ڈیرہ غازی خان،باغی ٹی وی (سٹی رپورٹر جواد اکبر) ٹیچنگ ہسپتال میں سیوریج سسٹم ناکام، کروڑوں کے فنڈز کرپشن کی نذر
تفصیل کے مطابق ڈیرہ غازی خان کے ٹیچنگ ہسپتال میں انتظامی نااہلی اور کرپشن نے عوام کی مشکلات میں اضافہ کر دیا ہے۔ ایم ایس عبد الرحمن عامر، بلڈنگ ایکسئین شہزاد سمیع اور سب انجینیئر فیاض کھوسہ کی زیر نگرانی کروڑوں روپے کے فنڈز ہسپتال کی سیوریج نظام کی بحالی کے لیے جاری کیے گئے لیکن یہ رقم کرپشن کی نذر ہو گئی۔ نتیجتاً ہسپتال کے سیوریج کا نظام ابتر ہوچکا ہے۔
ہسپتال کے مین ہول کھلے پڑے ہیں اور گٹر ابل رہے ہیں، جس کے باعث پارکنگ ایریاز اور گراسی پلاٹس گندگی سے بھرے ہوئے ہیں۔ ہر طرف سیوریج کا پانی اور کیچڑ پھیلا ہوا ہے، جو ہسپتال آنے والے مریضوں اور ان کے تیمارداروں کے لیے شدید پریشانی کا باعث ہے۔ مریضوں کو نہ صرف اپنے کپڑوں کے خراب ہونے کا سامنا ہے بلکہ بدبو اور گندگی نے پورے علاقے کے ماحول کو خراب کر رکھا ہے۔
محکمہ ہیلتھ نے سیوریج سسٹم کی بحالی کے لیے کروڑوں روپے کے فنڈز جاری کیے تھے جو ہسپتال انتظامیہ کے ذریعے محکمہ بلڈنگ ڈیپارٹمنٹ کو فراہم کیے گئے۔ لیکن بدقسمتی سے یہ فنڈز بلڈنگ ڈیپارٹمنٹ کے افسران کی مبینہ ملی بھگت سے ضائع ہو گئے اور سیوریج سسٹم کی بحالی کے لیے کوئی موثر کام نہیں کیا جا سکا۔
شہریوں اور سماجی حلقوں نے اس سنگین صورتحال پر شدید تشویش کا اظہار کیا ہے۔ ان کا کہنا ہے کہ ہسپتال کی خراب حالت انتظامیہ کی غفلت اور کرپشن کا نتیجہ ہے۔ ناصر قریشی، رانا انتظار، الیاس، بخت علی، عاشق علی اور ساجد خان جیسے نمائندہ شہریوں نے مطالبہ کیا ہے کہ کمشنر ناصر محمود بشیر، ڈپٹی کمشنر عثمان خالد اور وزیر اعلیٰ پنجاب مریم نواز اس معاملے میں فوری ایکشن لیں۔
عوام کا کہنا ہے کہ ہسپتال کی سیوریج نظام کی فوری بحالی کے لیے ہنگامی اقدامات کیے جائیں اور ذمہ دار افسران کو معطل کرکے ان کے خلاف کارروائی کی جائے۔ انہوں نے یہ بھی مطالبہ کیا کہ ہسپتال انتظامیہ کے لیے نئے افسران تعینات کیے جائیں اور اس مسئلے کے مستقل حل کے لیے موقع پر وزٹ کرکے معاملات کا جائزہ لیا جائے۔
