Category: چارسدہ

چارسدہ میں خوارج کے خلاف عوامی ردِعمل میں نمایاں شدت دیکھنے میں آ رہی ہے، جہاں شہریوں نے مختلف مقامات پر دیواروں پر خوارجی دہشتگرد نور ولی کے چہرے پر “لعنت” لکھ کر اپنے شدید غم و غصے کا اظہار کیا۔

عوامی حلقوں کا کہنا ہے کہ دہشتگرد عناصر نے نہ صرف ملک کے امن کو نقصان پہنچایا بلکہ مذہبی شخصیات، مساجد اور معصوم شہریوں کو بھی مسلسل نشانہ بنایا۔مقامی ذرائع کے مطابق مولانا شیخ ادریس کی شہادت کے بعد علاقے میں خوارج کے خلاف جذبات مزید بھڑک اٹھے ہیں۔ شہریوں کا کہنا ہے کہ علما پر حملے دراصل دین اسلام اور امن دشمنی کا کھلا ثبوت ہیں۔ مختلف علاقوں میں عوام نے دہشتگردی کے خلاف نعرے لگائے اور خوارج کے خلاف سخت کارروائی کا مطالبہ کیا۔دوسری جانب مولانا فضل الرحمٰن سمیت متعدد مذہبی علما کی جانب سے خوارج کے خلاف اعلانِ جنگ کے بعد عوامی بیانیے میں بھی سختی دیکھی جا رہی ہے۔ مذہبی رہنماؤں نے واضح کیا ہے کہ معصوم انسانوں کا قتل، مساجد پر حملے اور علما کو نشانہ بنانا اسلامی تعلیمات کے سراسر منافی ہے۔

عوامی و مذہبی حلقوں کا کہنا ہے کہ خوارج نے اپنی کارروائیوں سے خود کو اسلام اور انسانیت دونوں کا دشمن ثابت کیا ہے، جبکہ شہریوں نے مطالبہ کیا ہے کہ دہشتگرد عناصر اور ان کے سہولت کاروں کے خلاف بلاامتیاز کارروائی کی جائے تاکہ ملک میں امن و استحکام کو یقینی بنایا جا سکے۔

خیبرپختونخوا کے ضلع چارسدہ میںجمعیت علمائے اسلام (جے یو آئی) کے سابق رکن صوبائی اسمبلی مولانا محمد ادریس پر حملہ کرنے والوں میں سے ایک کی شناخت ہو گئی ہے

پولیس کے مطابق واقعہ اس وقت پیش آیا جب مولانا محمد ادریس اپنی گاڑی میں سفر کر رہے تھے۔ حملہ آوروں نے گاڑی پر عقب سے اندھا دھند فائرنگ کی، جس کے نتیجے میں وہ موقع پر ہی جان کی بازی ہار گئے جبکہ دو اہلکار زخمی ہو گئے، جنہیں فوری طور پر قریبی اسپتال منتقل کر دیا گیا۔تفتیشی حکام کا کہنا ہے کہ حملے میں ملوث چار دہشت گردوں میں سے ایک کی شناخت کر لی گئی ہے، جس کا تعلق افغانستان سے بتایا جا رہا ہے۔ حکام کے مطابق شناخت ہونے والے ملزم کی مدد سے پورے نیٹ ورک تک رسائی حاصل کرنے کی کوشش جاری ہے۔ ابتدائی تحقیقات سے یہ بات سامنے آئی ہے کہ اس حملے کی منصوبہ بندی افغانستان میں کی گئی۔

دوسری جانب واقعے کا مقدمہ محکمہ انسداد دہشت گردی (سی ٹی ڈی) کے تھانہ مردان میں درج کر لیا گیا ہے۔ ایف آئی آر کانسٹیبل شیر عالم کی مدعیت میں نامعلوم ملزمان کے خلاف درج کی گئی ہے، جس میں قتل اور دہشت گردی کی دفعات شامل کی گئی ہیں۔ایف آئی آر کے متن کے مطابق مولانا محمد ادریس گاڑی میں دو پولیس اہلکاروں اور ڈرائیور کے ہمراہ سفر کر رہے تھے کہ نامعلوم افراد نے پیچھے سے فائرنگ کر دی، جس کے نتیجے میں یہ افسوسناک واقعہ پیش آیا۔

ڈسٹرکٹ پولیس آفیسر چارسدہ محمد وقاص خان کی خصوصی ہدایات پر ضلع بھر میں امن و امان کی صورتحال کو برقرار رکھنے اور جرائم پیشہ عناصر کے خلاف کارروائیاں تسلسل کے ساتھ جاری ہیں۔

اسی سلسلے میں ڈی ایس پی شبقدر ریاض خان کی نگرانی میں سروکلے پولیس نے عوامی شکایات کا فوری نوٹس لیتے ہوئے ایس ایچ او سروکلے آصف خان نے ٹیم کے ہمراہ کارروائی کرتے ہوئے موضع باڈی کور میں قائم ایک ڈانس پارٹی پر چھاپہ مارا۔چھاپے کے دوران تین خواتین ڈانسرز مسماتہ (ص)، مسماتہ (کا) اور مسماتہ (ک) جبکہ دس مرد تماش بین جن میں واجد، یونس، زیشان، گلستان، نعیم، محمد جان، سائر، مثل خان، ادریس اور عابد علی شامل ہیں کو گرفتار کر لیا گیا۔پولیس نے موقع سے چار عدد پستول اور گیارہ شراب کی بوتلیں بھی برآمد کر لیں۔ گرفتار ملزمان کے خلاف متعلقہ دفعات کے تحت مقدمات درج کرکے مزید تفتیش شروع کر دی گئی ہے۔

ڈی ایس پی شبقدر ریاض خان نے کہا ہے کہ عوام کے جان و مال کے تحفظ، امن و امان کے قیام اور غیر قانونی و غیر اخلاقی سرگرمیوں کے مکمل خاتمے کے لیے پولیس کی کارروائیاں بلا امتیاز جاری رہیں گی۔ انہوں نے واضح کیا کہ معاشرے کے امن کو خراب کرنے والے عناصر کے خلاف کسی قسم کی نرمی نہیں برتی جائے گی اور قانون کی بالادستی ہر صورت یقینی بنائی جائے گی۔ عوامی شکایات پر فوری کارروائی چارسدہ پولیس کی اولین ترجیح ہیں۔

چارسدہ: خیبر پختونخوا کے ضلع چارسدہ میں افسوسناک فائرنگ کے ایک واقعے میں سرکاری اسکول کی دو خاتون اساتذہ جاں بحق ہوگئیں۔

پولیس کے مطابق یہ واقعہ پیر کی صبح پڑانگ قبرستان کے قریب پیش آیا، جہاں نامعلوم مسلح افراد نے اسکول ڈیوٹی پر جانے والی خواتین پر فائرنگ کردی۔پولیس حکام نے بتایا کہ دونوں مقتول خواتین گورنمنٹ ہائی اسکول شاہ پسند کلی میں ملازم تھیں اور روزانہ کی طرح آج بھی فرائض انجام دینے کے لیے اسکول جا رہی تھیں کہ راستے میں گھات لگائے بیٹھے حملہ آوروں نے اندھا دھند گولیاں برسا دیں۔ فائرنگ کے نتیجے میں دونوں خواتین موقع پر ہی دم توڑ گئیں۔

واقعے کی اطلاع ملتے ہی پولیس کی نفری جائے وقوعہ پر پہنچ گئی، علاقے کو گھیرے میں لے کر شواہد جمع کیے گئے۔ پولیس کا کہنا ہے کہ قتل کی اس واردات کے محرکات کا فوری طور پر علم نہیں ہوسکا، تاہم ابتدائی معلومات کی روشنی میں مختلف پہلوؤں پر تفتیش جاری ہے۔پولیس حکام کا کہنا ہے کہ جلد ہی ملزمان کو گرفتار کرکے قانون کے کٹہرے میں لایا جائے گا۔ واقعے نے علاقے میں خوف و ہراس پھیلا دیا ہے، جبکہ شہریوں نے خاتون اساتذہ پر حملے کی شدید مذمت کی ہے۔

جمعیت علما اسلام کے سربراہ مولانا فضل الرحمان نے کہا ہے کہ مدارس کی آزادی کی جنگ لڑ رہے ہیں، حکومت نے آج اجلاس بلا کر علما کو تقسیم کرنے کی سازش کی ہے،

مدارس رجسٹریشن پر علما اجلاس کے بعد پریس کانفرنس کرتے ہوئے مولانا فضل الرحمان کا کہنا تھا کہ بل پر تمام جماعتیں متفق ہوئیں، بل سینیٹ اور قومی اسمبلی سے پاس ہوا،مفتی تقی عثمانی نے کہا کہ وفاق اور تنظیمات المدارس کا اجلاس 17 دسمبر کو بلایا ہے،ہم صرف مدارس بورڈ نہیں بلکہ ہر مدرسے اور طالب علم کا تحفظ چاہتے ہیں، ہم مدارس کی رجسٹریشن چاہتے ہیں یہ ہمیں کہیں اور دھکیل رہے ہیں، ہم مدارس کی آزادی کی جنگ لڑ رہے ہیں، یہ ڈمی حکومت ہے ،پی ڈی ایم حکومت نے دینی مدارس کے بل پر اتفاق رائے کیا تھا ، ہم ریاست سے تصادم نہیں چاہتے، مدارس کو ایک ایکٹ کیساتھ منسلک کیا جارہا ہے، کے پی کے میں امن و امان تباہ ہو چکا ہے، لوگوں کا قتل عام ہورہا ہے،حکمران ملک بچانے کیلئے فکر مند ہو جائیں، علما کے مقابلے میں علما کو لایا جارہا ہے،ہم ریاست کیساتھ تصادم نہیں چاہتے، ہمیں حکومت کی کوئی تجویز قبول نہیں، جو علما اسلام آباد جمع ہو ئے ہم ان کا بھی احترام کرتے ہیں، یہ علما کو تقسیم کرنےکی سازش ہے، 2019میں دیا گیا نظام صرف ایک معاہدہ ہے، ہم قانون کی بات کر رہے ہیں حکومت اس کو سیاسی اکھاڑا نہ بنائے، اس وقت تک ہمیں حکومت کی کوئی تجاویز قبول نہیں،

دینی مدارس کی رجسٹریشن،حکومت نے نیا مسوودہ جے یوآئی کو دے دیا

دینی مدارس میں سرکار کی مداخلت نہیں مانتے،مولانا فضل الرحمان

مدارس رجسٹریشن بل کو قانونی شکل دینے میں کچھ وقت درکار ہے،وزیر برائے مذہبی امور

مدارس رجسٹریشن بل،صدر مملکت کا اعتراض،واپس بھجوا دیا

مدارس پر تنقید کر کے اصل حقائق نہیں چھپائے جا سکتے۔ترجمان جے یو آئی

دینی مدارس کے طلبہ عصری تعلیم میں بھی بازی لے گئے

مدارس،مساجد کی رجسٹریشن کا بل،جے یو آئی سینیٹر کا قائمہ کمیٹی سے واک آؤٹ

بین المدارس کھیلوں کے مقابلے،ضلع مہمند کے کھلاڑیوں نے جیت اپنے نام کر دی

عوامی نیشنل پارٹی کے مرکزی صدر سینیٹر ایمل ولی خان نے خیبر پختونخوا میں منعقدہ جلسے سے خطاب کرتے ہوئے اہم سیاسی اور انتخابی نکات پر کھل کر بات کی۔ چار سدہ میں ہونے والے اس جلسے میں جے یو آئی رہنما محمد احمد خان کی عوامی نیشنل پارٹی میں شمولیت کا اعلان بھی کیا گیا، جسے پارٹی کے لیے ایک بڑی کامیابی قرار دیا جا رہا ہے۔ سینیٹر ایمل ولی خان نے کہا کہ عام انتخابات میں تحریک انصاف کے امیدواروں کو دہشت گرد اور طالبان کی مدد سے کامیاب کیا گیا، اور تحریک انصاف کے بیلٹ بکس بھرے گئے۔ ان کا کہنا تھا کہ انہوں نے سینیٹ اجلاس میں تحریک انصاف کو انتخابی آڈٹ کا چیلنج دیا ہے اور مطالبہ کیا ہے کہ انتخابی حلقے کھولے جائیں تاکہ شفافیت کو یقینی بنایا جا سکے۔ ایمل ولی خان نے دعویٰ کیا کہ عام انتخابات میں ان کا مینڈیٹ چوری کیا گیا تھا، تاہم تین ماہ بعد باجوڑ کی صوبائی سیٹ وہ جیت چکے ہیں۔
سینیٹر ایمل ولی خان نے خیبر پختونخوا کے وسائل کے حوالے سے بھی شدید تنقید کی اور کہا کہ صوبے کے وسائل تخت پنجاب کی جنگ میں استعمال کیے جا رہے ہیں۔

انہوں نے خیبرپختونخوا کے موجودہ وزیر اعلیٰ علی امین گنڈاپور کو "ڈائیلاکی وزیر اعلیٰ” قرار دیا اور چیلنج کیا کہ وہ صوبے میں ایک بھی قابل ذکر پراجیکٹ دکھا دیں۔ ان کا کہنا تھا کہ خیبر پختونخوا تقریباً 1800 ارب روپے کا مقروض ہے، اور پی ٹی آئی کی حکومت اس قرضے کو 2800 ارب روپے تک بڑھا دے گی۔ایمل ولی خان نے تحریک انصاف پر شدید تنقید کرتے ہوئے مزید کہا کہ پختون عوام کو عمران خان کی رہائی کے لیے استعمال کیا جا رہا ہے۔ انہوں نے شکوہ کیا کہ گزشتہ گیارہ سالوں سے ان کو انتخابات میں شکست دی جا رہی ہے اور ریاستی ادارے بار بار عوامی نیشنل پارٹی کے پارلیمان میں داخلے کے راستے میں رکاوٹیں ڈال رہے ہیں۔ انہوں نے اپنی پارٹی کے دو سینیٹرز کو پارلیمان کے دیگر تمام سینیٹرز سے زیادہ مؤثر اور بھاری قرار دیا۔عوامی نیشنل پارٹی کے سربراہ کا یہ بیان پاکستانی سیاست میں ایک نیا باب کھول سکتا ہے، خاص طور پر خیبر پختونخوا میں وسائل کی تقسیم اور انتخابات میں شفافیت کے حوالے سے پیدا ہونے والے سوالات میں مزید شدت کا باعث بن سکتا ہے۔ ان کی باتوں سے اندازہ ہوتا ہے کہ عوامی نیشنل پارٹی آنے والے انتخابات میں خیبر پختونخوا کے عوام کے حقوق کے لیے ایک مضبوط مؤقف اختیار کرنے کا ارادہ رکھتی ہے۔