Category: ڈیرہ غازی خان

ڈیرہ غازی خان(باغی ٹی وی رپورٹ)ڈیڑھ سال قبل قتل ہونے والے نوجوان کے قاتل آزاد،ورثاء دفتروں کے چکروں پر مجبور

تفصیل کے مطابق بارڈر ملٹری پولیس تھانہ لاکھا کی حدود میں ڈیڑھ سال قبل قتل ہونے والے نوجوان محبوب کے قاتل تاحال قانون کی گرفت میں نہیں آسکے۔ مقتول کے بھائی اصغر ہیبتانی کا کہنا ہے کہ وہ ڈیڑھ سال سے ملزمان کی گرفتاری کے لیے دفاتر کے چکر کاٹ رہے ہیں، مگر ملزمان آزاد گھوم رہے ہیں اور بی ایم پی تھانہ لاکھا کے اہلکار انہیں گرفتار کرنے میں ناکام ہیں۔

اصغر ہیبتانی نے الزام عائد کیا کہ جب بھی بی ایم پی کے اعلیٰ افسران ملزمان کی گرفتاری کا حکم دیتے ہیں، تو تھانہ لاکھا کے اہلکار ملزمان کو فون کرکے کارروائی سے آگاہ کر دیتے ہیں، جس سے ملزمان فرار ہونے میں کامیاب ہوجاتے ہیں۔ اصغر نے حکام سے مطالبہ کیا ہے کہ ملزمان کو فوری گرفتار کیا جائے تاکہ انصاف فراہم کیا جا سکے۔

ویڈیو دیکھنے کیلئے اس لنک پر کلک کریں

ڈیرہ غازی خان بارڈر ملٹری پولیس تھانہ لاکھا کی حدود میں ڈیڑھ سال قبل قتل ہونیوالے نوجوان محبوب کے بھائی ڈیڑھ سال سے ملزمان کی گرفتاری کیلئے دفتروں کے چکر کاٹ رہے ہیں ملزمان بی ایم پی تھانہ لاکھا کی حدود میں آزاد گھوم رہے ہیں مقتول کے بھائی اصغر ہیبتانی نے اعلی حکام سے ملزمان کی… pic.twitter.com/DivotCttqL

— Baaghi TV باغی ٹی وی (@BaaghiTV) November 4, 2024

دوسری جانب ایس ایچ او تھانہ لاکھا یونس کھوسہ کا کہنا ہے کہ ملزمان کی گرفتاری کے لیے متعدد بار کوششیں کی گئی ہیں۔ ان کا کہنا ہے کہ ایک بار تو بی ایم پی ٹیم کی قیادت کرتے ہوئے رسالدار ملزمان کی گرفتاری کے لیے گئے، مگر گھروں میں صرف خواتین موجود تھیں۔ بلوچ روایات کی پاسداری کرتے ہوئے خواتین کو ہراساں کرنا ان کے اصولوں کے خلاف ہے۔ ایس ایچ او نے مزید کہا کہ ملزمان اشتہاری قرار دیے جا چکے ہیں، اور پولیس پوری کوشش میں ہے کہ انہیں جلد قانون کے کٹہرے میں لایا جائے۔

ڈیرہ غازی خان (باغی ٹی وی رپورٹ) پولیو مہم میں مبینہ کرپشن کے الزامات، ویکسینیٹر مافیا اور افسران پر سنگین بے ضابطگیوں کا الزام تحقیقات کا مطالبہ

تفصیلات کے مطابق ڈیرہ غازی خان میں پولیو جیسے خطرناک مرض کے خاتمے کے لیے قومی پولیو مہم کو شدید بدعنوانیوں اور مبینہ کرپشن کے الزامات کا سامنا ہے۔ مقامی ویکسینیٹرز، محکمہ صحت کے ملازمین اور کچھ افسران پر الزام عائد کیا گیا ہے کہ وہ مالی فوائد کے لیے قومی پولیو مہم اور ای پی آئی ویکسنیشن کے نظام کو ناکام بنانے میں ملوث ہیں۔ شہریوں اور سماجی رہنماؤں نے اعلیٰ حکام سے مطالبہ کیا ہے کہ اس معاملے کی فوری اور جامع تحقیقات کی جائیں تاکہ پولیو مہم کو کامیاب بنایا جا سکے۔

پولیو مہم کی تباہی اور ویکسینیٹرز مافیا
ذرائع کے مطابق عابد حسین نامی ایک ویکسینیٹر جو کہ یوسی اربن 7 میں تعینات ہے نے مبینہ طور پر ایک نیٹ ورک بنا کر اپنے مالی مفادات کے لیے کرپشن کا بازار گرم کر رکھا ہے۔ اطلاعات کے مطابق عابد حسین اپنے افسران کو بلیک میل کرکے اپنی خلاف ہونے والی انکوائریوں کو بند کروا لیتا ہے اور پولیو مہم میں دھڑا بندی اور سیاست کے ذریعے اپنے مالی مفادات حاصل کرتا ہے۔

درخواستوں اور ثبوتوں کے باوجود کارروائی کا فقدان
شہری محمد احسان نے ایک تحریری درخواست کے ذریعے الزام عائد کیا ہے کہ محکمہ صحت میں EPI ویکسنیشن اور پولیو مہم کے دوران فراڈ کی بارہا نشاندہی کی گئی، لیکن ان درخواستوں کو صرف فائلوں میں دبا دیا گیا اور ان پر کوئی کارروائی نہیں کی گئی۔ احسان نے مزید کہا کہ اس حوالے سے تمام ضروری دستاویزی ثبوت بھی فراہم کیے گئے ہیں، مگر انکوائری رپورٹ منظر عام پر نہیں لائی گئی۔

کرپشن کے اثرات اور افسران کی ملی بھگت
ذرائع کے مطابق WHO اور یونیسف کے نمائندے، ضلعی افسران اور محکمہ صحت کے اعلیٰ افسران بھی اس کرپشن سے چشم پوشی کرتے ہیں۔ شہریوں کا کہنا ہے کہ پولیو مہم میں ہونے والی بے ضابطگیاں اور انتظامی نااہلی اس قدر بڑھ چکی ہیں کہ پولیو جیسے موذی مرض کا خاتمہ ممکن نہیں ہو پا رہا۔ ویکسینیٹرز مافیا کی کرپشن اور افسران کی ملی بھگت کی وجہ سے نہ صرف کروڑوں روپے ضائع ہو رہے ہیں بلکہ عالمی سطح پر پاکستان کے پولیو کے خاتمے کے اہداف بھی متاثر ہو رہے ہیں۔

سماجی و شہری حلقوں کا ردعمل اور اعلیٰ سطحی انکوائری کا مطالبہ
ڈیرہ غازی خان کے عوامی و سماجی حلقوں سے تعلق رکھنے والے غلام فرید خان، سینئر ایڈوکیٹ ملک شاہد وسیم، خرم شہزاد، حاجی محمد حسین، سردار حبیب خان لغاری، سردار امیر محمد خان کلاچی اور دیگر نے اس معاملے پر شدید ردعمل کا اظہار کیا ہے۔ ان رہنماؤں نے وزیر اعلیٰ پنجاب مریم نواز، وزیر صحت، سیکرٹری ہیلتھ، ڈائریکٹر جنرل ہیلتھ، WHO اور یونیسف کے نمائندگان سمیت دیگر اعلیٰ حکام سے اپیل کی ہے کہ وہ فوری طور پر اس مسئلے کی جانچ کے لیے ایک اعلیٰ سطحی انکوائری کمیشن تشکیل دیں۔ ان کا مطالبہ ہے کہ ویکسینیٹر مافیا اور ان کا ساتھ دینے والے محکمہ صحت اور WHO کے ملازمین اور ضلعی افسران کے خلاف سخت کارروائی کی جائے۔

حکام کی جانب سے عدم توجہی اور رابطے کا فقدان
ڈیرہ غازی خان کے ڈی ایچ او پی ایس ڈاکٹر اطہر سکھانی سے اس معاملے پر ان کا موقف لینے کے لیے رابطہ کیا گیا لیکن انہوں نے فون کال کا جواب نہیں دیا۔ ایک اہلکار نے نام ظاہر نہ کرنے کی شرط پر بتایا کہ عابد حسین کے خلاف انکوائری مکمل ہو چکی ہے مگر تاحال کوئی کارروائی عمل میں نہیں آئی۔

عوامی مطالبہ، کرپشن کے خلاف فوری اقدام
ڈیرہ غازی خان کے عوام اور سماجی تنظیمیں اس کرپشن اور بے ضابطگیوں پر نہایت افسردہ ہیں اور ان کا کہنا ہے کہ اگر فوری طور پر اس مسئلے کا حل نہ نکالا گیا تو پولیو مہم کا مقصد مکمل طور پر ناکام ہو جائے گا۔ عوامی اور سماجی رہنماؤں نے کہا ہے کہ وہ کسی صورت میں پولیو مہم کو ناکام ہوتا نہیں دیکھنا چاہتے اور امید کرتے ہیں کہ اعلیٰ حکام جلد اس معاملے میں سنجیدگی سے کارروائی کریں گے۔ شہریوں اور سماجی رہنماؤں نے وزیر اعلیٰ پنجاب اور دیگر اعلیٰ حکام سے اس معاملے کی اعلیٰ سطحی انکوائری اور کارروائی کا مطالبہ کیا ہے تاکہ قومی پولیو مہم کو بچایا جا سکے۔

ڈیرہ غازی خان،کوٹ چھٹہ (باغی ٹی وی ،سٹی رپورٹر،تحصیل رپورٹر) زمین کے تنازع پر فائرنگ، دو افراد جاں بحق

ڈیرہ غازی خان کے علاقے مانہ احمدانی میں زمین کے تنازع اور مقدمہ بازی کی رنجش پر دو گروپوں کے درمیان تصادم کے نتیجے میں دو افراد جاں بحق اور دو شدید زخمی ہوگئے۔

ریسکیو 1122 کنٹرول روم ڈیرہ غازی خان کو ایمرجنسی کال موصول ہوئی جس میں بتایا گیا کہ بودلہ فارم کے قریب دو گروپوں کے درمیان فائرنگ ہوئی ہے جس کے نتیجے میں زخمیوں میں سے ایک شخص کی موقع پر موت ہو چکی ہے۔ کنٹرول روم نے فوری طور پر ایک موٹر بائیک ایمبولینس اور دو ایمبولینسز جائے حادثہ کی جانب روانہ کر دیں۔

جب ریسکیو ٹیمیں موقع پر پہنچیں تو پولیس پہلے سے وہاں موجود تھی۔ ایک شخص کی گردن میں گولی لگنے سے موت واقع ہوچکی تھی جبکہ دو زخمیوں کو پولیس نے فوری طور پر کوٹ چھٹہ منتقل کرنا شروع کر دیا۔ ریسکیو اسٹاف نے زخمیوں کو ایمبولینس میں منتقل کرنے کی کوشش کی مگر حفاظتی وجوہات کی بنا پر پولیس نے زخمیوں کو اپنے ہی ساتھ لے جانا مناسب سمجھا۔

پولیس کے ہمراہ ریسکیو ٹیم کوٹ چھٹہ پولیس اسٹیشن پہنچی جہاں مزید جانچ سے پتہ چلا کہ ایک زخمی شخص کو پیٹ میں گولیوں کی وجہ سے جانبر نہ ہوسکا اور وہ دم توڑ گیا، جبکہ دوسرے زخمی کو کمر میں چھرے لگے تھے جسے فوری طبی امداد فراہم کی گئی۔ حفاظتی خدشات کے پیش نظر زخمی کو تھانے کے اندر ہی رکھا گیا۔

حادثے کے مقام پر موت کے شکار شخص کے لیے کرائم سین یونٹ ٹیم کا انتظار کیا گیا اور پولیس کارروائی مکمل کرنے کے بعد دونوں لاشوں کو پوسٹ مارٹم کے لیے ٹیچنگ اسپتال ڈیرہ غازی خان منتقل کر دیا گیا۔

کوٹ چھٹہ (باغی ٹی وی ،تحصیل رپورٹر مریدٹالپور) 2موٹر سائیکلوں کے تصادم میں 3 سالہ بچی جاں بحق، 3 افراد زخمی

تفصیل کے مطابق کوٹ چھٹہ میں انڈس ہائی وے ٹوٹل پمپ کے قریب اڈہ نور والا پر دو موٹر سائیکلوں کے درمیان تصادم میں ایک 3 سالہ بچی موقع پر جاں بحق جبکہ 3 افراد زخمی ہو گئے۔

ریسکیو 1122 کنٹرول روم کو حادثے کی اطلاع ملتے ہی فوری طور پر ایک فائر وہیکل، ریسکیو وہیکل، اور دو ایمبولینسز جائے وقوعہ کی طرف روانہ کی گئیں۔ پولیس کنٹرول کو بھی اطلاع دے دی گئی تاکہ قانونی کارروائی کی جا سکے۔

ریسکیو ٹیم جب موقع پر پہنچی تو تین افراد زخمی تھے جبکہ 3 سالہ بچی جاں بحق ہو چکی تھی۔ اہلکاروں نے زخمیوں کو فرسٹ ایڈ فراہم کرنے کے بعد تمام متاثرین کو تحصیل ہسپتال کوٹ چھٹہ منتقل کیا۔ جاں بحق ہونے والی بچی کی لاش بھی ہسپتال منتقل کی گئی۔

ڈیرہ غازی خان(باغی ٹی وی،سٹی رپورٹر) ٹریفک پولیس کے چالان اب ٹھیلے والوں کے ذریعے جمع کرانے کا نیا نظام متعارف کرادیا گیا

تفصیلات کے مطابق ڈیرہ غازی خان میں ٹریفک پولیس کی کارکردگی نے عوامی اعتماد کو شدید نقصان پہنچایا ہے۔ حالیہ واقعات کے دوران ڈیرہ غازی پل ڈاٹ سنگم چوک پر پیش آنے والی ایک عجیب صورتحال نے شہریوں میں بے چینی پیدا کر دی۔ جب چند صحافی دوست چائے پینے کے لیے وہاں رکے تو انہوں نے ٹریفک پولیس کے اے ایس آئی شہزاد کو اپنی ڈیوٹی پر متحرک پایا۔

اے ایس آئی شہزاد نے گاڑیوں کو روکتے ہوئے ڈرائیورز کو اپنی جانب متوجہ کیا۔ جب کوئی ڈرائیور اپنی گاڑی سے اترتا تو انہیں بتایا جاتا کہ وہ اپنی چالان کی رقم ایک ٹھیلے والے جو ساتھ ہی کیلے فروخت کر رہا تھاکے پاس جمع کرائیں۔ اس غیر روایتی طریقہ کار پر صحافیوں نے حیرت کا اظہار کیا اور اے ایس آئی شہزاد سے وضاحت طلب کی۔

شہزاد نے وضاحت کرتے ہوئے کہا کہ ان کے پاس چالان بھرنے کا موقع نہیں ہے، اس لیے ڈرائیور نے ٹھیلے والے کو رقم دے کر کہا ہے کہ وہ چالان جمع کرائے۔ انہوں نے یہ بھی کہا کہ اس معاملے کا تحریری نوٹ بھی موجود ہے جو اس عمل کی تصدیق کرتا ہے۔

یہ صورتحال شہریوں کے لیے نئی اور حیران کن ہے۔ اب سوال یہ پیدا ہوتا ہے کہ کیا ٹریفک پولیس کے چالان اب ٹھیلے والوں کے ذریعے ادا کیے جائیں گے؟ اس کے علاوہ ہر چالان کرنے والے پولیس افسر کے ساتھ موجود نجی فرد کا کردار بھی سوالیہ نشان بن گیا ہے جو چالان کی رقم وصول کرتا ہے یا رسید فراہم کرتا ہے۔

شہزاد کے بیان نے عوام میں مزید شکوک و شبہات پیدا کر دیے ہیں۔ آیا یہ کیلے والا دراصل گاڑی کے مالک کا قریبی رشتہ دار ہے جو چالان کی رقم جمع کرائے گا؟ ایسی صورت حال نے شہریوں کو یہ سوچنے پر مجبور کر دیا ہے کہ آیا یہ ٹریفک پولیس کی کارکردگی میں کمی کا اشارہ ہے یا یہ عوام کے حقوق کی کھلی خلاف ورزی ہے۔

ڈیرہ غازی خان میں ٹریفک پولیس کے اس غیر روایتی نظام نے شہریوں کے لیے نئے چیلنجز پیدا کر دیے ہیں۔ شہریوں کا مطالبہ ہے کہ حکومت اور اعلیٰ حکام اس صورتحال کا سنجیدگی سے نوٹس لیں تاکہ ٹریفک پولیس کی کارکردگی کو بہتر بنایا جا سکے ۔

ڈیرہ غازیخان (باغی ٹی وی،سٹی رپورٹرجواد اکبر) محکمہ صحت کے ویکسینیٹر چوہدری محمد نعیم کو ادویات کی خریداری اور کروڑوں روپے کی مالی کرپشن کی نشاندہی کرنے کے بعد نوکری سے برخاست کر دیا گیا۔ اس اقدام کے خلاف ویکسینیٹرز نے سی ای او ہیلتھ آفس کا گھیراؤ کیا اور شدید نعرے بازی کرتے ہوئے احتجاجی مظاہرہ کیا۔

چوہدری محمد نعیم نے ادویات کی خریداری، فرضی بلوں، اور پٹرول کے بلوں میں مبینہ کرپشن کے خلاف ڈی جی انٹی کرپشن کو درخواست دی تھی، جس پر سی ای او ہیلتھ ڈاکٹر محمد ادریس لغاری نے انہیں نوکری سے برخاست کر دیا۔ اس فیصلے کے خلاف ضلع بھر سے ویکسینیٹرز نے سی ای او آفس کے باہر دھرنا دیا اور مظاہرین نے اعلان کیا کہ چوہدری محمد نعیم کی بحالی اور انکوائری مکمل ہونے تک ان کا احتجاج جاری رہے گا۔

ای پی آئی فیڈریشن کے رہنماؤں محمد عابد اور عطااللہ ساجد نے کہا کہ اگر مطالبات پورے نہ کیے گئے تو احتجاج کا دائرہ مزید وسیع کیا جائے گا۔ مظاہرین نے دفتر کے امور اور پولیو مہم کے بائیکاٹ کا بھی اعلان کر دیا ہے، مطالبہ کیا کہ انصاف پر مبنی انکوائری کی جائے اور چوہدری نعیم کو فوری بحال کیا جائے۔