس موقع پر تھانے میں موجود تین دیگر اہلکاروں نے بھی انسپکٹر جہانزیب خان کے بیان کی تصدیق کی۔ تحقیقاتی رپورٹ میں کانسٹیبل کی جانب سے اپنے دفاع میں فائرنگ کرنے کے دعوے کو حقائق کے منافی اور غلط قرار دیا گیا ہے۔

رپورٹ کے مطابق جائے وقوع سے پستول کے 14 جبکہ کلاشنکوف کے 13 خول بھی برآمد ہوئے۔ تفتیش کے دوران مختلف شواہد، گواہوں کے بیانات اور واقعے سے متعلق دیگر مواد کو رپورٹ کا حصہ بنایا گیا۔

تحقیقاتی رپورٹ میں یہ بھی بتایا گیا ہے کہ ہانیہ احمد، اس کے والد عدیل احمد اور بھائی عفان کو لگنے والی گولیوں اور خون کے نمونوں سے متعلق پنجاب فرانزک سائنس ایجنسی کی حتمی رائے تاحال موصول نہیں ہوئی۔

تحقیقاتی رپورٹ میں کانسٹیبل کو اعلیٰ حکام کی اجازت کے بغیر فائرنگ کرنے اور اس کے نتیجے میں پیش آنے والے واقعے کا ذمہ دار قرار دیا گیا ہے، جبکہ فرانزک رپورٹ کی حتمی رائے موصول ہونے کے بعد کیس میں مزید قانونی پیش رفت متوقع ہے۔

چکوال : یونیورسٹی آف چکوال کی سنڈیکیٹ کا اہم اجلاس پنجاب ہائر ایجوکیشن عارفہ کریم ٹاور لاہور میں منعقد ہوا، جس کی صدارت صوبائی وزیر ہائر ایجوکیشن پنجاب رانا سکندر حیات نے کی۔ اجلاس میں وائس چانسلر یونیورسٹی آف چکوال پروفیسر ڈاکٹر فرخ ارسلان صدیقی سمیت حکومت پنجاب، ہائر ایجوکیشن کمیشن، پنجاب ہائر ایجوکیشن کمیشن، محکمہ خزانہ و قانون، اراکین پنجاب اسمبلی، ماہرین تعلیم، صنعت و تجارت اور سول سوسائٹی کے نمائندگان نے شرکت کی۔

اجلاس میں گزشتہ سنڈیکیٹ اجلاس کی کارروائی کی توثیق، سابقہ فیصلوں پر عملدرآمد کا جائزہ اور وائس چانسلر کو تفویض اختیارات کے تحت کیے گئے اقدامات کی منظوری دی گئی۔ اکیڈمک کونسل، فنانس اینڈ پلاننگ کمیٹی اور سلیکشن بورڈ کی سفارشات پر بھی تفصیلی غور کیا گیا۔

سنڈیکیٹ نے مالی سال 2026-27 کیلئے یونیورسٹی آف چکوال کے 85 کروڑ 56 لاکھ روپے کے بجٹ کی منظوری دے دی۔ اجلاس میں بتایا گیا کہ مؤثر مالی منصوبہ بندی، اخراجات میں نظم و ضبط اور بہتر مالی انتظام کے باعث یونیورسٹی نے 45 ملین روپے کا سرپلس حاصل کیا ہے، جسے صوبائی وزیر ہائر ایجوکیشن اور دیگر شرکاء نے خوش آئند قرار دیا۔

اجلاس میں تدریسی و غیر تدریسی آسامیوں پر بھرتیوں، زیر التوا بھرتیوں، سرچ کمیٹیوں کی ازسرنو تشکیل، سکروٹنی کمیٹیوں اور ریکروٹمنٹ کمپلینٹ ریڈریسل سیل کے قیام سمیت متعدد معاملات کا جائزہ لیا گیا۔

سنڈیکیٹ کے کاروباری قواعد، چیئرپرسن، ڈائریکٹر اور پرنسپل کی تقرری سے متعلق مجوزہ قوانین، اساتذہ و ملازمین کی ڈیپوٹیشن، بیرون ملک غیر معمولی رخصت، پارٹ ٹائم میڈیکل آفیسر اور وزٹنگ یا پارٹ ٹائم لیبارٹری انجینئرز کی تقرری سمیت مختلف انتظامی امور پر بھی غور کیا گیا۔

اجلاس میں یونیورسٹی کے ایونٹ ہالز کے استعمال اور عدالتی احکامات کی روشنی میں بعض انفرادی و انتظامی معاملات کا بھی جائزہ لیا گیا۔ اکنامکس ڈیپارٹمنٹ کی اسسٹنٹ پروفیسر ڈاکٹر منیبہ ثناء کی عدالتی احکامات کی روشنی میں دائر اپیل بھی سنی گئی، جس پر فیصلہ محفوظ کرلیا گیا۔

شرکاء نے یونیورسٹی انتظامیہ کی جانب سے ادارہ جاتی استحکام، مالی نظم و ضبط، شفافیت اور تعلیمی معیار کی بہتری کیلئے کیے جانے والے اقدامات پر اطمینان کا اظہار کیا۔ اجلاس میں منظور کیے گئے فیصلوں کو یونیورسٹی کی ترقی، تحقیق و تدریس کے فروغ اور مالی و انتظامی استحکام کی جانب اہم پیش رفت قرار دیا گیا۔

نوجوان صحافی، اینکر پرسن، ڈائریکٹر ڈیلی چکوال اور نیوز ایڈیٹر باغی ٹی وی فیضان شیخ کو صحافتی خدمات کے اعتراف میں 14 اگست 2026ء کو شانِ پاکستان ایوارڈ سے نواز دیا گیا۔

یومِ آزادی پاکستان کے موقع پر اپووا کے زیر اہتمام لاہور میں منعقدہ تقریب میں فیضان شیخ کو صحافت کے شعبے میں ان کی خدمات، پیشہ ورانہ صلاحیتوں اور عوامی مسائل کو اجاگر کرنے کے حوالے سے نمایاں کردار پر یہ اعزاز پیش کیا گیا۔ فیضان شیخ طویل عرصے سے صحافت کے شعبے سے وابستہ ہیں اور بطور صحافی و اینکر پرسن علاقائی مسائل، عوامی معاملات اور اہم خبروں کو مؤثر انداز میں اجاگر کرنے میں اپنا کردار ادا کر رہے ہیں۔بطور ڈائریکٹر ڈیلی چکوال اور ٹی این این ڈیجیٹل فیضان شیخ مقامی صحافت کے فروغ اور عوامی مسائل کو صحافتی پلیٹ فارم کے ذریعے اجاگر کرنے کے لیے سرگرم عمل ہیں، جبکہ نیوز ایڈیٹر و انچارج نمائندگان باغی ٹی وی کی حیثیت سے بھی صحافتی نمائندگان کے امور کی نگرانی اور خبروں کی مؤثر ترسیل میں اپنی ذمہ داریاں نبھا رہے ہیں۔

فیضان شیخ کو شانِ پاکستان ایوارڈ ملنا صرف ان کی ذاتی کامیابی نہیں بلکہ ضلع چکوال/تلہ گنگ کے لیے بھی باعثِ فخر ہے۔ ایک نوجوان صحافی کا اپنی پیشہ ورانہ صلاحیتوں اور صحافتی خدمات کے اعتراف میں یہ اعزاز حاصل کرنا چکوال/تلاگنگ کے لیے اعزاز کی بات ہے۔ ان کی یہ کامیابی علاقے کے دیگر نوجوانوں کے لیے بھی حوصلہ افزائی کا باعث ہے اور اس امر کی عکاسی کرتی ہے کہ چکوال/تلہ گنگ کے باصلاحیت نوجوان اپنی محنت اور صلاحیتوں کے ذریعے ملکی سطح پر اپنی شناخت بنانے کی صلاحیت رکھتے ہیں۔صحافتی، سیاسی، سماجی اور کاروباری حلقوں نے فیضان شیخ کو شانِ پاکستان ایوارڈ حاصل کرنے پر مبارکباد پیش کرتے ہوئے کہا ہے کہ ان کی یہ کامیابی ضلع چکوال/تلہ گنگ کے لیے قابلِ فخر ہے۔ انہوں نے امید ظاہر کی کہ فیضان شیخ مستقبل میں بھی مثبت، ذمہ دارانہ اور عوامی خدمت پر مبنی صحافت کے ذریعے چکوال/تلہ گنگ کا نام روشن کرتے رہیں گے۔

فیضان شیخ نے اعزاز ملنے پر اظہارِ تشکر کرتے ہوئے کہا کہ شانِ پاکستان ایوارڈ ان کے لیے باعثِ اعزاز ہے۔ وہ آئندہ بھی صحافت کے ذریعے عوامی مسائل کو اجاگر کرنے، مثبت صحافت کو فروغ دینے اور اپنے پیشہ ورانہ فرائض مزید محنت، دیانت داری اور ذمہ داری کے ساتھ ادا کرنے کی کوشش جاری رکھیں گے۔

آل پاکستان رائٹرز ویلفیئر ایسوسی ایشن (اپووا) کے بانی و صدر ایم ایم علی کی تلہ گنگ آمد کے موقع پر انہوں نے مصنفہ نمرہ ملک کے بھائی کے انتقال پر ان کے گھر جا کر تعزیت کی۔ اس موقع پر اپووا چکوال و تلہ گنگ کے کوآرڈینیٹر فیضان شیخ بھی ان کے ہمراہ موجود تھے۔ بانیِ اپووا نے مرحوم کے لیے دعائے مغفرت کی اور سوگوار خاندان سے دلی ہمدردی اور تعزیت کا اظہار کیا۔

بعد ازاں بانیِ اپووا نے اپووا کے ضلعی دفتر کا دورہ کیا، جہاں ان کی اپووا کوآرڈینیٹر فیضان شیخ سے تفصیلی ملاقات ہوئی۔ ملاقات کے دوران تنظیمی امور، ادبی سرگرمیوں اور مستقبل کے منصوبوں پر تبادلۂ خیال کیا گیا۔ دونوں رہنماؤں نے باہمی تعاون کو مزید مضبوط بنانے اور ادبی خدمات کے فروغ کے عزم کا اظہار کیا۔اس موقع پر چکوال اور تلہ گنگ میں اپووا کے زیرِ اہتمام ایک ادبی کانفرنس کے انعقاد کے حوالے سے بھی لائحۂ عمل طے کیا گیا۔فیضان شیخ کی جانب سے بانیِ اپووا کے اعزاز میں پرتکلف ظہرانے کا اہتمام بھی کیا گیا تھا، جس میں معروف کالم نگار اور صحافی ارشد کوٹگلہ بھی شریک ہوئے۔