Category: ڈیرہ غازی خان

کوٹ چھٹہ(باغی ٹی وی ،تحصیل رپورٹرمریدحسین ٹالپور)چوٹی زیرین کے صحافی کا موبائل چوری کا مقدمہ، پولیس کی کارکردگی پر سوالیہ نشانات لگ گئے

چوٹی زیرین کے معروف صحافی شوکت عباس سانگھی کا موبائل فون چوری ہونے کا مقدمہ تھانہ چوٹی زیرین میں ایک سال دو ماہ سے زائد عرصے سےدرج ہے لیکن اب تک کوئی پیشرفت نہیں ہوئی ہے۔صحافی کو پولیس کی نااہلی اور ناانصافی کا سامنا ہے کیونکہ پولیس عرصہ گزرنے کے باوجود ان کا چوری شدہ موبائل فون برآمد کرنے میں ناکام رہی ہے۔

شوکت عباس سانگھی کا کہنا ہے کہ جب سے ان کا موبائل چوری ہوا ہے وہ متعدد بار پولیس سے رابطہ کر چکے ہیں لیکن پولیس اہلکاروں کا رویہ بہت ہی غیر ذمہ دارانہ رہا ہے۔ انہوں نے الزام لگایا ہے کہ ایک پولیس کاتفتیشی اے ایس آئی نہ صرف موبائل فون برآمد کرنے میں ناکام رہا بلکہ انہیں دھمکیاں بھی دیتا رہا ہے۔

اس سلسلے میں صحافی برادری نے آر پی او کپٹن ر سجاد اور ڈی پی او سید علی ڈیرہ غازی خان سے مطالبہ کیا ہے کہ وہ اس معاملے میں فوری طور پر نوٹس لیں اور شوکت عباس سانگھی کا موبائل فون جلد از جلد برآمد کرایا جائے۔

ڈیرہ غازیخان (باغی ٹی وی رپورٹ) کمانڈنٹ اسد چانڈیہ کا ایکشن، "کالی” قرار دی گئی خاتون بازیابباغی ٹی وی کی خبر پر نوٹس،فوری طوری پر متاثرہ خاتون اور اہل خانہ کو تحفظ دے کر تھانہ کھر منتقل کیا گیا

تفصیل کے مطابق بلوچستان کے علاقے رکنی چوڑ ندی کے قریب ایک اندوہناک واقعہ پیش آیا، جہاں پنچایت نے ظالمانہ فیصلہ سناتے ہوئے ایک خاتون "ن” کو "کالی” قرار دے کر فروخت کرنے کا اعلان کیا۔ باغی ٹی وی اور میڈیا پر انسانیت سوزواقعہ رپورٹ ہونے پراس ظلم کے خلاف کمانڈنٹ بارڈر ملٹری پولیس اسد خان چانڈیہ نے فوری ایکشن لیتے ہوئے متاثرہ خاتون اور اس کے اہل خانہ کو تحفظ فراہم کیا اور انہیں تھانہ کھر منتقل کیا، جہاں وہ اب پولیس کی تحویل میں محفوظ ہیں۔

واقعے کے مطابق قبائلی رسم و رواج کی آڑ میں پنچایت نے نور دین ولد جانے کو "کالا” قرار دیا اور اسے 10 لاکھ روپے جرمانہ ادا کرنے کا حکم دیا۔ نور دین کو خبردار کیا گیا کہ اگر جرمانہ ادا نہ کیا تو اسے گولی مار کر قتل کر دیا جائے گا۔ اپنی جان بچانے کے لیے نور دین نے 10 لاکھ روپے ادا کر دیے، تاہم پنچایت کا ظلم یہیں ختم نہ ہوا۔ پنچایت نے اعلان کیا کہ "ن” خاتون، جس کا شوہر تاج محمد بیرون ملک محنت مزدوری کے لیے مقیم ہے، کو بلوچستان کے ایک دور دراز علاقے میں فروخت کیا جائے گا۔

متاثرہ خاتون کی دادی بچی مائی نے میڈیا اور اعلیٰ حکام سے انصاف کی اپیل کرتے ہوئے بتایا کہ ان کی پوتی بے گناہ ہے اور اس پر لگائے گئے الزامات بے بنیاد ہیں۔ انہوں نے روتے ہوئے کہا کہ پنچایت نے ان کی پوتی کو "کالی” قرار دے کر قبیلے کے چند افراد کے مفادات کے لیے فروخت کرنے کا فیصلہ کیا جو ایک نہایت ظالمانہ اقدام ہے۔ بچی مائی نے مزید کہا کہ وہ اپنی بیٹی کا رشتہ اپنی مرضی سے کرنا چاہتی ہیں اور کسی کے دباؤ میں نہیں آئیں گی۔

بچی مائی نے وزیر اعلیٰ پنجاب مریم نواز شریف، کمانڈنٹ بارڈر ملٹری پولیس اسد خان چانڈیہ اور دیگر اعلیٰ حکام سے اپیل کی کہ اس کی پوتی کو فوری انصاف فراہم کیا جائے اور پنچایت میں ملوث افراد کے خلاف سخت قانونی کارروائی کی جائے تاکہ اس ظلم کا سدباب ہو۔

یہ خبر بھی پڑھیں
ڈیرہ غازی خان: خاتون کو ‘کالی’ قرار دے کر فروخت کا حکم، دادی کی انصاف کی اپیل

کمانڈنٹ بارڈر ملٹری پولیس اسد خان چانڈیہ نے اس واقعے کا سخت نوٹس لیتے ہوئے ایس ایچ او تھانہ کھر حبیب خان لغاری کی مدد سے متاثرہ خاندان کو فوری تحفظ فراہم کیا اور انہیں تھانے منتقل کیا، جہاں وہ اب محفوظ ہیں۔ بچی مائی نےبارڈرملٹری پولیس حکام پر مکمل اعتماد کا اظہار کرتے ہوئے کہا کہ وہ ان کی جان بچانے میں پیش پیش ہیں۔

بچی مائی نے صحافی برادری کا بھی تہہ دل سے شکریہ ادا کیا، جنہوں نے اس واقعے کو اجاگر کیا اور ان کی آواز بنے۔ انہوں نے خاص طور پر منظورخان لغاری،چوہدری شکیل احمد، قیصر عباس جعفری اور ڈاکٹر غلام مصطفیٰ خان بڈانی کا شکریہ ادا کیا، جنہوں نے دور دراز اور دشوار گزار پہاڑی علاقے میں آکر ان کا ساتھ دیا اور اس ظلم کے خلاف خبریں شائع کیں۔

عوامی وسماجی حلقوں کاکہنا ہے کہ یہ واقعہ قبائلی علاقوں میں پنچایتوں کے ظالمانہ فیصلوں اور خواتین پر ہونے والے مظالم کی ایک اور افسوسناک مثال ہے، جو معاشرتی اور قانونی نظام کے لیے چیلنج ہے۔یہ افسوسناک واقعہ اس بات بھی کی نشاندہی کرتا ہے کہ پنچایتی نظام میں خواتین کو انصاف کے بجائے ظلم کا نشانہ بنایا جاتا ہے۔ حکومت، سول سوسائٹی، اور میڈیا کی ذمہ داری ہے کہ ایسے واقعات کو روکے اور متاثرین کو انصاف فراہم کیا جائے۔

کمانڈنٹ اسدخان چانڈیہ نے رابطہ کرنے بتایا کہ متاثرہ خاتون کو عدالت میں پیش کیا گیا،عدالت نے اسے دارالامان جانے کا پوچھا لیکن خاتون نے والدین کے گھر جانے کی خواہش کا اظہار کیا ،اب عدالت کے حکم پر اس خاتون کو اس کے والدین کے گھر بھیج دیا گیا ہے .

ڈیرہ غازی خان (باغی ٹی وی،نیوزرپورٹر شاہد خان) یو سی 17 کی کالونی عبداللہ ٹاؤن میں ناجائز تجاوزات نے رہائشیوں کی زندگی اجیرن کر دی ہے۔ ذرائع کے مطابق لوگوں نے اپنے گھروں کے باہر گلیوں میں بڑے بڑے گٹر اور دروازوں پر سیڑھیاں بنا کر راستے بلاک کر دیے ہیں، جس کی وجہ سے نہ صرف موٹرسائیکل بلکہ پیدل گزرنا بھی مشکل ہو گیا ہے۔

عبداللہ ٹاؤن کی گلی نمبر ایک میں 5 فٹ چوڑا گٹر پہلے ہی گلی کے اوپر موجود تھا لیکن اس کے ساتھ 4 فٹ کی اضافی سیڑھی تعمیر کر کے گلی مکمل طور پر بلاک کر دی گئی۔ ہمسایوں کے اعتراض کے باوجود مالک مکان نے زبردستی یہ تجاوزات اپنی نگرانی میں مکمل کروائیں اور احتجاج کرنے والے پڑوسیوں کو دھمکی دیتے ہوئے کہا کہ جو کرنا ہے کر لیں۔

مقامی رہائشیوں کے مطابق عبداللہ ٹاؤن میں یہ تجاوزات ایک معمول بن چکی ہیں، جہاں لوگ اپنی سہولت کے لیے گلیاں بند کر دیتے ہیں، بغیر اس کے کہ ان کے ہمسائے کس قدر پریشان ہوں۔ اس صورتحال پر بات کرتے ہوئے علاقے کے رہائشیوں، حیدر علی، محمد افضل، محمد کاشف اور محمد ارسلان نے باغی ٹی وی کے ذریعے ٹی ایم اے کے سی ای او جواد الحسن گوندل سے اپیل کی ہے کہ وہ عبداللہ ٹاؤن کا دورہ کریں۔

رہائشیوں کا کہنا ہے کہ ڈیرہ غازی خان شہر میں ناجائز تجاوزات کے خلاف انتظامیہ نے سخت ایکشن لیا ہے لیکن عبداللہ ٹاؤن میں اب تک کوئی کارروائی نہیں ہوئی۔ انہوں نے مطالبہ کیا کہ فوری ایکشن لیتے ہوئے گلیوں میں تعمیر شدہ گٹر اور غیر قانونی سیڑھیوں کو ہٹایا جائے تاکہ علاقے کے رہائشیوں کو مزید مشکلات کا سامنا نہ کرنا پڑے۔

ڈیرہ غازی خان(باغی ٹی وی رپورٹ)خاتون کو ‘کالی’ قرار دے کر بلوچستان میں فروخت کرنے کا پنچائتی حکم، پنچایت میں ن خاتون کو کالی قرار دے دیا گیا۔ اس کے ساتھ ہی نور دین ولد جانے قوم بیڑنی کو دس لاکھ روپے جرمانہ ادا کرنے کا حکم دیا گیا۔ اگر نور دین یہ رقم ادا کرنے میں ناکام رہے تو اسے گولی مارنے کا فیصلہ کیا گیا۔نور دین نے اپنی جان بچانے کے لیے فوراً دس لاکھ روپے ادا کر دیے.

دوسری طرف ذرائع سے معلوم ہوا کہ بی ایم پی کے اعلیٰ افسران اس معاملے کو دبانے کیلئے کوشاں ہیں اور بی ایم پی کے مقامی اہلکار اور بی ایم پی کمانڈنٹ اسدخان چانڈیہ کو اس معاملہ جھوٹی خبر قرار دے کر غیرجانبدارانہ تحقیقات میں رکاوٹ بنے ہوئے ہیں

تفصیلات کے مطابق ڈیرہ غازی خان کے قبائلی علاقے میں ایک "بنت حوا "کو کالی قرار دے کر اس کی زندگی کو خطرے میں ڈال دیا گیا ہے۔ فورٹ منرو علاقہ گاگن تھل لاشار مول بی ایم پی تھانہ کھر کے علاقے کی رہائشی ن خاتون کی دادی بچی مائی نے بتایا کہ اس کی پوتی ن خاتون، جس کا شوہر تاج محمد بیرون ملک محنت مزدوری کے لیے گیا ہوا ہے، کو مقامی ملزمان نے بے بنیاد الزام کے تحت کالا قرار دے دیا۔

ملزمان بیڑانی مقدم بیڑا، شاہ بخش، سیوہ، میوہ، فیضو، رحیم بخش، جمیل، ایمل، مہراب اور کریم بخش نے ایک پنچایت کا انعقاد کیا، جس میں ن خاتون کو کالی قرار دے دیا گیا۔ اس کے ساتھ ہی نور دین ولد جانے قوم بیڑنی کو دس لاکھ روپے جرمانہ ادا کرنے کا حکم دیا گیا۔ اگر نور دین یہ رقم ادا کرنے میں ناکام رہے تو اس کے خلاف گولی مارنے کا فیصلہ کیا گیا۔

ویڈیو دیکھنے کیلئے لنک پر وزٹ کریں
https://x.com/BaaghiTV/status/1850080310295253240
نور دین نے اپنی جان بچانے کے لیے فوراً دس لاکھ روپے ادا کر دیے۔ اس کے بعد ملزمان نے ن خاتون کو بلوچستان کے دور دراز علاقے میں فروخت کرنے کا اعلان کر دیا۔ بچی مائی نے وزیراعلیٰ پنجاب مریم نواز شریف اور ڈیرہ غازی خان کے کمانڈنٹ بارڈر ملٹری پولیس اسد خان چانڈیہ سے اپیل کی ہے کہ انہیں تحفظ فراہم کیا جائے اور ن خاتون کی ممکنہ فروخت کو روکا جائے۔

دوسری طرف ذرائع سے معلوم ہوا کہ بی ایم اے کے اعلیٰ افسران اس معاملے کو دبانے کیلئے کوشاں ہیں اور بی ایم پی کے مقامی اہلکار اور بی ایم پی کمانڈنٹ اسدخان چانڈیہ کو اس معاملہ جھوٹی خبر قرار دے کر غیرجانبدارانہ تحقیقات میں رکاوٹ بنے ہوئے ہیں

یہ واقعہ ایک بار پھر اس بات کی نشاندہی کرتا ہے کہ قبائلی علاقوں میں خواتین کی زندگیوں اور حقوق کا کس طرح بے دریغ استحصال کیا جاتا ہے۔ خواتین کو ان کی مرضی کے بغیر کمزور اور بے بس سمجھا جاتا ہے، جس کے نتیجے میں ایسے خوفناک واقعات پیش آتے ہیں۔ حکومتی اقدامات کی ضرورت ہے تاکہ اس طرح کی زیادتیوں کا فوری خاتمہ ممکن ہو سکے اور متاثرہ خواتین کو تحفظ فراہم کیا جا سکے۔

کوٹ مبارک (امداداللہ تھہیم)ڈیرہ غازی خان اور گردونواح میں دھان کی باقیات اور بھٹوں سے پھیلنے والی سموگ، شہری بیماریوں کا شکار،انتظامیہ غائب

تفصیلات کے مطابق ڈیرہ غازی خان اور گردونواح کے علاقوں یارو کھوسہ، پیر عادل، شاہ صدردین، دراہمہ، دری میرو،لاڈن،سمینہ، شادن لنڈ اور کوٹ مبارک سمیت دیگر علاقوں میں دھان کی فصل کی باقیات جلانے اور اینٹوں کے بھٹوں سے پھیلنے والی آلودگی کے باعث سموگ کی شدت میں اضافہ ہو گیا ہے۔

ڈی جی خان میں 220 سے زائد بھٹے اور کھیتوں میں باقیات جلانے سے ماحولیاتی آلودگی میں بے حد اضافہ ہو رہا ہے، جس کے نتیجے میں شہری مختلف بیماریوں جیسے سانس، دمہ، آنکھوں کی الرجی، فلو اور جلدی امراض میں مبتلا ہو رہے ہیں۔ خاص طور پر بچے اور بوڑھے افراد زیادہ متاثر ہو رہے ہیں۔

ضلعی انتظامیہ کی غفلت کے باعث صورتحال مزید خراب ہو رہی ہے جبکہ بھٹے زگ زیگ ٹیکنالوجی کے بغیر چل رہے ہیں اور کھیتوں میں دھڑلے سے باقیات کو آگ لگائی جا رہی ہے۔ بیشتر بھٹے آبادیوں اور سڑکوں کے قریب واقع ہیں، جس سے ٹریفک اور شہریوں کے لیے خطرات بڑھ گئے ہیں۔

عوامی اور سماجی حلقوں نے وزیر اعلیٰ پنجاب اور ڈپٹی کمشنرڈیرہ غازی خان سے فوری نوٹس لینے کا مطالبہ کیا ہے تاکہ آلودگی پر قابو پا کر ہزاروں افراد کو بیماریوں سے بچایا جا سکے۔

ڈیرہ غازی خان (باغی ٹی وی ،سٹی رپورٹرجواداکبر) حکومت پنجاب کی ہدایت پر اقلیتوں کے حقوق کے تحفظ اور سوشل میڈیا پر نفرت انگیز مواد کے خلاف سخت قانونی کارروائی کا فیصلہ کیا گیا ہے۔

کمشنر ڈیرہ غازی خان ڈویژن ڈاکٹر ناصر محمود بشیرنے ویڈیو لنک اجلاس کی صدارت کرتے ہوئے احکامات جاری کیے۔ اجلاس میں آر پی او کیپٹن (ر) سجاد حسن خان اور دیگر متعلقہ افسران نے شرکت کی۔

کمشنر ناصر محمود بشیر نے کہا کہ تعلیمی اداروں میں اقلیتوں کے داخلوں اور ملازمتوں میں مخصوص کوٹے پر عملدرآمد یقینی بنایا جائے گا۔ ڈی جی خان ڈویژن کے اقلیتی تعلیمی اداروں اور زیر تعلیم بچوں کا ریکارڈ طلب کرتے ہوئے، انہوں نے عیسائی، ہندو اور دیگر اقلیتوں کے لیے تعلیمی وظائف کی فراہمی یقینی بنانے کے احکامات دیے۔

مزید برآں عبادت گاہوں، قبرستانوں، اور حساس مقامات کی سیکیورٹی بہتر بنانے کے لیے سپیشل پولیس فورس یا اسکواڈ کی تعیناتی کا فیصلہ بھی کیا گیا۔

کمشنر نے اقلیتی برادری کے ملک کی ترقی میں کردار کو سراہتے ہوئے کہا کہ حکومت اقلیتوں کے حقوق کے تحفظ کے لیے ہر ممکن اقدام کرے گی اور تمام ادارے حکومتی ہدایات پر سختی سے عملدرآمد کریں۔

ڈیرہ غازیخان(باغی ٹی وی ،سٹی رپورٹرجواداکبر)سیف سٹی پروجیکٹ کا آغاز کردیاگیا

تفصیلات کے مطابق وزیراعلیٰ پنجاب مریم نواز شریف کی ہدایت پر ڈیرہ غازیخان میں سیف سٹی پروجیکٹ کے اقدامات کا آغاز کردیا گیا ہے۔ اس حوالے سے ایک اہم اجلاس ڈپٹی کمشنر محمد عثمان خالد اور ڈی پی او سید علی کی زیرصدارت منعقد ہوا، جس میں اسسٹنٹ کمشنر تیمور عثمان، سی او ایم سی جواد الحسن گوندل اور اسسٹنٹ ڈائریکٹر پی ایچ اے شہزاد نذیر سمیت دیگر الائیڈ محکموں کے افسران اور سیف سٹی کی ٹیم بھی موجود تھی۔

اجلاس میں فیصلہ کیا گیا کہ سیف سٹی کے لیے تمام سٹیک ہولڈرز کا مشترکہ سروے کیا جائے گا اور سرکاری محکموں کے انفراسٹرکچر کو نقصان پہنچائے بغیر پروجیکٹ پر کام کیا جائے گا۔

ڈپٹی کمشنر محمد عثمان خالد نے اس بات پر زور دیا کہ سیف سٹی پروجیکٹ کی تکمیل سے ڈیرہ غازیخان جدید شہروں کی صف میں شامل ہو جائے گا اور جرائم کی کنٹرول میں مدد ملے گی۔ انہوں نے مزید کہا کہ باہمی روابط کی بدولت پروجیکٹ کی تکمیل میں آسانیاں پیدا ہوں گی اور متعلقہ محکموں کے افسران کو شامل کیا جائے گا تاکہ کھدائی کے دوران دیگر محکموں کے انفراسٹرکچر کا خیال رکھا جائے۔

ڈی پی او سید علی نے اس پروجیکٹ کو انقلابی قرار دیتے ہوئے کہا کہ اس سے جرائم کی شرح میں کمی آئے گی۔ انہوں نے یقین دہانی کرائی کہ ٹیموں کو ورکنگ کے دوران مکمل سیکیورٹی فراہم کی جائے گی اور مشترکہ سروے کے ذریعے پوائنٹس کی تنصیب اور اعتراضات کو دور کرنے میں مدد ملے گی۔ انہوں نے کہا کہ سروے مکمل ہونے پر تعمیراتی کام شروع کیا جائے گا۔

ڈیرہ غازی خان(باغی ٹی وی،نیوزرپورٹرشاہدخان) حکومت پنجاب کی ہدایت پر ڈپٹی کمشنر محمد عثمان خالد اور ڈی پی او سید علی نے پنجاب کالج کے طلبا و طالبات سے ملاقات کی، جس میں لاہور کے ایک نجی کالج میں طالبہ سے زیادتی کے مبینہ جھوٹے واقعے پر بات چیت کی گئی۔

ڈپٹی کمشنر محمد عثمان خالد نے کہا کہ حکومت پنجاب اپنے طلبا و طالبات کی حفاظت کے لیے پُرعزم ہے۔ وزیر اعلیٰ پنجاب مریم نواز شریف نے اس واقعے کی اعلیٰ سطح پر تحقیقات کرانے کی ہدایت کی ہے۔ انہوں نے مزید کہا کہ اس واقعے کی من گھڑت کہانی نے سوشل میڈیا پر افواہیں پھیلائیں، جس کی وجہ سے قانون و امن کی صورت حال متاثر ہوئی۔

ڈپٹی کمشنر نے طلبا و طالبات کو مشورہ دیا کہ وہ اپنے آپ کو شرپسند عناصر سے بچائیں اور اپنی تعلیم پر توجہ دیں۔انہوں نے کہا کہ ہماری بیٹیاں، بہنیں اور مائیں سب کی عزت مشترک ہے اور جو اس عزت کو اچھالے گا وہ کسی رعایت کا مستحق نہیں ہے ۔

ڈی پی او سید علی نے اس موقع پر یقین دلایا کہ وزیراعلیٰ مریم نواز شریف طلبا و طالبات کی عزت و آبرو کے محافظ ہیں۔ انہوں نے کہا کہ کسی کو بھی انتشار پھیلانے کی اجازت نہیں دی جائے گی اور خبر کی تصدیق کرنا ہمارے مذہب کی تعلیم ہے۔

طلبا و طالبات نے اس موقع پر وزیر اعلیٰ مریم نواز شریف کی جانب سے اس جھوٹے واقعے کو بےنقاب کرنے اور حقائق کو عوام کے سامنے لانے پر انہیں خراج تحسین پیش کیا۔

ڈپٹی کمشنر نے طلبا کو ہدایت کی کہ وہ ڈسٹرکٹ اور پولیس انتظامیہ کے ساتھ رابطے میں رہیں اور سوشل میڈیا پر منفی مہم چلانے والوں کے خلاف عوامی آگاہی بڑھائیں۔

ڈیرہ غازی خان(باغی ٹی وی سٹی رپورٹرجواد اکبر)بی ایم پی سخی سرور کی منشیات فروشوں اور جرائم پیشہ افراد کے خلاف کامیاب کارروائیاں

تفصیلات کے مطابق کمانڈنٹ بارڈر ملٹری پولیس اسد خان چانڈیہ کی ہدایت پر منشیات فروشوں اور جرائم پیشہ عناصر کے خلاف تھانہ سخی سرور کی پولیس نے گھیرا تنگ کر دیا ہے۔ مختلف کارروائیوں میں اہم گرفتاریاں عمل میں آئیں، جس سے علاقے میں امن و امان کی صورتحال میں بہتری کا عندیہ ملا ہے۔

ایس ایچ او درمحمد لغاری اور ان کی ٹیم نے دورانِ گشت کارروائی کرتے ہوئے نزیر عرف گیلا سے 20 لیٹر دیسی شراب برآمد کر لی۔ پولیس نے ملزم کے خلاف مقدمہ درج کر کے تفتیش کا آغاز کر دیا ہے۔ یہ کارروائی علاقے میں منشیات کے خلاف بی ایم پی کی مؤثر حکمت عملی کی عکاسی کرتی ہے۔

جرائم پیشہ افراد کے خلاف بی ایم پی تھانہ سخی سرور کی ایک اور کامیاب کارروائی میں ایڈیشنل ایس ایچ او حاجی حسین خان لغاری اور ان کی ٹیم نے بی ایم پی تھانہ کھانڑ ضلع راجن پور کے مقدمہ نمبر 6/24 کے تحت مطلوب تاجو ولد دوران قوم گورچانی کو گرفتار کر لیا۔ ملزم پر اغوا برائے تاوان اور چوری جیسے سنگین جرائم کا الزام تھا۔

ایڈیشنل ایس ایچ او حسین خان لغاری نے اپنی تفتیشی مہارت اور صلاحیتوں کو بروئے کار لاتے ہوئے ملزم کو ٹریس کیا اور گرفتار کر کے قانون کے حوالے کر دیا۔ یہ ایک بڑی کامیابی سمجھی جا رہی ہے خاص طور پر بی ایم پی جیسی فورس کے لیے جو جدید ٹیکنالوجی سے محروم ہے۔

علاقہ راجن پور کے عوام اور مقدمے کے مدعی نے کمانڈنٹ اسد خان چانڈیہ، ایڈیشنل ایس ایچ او حاجی حسین خان لغاری اور ان کی ٹیم کو بہترین کارکردگی پر خراجِ تحسین پیش کیا اور شکریہ ادا کیا۔ اس کامیابی نے نہ صرف فورس کا مورال بلند کیا بلکہ علاقہ مکینوں کے اعتماد میں بھی اضافہ کیا ہے۔

یہ مؤثر کارروائیاں اس بات کا ثبوت ہیں کہ بارڈر ملٹری پولیس وسائل کی کمی کے باوجود اپنے فرائض کی انجام دہی میں پیش پیش ہے اور علاقے سے جرائم کے خاتمے کے لیے سرگرم عمل ہے۔