Category: ڈیرہ غازی خان

ڈیرہ غازی خان (باغی ٹی وی رپورٹ) بی ایم پی چیک پوسٹوں پر رشوت اور اثر و رسوخ کا راج

تفصیلات کے مطابق بین الصوبائی چیک پوسٹ و تھانہ بواٹہ پر تعینات ایس ایچ او اقبال لغاری اور اہلکار شوکت کے بارے میں انکشاف ہوا ہے کہ وہ چیک پوسٹ راکھی گارج پر تعینات فیاض نامی اہلکار کے ساتھ مل کر مبینہ طور پر سمگلروں اور با اثر سیاستدانوں کے مفادات کی حفاظت کر رہے ہیں۔ ذرائع کے مطابق یہ اہلکار مبینہ طور پر سمگلنگ کے ذریعے کمایا گیا پیسہ سیاستدانوں تک پہنچاتے ہیں جبکہ ایس ایچ اوز بے بس ہو کر خاموش تماشائی بنے ہوئے ہیں۔

عوامی حلقوں نے بارڈر ملٹری پولیس کے سینئر کمانڈنٹ شاہد زمان لک اور کمانڈنٹ اسد خان چانڈیہ سے اپیل کی ہے کہ ان اہلکاروں کو چیک پوسٹوں سے فوری طور پر ہٹایا جائے تاکہ کرپشن اور لوٹ مار کا خاتمہ ہو سکے۔

ذرائع کا کہنا ہے کہ ان اہلکاروں کو چوٹی زیریں اور فورٹ منرو کے با اثر سیاستدانوں کی مکمل پشت پناہی حاصل ہے جس کی وجہ سے موجودہ دور حکومت میں بھی ان کا تبادلہ ممکن نہیں ہو سکا۔

مزید برآں ذرائع کا کہنا ہے کہ فیاض نامی اہلکار کے حوالے سے کہا جا رہا ہے کہ وہ ایس ایچ اوز پر دباؤ ڈالتا ہے اور ان سے من مانی کرواتا ہے۔ اس نے یہاں تک دھمکی دی ہے کہ اگر اس کا تبادلہ کیا گیا تو وہ چوٹی جا کر تمام بڑے افسروں کو لاہور بھیج دے گا۔ عوامی حلقے اس صورتحال پر شدید تشویش کا اظہار کر رہے ہیں اور فوری ایکشن کا مطالبہ کر رہے ہیں۔

ڈیرہ غازی خان (باغی ٹی وی رپورٹ) دری میرو کے قریب پولیس مقابلہ، ایک ملزم زخمی حالت میں گرفتار

تفصیلات کے مطابق تھانہ دراہمہ پولیس نے دورانِ گشت بستی گرنڈ کے قریب موٹر سائیکل پر سوار تین مشتبہ افراد کو دیکھا جو پولیس کو دیکھتے ہی فرار ہوگئے۔

پولیس نے فوری طور پر ملزمان کا تعاقب کیا اور سپر دھنوتر دری میرو کے قریب پہنچ کر ملزمان نے پولیس پر فائرنگ شروع کر دی۔ جوابی فائرنگ کے بعد علاقے میں سرچ آپریشن کیا گیا، جس کے دوران ایک ملزم الطاف عرف الطافی ولد عبدالمجید قوم ڈاڈا سکنہ چھابری زیریں کو زخمی حالت میں گرفتار کیا گیا۔ الطاف کے دائیں گھٹنے پر گولی لگی تھی۔

زخمی حالت میں گرفتار ہونے والے الطاف نے انکشاف کیا کہ اس کے ساتھی حیدر عرف راجو ڈاڈا اور صفدر کھا کھی موقع سے فرار ہو چکے ہیں۔ مزید تحقیقات سے پتہ چلا کہ الطاف موٹر سائیکل چھیننے اور دیگر پولیس مقابلوں میں ملوث تھا اور وہ متعدد سنگین جرائم میں بھی مطلوب تھا۔

زخمی ملزم الطاف کو فوری طور پر ٹراما سینٹر منتقل کیا گیا جہاں پولیس کی حراست میں اس کا علاج جاری ہے۔ پولیس نے فرار ہونے والے دیگر ملزمان کی گرفتاری کے لیے مختلف مقامات پر چھاپے مارنے کا سلسلہ بھی شروع کر دیا ہے۔

ڈیرہ غازیخان(باغی ٹی وی،سٹی رپورٹر جواد اکبر)ڈیرہ غازیخان کے نواحی علاقے دری ڈھولے والی کے قریب ہوتہ ہتوانی میں شادی کی تقریب اس وقت ماتم میں بدل گئی جب پرانی دشمنی کی بنا پر مسلح افراد نے تقریب میں گھس کر فائرنگ کر دی۔ واقعہ بیگے والا چوک کے قریب پیش آیا، جس میں 4 افراد ہلاک ہوگئے جبکہ متعدد زخمی ہوئے ۔تھانہ کالا کی حدود موضع ہوتہ ہتوانی میں قتل کی لرزہ خیز واردات میں کلاشنکوف کی فائرنگ کے ساتھ ساتھ ہینڈ گرنیڈ پھینکا گیا پولیس رپورٹ

ریسکیو 1122 کنٹرول روم ڈیرہ غازی خان کو ایمرجنسی کال موصول ہوئی کالر نے بتایا کہ شادی کی تقریب میں اچانک فائرنگ ہو گئی ہے اور تین سے چار افراد شدید زخمی ہو چکے ہیں۔ کالر نے یہ بھی بتایا کہ وہ زخمیوں کو بیگے والا چوک کی طرف لے جا رہے ہیں تاکہ فوری طبی امداد دی جا سکے۔

فوری ریسپانس دیتے ہوئے ریسکیو 1122 نے فیکٹری موڑ سے قریب ترین ایمبولینس DGA.10 کو جائے حادثہ کی طرف روانہ کیا۔ مزید یہ کہ دوسری ایمبولینس DGA.12 جو پہلے شادن لنڈ میں مریض شفٹ کر رہی تھی اسے فوری طور پر فری کرا کے موقع پر پہنچنے کے لیے روانہ کیا گیا۔ ڈی جی خان سے TSA.09 کو بھی صورتحال کی سنگینی کو مدنظر رکھتے ہوئے بھیجا گیا۔

زخمیوں میں حفیظ اللہ ولد اللہ وسایا جسے پیٹ کے نچلے حصے اور دائیں ٹانگ پر گولی لگی جس کی وجہ سے وہ موقع پر ہی جاں بحق ہو گیا۔ اس کی لاش کو فوری طور پر علامہ اقبال ٹیچنگ ہسپتال منتقل کر دیا گیا۔

صداقت ولد سجاد حسین جسے سر پر گولی لگی اور اس کی حالت تشویشناک ہے۔ اسے فوری طور پر ہسپتال منتقل کیا گیا، جہاں ڈاکٹروں کی ٹیم اس کی جان بچانے کی کوشش کر رہی ہے۔

دلشاد ولد مجاہدکو دائیں بازو اور منہ پر گولی لگی اس کی حالت بھی نازک بتائی جا رہی ہے جبکہ الیاس ولد شاہد کو بائیں پاؤں پر گولی لگی، اس کی حالت خطرے سے باہر ہے، تاہم اسے بھی فوری علاج کے لیے ہسپتال منتقل کیا گیا۔

پولیس کو بھی فوری طور پر واقعے کی اطلاع دی گئی، جس نے موقع پر پہنچ کر شواہد اکٹھے کیے اور فائرنگ میں ملوث ملزمان کی تلاش شروع کر دی ہے۔ ابتدائی اطلاعات کے مطابق یہ فائرنگ پرانی دشمنی کا شاخسانہ تھی۔ پولیس مختلف زاویوں سے اس واقعے کی تحقیقات کر رہی ہے تاکہ جلد از جلد ملوث افراد کو قانون کے کٹہرے میں لایا جا سکے۔

آخری اطلاعات کے مطابق ڈیرہ غازی خان کے نواحی گاؤں ہوتہ ہتوانی شادی کی تقریب میں فائرنگ سے4 افراد جاں بحق جبکہ متعدد مہمان زخمی ہوگئے وجہ عناد سعودی عرب میں لین دین کا تنازعہ بتائی جاتی ہے

ڈیرہ غازی خان(باغی ٹی وی ،سٹی رپورٹرجواد اکبر) وزیراعلیٰ پنجاب مریم نواز شریف کے ویژن کے تحت ڈیرہ غازی خان میں تجاوزات کے خاتمے اور قیمتوں کی جانچ پڑتال کے عمل میں تیزی آ گئی ہے۔ ڈپٹی کمشنر مہر شاہد زمان لک نے شہر کے مختلف اہم چوکوں اور بازاروں کا دورہ کیا اور تجاوزات کے خلاف کارروائی کی قیادت کی۔

دورے کے دوران تجاوزات قائم کرنے والے پانچ دکانداروں کو موقع پر گرفتار کر لیا گیا اور ان کی جانب سے رکھی گئی سولر پلیٹ بلاکس کو بحقِ سرکار ضبط کر لیا گیا۔ ڈپٹی کمشنر نے دکانوں کے آگے لکیریں لگانے کے احکامات جاری کیے تاکہ آئندہ تجاوزات کی روک تھام کی جا سکے۔

ڈپٹی کمشنر نے واضح وارننگ دیتے ہوئے کہا کہ جو دکاندار اپنی حدود سے باہر سامان سجائیں گے، ان کے خلاف سخت کارروائی کی جائے گی اور گرفتاریاں بھی کی جائیں گی۔

مہر شاہد زمان لک نے ہسپتال چوک، پرانا غلہ منڈی روڈ، پل پیارے والا، اور چورہٹہ چوک پر تجاوزات کے خاتمے کے آپریشن کی قیادت کی۔ انہوں نے اپنی نگرانی میں سڑک کنارے رکھی گئی سولر پلیٹ بلاکس کو ضبط کروایا۔

ڈپٹی کمشنر نے میڈیا سے گفتگو کرتے ہوئے کہا کہ وزیراعلیٰ پنجاب کے احکامات کے تحت تجاوزات کا خاتمہ اولین ترجیح ہے۔ انہوں نے افسران کو ہدایت کی کہ وہ شفٹوں میں شہر کا دورہ کریں اور حدود سے باہر رکھا گیا سامان فوری طور پر ضبط کر لیا جائے۔ ان کا کہنا تھا کہ سرکاری پراپرٹی کسی کی ذاتی جاگیر نہیں اور دکانداروں کو اپنی حدود میں رہتے ہوئے کام کرنا ہوگا۔

ڈپٹی کمشنر نے مزید احکامات جاری کیے کہ سٹرک کنارے لائنیں لگائی جائیں اور بازاروں میں بار بار انسپکشن کی جائے۔ انہوں نے ہسپتال چوک پر روٹی کے وزن اور قیمت کی جانچ بھی کی، اور زائد قیمت پر روٹی بیچنے والے ہوٹل کے مالک کو گرفتار کروا دیا۔ دورے کے دوران اے ڈی سی آر نعمان فاروق تارڑ، سی او ایم سی جواد الحسن گوندل، امیر مسلم اور خالد رسول بھی ان کے ہمراہ تھے۔

ڈیرہ غازیخان (باغی ٹی وی رپورٹ ) سپرنٹنڈنٹ سینٹرل جیل محمد زبیر احمد خان چیمہ نے جیل کے ملاقات سسٹم پر لگائے گئے الزامات کو مکمل طور پر جھوٹا، من گھڑت اور بے بنیاد قرار دیا ہے۔ انہوں نے کہا کہ جیل میں تمام اسیران کی ملاقاتیں باقاعدہ شیڈول کے مطابق کروائی جاتی ہیں اور یہ سسٹم مکمل طور پر کمپیوٹرائزڈ ہے۔ ملاقات کا شیڈول مین گیٹ کے باہر، ویٹنگ شیڈ کے اندر اور بیرون علاقوں میں واضح طور پر آویزاں کیا گیا ہے تاکہ اسیران کے لواحقین کو کوئی مشکل پیش نہ آئے۔

محمد زبیر احمد خان چیمہ نے بتایا کہ ہر اسیر کی ملاقات ہفتے میں صرف ایک بار مقررہ وقت پر ہوتی ہے اور اس کا اندراج پی ایم آئی ایس (Prison Management Information System) کے ذریعے کیا جاتا ہے، جو کہ لاہور کے ہیڈ آفس سے منسلک ہے۔ ملاقات کے اس کمپیوٹرائزڈ نظام میں بغیر شیڈول کسی ملاقات کا اندراج ممکن نہیں ہے، اس لیے کسی بھی غیر متعلقہ ملاقات کا سوال ہی پیدا نہیں ہوتا۔

سپرنٹنڈنٹ نے مزید وضاحت کی کہ جیل میں ملاقاتوں کا تمام عمل سی سی ٹی وی کیمروں کی زیر نگرانی میں ہوتا ہے، اور یہ کیمرے آئی جی آفس سے منسلک ہیں۔ ملاقات شیڈ میں تعینات ملازمین کی ڈیوٹی ہفتہ وار بنیاد پر تبدیل کی جاتی ہے، اور کوئی بھی ملازم مستقل طور پر ملاقات کے عمل پر تعینات نہیں ہوتا۔ انہوں نے اس بات پر زور دیا کہ جیل میں کسی بھی ملازم کو اسیران یا ان کے لواحقین سے پیسے لینے یا غیر اخلاقی رویے کی اجازت نہیں ہے۔ بلکہ یہاں تک کہ کسی ملازم کو اسیران کے لواحقین سے ہاتھ ملانے کی بھی اجازت نہیں دی گئی۔

انہوں نے بتایا کہ وہ روزانہ ایک گھنٹے کے لیے ویٹنگ شیڈ میں موجود رہتے ہیں تاکہ اسیران کے لواحقین کے مسائل کو سن سکیں اور ان کا حل نکال سکیں۔ اس کے علاوہ مختلف اوقات میں وہ خود بھی اچانک مین گیٹ اور ملاقات شیڈ کا دورہ کرتے ہیں تاکہ ہر چیز کو شفاف اور قانون کے مطابق رکھا جا سکے۔

محمد زبیر احمد خان چیمہ نے کہا کہ خبر میں لگائے گئے تمام الزامات جھوٹے، بے بنیاد اور بدنیتی پر مبنی ہیں۔ یہ الزامات صرف ان عناصر کی جانب سے لگائے جا رہے ہیں جو جیل کے نظام کو بدنام کرنے کی کوشش کر رہے ہیں۔ انہوں نے ان الزامات کو تخریب کار اور جھوٹا پروپیگنڈا قرار دیا جس کا مقصد صرف انتشار پھیلانا ہے۔

سپرنٹنڈنٹ نے آخر میں کہا کہ ان کی ٹیم کے حوصلے بلند ہیں، اور وہ پریزن رولز کی مکمل پیروی کرتے ہوئے اپنے فرائض ایمانداری اور دیانت داری سے سر انجام دیتے رہیں گے۔ ان کا کہنا تھا کہ ان کے فرائض منصبی میں کسی بھی طرح کی رکاوٹ برداشت نہیں کی جائے گی اور عوام کی بے لوث خدمت جاری رکھی جائے گی۔

ڈیرہ غازی خان(باغی ٹی وی سٹی رپورٹرجواد اکبر)جنسی درندگی کے بعد قتل ہونے والی 10 سالہ بچی کا قاتل گرفتار،تین روز قبل معصوم بچی علیزہ جو قرآن مجید کی تعلیم حاصل کرنے کے لیے گھر سے نکلی تھی، اغوا اور زیادتی کے بعد قتل کر دی گئی۔

واقعہ تھانہ جھوک اُوترا کی حدود میں پیش آیا۔ مدعی کی شکایت پر پولیس نے فوری کارروائی کرتے ہوئے مقدمہ درج کر کے تحقیقات کا آغاز کیا۔ تفتیش کے دوران ایک مشکوک شخص توفیق ولد منیر جو کہ مدعی کا بھتیجا ہے کو حراست میں لیا گیا۔ دوران تفتیش ملزم نے اپنی کزن کے ساتھ زیادتی اور قتل کا اعتراف کیا۔ ملزم کی نشاندہی پر مقتولہ کی لاش دھان کی فصل سے برآمد کر لی گئی۔

فوری طور پر کرائم سین یونٹ اور PFSA ٹیم کو طلب کر کے تمام شواہد اکٹھے کیے گئے، جبکہ مقتولہ کا پوسٹ مارٹم بھی مکمل کیا گیا۔ ملزم کا ڈی این اے ٹیسٹ کیا گیا ہے تاکہ قانونی کارروائی میں مزید پیش رفت ہو سکے۔ پولیس نے ملزم کو عدالت میں پیش کر کے اس کا 5 دن کا جسمانی ریمانڈ حاصل کیا۔

یہ خبر بھی پڑھیں
ڈی جی خان:10 سالہ بچی اغوا اور جنسی درندگی کے بعد قتل

ڈی پی او ڈیرہ غازی خان نے کہا ہے کہ اس اندوہناک جرم میں ملوث مجرم کو سخت ترین سزا دلانے کے لیے تمام قانونی تقاضے پورے کیے جائیں گے۔ پولیس نے اس نازک اور چیلنجنگ کیس کو بروقت حل کر کے عوام کے اعتماد کو بحال کیا ہے۔

عوام سے اپیل کی جاتی ہے کہ وہ کسی بھی مشکوک سرگرمی کی فوری اطلاع دیں تاکہ ایسے جرائم کو روکا جا سکے اور ہمارا معاشرہ محفوظ بنایا جا سکے۔ پولیس عوام کی خدمت اور انصاف کی فراہمی کے لیے پرعزم ہے اور ایسے واقعات کو روکنے کے لیے ہر ممکن اقدامات اٹھائے جائیں گے۔