چکوال: 12 سالہ یتیم بچی سے مبینہ زیادتی کے مقدمے میں نامزد پیر سید عبداللہ شاہ اپنے ہی ساتھیوں کی فائرنگ سے زخمی ہوگیا۔
ذرائع کے مطابق گرفتار ملزم پیر سید عبداللہ شاہ کو پولیس اسلحہ برآمدگی کے لیے لے جا رہی تھی کہ تلہ گنگ گٹال موڑ کے قریب مبینہ طور پر اس کے ساتھیوں نے پولیس پارٹی پر فائرنگ کردی۔
پولیس کی جوابی کارروائی کے دوران فائرنگ کے تبادلے میں گدی نشین آستانہ دندہ شاہ بلاول پیر سید عبداللہ شاہ اپنے ہی ساتھیوں کی فائرنگ کی زد میں آکر زخمی ہوگیا۔ واقعے کے بعد زخمی ملزم کو طبی امداد کے لیے اسپتال منتقل کیا جا رہا ہے، جبکہ فائرنگ کے بعد فرار ہونے والے ملزمان کی گرفتاری کے لیے پولیس کی کارروائی جاری ہے۔
یاد رہے کہ چند روز قبل میانوالی سے دم کروانے کے لیے چکوال آنے والی 12 سالہ یتیم بچی نے مذکورہ پیر پر مبینہ زیادتی کا الزام عائد کیا تھا۔ پولیس نے واقعے کا مقدمہ درج کرکے پیر سید عبداللہ شاہ کو گرفتار کیا تھا۔
دستیاب میڈیکل رپورٹ کے مطابق متاثرہ بچی کے ساتھ جنسی زیادتی کی تصدیق ہوئی تھی۔ واقعے کے بعد پولیس کی جانب سے مقدمے کی مزید تفتیش جاری ہے، جبکہ آج پیش آنے والے فائرنگ کے واقعے کی بھی تحقیقات کی جا رہی ہیں۔